Tok Bilong God i Gat Laip
Rot Bilong i Stap Amamas Wantaim Famili
BAIBEL inap helpim famili bilong yu long i stap amamas. Yu save long dispela? Sapos olgeta wan wan insait long famili ol i bihainim tok bilong Baibel, dispela bai helpim ol. Sapos yu wanpela man marit, harim dispela tok em Baibel i givim long yu.
STAP GUT WANTAIM MERI BILONG YU
Baibel i tok: “Yupela man, yupela i mas sori long meri bilong yupela.” “Meri … bilong yu … yu ken amamas long en. … Nogut yu tingting oltaim long meri bilong narapela man.”—Efesas 5:25, 28; Provep 5:18-20.
Sapos man marit i bihainim dispela tok bilong Baibel, em wantaim meri bilong em tupela bai stap amamas. Na dispela bai kirapim meri tu long bihainim tok bilong Baibel. Na meri i mas mekim wanem?
LITIMAPIM NEM BILONG MAN BILONG YU
Baibel i tok: “Meri i mas litimapim nem bilong man bilong en.” (Efesas 5:33) Sampela meri i no save bihainim dispela tok, olsem na man bilong ol i bel nogut long ol. Meri i mas bihainim tok bilong man bilong em. Baibel i tok meri i mas helpim man bilong em, na sapos meri i bihainim dispela, orait man bilong em bai amamas long laikim em.—Jenesis 2:18.
Taim ol pikinini i kamap, papamama i mas mekim wanem long ol? Baibel i givim wanem tok long papamama?
GIVIM HAP TAIM LONG OL PIKININI NA STRETIM OL
Papamama i mas lusim hap taim long lainim pikinini long tok bilong Baibel. (Diuteronomi 11:19) Na ol i mas stretim pikinini tu. Baibel i tok: “Ol pikinini i save mekim ol kain longlong pasin. Tasol sapos yu givim kanda long ol, bai ol i lusim dispela pasin” Sapos papamama i sori long pikinini, ol bai paitim em bilong stretim em. Baibel i tok: “Sapos papa i laikim pikinini, orait em i strong long stretim em.”—Provep 22:15; 13:24; 23:13, 14; Efesas 6:4.
Sapos pikinini i bihainim gutpela pasin, dispela bai kamapim amamas insait long famili. Baibel i tok wanem long dispela?
BIHAINIM TOK BILONG PAPAMAMA BILONG YU
Baibel i tok: “Yupela pikinini, yupela mas bihainim tok bilong papamama long nem bilong Bikpela. Dispela pasin i stret.” Em i bikpela samting, long wanem, Baibel i tok: “Sapos man i sakim tok bilong papamama bilong en, na i tok bilas long tupela, orait long taim em i dai bai ol i no planim bodi bilong en. Bai ol kotkot na ol bikpela taragau i kam na kamautim ai bilong en na kaikai bodi bilong en.” Olsem na yupela pikinini i mas bihainim tok bilong papamama, nogut God i gat tok long yu.—Efesas 6:1; Provep 30:17.
Tru yu laik bai famili bilong yu i ken i stap amamas? Em inap. Ol samting ol i mas mekim i no hait; em i stap ples klia. God i kolim pinis ol samting ol i mas mekim. Sapos ol wan wan bilong famili ol i lainim na bihainim tok bilong God, amamas bai stap insait long famili.