Husat Tru i Bosim Dispela Graun?

Planti bai tok, God i bosim dispela graun. Tasol Baibel i no tok, Krais Jisas o Papa bilong em i bosim dispela graun. Jisas i bin tok: “Nau bai [God] i rausim dispela hetman i save bosim dispela graun.” Na Jisas i tok moa: “Dispela hetman i save bosim dispela graun em i kam nau. Em i no gat strong bilong mekim wanpela samting long mi.”​—⁠Jon 12:31; 14:30; 16:⁠11.

Olsem na dispela hetman i bosim dispela graun em i birua long Jisas. Em i husat tru?

Ol Hevi i Kamap i Givim Save Long Yumi

Long bipo yet na i kam inap nau, planti pen na hevi i bin painim ol man. Olsem na sampela man i gat wankain tingting olsem wanpela man bilong raitim nius bipo (em David Lawrence), em i bin tok: “ ‘Bel isi long graun’​—⁠klostu olgeta man i laikim dispela samting. ‘Belgut long ol man’​—⁠klostu olgeta man i gat dispela kain tingting long narapela narapela. Orait, sapos ol man i gat laik long i stap bel isi wantaim, bilong wanem ol kantri i tok long kirapim pait?”

Dispela samting i narapela kain, a? Ol man i gat laik long i stap bel isi wantaim, tasol planti taim ol i birua na narapela i kilim i dai narapela​—⁠na ol i mekim long narapela kain pasin i nogut moa yet. Ol i bin pasim ol man insait long rum na pulimapim ges nogut long rum na ol i dai; ol i kalabusim ol man long ol traipela banis kalabus nogut; ol i tromoi ol kain kain bom nogut i save kukim skin bilong man, na ol i mekim ol narapela samting nogut tru bilong givim bikpela pen long ol man na bagarapim ol.

Tasol yumi ol man i gat laik long i stap bel isi wantaim na i stap amamas, a? Orait, ol dispela pasin nogut tru ol man i mekim long narapela man, yu ting ol i mekim long tingting bilong ol yet? Wanpela samting i save kirapim ol man long mekim ol kain pasin nogut tru olsem? Yu ting i gat wanpela spirit nogut i stap na em i gat strong long kirapim ol man long bagarapim nogut tru ol narapela man?

Ol Hetman Bilong Dispela Graun

Baibel i kamapim klia olsem i gat wanpela man i stap, em yumi no inap lukim, na em i bin bosim ol man na ol lain man tu. Baibel i tok: “Dispela graun olgeta em i stap aninit long strong bilong Satan.” Baibel i kamapim gen nem bilong dispela man, olsem: “Satan . . . em i man bilong giamanim olgeta manmeri bilong graun.”​—⁠1 Jon 5:19; KTH 12:⁠9.

Wanpela taim ‘Satan i traim Jisas.’ Jisas i save, Satan em i hetman bilong dispela graun. Baibel i stori long samting i bin kamap, olsem: “Satan i kisim Jisas gen i go long wanpela maunten i antap moa. Na Satan i soim em olgeta strongpela kantri bilong dispela graun wantaim ol gutpela samting bilong ol. Na em i tokim Jisas olsem, ‘Sapos yu brukim skru na lotu long mi, orait bai mi givim yu dispela olgeta samting.’ Na Jisas i tokim em, ‘Satan, yu klia.’ ”​—⁠Matyu 4:​1, 8-10.

Bilong traim Jisas, Satan i tok long givim “olgeta strongpela kantri bilong dispela graun” long Jisas. Tasol sapos Satan i no bosim tru ol dispela kantri o gavman bilong graun, orait, taim em i tok long givim long Jisas, dispela i no olsem wanpela traim tru bilong Jisas, a? Na sapos Satan i no bosim ol dispela gavman, Jisas bai tokaut long dispela samting. Tasol em i no bin mekim olsem, long wanem, em i save, Satan i bosim ol. Olsem na Satan yet em i hetman bilong dispela graun! Na Baibel i kolim em olsem “god bilong dispela graun.” (2 Korin 4:⁠4) Tasol olsem wanem dispela man nogut i kamap hetman bilong dispela graun?

Pastaim em i wanpela ensel em God i bin kamapim, tasol bihain em i mangalim bikpela namba bilong God. I stret God i bosim ol man, tasol dispela ensel i tok, i no stret long God i mekim olsem. Olsem na long rot bilong wanpela snek em i giamanim namba wan meri, em Iv, na nau em inap kirapim Iv na man bilong em Adam long sakim tok bilong God na bihainim tok bilong em. (Stat 3:​1-6; 2 Korin 11:⁠3) Na Satan i tok em inap pulim olgeta pikinini em Adam tupela Iv bai kamapim, na ol bai lusim God. Olsem na God i givim hap taim long Satan bilong truim tok bilong em. Tasol Satan i no bin truim dispela tok.​—⁠Jop 1:​6-12; 2:​1-10.

Na i no Satan tasol i bosim graun. Em i bin pulim sampela ensel na ol tu i bikhet long God. Ol i kamap spirit nogut na ol i wok wantaim Satan. Baibel i makim dispela lain taim em i tokim ol Kristen: “Sanap strong na sakim olgeta kain pasin bilong trik na giaman Satan i save hait na mekim. . . . Yumi no save pait long ol manmeri. Nogat. Yumi pait long . . . ol gavman na ol kain kain samting i gat strong, ol i save bosim graun . . . Yumi pait long olgeta spirit nogut i stap antap.”​—⁠Efesus 6:​11, 12.

Sakim Ol Spirit Nogut

Ol dispela hetman nogut bilong graun em yumi no inap lukim ol, ol i strong long paulim olgeta manmeri na bai ol i no lotu moa long God. Wanpela rot bilong ol, em ol i kirapim bilip olsem taim man i dai, em i no dai tru​—⁠em i stap laip yet. Tasol Baibel i tok klia olsem ol man i dai pinis ol i no gat tingting moa⁠​—⁠​tingting bilong ol i pinis. (Stat 2:17; 3:19; Esekiel 18:4; Song 146:​3, 4; Saveman 9:​5, 10) Olsem na sampela taim wanpela spirit nogut bai makim nek bilong wanpela man i dai pinis na toktok wantaim ol wanblut o poroman bilong em long rot bilong wanpela wailis bilong ol spirit nogut, o ol i harim “nek” bilong wanpela spirit. Dispela “nek” i giamanim ol man na bai ol i ting em dispela man i dai pinis, tasol nogat; em wanpela spirit nogut!

Olsem na sapos yu harim wanpela “nek” olsem, yu no ken larim em i giamanim yu. Sakim tok bilong en na mekim tok olsem Jisas i bin mekim, em i tok: “Satan, yu klia.” (Matyu 4:10; Jems 4:⁠7) Nogut yu laik save long ol spirit na yu go insait long wok bilong ol spirit nogut. God i givim strongpela toksave long ol man i lotuim em ol i no ken insait long dispela wok. Baibel i tok, yumi no ken ‘mekim olkain pasin bilong glasman, na pasin tambaran na pasin sanguma na wokim posin na mekim marila na toktok wantaim ol man i dai pinis.’​—⁠Lo 18:​10-12; Galesia 5:​19-21; KTH 21:⁠8.

Taim man i insait long wok bilong ol spirit nogut, ol i save bosim em. Olsem na yu mas sakim dispela wok nogut, maski em i olsem samting bilong pilai na amamas. Sampela wok olsem, em lukluk long bal glas, o mekim wok long plang wija, o lukim ol mak bilong han, o lukluk long ol sta, na olkain wok marila samting. Ol spirit nogut i save go insait long sampela haus na mekim ol pairap na ol samting i narapela kain tru.

Na tu, ol spirit nogut i save yumi sinman tasol, na bilong paulim yumi ol i kirapim ol man long wokim ol buk, na piksa wokabaut nogut, na ol stori bilong televisen long pasin pamuk na ol narapela kain pasin sem. Ol spirit nogut i save, sapos yumi no rausim kwik ol tingting nogut, dispela bai kirapim yumi long mekim pasin nogut​—⁠olsem ol spirit nogut yet i mekim.​—⁠Stat 6:​1, 2; 1 Tesalonaika 4:​3-8; Jut 6.

Tru, planti man bai lap taim yumi tok, ol spirit nogut i bosim dispela graun. Tasol yumi no ken kirap nogut long dispela, long wanem, Baibel i tok: “Satan yet i save senisim pasin bilong en na kamap olsem ensel bilong lait.” (2 Korin 11:14) Na Satan i bin giamanim ol man na ol i ting em wantaim ol spirit nogut bilong em i no i stap tru. Tasol yu no ken larim em i giamanim yu! Satan na ol spirit nogut ol i stap tru, na oltaim yu mas wok long sakim ol.​—⁠1 Pita 5:​8, 9.

Tasol yumi ken amamas, long wanem, klostu nau na Satan wantaim ol dispela lain nogut bilong em i no ken i stap moa! Baibel i tok: “Olgeta pasin bilong dispela graun [wantaim ol spirit nogut i bosim graun] . . . bai i pinis,” tasol “man i bihainim tok bilong God, em bai i stap oltaim.” (1 Jon 2:⁠17) Em gutpela tru! Ol dispela spirit nogut i no ken i stap moa bilong paulim yumi. Olsem na yumi mas i stap insait long dispela lain ol i mekim wok bilong God na bihain ol i ken i stap oltaim long nupela stretpela taim God bai kamapim long graun.​—⁠Song 37:​9-11, 29; 2 Pita 3:13; KTH 21:​3, 4.

[Piksa long pes 4]

Yu ting Satan inap givim olgeta dispela gavman bilong graun long Jisas sapos ol i no bilong em?