Stadi 11
Ol Bilip na Ol Kastam God i No Laikim
Wanem kain bilip na kastam em i no stret? (1)
I stret ol Kristen i bilip long God Triwan o nogat? (2)
Bilong wanem ol trupela Kristen i no save selebretim Krismas, Ista, na ol betde? (3, 4)
Ol man i dai pinis inap nogutim ol man i stap laip? (5)
Jisas i bin dai long diwai kros? (6)
Em i bikpela samting long mekim pasin God i laikim? (7)
1. Sampela bilip na kastam ol man i bihainim i gutpela. Tasol God i no orait long ol sapos ol lotu giaman i as bilong en o sapos ol i no stret wantaim tok bilong Baibel.—Matyu 15:6.
2. God Triwan: Olsem wanem? Jehova i wanpela God Triwan—olsem tripela god insait long wanpela God? Nogat! Jehova, em Papa, em ‘wanpela tasol em i God tru.’ (Jon 17:3; Mak 12:29) Jisas em i namba wan Pikinini bilong Em, na em i stap aninit long God. (1 Korin 11:3) Papa em i bikpela na i winim Pikinini. (Jon 14:28) Holi spirit em i no wanpela man; em i strong bilong God.—Aposel 2:18.
3. Krismas na Ista: Jisas i no bon long Disemba 25. Em i bon long Oktoba 1 samting, long taim ol wasman wantaim ol sipsip bilong ol i stap ausait long nait. (Luk 2:8-12) Jisas i no tokim ol Kristen long selebretim de mama i bin karim em. Nogat. Em i tokim ol disaipel long tingim indai bilong em. (Luk 22:19, 20) Ol lotu giaman bilong bipo i as bilong Krismas na ol pasin bilong mekim Krismas. Na i wankain long ol pasin bilong mekim wok long ol kiau na rabit long Ista. Ol Kristen bilong pastaim i no bin selebretim Krismas o Ista, na ol trupela Kristen long nau tu i no mekim olsem.
4. Ol Betde: Tupela taim tasol Baibel i stori long pati bilong betde, na ol man i no lotuim Jehova ol i bin mekim. (Stat 40:20-22; Mak 6:21, 22, 24-27) Ol Kristen bilong pastaim i no selebretim ol betde. Ol lotu giaman bilong bipo i as bilong pasin bilong selebretim betde. Ol trupela Kristen i save givim presen na amamas wantaim long ol narapela taim bilong yia.
5. Pret Long Ol Man i Dai Pinis: Ol man i dai pinis i no inap mekim o pilim wanpela samting. Yumi no inap helpim ol, na ol i no inap mekim nogut long yumi. (Song 146:4; Saveman 9:5, 10) Taim man i dai i no gat samting i lusim bodi na i stap laip yet. Tasol sampela taim ol ensel nogut, olsem ol spirit nogut, ol i giamanim ol man olsem ol i spirit, o tewel, bilong man i dai pinis. Ol kastam em pasin bilong pret o lotu long daiman i as bilong en, ol i no stret.—Aisaia 8:19.
6. Diwai Kros: Jisas i no dai long diwai kros. Em i dai long wanpela pos. Wanpela tok Grik em planti Baibel i bin tanim olsem “diwai kros,” o “kruse,” i makim tasol wanpela hap diwai. Ol lotu giaman bilong bipo i as bilong mak olsem kruse. Ol Kristen bilong pastaim i no bin mekim wok long kruse o lotu long en. Olsem na yu ting i stret yumi mekim wok long kruse taim yumi lotuim God?—Lo 7:26; 1 Korin 10:14.
7. Ating i hatwok tru long lusim sampela bilong ol dispela bilip na kastam. Ating ol wanblut na pren bilong yu bai toktok strong long yu no ken senisim bilip bilong yu. Tasol yumi mas mekim pasin God i laikim, em bikpela samting moa, winim pasin bilong stap gut long ai bilong ol man.—Sindaun 29:25; Matyu 10:36, 37.
[Piksa long pes 22]
God em i no wanpela God Triwan
[Piksa long pes 23]
Krismas na Ista —ol lotu giaman bilong bipo i as bilong en
[Piksa long pes 23]
I no gat as na yu lotu long ol man i dai pinis o pret long ol