Stadi 15
Helpim Ol Narapela Long Bihainim Laik Bilong God
Ol save yu kisim pinis, bilong wanem i gutpela yu kamapim long ol man? (1)
Yu ken toktok wantaim husat long gutnius? (2)
Pasin bilong yu inap mekim wanem long ol narapela? (2)
Yu mas mekim wanem na bai yu ken autim tok wantaim kongrigesen? (3)
1. Nau yu lain pinis long planti gutpela tok bilong Baibel. Dispela save i mas helpim yu long bihainim pasin Kristen. (Efesus 4:22-24) Dispela save em i bikpela samting bilong helpim yu long kisim laip oltaim. (Jon 17:3) Tasol ol narapela tu i mas harim gutnius bambai ol tu inap kisim laip. Olgeta Kristen tru i mas autim tok long ol narapela man. Em i lo bilong God.—Rom 10:10; 1 Korin 9:16; 1 Timoti 4:16.
2. Yu ken kirap long mekim wok autim tok olsem: Tokim ol man i stap klostu long yu long ol gutpela samting yu lainim. Autim tok long ol wanfamili, ol pren, ol wanskul na wanwok. Mekim long gutpela pasin na no ken les kwik. (2 Timoti 2:24, 25) Tingim: Planti taim ol man i tingim pasin man i mekim, tasol ol i no tingim tumas tok em i mekim. Olsem na pasin yu mekim em inap kirapim ol man long harim gut tok yu autim long ol.—Matyu 5:16; 1 Pita 3:1, 2, 16.
3. Ating bihain yu inap winim ol mak bambai yu ken autim tok wantaim kongrigesen bilong ol Witnes Bilong Jehova i stap long hap bilong yu. Dispela em i bikpela samting bilong helpim yu long kamap strong moa. (Matyu 24:14) Bai yu kisim bikpela amamas sapos yu inap helpim narapela man long kamap wanpela wokman bilong Jehova na kisim laip oltaim!—1 Tesalonaika 2:19, 20.