Kingdom Nius Namba 35
Olsem Wanem? Bihain Bai Olgeta Man i Laikim Tru Ol Narapela?
Ol Man i Lusim Pinis Pasin Bilong Laikim Tru Ol Narapela
PLANTI milion manmeri i bel hevi na ol i pilim olsem ol i lus pinis na i no gat wanpela bilong helpim ol. Wanpela bisnismeri i tok: ‘Wanpela taim long apinun, wanpela meri wanpis i save sindaun klostu long mi em i paitim dua na em i tok, em i pilim olsem em i stap wanpis. Long gutpela pasin mi tokim em stret olsem mi gat planti wok. Em i tok sori long em i bin kam katim wok bilong mi na em i go.’
Sori tru, long dispela nait yet meri wanpis i kilim i dai skin bilong em yet. Bihain dispela bisnismeri i tok, dispela i bin ‘skulim em long wanpela bikpela samting.’
Planti taim ol bikpela hevi i save kamap, long wanem, ol man i no laikim tru ol narapela man. Long ol pait i bin kamap namel long ol narapela narapela lain long Bosnia na Hetsagovina, bipo em i hap bilong Yugoslavia, winim wan milion manmeri ol i mas ranawe na lusim haus bilong ol, na planti tausen tausen i dai. Husat i bin mekim ol dispela pasin nogut long ol? Wanpela yangpela meri em ol i bin rausim em long ples bilong em, em i tok: “Ol man i sindaun klostu long mipela ol i bin mekim. Mipela i bin save gut long ol.”
Long Ruanda ol i bin kilim i dai planti handet tausen manmeri—planti bilong ol i bagarap long han bilong ol man i sindaun klostu long ol. Nius The New York Times i tok: “Ol Hutu na Tutsi [i bin sindaun] wantaim, na narapela i maritim narapela, na ol i no tingim o save long husat i Hutu o husat i Tutsi. Tasol i olsem wantu tasol senis i kamap na narapela i kirap kilim i dai narapela.”
Na long Israel, ol Juda na Arap i sindaun wantaim, tasol planti bilong ol i birua birua. Wankain samting tu i kamap namel long ol Katolik na Talatala long Aialan, na long planti manmeri moa long ol narapela kantri. I no gat narapela taim bipo na ol man i bin lusim pasin bilong laikim ol narapela olsem long nau.
Bilong Wanem Ol Man i Lusim Pasin Bilong Laikim Tru Ol Narapela?
Man bilong wokim yumi em i bekim dispela askim. Baibel i kolim dispela taim yumi stap long en olsem “taim bilong las de,” na Baibel i tok profet olsem long dispela taim ol man bai i no save long “pasin bilong i stap pren bilong ol arapela.” Baibel i tokaut olsem, taim pasin bilong dispela graun i laik pinis em bai ‘taim bilong planti hevi nogut tru,’ na Krais Jisas i tingim dispela taim na em i tok profet olsem “planti man bai i lusim pasin bilong laikim ol arapela.”—2 Timoti 3:1-5; Matyu 24:3, 12.
Long nau ol man i lusim pasin bilong laikim tru ol narapela man, na dispela em i wanpela mak i kamapim klia olsem yumi stap long taim bilong las de. Tasol gutpela tru, em i makim tu olsem klostu nau ol man i givim baksait long God ol bai pinis, na nupela stretpela taim bai kamap em pasin sori i bosim olgeta samting ol man i mekim.—Matyu 24:3-14; 2 Pita 2:5; 3:7, 13.
Tasol olsem wanem? I gat as na yumi ken bilip tru olsem dispela senis bai kamap—olsem olgeta man bai lain long laikim tru ol narapela na stap gut wantaim?
Pasin Bilong Laikim Tru Ol Narapela—I Kamap Tru Pinis
WANPELA saveman bilong lo i bin askim Jisas olsem: ‘Wantok bilong mi, em i husat tru?’ Ating em i ting Jisas bai tok, ‘Em wanples Juda bilong yu.’ Tasol long stori bilong wanpela man Samaria, Jisas i kamapim olsem ol man bilong ol narapela lain tu ol i wantok bilong yumi.—Luk 10:29-37; Jon 4:7-9.
Jisas i kamapim klia olsem yumi mas laikim tru God pastaim, na laikim ol narapela man tu, na dispela i mas bosim olgeta samting yumi mekim. (Matyu 22:34-40) Tasol olsem wanem? I gat wanpela lain em ol i bin laikim tru ol narapela man? Ol Kristen bilong pastaim i bin mekim olsem! Ol i gat nem olsem ol man i laikim tru ol narapela man.—Jon 13:34, 35.
Olsem wanem long nau? I gat sampela man em ol i bihainim pasin bilong Krais long laikim ol narapela? Buk Encyclopedia Canadiana i tok: “Dispela wok ol Witnes Bilong Jehova i mekim i kamapim bek wok Kristen bilong pastaim em Jisas na ol disaipel bilong em i bin mekim . . . Olgeta i stap olsem brata brata.”
Wanem insait bilong dispela tok? Em olsem: Ol Witnes Bilong Jehova i no save larim wanpela samting—skin, kantri, o lain—i kirapim ol long birua long ol man i stap long hap bilong ol. Na ol i no ken kilim i dai wanpela man, long wanem, i olsem ol i paitim pinis ol bainat bilong ol i kamap olsem ol ain bilong brukim graun, na ol spia bilong ol i kamap olsem ol naip. (Aisaia 2:4) Ol Witnes i gat nem olsem ol i man bilong go pas long helpim ol narapela man.—Galesia 6:10.
Long dispela as edita bilong nius Sacramento Union bilong Kalifonia i bin raitim wanpela stori i tok: “Tru tumas, sapos olgeta man long graun i bihainim bilip bilong ol Witnes Bilong Jehova, pasin bilong kilim man i dai na pasin birua bai pinis, na pasin sori bai kamap strong.” Long Hangari, wanpela man i raitim stori long nius Ring na em i tok: “Mi ting olsem, sapos ol Witnes Bilong Jehova tasol i stap long graun, olgeta pait bai pinis, na ol polis bai i gat wok tasol long soim rot long ol ka na wokim ol paspot.”
Tasol yumi save, bilong olgeta manmeri i ken laikim tru narapela narapela, bikpela senis tru i mas kamap. Dispela senis bai kamap olsem wanem? (Lukim pes long baksait.)
Taim Olgeta Man Bai Laikim Tru Ol Narapela
WANPELA beten Krais Jisas i bin lainim ol man long en i kamapim klia olsem klostu nau bikpela senis tru bai kamap. Long bikpela tok bilong em long maunten, Jisas i lainim yumi long beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”—Matyu 6:10.
Kingdom bilong God em i wanem samting? Em wanpela gavman tru, na em i stap long heven. Olsem na Baibel i tok em i “Kingdom bilong heven.” Jisas, em “King bilong kamapim gutpela sindaun na bel isi,” em i bin kisim wok long Papa bilong em long bosim ol man.—Matyu 10:7; Aisaia 9:6, 7; Song 72:1-8.
Taim Kingdom bilong God i kam, wanem samting bai kamap long dispela graun em pasin birua i pulap long en? “Dispela kingdom,” bai ‘daunim na bagarapim’ olgeta gavman nogut bilong dispela graun. (Daniel 2:44) Baibel i tok: “Dispela graun bai i pinis, . . . tasol man i bihainim tok bilong God, em bai i stap oltaim.”—1 Jon 2:17.
Baibel i stori long nupela taim God bai kamapim, olsem: “Ol stretpela man bai i kisim graun God i givim ol, na bai ol i stap oltaim long en.” (Song 37:9-11, 29; Sindaun 2:21, 22) Em nau! Gutpela taim tru bai kamap! “Ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:4) Na narapela gutpela samting bai kamap em ol manmeri i dai pinis, ol bai stap laip gen, na graun olgeta bai kamap wanpela paradais tru.—Aisaia 11:6-9; 35:1, 2; Luk 23:43, NW; Aposel 24:15.
Sapos yumi laik stap long dispela nupela taim God bai kamapim, yumi mas laikim ol narapela man, olsem God i skulim yumi long mekim. (1 Tesalonaika 4:9) Wanpela sumatin bilong Baibel long hap bilong Is em i tok: “Mi wetim tru dispela taim Baibel i promis long en, taim olgeta man i lain pinis long laikim tru ol narapela.” Na yumi ken bilip tru olsem God bai truim ol tok promis bilong em! Em i tok: “Mi tok pinis long mekim dispela ol samting, na bai mi mekim ol i kamap olsem mi tok.”—Aisaia 46:11.
Tasol bilong kisim ol blesing em Kingdom bilong God bai kamapim, yu mas kisim save long ol tok bilong Baibel. Long olgeta hap, planti milion manmeri em ol i gat stretpela bel ol i wok long mekim olsem. (Jon 17:3) Wanpela liklik buk i gat 32 pes, em God i Laik Yumi Mas Mekim Wanem?, em bai helpim yu. Yu ken kisim wanpela sapos yu raitim nem na atres bilong yu daunbilo long pes i kam paslain long dispela, na salim i go long atres em i stret long yu.
□ Mi laik kisim liklik buk God i Laik Yumi Mas Mekim Wanem? Mi putim ol stem inap 40 toea insait long pas, olsem pe bilong dispela liklik buk.
□ Mi laik bai wanpela i ken kam long haus bilong mi na mekim Baibel-stadi wantaim mi, no gat pe.
[Piksa Kredit Lain long pes 2]
Man i sut long gan na bung bilong planim man long Bosnia: Reuters/Corbis-Bettmann