Olsem Wanem Yumi Ken Soim Pasin Bilong Laikim Tru Ol Narapela?

“Yu mas laikim ol wantok [“narapela man,” NW] olsem yu laikim yu yet.”​—MATYU 22:39.

1. Olsem wanem yumi soim olsem yumi laikim tru God?

JEHOVA i laik bai ol man i lotuim em ol i mas mekim wanem? Jisas i mekim sampela tok tasol bilong bekim dispela askim, tasol ol dispela tok i gat bikpela insait bilong en. Em i tok nambawan bikpela lo, em yumi mas laikim tru Jehova long bel, tingting, na strong olgeta bilong yumi. (Matyu 22:37; Mak 12:30) Olsem yumi lukim long stadi i kamap paslain long dispela, bilong soim olsem yumi laikim tru God yumi mas bihainim ol tok na lo bilong em, long wanem, em i laikim tru yumi. Ol man i laikim tru God ol i ting pasin bilong bihainim laik bilong God i no putim hevi long ol, nogat, dispela i givim amamas long ol.​—Song 40:8; 1 Jon 5:​2, 3.

2, 3. Bilong wanem yumi mas tingim dispela lo i tok long yumi mas laikim tru ol narapela man? Dispela i kamapim wanem ol askim?

² Jisas i tok nambatu bikpela lo i poroman wantaim nambawan bikpela lo, em i tok: “Yu mas laikim ol wantok [“narapela man,” NW] olsem yu laikim yu yet.” (Matyu 22:39) Nau bai yumi skelim dispela lo, na i gat as tru na yumi mas mekim olsem. Long dispela taim yumi stap long en, pasin laikim bilong ol man i senis na i go narapela kain na ol i save laikim ol yet tasol. Holi spirit i kirapim aposel Pol long raitim ol tok long mak bilong “taim bilong las de,” na em i tok ol man bai i no laikim ol narapela man, nogat, ol bai laikim ol yet tasol, mani, na ol amamas bilong graun. Planti bai “i no save long pasin bilong i stap pren bilong ol arapela,” o olsem wanpela Baibel i tanim dispela tok, ol bai “i no gat pasin bilong laikim narapela insait long famili.” (2 Timoti 3:​1-4) Jisas Krais i tok profet: “Man bai i kotim brata bilong en, . . . ol papa bai i mekim wankain pasin long ol pikinini bilong ol. Na ol pikinini bai i birua long papamama.” “Na planti man bai i lusim pasin bilong laikim ol arapela.”​—Matyu 10:21; 24:12.

³ Tasol Jisas i no tok olsem olgeta man bai lusim pasin bilong laikim ol arapela. Kirap long bipo yet na i go inap long olgeta taim bihain, bai i gat ol manmeri husat i kamapim dispela kain pasin laikim Jehova i laik bai ol man i mas soim long em na i stret ol i mekim olsem. Ol man i laikim tru Jehova ol i wok strong long kisim wankain tingting olsem Em long ol narapela man. Tasol husat ol dispela narapela man em yumi mas laikim tru? Olsem wanem yumi ken soim pasin bilong laikim tru ol narapela man? Baibel inap helpim yumi long bekim ol dispela bikpela askim.

Ol “Narapela Man” i Makim Husat?

4. Olsem Wok Pris sapta 19 i tok, ol Juda i mas laikim tru husat?

⁴ Taim Jisas i tokim ol Farisi olsem nambatu bikpela lo i tok ol i mas laikim ol narapela man olsem ol i laikim ol yet, em i toktok long wanpela lo stret God i bin givim long lain Israel. Dispela lo i stap long Wok Pris 19:18. Long dispela sapta, Baibel i tok ol Juda i no ken tingim ol wanlain Israel tasol, ol i mas tingim tu ol narapela man. Ves 34 i tok: “Yupela i mas mekim gutpela pasin long ol [narapela lain], olsem yupela i save mekim long ol wanlain bilong yupela, ol Israel. Na yupela i mas laikim ol tru, olsem yupela i save laikim yupela yet. Yupela i bin i stap long Isip bipo, olsem na yupela i save long pasin bilong man i lusim as ples na i stap long narapela kantri.” Olsem na ol i mas laikim tru ol man i no bilong lain Juda, na moa yet ol man i kirap bihainim lotu Juda.

5. Ol Juda i ting olsem wanem long pasin bilong laikim ol narapela?

⁵ Tasol ol bikman bilong lotu Juda long taim bilong Jisas i gat narapela tingting. Sampela i tok, dispela tok “pren” na “narapela man” i makim ol Juda tasol. Ol i nolaik tru long ol man i no bilong lain Juda. Ol dispela tisa i tok ol man i lotuim God ol i mas ting olsem ol man i no save lotuim God, ol i samting nating. Wanpela buk i tok: “Taim ol bikman i gat kain tingting olsem, pasin bilong nolaik tru long narapela i go bikpela. I gat planti samting bilong kirapim ol man long mekim olsem.”

6. Jisas i kamapim wanem tupela bikpela tok taim em i toktok long pasin bilong laikim ol narapela man?

⁶ Long Bikpela Tok Long Maunten, Jisas i toktok long dispela samting na i kamapim klia yumi mas laikim husat. Em i tok: “Yupela i harim pinis bipo ol i bin tok olsem, ‘Yu mas laikim tru ol wantok [“narapela man,” NW] na yu mas bel nogut long ol birua bilong yu.’ Tasol mi tokim yupela olsem, yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela. Olsem bai yupela i stap pikinini bilong Papa bilong yupela em i stap long heven. Em i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu.” (Matyu 5:​43-45) Jisas i kamapim tupela bikpela tok. Namba 1, Jehova i save givim planti samting na mekim gutpela pasin long ol gutpela man na ol man nogut. Namba 2, yumi mas bihainim pasin bilong Em.

7. Yumi lainim wanem samting long tok piksa bilong gutpela man Samaria?

⁷ Long narapela taim, wanpela Juda husat i save gut long Lo, em i askim Jisas: “Taim lo i tok long wantok bilong mi [“narapela man,” NW], em i tok long husat tru?” Bilong bekim dispela askim, Jisas i kamapim tok piksa long wanpela man Samaria husat i bungim wanpela man Juda em ol stilman i bin paitim em na stilim ol samting bilong em. Maski ol Juda i no laikim tru ol Samaria, dispela man Samaria i pasim ol sua bilong man Juda na kisim em i go long wanpela haus pasindia we em i ken kamap orait gen. Dispela i lainim yumi long wanem samting? Yumi mas laikim olgeta man, yumi no ken laikim tasol ol wanskin, wankantri, o wanlotu.​—Luk 10:​25, 29, 30, 33-37.

Olsem Wanem Yumi Ken Soim Pasin Bilong Laikim Tru Ol Narapela?

8. Wok Pris sapta 19 i tok ol Israel i mas soim pasin laikim olsem wanem?

⁸ Pasin bilong laikim narapela man, wankain olsem pasin bilong laikim God, em i no wanpela samting yumi pilim tasol long bel, nogat, yumi mas mekim sampela samting tu. Em i gutpela long skelim sampela ves i stap klostu long dispela lo i stap long Wok Pris 19, olsem lain bilong God i mas laikim ol narapela man olsem ol i save laikim ol yet. Ol dispela ves i tok ol Israel i mas larim ol rabisman na ol man bilong narapela lain i kisim sampela kaikai long gaden bilong ol. Ol man i no ken stil na giamanim narapela man. Taim ol i harim kot, ol Israel i mas mekim wankain pasin long olgeta man. Ol i mas stretim narapela man taim i gat wok long mekim olsem, tasol lo i tok: ‘Yu no ken kros oltaim long narapela man long tingting bilong yu.’ Ol dispela lo wantaim planti arapela lo i stap insait long dispela wanpela tok: “Yu mas laikim tru ol wantok [“narapela man,” NW] olsem yu laikim yu yet.”​—Wok Pris 19:​9-11, 15, 17, 18.

9. Bilong wanem Jehova i tok ol Israel i mas stap longwe long ol narapela lain?

⁹ Ol Israel i mas laikim tru ol narapela man, tasol ol i mas stap longwe long ol man i lotuim ol god giaman. Jehova i tok lukaut long ol hevi i save kamap long rot bilong ol poroman nogut. Olsem: Taim Jehova i toktok long ol lain em ol Israel i mas rausim long graun bilong ol, em i tok: “Yupela i no ken senisim meri wantaim ol, long wanem, ol bai i pulim ol pikinini bilong yupela i go longwe long Bikpela na bai ol i lotu long ol giaman god. Sapos ol pikinini i mekim olsem, orait Bikpela bai i belhat long yupela.”​—Lo 7:​3, 4.

10. Yumi mas was gut long wanem samting?

¹⁰ Na olsem tasol, ol Kristen i was gut, nogut ol i kirap poromanim ol lain husat inap bagarapim bilip bilong ol. (1 Korin 15:33) Baibel i tokim yumi: “Ol haiden ol i narakain, olsem na yupela i no ken pas wantaim ol na wok bung wantaim ol,” olsem ol man i no insait long kongrigesen Kristen. (2 Korin 6:14) Na tu, ol Kristen i mas maritim tasol “man i bilip long Bikpela.” (1 Korin 7:39) Tasol yumi no ken ting ol man i no bilip long Jehova, ol i samting nating tasol. Nogat. Krais i dai bilong helpim ol sinman, na planti man em bipo ol i bin mekim ol pasin nogut, ol i senisim pasin bilong ol na kamap wanbel wantaim God.​—Rom 5:8; 1 Korin 6:​9-11.

11. Wanem nambawan gutpela rot bilong soim pasin laikim long ol man i no lotuim Jehova? Bilong wanem dispela rot i nambawan?

¹¹ Nambawan gutpela rot bilong soim pasin laikim long ol man i no lotuim God, em yumi mas bihainim pasin bilong Jehova yet. Em i nolaik tru long pasin nogut, tasol em i marimari long olgeta man na i opim rot long ol i ken lusim pasin nogut bilong ol na kisim laip i stap gut oltaim. (Esekiel 18:23) Jehova “i laik bai olgeta man i mas tanim bel.” (2 Pita 3:9) Na em i laik bai ‘olgeta manmeri i ken save long as bilong tok tru.’ (1 Timoti 2:4) Long dispela as Jisas i tokim lain bilong em long autim tok na skulim ol man na “mekim olgeta lain manmeri i kamap disaipel.” (Matyu 28:​19, 20) Taim yumi insait long dispela wok, yumi kamapim pasin bilong laikim God na ol narapela man, yes, ol birua bilong yumi tu!

Laikim Tru Ol Brata Kristen

12. Aposel Jon i tok wanem long pasin bilong laikim ol brata bilong yumi?

¹² Aposel Pol i tok: ‘Yumi mas mekim gutpela pasin long ol arapela. Na yumi mas strong tru long mekim gutpela pasin long ol arapela manmeri i bilip long Bikpela.’ (Galesia 6:10) Yumi ol Kristen i mas laikim tru ol wanbilip​—ol bratasista Kristen bilong yumi. Dispela pasin laikim i bikpela samting olsem wanem? Aposel Jon i kamapim klia dispela samting na i tok: “Man i no laikim tru brata bilong en na i bel nogut long em, i olsem em i kilim man i dai. . . . Sapos wanpela man i tok, ‘Mi laikim tru God,’ tasol em i no laikim wanpela bilong ol arapela manmeri bilong God, orait dispela man em i man bilong giaman. I no gat wanpela man i bin lukim God. Olsem na man i no save laikim ol arapela, em ol manmeri em i lukim pinis, em i no inap laikim God em i no bin lukim.” (1 Jon 3:15; 4:20) Em ol strongpela tok. Jisas Krais i tok Satan em i “man bilong kilim ol man i dai” na “man bilong tok giaman.” (Jon 8:44) Yumi no laik bai wanpela i tok yumi dispela kain man!

13. Long wanem ol rot yumi ken soim olsem yumi laikim ol wanbilip?

¹³ God i skulim ol Kristen tru ‘long pasin bilong givim bel bilong ol long ol manmeri bilong God.’ (1 Tesalonaika 4:9) Yumi “no ken laikim ol brata long tok tasol o long maus tasol. Nogat. Yumi mas givim bel bilong yumi tru long ol na mekim gutpela pasin long ol.” (1 Jon 3:18) Yumi mas laikim tru ol brata, yumi no ken “giaman” long mekim olsem. (Rom 12:9) Pasin laikim i kirapim yumi long mekim gutpela pasin, pasin sori, na lusim rong. Em i no kirapim yumi long kros kwik, jeles, hambak, mekim pasin antap, o tingim yumi yet tasol. (1 Korin 13:​4, 5; Efesus 4:32) Dispela pasin i kirapim yumi long “stap olsem wokboi bilong ol arapela manmeri bilong God.” (Galesia 5:13) Jisas i tokim ol disaipel bilong em long narapela i mas laikim tru narapela olsem em i save laikim ol. (Jon 13:34) Olsem na Kristen i mas redi long givim laip bilong em yet bilong helpim ol wanbilip.

14. Olsem wanem yumi ken kamapim pasin laikim insait long famili?

¹⁴ Pasin laikim i mas i stap insait long famili Kristen na moa yet namel long man na meri marit. Ol marit i pas gut wantaim, olsem na Pol i tok: “Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet.” Na em i tok moa: “Man i laikim tru meri bilong en, em i laikim tru em yet.” (Efesus 5:28) Pol i mekim wankain tok long ves 33. Man marit husat i laikim tru meri bilong em, em bai no bihainim pasin bilong ol Israel long taim bilong Malakai em ol i brukim promis ol i bin mekim long poroman marit bilong ol. Nogat. (Malakai 2:14) Em bai tingim tru meri bilong em. Em bai laikim em tru olsem Krais i save laikim tru kongrigesen. Pasin laikim i kirapim meri marit tu long rispektim man bilong em.​—Efesus 5:​25, 29-33.

15. Taim ol man i lukim pasin bilong yumi long laikim ol brata, dispela i kirapim sampela long tok wanem na long mekim wanem?

¹⁵ Tru tumas, dispela kain pasin laikim em i mak bilong ol Kristen tru. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Pasin bilong yumi long laikim tru narapela narapela i pulim ol manmeri i kam long dispela God yumi save laikim tru na holim nem bilong em. Wanpela famili Witnes long Mosambik i stori olsem: “Mipela i no bin lukim kain samting olsem bipo. Long apinun strongpela win i kirap, na bihain long en bikpela ren wantaim ren ais i pundaun. Strongpela win i bagarapim haus kunai bilong mipela na rausim kapa. Taim ol brata long ol kongrigesen i stap klostu i kam na helpim mipela long wokim gen haus, ol neiba bilong mipela i kirap nogut na i tok: ‘Lotu bilong yupela i gutpela tru. I no gat wanpela taim mipela i bin kisim kain helpim olsem long lotu bilong mipela.’ Mipela i opim Baibel na soim Jon 13:​34, 35 long ol. Nau planti neiba bilong mipela i stadi long Baibel.”

Laikim Olgeta Wan Wan

16. Olsem wanem pasin bilong laikim ol narapela man olsem wanpela lain na pasin bilong laikim olgeta wan wan i no wankain?

¹⁶ I no hatwok long laikim tru ol narapela man olsem wanpela lain. Tasol ating i hatwok long laikim olgeta man wan wan. Olsem: Sampela man i soim pasin laikim long rot bilong givim mani samting long ol oganaisesen i save helpim ol man i sot, tasol ol i no laik mekim narapela samting. Tru tumas, i no hatwok long tok yumi laikim tru ol narapela man, tasol em i hatwok long laikim tru wanpela wanwok husat i no tingim yumi liklik, o wanpela neiba i no gat gutpela pasin, o wanpela pren husat i bagarapim bel bilong yumi.

17, 18. Olsem wanem Jisas i soim olsem em i laikim tru olgeta wan wan man? Wanem samting i kirapim em long mekim olsem?

¹⁷ Jisas i bihainim stret ol pasin bilong God, olsem na pasin bilong em i lainim yumi long laikim olgeta wan wan man. Tru, em i kam long graun bilong rausim sin bilong olgeta manmeri, tasol em i soim tu pasin laikim long olgeta wan wan man​—wanpela meri i gat sik, man i gat sik lepra, na wanpela pikinini. (Matyu 9:​20-22; Mak 1:​40-42; 7:​26, 29, 30; Jon 1:29) Na olsem tasol, yumi soim pasin bilong laikim tru ol narapela man long rot bilong pasin yumi mekim long olgeta wan wan man yumi save bungim long olgeta de.

¹⁸ Tasol yumi no ken lusim tingting olsem pasin bilong laikim tru ol narapela man i poroman wantaim pasin bilong laikim tru God. Jisas i helpim ol rabisman, oraitim ol sikman, givim kaikai long ol man i hangre, na skulim ol man, em i mekim olgeta dispela samting bilong helpim ol long kamap wanbel wantaim Jehova. (2 Korin 5:19) Jisas i mekim olgeta samting bilong givim biknem long God, em i no lusim tingting olsem em i holim nem bilong dispela God em i laikim tru na i kamapim pasin bilong em. (1 Korin 10:31) Long rot bilong bihainim pasin bilong Jisas, yumi tu i ken kamapim pasin bilong laikim tru ol narapela man, tasol yumi no ken insait long pasin nogut bilong dispela graun.

Olsem Wanem Yumi Ken Laikim Narapela Olsem Yumi Yet?

19, 20. Laikim tru ol narapela man i makim wanem samting?

¹⁹ Jisas i tok: “Yu mas laikim ol wantok [“narapela man,” NW] olsem yu laikim yu yet.” I stret yumi lukautim yumi yet na amamas long yumi yet. Sapos yumi no mekim olsem, orait dispela lo i no gat bikpela insait bilong en. Tasol yumi no ken ting dispela pasin bilong amamas long yumi yet i wankain olsem pasin bilong laikim yumi yet tasol em aposel Pol i tok long en long 2 Timoti 3:2. Nogat. Em i makim olsem yumi gat stretpela tingting long yumi yet. Wanpela saveman bilong Baibel i tok em i “pasin bilong laikim yumi yet long mak i stret, i no olsem yumi ting ‘Mi gutpela tru’ na i no olsem yumi ting ‘Mi samting nating tasol.’ ”

²⁰ Pasin bilong laikim tru ol narapela man i makim olsem tingting yumi gat long ol i wankain olsem yumi laik bai ol i gat long yumi, na pasin yumi mekim long ol i wankain olsem yumi laik bai ol i mekim long yumi. Jisas i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Jisas i no tokim yumi long tingim tingim ol samting ol narapela i bin mekim long yumi long bipo na bekim pe nogut long ol. Nogat. Yumi mas tingting long wanem kain pasin yumi laik bai ol narapela i mekim long yumi na yumi mas mekim wankain pasin long ol. Na tu, Jisas i no tok yumi mas mekim olsem long ol pren na ol brata tasol. Nogat. Em i tok long “ol arapela manmeri,” ating em i tok olsem bilong soim olsem yumi mas mekim dispela kain pasin long olgeta manmeri, em olgeta man yumi bungim.

21. Taim yumi laikim tru ol narapela, yumi soim wanem samting?

²¹ Pasin bilong laikim tru ol narapela man i helpim yumi long sakim pasin i no stret. Aposel Pol i tok: “Lo i tok olsem, ‘Yupela i no ken kilim manmeri i dai. Yupela i no ken stil. Yupela i no ken mangalim samting bilong narapela man. Yupela ol marit, yupela i no ken mekim pasin pamuk.’ Ol dispela lo, na olgeta arapela lo i stap, em olgeta i stap insait long dispela wanpela tok, ‘Yu mas laikim tru ol arapela man olsem yu laikim yu yet.’ Man i save givim bel bilong em long arapela man, em i no save mekim pasin nogut long em.” (Rom 13:​9, 10) Pasin laikim bai kirapim yumi long painim rot bilong mekim ol samting i helpim ol narapela. Taim yumi laikim tru ol narapela man, yumi soim olsem yumi laikim tru dispela man husat i bin wokim ol man i kamap olsem Em yet, em God Jehova.​—Stat 1:26.

Bai Yu Bekim Olsem Wanem?

• Yumi mas laikim tru husat? Bilong wanem yumi mas laikim ol?

• Olsem wanem yumi ken soim pasin laikim long ol man husat i no mekim wok bilong Jehova?

• Baibel i tok wanem long pasin laikim yumi mas soim long ol brata bilong yumi?

• Pasin bilong laikim tru ol narapela man olsem yumi laikim yumi yet i makim wanem samting?

[Piksa long pes 26]

Ol “narapela man” i makim husat?

[Piksa long pes 29]

Jisas i laikim tru olgeta man wan wan