Stadi 5

Ol Pren Bilong God Bai Stap Long Paradais

Paradais bai i no kain olsem graun nau yumi stap long en. God i no laik bai graun i pulap long pen na hevi. Long bihain, God bai mekim na dispela graun i kamap wanpela paradais. Paradais bai stap wanem kain ples? Orait nau yumi ken skelim ol tok bilong Baibel long dispela samting:

Ol gutpela manmeri. Paradais bai kamap ples bilong ol pren bilong God. Narapela bai mekim ol gutpela samting bilong helpim narapela. Ol bai bihainim stretpela lo bilong God long i stap bilong ol.​—⁠Sindaun 2:⁠21.

Bai i gat planti kaikai. Long Paradais, bai i no gat hangre. Baibel i tok: “Planti rais na wit samting [olsem kaikai] i ken kamap long ol gaden.”​—⁠Song 72:⁠16.

Gutpela haus na gutpela wok. Long Paradais long graun, olgeta famili bai i gat haus bilong ol yet. Olgeta manmeri bai mekim wok i givim amamas tru long ol.​—⁠Aisaia 65:​21-23.

Bel isi bai stap long olgeta hap bilong graun. Ol manmeri bai no inap pait moa na dai long ol pait. Baibel i tok: “[God] i save mekim i dai pait.”​—⁠Song 46:​8, 9.

No gat sik. Baibel i tok promis olsem: “Bai i no gat wanpela man [i stap long Paradais] i tok: ‘Mi gat sik.’ ” (Aisaia 33:​24, NW ) Na tu, bai i no gat ol lek nogut, ol aipas, ol yaupas, o ol mauspas.​—⁠Aisaia 35:​5, 6.

Pen na hevi na indai bai pinis. Baibel i tok: “Ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:⁠4.

Ol man nogut bai i pinis olgeta. Jehova i tok promis olsem: “God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.”​—⁠Sindaun 2:⁠22.

Narapela bai i laikim tru narapela na daun long em. Bai i no gat moa pasin i no stret, na pasin bilong daunim ol man, na pasin mangal, na pasin bilong bel nogut. Ol manmeri bai i stap wanbel na ol bai i bihainim ol stretpela lo bilong God.​—⁠Aisaia 26:⁠9.