Stadi 6

Paradais i Kam Klostu Pinis!

Ol samting nogut nau i kamap long graun i kamapim olsem Paradais i kam klostu pinis. Baibel i tok yumi bai lukim ol samting nogut tru i kamap paslain liklik long Paradais i kamap. Nau yumi stap long kain taim olsem! Em hia sampela samting Baibel i tok bai kamap:

Ol bikpela pait. “Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king.” (Matyu 24:⁠7) Dispela tok profet i kamap tru pinis. Kirap long yia 1914 na i kam inap long nau, i gat tupela bikpela pait i bin kamap na planti ol liklik pait. Planti milion manmeri i dai pinis long ol dispela pait.

Ol sik i go bikpela. Bai i gat taim bilong “bikpela sik.” (Luk 21:11) Olsem wanem? Dispela i kamap pinis? Yes, em i kamap. Sik kensa, sik bilong klok, sik TB, malaria, AIDS, na ol narapela sik i bin bagarapim planti milion manmeri.

Kaikai i sot. Long olgeta hap bilong graun i gat sampela manmeri i sot long kaikai. Planti milion manmeri i save dai long hangre long olgeta yia. Dispela em i narapela mak i kamapim olsem liklik taim Paradais bai kamap. Baibel i tok: “Bai ol i gat taim bilong bikpela hangre.”​—⁠Mak 13:⁠8.

Ol guria. “Long sampela hap . . . graun bai i guria.” (Matyu 24:⁠7) Dispela tu i kamap tru long taim bilong yumi. Winim wan milion manmeri ol i bin dai long ol guria, kirap long 1914 na i kam inap nau.

Ol man nogut. Ol man bai i “laikim tumas long kisim mani” na “laikim ol yet tasol.” Ol bai “laikim tumas ol kain kain pasin bilong amamas bilong dispela graun, na ol bai i no laikim God.” Ol pikinini bai “sakim tok bilong papamama.” (2 Timoti 3:​1-5) Long nau i gat planti man i kain olsem, a? Ol i no save daun long God, na ol i save givim hevi long ol man i laik kisim save long God.

Pasin raskol. Na tu “pasin nogut bai i kamap bikpela.” (Matyu 24:12) Yu bai wanbel long tok olsem pasin raskol i go nogut tru winim long ol yia i go pinis. Ol manmeri long olgeta hap i kisim hevi bilong ol man i stilim ol samting bilong ol, giamanim ol, o mekim nogut long ol.

Olgeta dispela samting i kamapim olsem Kingdom bilong God i kam klostu pinis. Baibel i tok: “Taim yupela i lukim ol dispela samting i kamap, yupela i ken save, kingdom bilong God i kam klostu pinis.” (Luk 21:31) Kingdom bilong God em wanem samting? Em gavman bilong God i stap long heven na em bai kamapim Paradais long graun. Kingdom bilong God bai senisim ol gavman bilong ol man.​—⁠Daniel 2:44.