Gutpela Sindaun—Klostu Nau Bai Kamap!

TINGIM wanpela man i save tokaut long wanem kain taim bai kamap, na klostu olgeta taim samting i save kamap olsem em i tok. Sapos long nait long stori bilong nius em i tokaut olsem tumora ren bai kam, ating long narapela de taim yu lusim haus bai yu kisim ambrela i go wantaim yu, a? Ating yu bilip long tok bilong dispela man, long wanem, long bipo em i bin toksave long wanem kain taim bai kamap, na em i bin kamap tru. Yu mekim ol samting i stret long toksave bilong em.

Orait, olsem wanem long ol tok promis bilong Jehova long gutpela sindaun bai kamap long Paradais long graun? Ol samting em i toksave long en long bipo i kamapim long ples klia wanem samting? Ol tok profet bilong Baibel em truim bilong en i kamap pinis, ol i kamapim long ples klia olsem ol tok profet Jehova i mekim i kamap tru. Em i God bilong mekim olgeta samting i kamap tru olsem em i bin tok, na em i God bilong tok tru tasol. (Josua 23:14; Aisaia 55:11) Long olgeta taim God Jehova i save truim tok promis bilong em, olsem na sampela taim em i stori long ol tok promis bilong em long bihain olsem ol i kamap pinis. Olsem: Bihain long tok promis bilong em long kamapim nupela graun na ol manmeri bai i no i dai moa na bel hevi moa, em i bin tok: “Olgeta samting [ol tok promis long ol blesing] i kamap pinis.” O yumi ken tok, “Ol i olsem samting tru!”​—⁠KTH 21:​5, 6.

Tru tumas, ol tok promis bilong Jehova em truim bilong ol i kamap pinis i mekim na yumi bilip tru long ol tok promis bilong em long ol man bai kisim gutpela sindaun. Tasol gutpela sindaun bai kamap long wanem taim?

Gutpela Sindaun​—⁠Long Wanem Taim?

Klostu nau gutpela sindaun bai kamap! Yumi ken bilip tru long dispela, long wanem, Baibel i tok paslain long Paradais i kamapim gutpela sindaun planti samting nogut bai kamap long graun. Ol dispela samting nogut i wok long kamap long nau.

Olsem: Krais Jisas i bin tok profet olsem ol bikpela pait bai kamap. Em i tok: “Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king.” (Matyu 24:⁠7) Truim bilong dispela tok profet i kamap pinis. Namel long yia 1914 na 1945, tupela bikpela pait bilong olgeta hap i bin kamap, na bihain long en planti pait moa i kamap, em narapela kantri i pait long narapela kantri. Buk World Military and Social Expenditures 1993 i tok: “Long olgeta wan wan yia, averes bilong ol man i dai long pait long dispela taim [kirap long Namba 2 Pait i kam inap nau] i winim namba bilong ol man i dai long yia 1800 i go inap 1900 samting inap tupela taim, na i winim namba bilong ol man i dai long yia 1700 i go inap 1800 samting inap 7-pela taim.”

Ol sik i go bikpela na dispela tu i kamapim long ples klia olsem gutpela sindaun long Paradais i kam klostu. Jisas i tok profet olsem “long sampela hap ol bai i gat . . . bikpela sik.” (Luk 21:11) Olsem wanem? Dispela tok profet i kamap tru? Yes, em i kamap tru. Bihain long Namba Wan Pait, bikpela sik kus bilong Spen i bagarapim 20 milion manmeri. Na kirap long dispela taim i kam inap long nau sik kensa, sik bilong klok, malaria, AIDS, na planti ol narapela sik i bin bagarapim planti milion manmeri. Long ol kantri i stap rabis liklik, ol sik ol man i kisim long wanem wara i no klin (olsem pekpek wara na ol liklik snek long bel), i save bagarapim planti milion manmeri long olgeta yia.

Na Jisas i tok: “Long sampela hap ol bai i gat taim bilong bikpela hangre.” (Matyu 24:⁠7) Olsem stori paslain long dispela i tok, ol man i stap rabis i no gat kaikai inap long ol. Dispela tu i kamapim long ples klia olsem klostu nau gutpela sindaun long Paradais bai kamap.

Jisas i tok: “Ol bikpela bikpela guria bai i kamap.” (Luk 21:11) Dispela samting tu i kamap tru long nau. Kirap long 1914 i kam inap long nau, ol bikpela guria i bin bagarapim planti handet tausen man.

Na Baibel i tok “long taim bilong las de” pasin bilong ol man bai senis. Ol bai “laikim ol yet tasol,” na “laikim tumas long kisim mani,” na ol pikinini bai “sakim tok bilong papamama.” Na planti man bai “laikim tumas ol kain kain pasin bilong amamas bilong dispela graun, na ol bai i no laikim God.” (2 Timoti 3:​1-5) Yu ting yumi stap long kain taim olsem?

Planti man moa i mekim pasin nogut, olsem na pasin nogut i go bikpela. Jisas i bin tok profet long dispela samting tu. Long Matyu 24:​12, Jisas i tok “pasin nogut bai i kamap bikpela.” Long nau pasin nogut i go bikpela moa yet, winim tru ol narapela taim bipo. Ating yu wanbel long dispela tok, a? Long olgeta hap ol man i pret wanpela man bai stilim ol samting bilong ol, o giamanim ol, o bagarapim ol.

Ol pait, ol bikpela sik, hangre, guria, pasin nogut i go bikpela, na ol man i no stap gut moa wantaim ol narapela​—⁠dispela olgeta samting i kamap long nau, olsem Baibel i tok profet. Tasol ating bai yu tok: ‘Ol dispela samting i bin kamap long bipo tu. Ol samting i kamap long nau i narapela kain olsem wanem?’

Tasol long nau i gat sampela samting i narapela kain olgeta long ol samting i bin kamap bipo. Baibel i no tok wanpela samting tasol, olsem hangre, i makim olsem yumi stap long taim bilong pinis na gutpela sindaun i klostu. Truim bilong ol tok profet bilong Baibel long las de bai kamap long wanpela lain manmeri i no save bilip long God.​—⁠Matyu 24:​34-39; Luk 17:​26, 27.

Na yumi kirap nogut long sampela samting bilong tok profet bilong Jisas i kamap tru long nau​—⁠olsem bai i gat bikpela hangre na ol bikpela sik. Dispela em i narapela kain tru, long wanem, long nau ol saientis i kisim pinis bikpela save moa yet long mekim kain kain samting. Long nau ol dokta i gat bikpela save long ol marasin na long stretim ol sik, na planti lain bilong graun ol inap kisim ol dispela marasin samting. Olsem na God tasol inap tok profet long Baibel olsem, long kain taim olsem ol sik na hangre bai go nogut moa​—⁠ol samting bai i no kamap gutpela liklik.

Ol tok profet bilong Baibel long taim bilong pinis, o “taim bilong las de,” i kamap tru, olsem na yumi ken save long wanem samting? Yumi ken save olsem gutpela sindaun i klostu! Tasol gutpela sindaun bai kamap olsem wanem?

Gutpela Sindaun—Bai Kamap Olsem Wanem?

Yu ting ol man inap kamapim Paradais? Kirap long bipo i kam inap long nau, ol man i bin kamapim kain kain gavman. Sampela i bin wok strong long helpim ol man. Tasol planti hevi i wok long go bikpela moa. Long ol kantri i gat planti mani na ol kantri i stap rabis, ol gavman i gat hevi long ol man i mekim nabaut long ol drak, na no gat gutpela haus, na ol man i stap rabis, na pasin raskol, na ol man i no gat wok, na pait.

Maski ol gavman inap stretim sampela bilong ol dispela hevi, ol i no inap pinisim ol sik; na ol i no inap pinisim lapun na indai. Tru tumas, ol man i no inap kamapim Paradais long graun.

Baibel i kamapim gutpela tingting olsem: “Ol king na ol man bilong graun i no inap kisim bek yu. Olsem na nogut yu bilip long ol.” Olsem na yumi ken bilip long husat? Baibel i tok: “Sapos wanpela man i bilip long God bilong Jekop bai em i helpim em, na sapos dispela man i pas wantaim God, Bikpela bilong em, orait em i ken amamas.” (Song 146:​3, 5) Sapos yumi bilip long God Jehova, bai yumi amamas tasol.

Dispela Man i gat save na strong long wokim graun, na san, na ol sta, em inap mekim na graun i kamap Paradais. Em inap helpim ol man long kisim gutpela sindaun. Ol samting God Jehova i laik mekim, em bai mekim. Baibel i tok: “I no gat wanpela samting God i no inap mekim.” (Luk 1:37) Tasol olsem wanem God bai kamapim gutpela sindaun?

Long rot bilong Kingdom God bai kamapim gutpela sindaun bilong ol man. Na Kingdom bilong God em wanem samting? Em i wanpela gavman tru na God i makim King bilong en, em Krais Jisas. Kingdom bilong God i stap long heven, tasol klostu nau em bai kamapim ol gutpela blesing na gutpela sindaun bilong ol man i stap long dispela Paradais long graun.​—⁠Aisaia 9:​6, 7.

Ating yu save pinis long beten bilong Jisas i stap long Baibel long Matyu 6:​9-13. Sampela hap bilong dispela beten i go long God i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” Olsem dispela beten i tok, Kingdom bilong God bai “kam” bilong kamapim laik bilong God Jehova long graun. Na em i laik graun bai kamap Paradais.

Orait, nau yumi laik kamapim laspela askim, olsem: Yu mas mekim wanem samting na bai yu inap kisim gutpela sindaun long Paradais?

Samting Yu Mas Mekim

God Jehova i gat pasin sori na em i laik givim gutpela sindaun long Paradais long olgeta man i bihainim laik bilong em. Baibel i tok: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Tasol wanem samting i mekim na wanpela man i olsem stretpela man long ai bilong God?

Sapos yumi laik Jehova i amamas long yumi, yumi mas kisim save long ol samting em i laik yumi mas mekim. Sapos yumi kisim save long God na bihainim dispela save, bai yumi inap kisim laip oltaim. Long beten bilong em long God, Jisas i tok: “Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—⁠Jon 17:⁠3.

Buk i helpim yumi long save long God Jehova na Krais Jisas, em Baibel. Em i wanpela gutpela presen tru Jehova i givim long yumi. Baibel i olsem wanpela pas wanpela papa i gat pasin sori i givim long ol pikinini bilong em. Baibel i stori long yumi long promis bilong God long kamapim gutpela sindaun bilong ol man na em i soim yumi olsem wanem yumi ken kisim dispela gutpela sindaun. Baibel i stori long yumi long ol samting God i bin mekim long bipo na ol samting em bai mekim long bihain. Em i givim gutpela tok long yumi bilong stretim ol hevi bilong yumi long nau. Tru tumas, Baibel i skulim yumi olsem wanem yumi ken kisim amamas, maski nau i gat planti hevi.​—⁠2 Timoti 3:​16, 17.

Ol Witnes Bilong Jehova bai amamas long kam lukim yu long haus na lainim yu long ol tok bilong Baibel, no gat pe. Kisim save long olsem wanem yu ken stap amamas long nau, na kisim gutpela sindaun long bihain.

[Piksa long pes 5]

Ol tok profet bilong Baibel i makim olsem klostu nau gutpela sindaun bai kamap

[Piksa long pes 7]

Kingdom bilong God bai kamapim gutpela sindaun bilong ol man