Ol Witnes Bilong Jehova Long Olgeta Hap—Nu Silan

OLSEM WANEM? Ol ailan inap litimapim nem bilong Jehova? Yes, ol inap mekim. Aisaia 42:10 (NW) i tok: “Singim nupela song bilong litimapim nem bilong Jehova. Yupela . . . ol ailan na ol man i stap long en.” Ol ailan bilong Nu Silan i save litimapim nem bilong Jehova. Nu Silan i gat nem long olgeta hap bilong graun, long wanem, em i gat ol raunwara, na ol bikpela maunten i go antap na ol baret bilong en i daun moa na solwara i kam insait long en, na ol traipela maunten, na ol maunten ais, na nambis, na bikbus, na ol bikpela gaden i gat gutpela gras. Olsem na Nu Silan i kamapim klia tru, Man bilong wokim heven na graun em i nambawan bikpela King na i gat bikpela strong.

Kirap long yia 1900 samting, planti man bilong Nu Silan tu i litimapim nem bilong Jehova na ol i lotu tru long em na autim tok bilong Kingdom long ol narapela man. I no longtaim i go pinis na wanpela Witnes i bin harim wanpela gutpela stori long pasin bilong autim tok long famili, olsem na em i pasim tok long bel long wok strong long autim tok long famili bilong em. Em i givim buk Yu Inap i Stap Oltaim Long Paradais Long Graun olsem presen long sampela long famili bilong em. Inap long nau wanem samting i kamap? Em i stori olsem, nau wanpela susa na wanpela brata i stadi long Baibel, na wanpela pikinini bilong smolpapa i baptais pinis olsem wanpela Witnes Bilong Jehova, na sampela i amamas nau long harim tok i tru bilong Baibel. Em i gat planti famili yet em i mas autim tok long ol; em i gat 6-pela brata na 9-pela susa, na papamama tu!

Taim ol Witnes i bung wantaim long wokim ol Haus Kingdom, dispela tu i litimapim nem bilong Jehova. Olsem: Man i raitim tok long nius, em Roy Perkins, em i tok long nius Opotiki News bilong Me 17, 1994, olsem: “Mi no wanpela Witnes, tasol mi kirap nogut long bikpela wok ol dispela wokman i dediket i bin mekim. Ol i givim bikpela hap taim na ol i wok strong tru, long wanem, ol i laikim tru God bilong ol.

“Long ol dispela planti aua ol i bin wok long Sarere Sande ol i no bin tok pait long ol lo bilong yunion bilong ol wokman . . . Ol meri i bin sanap long ol plang bilong mekim wok na wok wantaim ol man, na ol i litimapim na karim ol samting, na ol i amamas long mekim wok.

“Na i no gat wanpela minit i lus, long wanem, wanpela i mas smok. Maski ol man i mekim wanem wanem wok, win i klin. Smel bilong pen na das bilong ol brik tasol i stap long win.”

Lain elda bilong Kongrigesen Opotiki i tok: “Olgeta man bilong taun i kirap nogut long dispela wok mipela i mekim. I olsem olgeta man i toktok long dispela samting tasol. Mipela i bin kirapim sampela nupela Baibel-stadi. Na mipela i amamas moa yet long wanpela Baibel-stadi wantaim tupela marit, ol i man bilong lotu na inap planti yia ol i bin tok ol i no laik ol Witnes i kam autim tok long ol. Long olgeta de ol i bin kam long ples bilong wokim Haus Kingdom na bihain ol i kam long miting. Bihain man marit i tok, ‘Mi save yupela i lain bilong God. Long bel bilong mi, kirap long taim mi yangpela yet i kam inap nau, mi laik bung wantaim wanpela lain olsem dispela.’ ”

Long 1993, wanpela man bilong raitim tok long nius Otago Daily Times i stori long Haus Kingdom ol Witnes i bin wokim insait long sampela de tasol long Danedin na em i tok: “Ol Witnes i bin mekim gutpela wok tru; bel bilong ol i kirapim ol tru long mekim wok na ol i no singaut long narapela man i kam helpim ol.” Na nius i tok moa: “Ol man bilong taun i kirap nogut taim ol i lukim wanpela bikpela haus i wok long kamap taim ol i sanap na lukluk, na ating ol i mas tingting long wanem ol bikpela bikpela wok ol man inap mekim sapos ol bikpela lain volantia i bung wantaim long mekim wok na ol i wok gut wantaim olsem dispela lain i mekim. Haus Kingdom em i wanpela mak i kamapim klia ol samting ol man inap mekim taim ol i wok gut wantaim.”

Long ol planti handet man i bin kam long hap bilong wokim Haus Kingdom, wanpela man i tok, ol Witnes i wokim “ol haus lotu” na misin bilong em i wok long baim ol haus lotu bilong ol long ol man, long wanem, namba bilong ol man long misin bilong em i go daun. Em i tok: “Sapos yupela i wet inap 12-pela mun moa, yupela inap baim wanpela haus lotu bilong mipela. Mipela i mas baim wanpela i go long ol man, long wanem, mipela i no gat mani inap bilong baim olgeta samting. Tasol yupela ol Witnes i no gat ol pris pasto yupela i mas baim bilong mekim wok. . . . Na yupela i no gat wok long tromoi bikpela mani bilong lukautim haus lotu bilong yupela. Yupela i no gat ol haus lotu i gat taua i go antap tru, na i hatwok tru long lukautim.”

Tru tumas, ol ailan inap litimapim nem bilong God. Yumi laik litimapim yet nem bilong Jehova long dispela naispela kantri bilong solwara Pasifik​—⁠na long olgeta hap bilong graun!

[Blok long pes 9]

OL SAMTING BILONG KANTRI

Yia Bilong Wok Bilong 1994

HAMAS OL I AUTIM TOK: 12,867

SKELIM OLSEM: 1 Witnes insait long 271 man

HAMAS I BUNG LONG MEMORIAL: 24,436

HAMAS PAINIA, AVERES: 1,386

HAMAS BAIBEL-STADI, AVERES: 7,519

HAMAS I BAPTAIS: 568

HAMAS KONGRIGESEN: 158

BRENS-OFIS: MANUREWA

[Piksa long pes 9]

Ol painia i go autim tok long 1930 samting

[Piksa long pes 9]

Brens-ofis long Manurewa

[Piksa long pes 9]

Autim tok bilong Kingdom long Devonpot, Oklan