Ol Witnes Bilong Jehova Long Olgeta Hap—Ol Ailan Bahama

KOMONWEL bilong Bahama​—⁠em 3,000 bikpela na liklik ailan​—⁠ol i stap olsem gutpela bis long blupela solwara kirap long Florida na i go inap 900 kilomita klostu long ailan Kuba. I gat 267,000 manmeri i stap long ol dispela ailan, na planti ol i man bilong autim tok bilong Kingdom. Ol i mekim olsem Aisaia 42:​10-12 (NW) i tok: “Singim nupela song bilong litimapim nem bilong Jehova. Yupela ol man i raun long sip na ol abus bilong solwara, na yupela ol ailan na ol man i stap long en, yupela i mas litimapim nem bilong em.”

I Traim Nupela Bilip Bilong Em

Long Julai 1992, wanpela painia oltaim (em i autim tok bilong Kingdom long olgeta de) em i tilim wanpela buk i kamapim tok bilong Baibel long wanpela bisnisman i wok wantaim em, em buk​—⁠Yu Inap i Stap Oltaim Long Paradais Long Graun. Bisnisman i kaunim na bihain em i tokim em yet, ‘Mi mas kisim sampela save moa long dispela lotu.’ Long tupela Sande bihain, em i go long miting bilong ol Witnes Bilong Jehova long narapela narapela Haus Kingdom. Bihain ol i kirapim Baibel-stadi wantaim em. Em i stadi inap 6-pela wik tasol na nau traim i painim nupela bilip bilong em​—⁠em bai mekim betde o nogat.

Famili bilong em i strong long mekim betde, tasol em i laikim tumas Baibel, em tok bilong God, na em i no lusim stadi. Em i wok long kisim sampela save moa long ol tok i tru bilong Baibel, na nau em i save gut long tingting bilong Jehova long pasin bilong mekim betde na ol amamas bilong ol bikpela de bilong graun.

Meri bilong em i wokim pati bilong em long De Bilong Papa (Father’s Day), tasol long pasin isi em i tokim meri em i no inap i stap long pati. Meri i ting, man i no laikim em moa; em i laikim lotu, winim meri pikinini. Tasol man i stori gut olsem nau em i bihainim ol tok bilong Baibel em i lainim na dispela bai helpim em long kamap gutpela man na gutpela papa. Isi isi meri i pilim bikpela laik bilong man long ol tok i tru bilong Baibel na em i orait long stadi. Nau man i mekim Baibel-stadi wantaim famili. Long “God i Skulim Yumi” Kibung Distrik long 1993, em i kisim bikpela amamas! Meri na pikinini meri bilong em i stap na lukim em i kisim baptais.

Ol Man Bilong Narapela Kantri i Harim Nupela Song

Planti tausen man bilong kantri Haiti i kam i stap long ol ailan Bahama na ol i sindaun gut wantaim ol as ples. Ol tu i mas harim nupela song, em ol tok i tru bilong Kingdom. Ol Witnes long Bahama i amamas, long wanem, tupela brata Haiti bilong Amerika wantaim meri bilong ol i kam helpim ol. Fopela i strongim ol Haiti long ol nupela grup i kamap long ailan Gren Bahama na Abako.

Bilong helpim moa ol Haiti i laikim tok bilong Kingdom, ol i bin kamapim namba wan kibung distrik long tok ples Kriol, long Julai 31 i go Ogas 1, 1993. Inap 214 i bung na 3-pela nupela dediket i kisim baptais. Planti Haiti i kisim save long tok i tru taim ol i stap long ol ailan Bahama, ol i go bek pinis long ples bilong ol, em tu wanpela ailan, o long narapela hap, na ol i wok wantaim ol Witnes long ol dispela hap long litimapim nem bilong Jehova.

[Blok long pes 8]

OL SAMTING BILONG KANTRI

Yia Bilong Wok Bilong 1993a

HAMAS OL I AUTIM TOK: 1,294

SKELIM OLSEM: Wanpela insait long 197 man

HAMAS I BUNG LONG MEMORIAL: 3,794

HAMAS PAINIA, AVERES: 186

HAMAS BAIBEL-STADI, AVERES: 1,715

HAMAS I KISIM BAPTAIS: 79

HAMAS KONGRIGESEN: 22

BRENS-OFIS: NASAU

[Ol Futnot]

[Piksa long pes 9]

Namba wan Haus Kingdom, i gat brens-ofis na haus misineri

[Piksa long pes 9]

Ol Witnes i wok strong long autim tok bilong Kingdom

[Piksa long pes 9]

Milton G. Henschel na Nathan H. Knorr wantaim ol misineri long Nasau inap 45 yia bipo

[Piksa long pes 9]

Nupela brens-ofis, ol i dediketim long Februeri 8, 1992