Stori Bilong Wanpela Meri
Mi Amamas na Tenkyu Long God, Maski Gutpela Poroman i Dai
EM STORI BILONG NANCY E. PORTER
Em Jun 5, 1947, wanpela gutpela apinun long ol ailan Bahama long hap saut-is bilong Amerika. Wanpela bikman bilong imigresen i kam lukim mi na man bilong mi, George. Em i givim wanpela pas long mipela i tok gavman i no amamas long mipela i stap na ol i laik ‘kwiktaim mipela i mas lusim dispela kantri!’
MITUPELA George i namba wan misineri bilong ol Witnes Bilong Jehova i kam long Nasau, em nambawan biktaun long ol ailan Bahama. Taim mipela i winim namba 8 klas bilong Skul Gileat, wanpela skul bilong ol misineri long hap not bilong Nu Yok, ol i makim mipela long kam long dispela kantri. Mipela i bin mekim wanem na ol i laik bai mipela i mas lusim dispela kantri, em mipela i bin stap 3-pela mun tasol long en? Na wanem samting i kamap na i kam inap 50 yia samting, mi stap yet long dispela kantri?
Kisim Skul Bilong Mekim Wok Autim Tok
Pasin bilong papa bilong mi, em Harry Kilner, i stiaim strong i stap bilong mi long bihain. Em i makim gutpela piksa olsem man i redi tru long lusim planti samting bilong kamap wanpela Witnes Bilong Jehova. Skin bilong em i no strong tumas, tasol klostu olgeta Sarere Sande em i go autim tok—em i strong long putim ol wok bilong Kingdom i go pas long ol narapela samting. (Matyu 6:33) Mipela i no gat planti mani, tasol namel long 1930 i go inap 1939 samting, stua bilong papa long salim su i bin stap olsem ples bilong ol Witnes i bung long en bilong mekim wok bilong spirit long Letbris, Albeta, Kanada. Mi inap tingim yet ol Witnes Bilong Jehova i autim tok long olgeta de, em ol i kolim painia, ol i kam long haus bilong mipela na stori long ol gutpela ekspiriens.
Long 1943, mi kirap mekim wok painia klostu long taun Fot Maklaut na Klarshom, long Albeta. Long dispela taim gavman i bin tambuim wok bilong autim tok bilong mipela long Kanada, long wanem, sampela birua i bin kamapim ol tok giaman long mipela long taim bilong Namba Tu Pait. Hap mipela i autim tok long en i bikpela tru, kirap long wanpela hap i go long narapela hap em inap olsem 100 kilomita. Tasol mipela i yangpela na i gat strong, olsem na mipela i no tingting planti long raun long wilwil o wokabaut long lek bilong i go long ol liklik ples na ol fam. Long dispela taim, mi inap toktok wantaim sampela brata sista i bin winim Skul Gileat, na stori bilong ol i kirapim laik long bel bilong mi long kamap misineri.
Long 1945, mi maritim George Porter, em bilong Saskatsiwan, Kanada. Papamama bilong em ol i strongpela Witnes kirap long 1916, na em tu i makim wok bilong autim tok long olgeta de olsem wok bilong em. Namba wan hap bilong mipela long mekim dispela wok em naispela ples Lin Vali long hap not bilong taun Vankuva, long Kanada. I no longtaim bihain long dispela na ol i singautim mipela i go long Skul Gileat.
Insait long ol planti yia i kam inap nau, mi bin toktok wantaim sampela man i winim skul bilong kamap pris na mi lukim olsem skul bilong ol i bin bagarapim bilip bilong ol long God na long Baibel. Tasol samting mipela i lain long Skul Gileat i helpim mipela long tingim gut ol samting, na bikpela samting moa em i strongim bilip bilong mipela long God Jehova na long Baibel. Ol i makim ol wanskul bilong mipela long go long Saina, Singapo, India, sampela kantri bilong Afrika, Saut Amerika, na sampela narapela kantri. Mi inap tingim yet bikpela amamas taim mipela i kisim save long nupela ples wok bilong mipela long ol ailan Bahama.
Rot na Mipela Inap i Stap
Taim mi skelim longpela bilong rot ol wanskul bilong mipela i mas raun long en bilong go long nupela ples wok bilong ol, raun bilong mipela long go long ol ailan Bahama i no longwe tumas. I no longtaim na mipela i amamas long gutpela san, blupela skai, blupela wara, ol haus ol i penim long ol gutpela kala i no strong tumas, na ol planti wilwil. Tasol bikpela samting moa mi tingim yet em ol 5-pela Witnes i bin wetim mipela taim sip bilong mipela i kamap. I no longtaim na mipela i kisim save olsem pasin bilong ol dispela man i narapela kain tru long samting mipela i lain pinis long en. Olsem: Ol i tokim poroman marit bilong mi olsem em i no ken kolim mi lewa long ai bilong ol man, long wanem, ol man long dispela hap i save mekim dispela tok long ol meri tasol em ol i slip wantaim ol tasol ol i no marit long ol.
I no longtaim na ol pris pasto i sutim tok giaman long mipela na ol i tok mipela i Komiunis—ating ol i no amamas long mipela i raun autim tok long ol man na ol i ting mipela i laik bagarapim wok bilong ol. Olsem na ol i tokim mipela long lusim kantri. Tasol kwiktaim ol Witnes—long dispela taim ol i no 20 yet long ol dispela ailan—ol i askim planti tausen man long sainim nem bilong ol long wanpela pepa i askim gavman long larim mipela i stap. Olsem na gavman i orait long mipela i stap.
Go Long Nupela Hap
Kwiktaim tok i tru bilong Baibel i kamap strong long bel bilong ol man i laikim tru God, olsem na Sosaiti i salim sampela misineri moa i kam long ol ailan Bahama. Long 1950 ol i kamapim wanpela brens-ofis. Inap 10-pela yia bihain, Milton Henschel, wanpela brata i wok long nambawan ofis long Bruklin, Nu Yok, em i kam long ol ailan Bahama na em i askim ol misineri olsem i gat wanpela i redi long go kirapim wok bilong autim tok long narapela ailan bilong ol Bahama. George na mi i redi long go, na long dispela rot mipela i go stap inap 11-pela yia long ailan Long.
Long Bahama i gat planti ailan. Longpela bilong ailan Long em olsem 140 kilomita na braitpela bilong en olsem 6-pela kilomita, na long dispela taim i no gat wanpela taun tru long en. Klarens Taun, em i olsem nambawan biktaun, i gat 50 haus tasol. I no gat planti samting bilong helpim sindaun bilong mipela—olsem i no gat paua, paip wara, na stov samting insait long haus. Olsem na mipela i mas lain long mekim ol kain kain wok ausait long haus. Long ol dispela ailan ol man i amamas tru long toktok long skin bilong ol, olsem ol i strong o i gat sik samting. Olsem na taim mipela i tok gude long ol man, mipela i lain pinis olsem mipela i no ken askim ol, “Yu orait?,” long wanem, bai ol i kirap stori long olgeta hevi na sik bilong skin bilong ol.
Taim mipela i autim tok, planti taim mipela i go long ol haus kuk, long wanem, ol man i save stap long ol haus kuk. Ol dispela haus kuk i gat rup morata, na ol i kukim kaikai long paiawut. Planti man long ol dispela ples ol i stap rabis na ol i man bilong wokim gaden o painim pis, tasol ol i mekim gutpela pasin long mipela. Planti bilong ol i save tingim lotu, tasol ol i bihainim tu ol kain kain bilip kranki. Taim narapela kain samting i kamap ol i ting dispela i olsem mak bilong wanpela samting.
Ol pris pasto i save go long haus bilong sampela man, maski ol man bilong haus i no singautim ol, na ol i brukim ol buk na nius bilong Baibel mipela i bin lusim wantaim ol. Long dispela rot ol i pretim ol man i save sem, tasol i no olgeta i save pret long ol. Olsem: Wanpela meri i gat 70 krismas em i no larim ol pris i pretim em. Em i laik save long Baibel, na bihain em na sampela narapela i kamap Witnes. Bihain planti man moa i laik harim tok, olsem na sampela taim George i mas raun inap 300 kilomita bilong helpim ol dispela man i kam long miting long Sande.
Taim mipela i stap nupela long dispela ailan, inap sampela mun i no gat ol narapela Witnes, olsem na mitupela George tasol i wokim olgeta miting Kristen bambai mipela i ken stap strong long ol samting bilong spirit. Na tu, long olgeta Mande nait mipela i stadi long nius Wastaua na ritim Baibel. Na taim mipela i kisim ol nupela Wastaua na Kirap! wantu mipela i ritim olgeta stori bilong en.
Papa bilong mi i dai taim mipela i stap long ailan Long. Long mun Jun samting bilong 1963 mipela i stretim rot na bai Mama i ken kam na sindaun klostu long mipela. Em i lapun liklik, tasol em i lain gut long sindaun long dispela ailan i go inap long taim em i dai long 1971. Long nau, i gat wanpela kongrigesen long ailan Long na wanpela nupela Haus Kingdom.
Wanpela Bikpela Hevi
Long 1980, George i luksave olsem skin bilong em i no strong tumas. Orait nau wanpela taim bilong bikpela hevi tru i kirap long i stap bilong mi—mi lukim gutpela poroman marit, na wanwok, na pren bilong mi i kisim sik alsaima. Pasin bilong em i senis olgeta. Sik bilong em i go bikpela tru long 1983 samting, na long 1987 em i dai. I go inap long taim em inap long mekim, em i go autim tok na kam long ol miting wantaim mi, tasol planti taim bikpela hatwok long mekim olsem i mekim na mi krai. Bikpela pasin sori bilong ol brata Kristen i mekim gut bel bilong mi, tasol mi sori tru long poroman marit i no stap moa wantaim mi.
Wanpela gutpela samting tru long marit bilong mitupela George em olsem: Planti taim mipela i toktok gut wantaim. Nau George i no stap moa, olsem na mi tenkyu tru long Jehova i singautim ol wokman bilong em long “beten oltaim,” na long mekim “ol kain kain beten.” (1 Tesalonaika 5:17; Rom 12:12; Efesus 6:18) Jehova i save tingim tu ol wokman bilong em, na dispela save i mekim gut bel bilong mi. Mi pilim tru tok bilong Man bilong raitim Song, em i tok: “Yumi litimapim nem bilong Bikpela. Olgeta de em i save karim ol hevi bilong yumi.” (Song 68:19) Mi lain long karim hevi bilong wan wan de, na tingim strong bilong skin bilong mi, na mi amamas long ol gutpela samting bilong ol wan wan de, olsem Jisas i lainim yumi long mekim, na dispela em i nambawan gutpela rot long bihainim.—Matyu 6:34.
Gutpela Pe Bilong Wok Autim Tok
Pasin bilong wok strong long autim tok i helpim mi na mi no tingting tumas long ol samting bilong bipo. Long dispela rot mi inap abrusim dispela kain bel hevi i mekim na man i kisim bikpela bel hevi tru. Pasin bilong skulim ol narapela long tok i tru bilong Baibel i givim bikpela amamas long mi. Dispela i helpim mi long mekim ol wok bilong spirit i go i go, na i stap bilong mi i gat as bilong en.—Filipai 3:16.
Wanpela taim, wanpela meri i ringim mi na em i tok inap 47 yia i go pinis mi bin autim tok bilong Kingdom long em. Em i pikinini meri bilong namba wan Baibel-stadi em mipela i kisim taim mipela i kam long ol ailan Bahama long 1947. Mama, na papa, na olgeta brata susa bilong em, ol i bin kamap Witnes Bilong Jehova, na tu, klostu olgeta pikinini na bubu bilong ol. Inap olsem 60 manmeri insait long famili bilong dispela meri ol i Witnes. Tasol em yet i no bin kisim tok i tru bilong Baibel. Tasol nau em i redi long kamap wanpela wokman bilong God Jehova. Taim mitupela George i kam long ol ailan Bahama i gat wan wan Witnes tasol, tasol nau i gat 1,400 Witnes na mi bin amamas tru long lukim dispela liklik lain i go bikpela olsem!
Sampela taim ol man i askim mi olsem mi bel hevi long mi no gat pikinini bilong mi yet. Tru, sapos yumi gat pikinini dispela inap i stap olsem gutpela blesing. Tasol gutpela pasin sori ol pikinini na bubu bilong spirit i mekim long mi em wanpela gutpela samting ating i no olgeta papamama tru i pilim long ol pikinini tru bilong ol. Tru tumas, ol man i “mekim planti gutpela pasin bilong helpim ol arapela” na “givim planti samting long ol manmeri i sot,” ol i save amamas tru. (1 Timoti 6:18) Dispela em i as na mi wok strong long autim tok inap long skel bilong strong bilong skin bilong mi.
Wanpela taim mi stap long dokta bilong tit, na wanpela yangpela meri i kam long mi na i tok: “Yu no save long mi, tasol mi save long yu, na mi laik tokim yu olsem mi laikim yu tru.” Orait nau em i stori long rot em i kisim tok i tru bilong Baibel na em i amamas tru long mipela ol misineri i bin kam long ol ailan Bahama.
Long narapela taim mi kam bek long malolo, mi lukim wanpela plaua ros i stap long dua bilong mi, em long brens-ofis bilong ol Witnes Bilong Jehova long Nasau nau mi stap long en. Wanpela sotpela rait i stap long en i tok: “Mipela i amamas yu kam bek.” Bel bilong mi i amamas tru, na mi laikim Jehova moa yet taim mi tingim ol gutpela man, em Tok na oganaisesen na spirit bilong em i bin kamapim! Tru tumas, planti taim Jehova i lukautim yumi long rot bilong ol man i stap klostu long yumi.
Oltaim Mi Tenkyu Long Jehova
Sampela taim sindaun bilong mi i bin hatwok liklik, na sampela samting long nau tu i hatwok. Tasol i gat planti samting mi ken tenkyu long en. Olsem: Bikpela amamas mi kisim long wok bilong autim tok, gutpela pasin sori planti brata sista Kristen i mekim long mi, gutpela oganaisesen bilong Jehova, ol gutpela tok i tru bilong Baibel, mi wetim taim bilong stap gen wantaim ol man i dai pinis i kirap bek, na mi inap tingim ol 42 yia mi bin marit long wanpela gutpela wokman bilong Jehova. Paslain long mipela i marit, mi beten long Jehova olsem long olgeta taim mi laik i stap olsem gutpela helpim bilong man bilong mi bambai em i ken mekim wok bilong Jehova long olgeta de, em wanpela wok em i bin laikim tumas. Long gutpela pasin sori Jehova i harim dispela beten. Olsem na long rot bilong stap gut long Jehova long olgeta taim mi laik tok tenkyu long em.
Ol ailan Bahama i gutpela ples em planti turis i kam raun long en, na ol i tromoi planti tausen dola bilong kam na amamas long dispela gutpela ples. Mi bin pasim tok long bel long mekim wok bilong Jehova long olgeta hap em oganaisesen bilong em i makim, na long dispela rot mi bin kisim bikpela amamas long raun long planti hap bilong ol dispela ailan bilong autim gutnius bilong Kingdom bilong God. Tasol bikpela samting moa, mi kisim save na mi amamas moa yet long pasin sori bilong ol nambawan gutpela man bilong ol ailan Bahama.
Mi tenkyu tru long ol man i bringim tok i tru i kam long papamama bilong mi, na taim mi yangpela yet ol i putim strongpela laik long painim Kingdom bilong God pastaim i go long bel bilong mi. Ol yangpela wokman bilong Jehova long nau ol tu i ken kisim planti blesing sapos ol i go insait long bikpela dua i ‘opim rot bilong mekim bikpela wok’ moa bilong autim tok. (1 Korin 16:9) Yu tu bai tenkyu long Jehova long olgeta de sapos yu mekim wok long i stap bilong yu bilong litimapim nem bilong “Bikpela bilong olgeta king,” em Jehova.—Lo 10:17; Daniel 2:47.
[Piksa long pes 24]
Autim tok long rot long Viktoria, Britis Kalambia, long 1944
[Piksa long pes 24]
Mitupela George i go long Skul Gileat long 1946
[Piksa long pes 25]
Wantaim George long ai bilong haus misineri long Nasau, ol ailan Bahama, long 1955
[Piksa long pes 26]
Haus misineri long Dedmans Ke, em ples mipela i mekim wok autim tok long 1961 i go inap 1972