Laip Stori

Mipela i Lusim Ol Liklik Samting na Kisim Ol Bikpela Blesing

Stori bilong George na Ann Aljian

Mi wantaim meri bilong mi i no inap tru long ting olsem wanpela taim bai mipela i paul long tok “tisa” na tok “rat.” Mipela i no ting taim mipela i gat 65 krismas samting, bai mipela i tingim ol narakain leta bilong traim toktok wantaim ol manmeri bilong hap bilong Is. Tasol mitupela Ann i bin mekim olsem long 1988 samting. Orait, mipela i laik stori long olsem wanem ol liklik samting mipela i bin lusim long ol dispela yia i go pinis i mekim na mipela i kisim planti blesing.

FAMILI bilong mi i bilong Amenia na mipela i bilong Amenian Sios. Ann i bilong Misin Katolik. Mitupela wantaim i no bin bihainim stret ol samting bilong lotu bilong mipela taim mipela i marit long 1950. Mi gat 27 krismas, na Ann i gat 24 krismas. Mipela i sindaun long wanpela flet antap long stua bilong mipela bilong klinim ol klos long Jersey City, New Jersey, Amerika. Long dispela taim mi holim pinis dispela bisnis inap 4-pela yia.

Long 1955 mipela i baim wanpela naispela haus i gat 3-pela rum slip long Middletown, New Jersey. Dispela haus i stap longwe long ples bisnis bilong mi inap 60 kilomita, na mi wok inap 6-pela de long wik. Long olgeta nait mi kam bek leit long haus. Mi bungim tasol ol Witnes Bilong Jehova taim ol i save kam long stua bilong mi long lusim sampela buk na nius bilong Baibel, long ol narapela taim nogat. Mi amamas tru long ritim ol dispela buk samting. Tru, wok bisnis bilong mi i pulim klostu olgeta taim na tingting bilong mi, tasol mi kirap rispektim tru Baibel.

I no longtaim na mi painimaut olsem Wastaua redio stesin (WBBR), i kamapim ol tok bilong Baibel long taim mi draiv i go i kam long stua bilong mi. Mi putim gut yau long ol dispela tok, na mi gat laik tru long harim, olsem na mi askim ol Witnes long kam lukim mi. Long Novemba 1957, George Blanton i kam long haus bilong mi na em i kirap stadi long Baibel wantaim mi.

Famili i Kamap Wanbel Long Lotu

Ann i ting olsem wanem long ol dispela samting? Orait, em yet i ken stori long yupela.

“Pastaim mi birua tru long dispela stadi. Planti taim mi distebim Baibel stadi bilong George, olsem na inap 8-pela mun em i mekim stadi long narapela hap. Long ol dispela mun, George i kirap go long ol miting long Sande long Haus Kingdom. Mi save em i tingim tru Baibel stadi bilong em, long wanem, em i gat wanpela de tasol bilong malolo long wok skin. Tasol em i kamap gutpela poroman marit na papa, na tingting bilong mi i kirap senis. Na tu, sampela taim, taim mi klinim kopi tebol na i no gat wanpela i lukim, mi kisim nius Kirap! em long olgeta taim George i bin lusim long tebol, na mi save ritim. Na sampela taim, George i ritim sampela stori bilong Kirap! long mi, em ol i no stori long ol samting bilong bilip, tasol ol i stori long Man Bilong Wokim yumi.

“Long wanpela apinun, taim George i go long Baibel stadi bilong em wantaim Brata Blanton, mi kisim wanpela nius em pikinini man bilong mipela i gat 2-pela krismas, em George, i bin putim long tebol long sait bilong bet bilong mi. Nius i stori long gutpela samting i wetim ol man i dai pinis. Maski skin bilong mi i les, mi kirap ritim, long wanem, i no longtaim i go pinis na bubu meri bilong mi i dai, na mi bel hevi stret. Kwiktaim mi pilim tok i tru bilong Baibel olsem ol daiman i no save kisim pen long wanpela hap na ol bai kirap bek long bihain. I no longtaim na mi sindaun stret long bet, na mi amamas tru long ritim na makim ol tok mi laik soim long George taim em i kam bek long haus bihain long Baibel stadi bilong em.

“Man bilong mi i no inap bilip olsem mi wankain meri olsem bipo. Taim em i bin lusim haus, mi birua long em, na nau mi amamas na stori stori long ol gutpela tok i tru bilong Baibel mi bin lainim! Mipela i no slip na stori long ol tok bilong Baibel i go inap long bikmoning. George i stori long mi long samting God i tingting pinis long mekim long dispela graun. Long dispela nait yet mi askim em long mekim stadi bilong em long haus bambai mi ken stadi wantaim ol.

“Brata Blanton i kirapim mipela long larim ol pikinini tu i sindaun wantaim mipela long stadi. Mipela i bin ting ol i yangpela tumas, ol i gat 2-pela na 4-pela krismas tasol. Tasol Brata Blanton i soim Lo 31:12 long mipela, i tok: ‘Singautim olgeta man wantaim meri na pikinini . . . , bai olgeta i ken kam na harim dispela tok.’ Mipela i amamas long dispela tok bilong stiaim mipela na mipela i stretim rot na ol pikinini i bekim tok long taim bilong Baibel stadi. Mipela i redim ol bekim wantaim ol, tasol mipela i no tokim ol long wanem tok stret ol i mas mekim. Mipela i ting dispela i bin helpim ol pikinini bilong mipela long pilim tru tok i tru. Inap oltaim mipela i tenkyu long Brata Blanton long givim gutpela tok bilong stiaim mipela bilong helpim famili long kamap strong long ol samting bilong spirit.”

Lusim Sampela Samting

Nau mipela i stap wanbel long stadi long Baibel, tasol dispela i mekim na mipela i mas winim sampela hevi. Stua bilong mi i stap longwe, olsem na planti taim mi no kam bek long haus inap 9 klok nait. Dispela em i as na mi no inap go long ol miting namel long wik, tasol mi inap go long Sande. Long dispela taim, Ann i go pinis long olgeta miting na em i wok long kamap strong hariap. Mi tu i laik go long olgeta miting, na tu, mi laik mekim gut famili stadi. Mi save olsem mi mas lusim sampela samting bilong mi. Olsem na mi sotim ol aua bilong bisnis, maski long dispela rot mi inap lusim sampela kastama bilong mi.

Dispela i kamapim gutpela samting. Mipela i bin ting famili stadi i bikpela samting, wankain olsem ol narapela 5-pela miting bilong wik long Haus Kingdom. Mipela i bin kolim famili stadi olsem namba 6 miting bilong mipela. Olsem na mipela i makim wanpela de na aua stret bilong stadi​—⁠em Trinde long olgeta wik long 8 klok nait. Sampela taim, bihain long kaikai long nait taim mipela i wasim ol laspela plet samting long haus kuk, wanpela bai tok, “Klostu em taim bilong ‘miting’!” Sapos mi leit, Ann bai kirapim stadi, na taim mi kamap mi bai mekim.

Narapela samting i helpim mipela long stap strong na wanbel olsem wanpela famili em pasin bilong ritim teks bilong de long olgeta moningtaim. Tasol em i hatwok long stretim dispela. Olgeta i save kirap long narapela narapela taim. Mipela i toktok long dispela samting na mipela i pasim tok olsem mipela olgeta bai kirap long wankain taim, kisim kaikai bilong moningtaim long 6:​30, na skelim teks bilong de wantaim. Dispela samting i helpim gut mipela. Taim ol pikinini man bilong mipela i kamap bikpela, ol i go wok long Betel. Mipela i pilim olsem pasin bilong skelim teks long olgeta de i bin helpim ol long kamap strong long ol samting bilong spirit.

Bihain Long Baptais

Mi kisim baptais long 1962, na bihain long mi gat bisnis bilong mi inap 21 yia, mi salim na kisim wanpela wok long ples i stap klostu moa long famili bilong mi bambai mipela i ken mekim wok bilong Jehova wantaim. Dispela i opim rot bilong mipela i kisim planti blesing. Mipela i putim mak olsem mipela olgeta i laik mekim wok autim tok fultaim. Dispela i kirap long taim namba wan pikinini man bilong mipela, Edward, i kirap mekim wok autim tok fultaim, o wok painia oltaim, bihain stret long pinisim haiskul long 1971 samting. Liklik taim bihain, pikinini man bilong mipela, George, i kirap mekim wok painia, na i no longtaim bihain Ann tu i mekim. Pasin bilong tripela i strongim tru mi, long wanem, ol i stori long mi long ol gutpela ekspiriens bilong ol long taim ol i autim tok. Olsem wanpela famili mipela i toktok wantaim long olsem wanem mipela i ken lusim sampela samting bilong skin bambai mipela olgeta i ken mekim wok autim tok fultaim. Mipela i pasim tok long salim haus. Mipela i bin stap long dispela haus inap 18 yia na ol pikinini i kamap bikpela long dispela haus. Mipela i laikim tru haus bilong mipela, tasol Jehova i blesim tru pasin bilong mipela long salim dispela haus.

Ol i singautim Edward long wok long Betel long 1972, na George, long 1974. Tru mitupela Ann i sori long ol, tasol mipela i no tingim tingim olsem mipela i laik ol i stap klostu long mipela na ol i marit na kamapim pikinini. Mipela i amamas olsem ol pikinini man bilong mipela i mekim wok bilong Jehova long Betel.a Mipela i wanbel wantaim tok bilong Sindaun 23:​15, i tok: “Pikinini, sapos yu kisim gutpela tingting na save, bel bilong mi bai i gutpela tru.”

Mipela i Kirap Mekim Wok Painia Salim

Tupela pikinini man bilong mipela i mekim wok long Betel, na mipela i mekim yet wok painia. Bihain, long wanpela de long 1975, mipela i kisim wanpela pas i singautim mipela long kirap mekim wok painia salim long wanpela teritori ol i no bin makim bilong wanpela kongrigesen long hap bilong Clinton County, Illinois. Man! Mipela i kirap nogut tru! Dispela i makim olsem mipela i mas lusim New Jersey. Long dispela hap mipela i stap klostu long ol pikinini man bilong mipela long New York, na tu, mipela i gat ol pren na famili. Tasol mipela i ting dispela em i wanpela asainmen bilong Jehova na mipela i bin redi long lusim sampela samting bilong mipela yet na dispela i givim ol nupela blesing long mipela.

Taim mipela i autim tok pinis inap sampela mun long dispela nupela teritori, mipela i kirap mekim ol miting long wanpela komiuniti haus long Carlyle, Illinois. Tasol mipela i laikim wanpela ples bilong bung long en long olgeta taim. Wanpela brata bilong dispela ples na meri bilong em ol i painim wanpela hap graun i gat wanpela liklik haus long en na mipela inap long rentim dispela haus. Mipela i klinim haus na toilet i stap ausait na mipela i mekim na dispela haus i kamap wanpela liklik ples bilong bung. Mipela i tingim yet wanpela hos i gat laik long save long mipela. Planti taim em i putim het long windo na lukluk i kam insait bilong save wanem samting i kamap long miting!

Bihain, mipela i kamapim Kongrigesen Carlyle, na mipela i amamas long helpim dispela wok. Tupela yangpela marit painia i bin helpim mipela, em Steve na Karil Thompson, ol tu i kam wok long dispela teritori. Tupela Thompson i bin stap long dispela hap inap sampela yia na bihain ol i go long Wastaua Baibel Skul Bilong Gileat na ol i go mekim wok misineri long Is Afrika. Ol i mekim yet wok olsem wasman raun long dispela hap.

I no longtaim na liklik ples miting bilong mipela i pulap tumas, na mipela i mas painim wanpela ples i bikpela moa. Dispela brata na meri bilong em i helpim mipela gen na ol i bin baim wanpela hap graun i gutpela moa bilong wokim Haus Kingdom long en. Mipela i amamas tru olsem sampela yia bihain, ol i singautim mipela i kam long Carlyle bilong dediketim wanpela nupela Haus Kingdom! Mi amamas tru long mekim tok bilong dediket. Asainmen bilong mipela long dispela hap em i wanpela gutpela ekspiriens long mipela, em i wanpela blesing i kam long Jehova.

Nupela Ples Wok

Long 1979 mipela i kisim wanpela nupela asainmen, em long Harrison, New Jersey. Mipela i mekim wok long dispela hap inap 12-pela yia. Insait long dispela taim mipela i kirapim wanpela Baibel stadi wantaim wanpela meri Saina, na long dispela rot mipela i kirapim planti narapela stadi wantaim sampela man na meri bilong Saina. Long dispela taim mipela i kisim save olsem i gat planti tausen stiuden na famili bilong Saina i sindaun long dispela ples. Dispela i mekim na mipela i kirap lainim tok ples Saina. Tru, dispela i makim olsem long olgeta de mipela i mas lainim dispela tok ples, tasol dispela i mekim na mipela i kirapim planti gutpela Baibel stadi wantaim ol manmeri Saina long dispela hap.

Insait long ol dispela yia mipela i lap planti taim, na moa yet long pasin bilong mipela long traim long mekim tok Saina. Wanpela taim Ann i go long haus bilong ol man na i tok em i wanpela Baibel “rat,” tasol em i laik tok em i wanpela Baibel “tisa.” Tupela tok i klostu wankain. Meri bilong haus i lap liklik na i tok: “Plis kam insait. I kam inap long nau mi no bin toktok yet wantaim wanpela Baibel rat.” Mipela i hatwok yet long mekim dispela tok ples.

Orait nau ol i makim mipela i go long narapela ples long New Jersey we mipela inap mekim yet wok long hap i gat planti manmeri Saina. Bihain ol i singautim mipela i go long Boston, Massachusetts, we ol i bin wok pinis inap 3-pela yia long kamapim wanpela grup bilong tok ples Saina. Mipela i amamas long sapotim dispela grup insait long 7-pela yia i go pinis na mipela i amamas olsem long Janueri 1, 2003, dispela grup i kamap wanpela kongrigesen.

Mipela i Kisim Planti Blesing Long Pasin Bilong Daunim Laik Bilong Mipela Yet

Long Malakai 3:​10, yumi ken ritim singaut bilong Jehova long lain bilong em long bringim ol samting ol i laik ofaim na bai em i ken givim planti gutpela blesing long ol na ol i no ken sot. Mipela i bin lusim wok bisnis bilong mipela, em mi bin laikim tru. Na mipela i bin salim haus bilong mipela, em mipela i laikim tumas. Na mipela i bin lusim tu sampela narapela samting. Tasol sapos mipela i skelim dispela wantaim ol blesing mipela i bin kisim, ol dispela samting mipela i bin lusim ol i liklik samting.

Tru tumas, Jehova i bin givim planti blesing tru long mipela! Mipela i amamas tru long lukim ol pikinini bilong mipela i bihainim tok i tru, na mipela i amamas long insait long wok autim tok fultaim long helpim ol man long kisim laip, na mipela i bin lukim olsem Jehova i bin lukautim mipela. Tru tumas, ol liklik samting mipela i bin lusim i givim ol bikpela blesing long mipela!

[Futnot]

[Piksa long pes 25]

Louise na George Blanton wantaim Ann, 1991

[Piksa long pes 26]

Haus Kingdom long Carlyle, ol i dediketim long Jun 4, 1983

[Piksa long pes 27]

Wantaim nupela kongrigesen bilong tok ples Saina long Boston

[Piksa long pes 28]

Wantaim Edward, Connie, George, na Grace