Ripot Long Wok Bilong Kingdom
God i Save Mekim Ol Samting i Kamap Bikpela Long Alaska
AIS i karamapim wanpela liklik pikinini kaikai em i save wet long gutpela taim bambai em i ken kamap bikpela. Insait long tripela mun i olsem taim bilong san long Alaska, wanpela liklik pikinini kaikai bilong kabis, em bikpela inap 3 milimita, em inap kamap bikpela olsem 40 kilogram. Em nau, dispela hap graun bipo planti man i ting em i olsem ples maunten ais i stap nating, em inap kamapim planti kaikai.
Dispela samting i kamap tru moa yet long gaden spirit long Alaska. Long dispela hap, long taim bilong kol i longtaim tru, ol Witnes Bilong Jehova i wok yet long planim pikinini kaikai, em tok bilong Kingdom. God i save mekim dispela pikinini kaikai i kamap bikpela long gutpela bel bilong planti man, olsem em i save mekim long ol narapela hap bilong graun.—1 Korin 3:6, 7.
● Taim ol sumatin i raun long bas bilong skul, wanpela yangpela Witnes, nem bilong em Vanessa, em i lukim wanpela wanskul, em Ann, em i save sindaun wanpis tasol. I olsem Ann i bel hevi, olsem na Vanessa i singautim Ann i kam na sindaun klostu long em. Yumi no kirap nogut long Ann i bel hevi! Mama bilong em i bin dai long hat-atek, na liklik taim bihain, papa bilong em i dai long sik kensa. Olsem na Ann i stap wantaim ol wanblut long Alaska.
Long wanpela Sarere, taim Vanessa i mekim wok autim tok, em i kam long haus bilong nupela pren bilong em na givim em dispela buklet, Tru God i Save Tingim Yumi? Long Mande long skul, Ann i wok long painim dispela yangpela Witnes. Ann i gat planti askim bilong Baibel, em Vanessa inap bekim. Na em i askim olsem: “Yu save mekim ol bung bilong lotu long we?” Long apinun, Ann i kam long namba wan taim long miting long Haus Kingdom.
I no longtaim na dispela yangpela meri i gat 17 krismas na em i no gat papamama, em i kisim planti “papa” na “mama,” olsem Jisas i bin tok promis. (Matyu 19:29) Na em i taim bilong bikpela amamas tru taim ol i lukim Ann—em i amamas na em i lap—em i kisim baptais bilong makim olsem em i dediket pinis long Jehova, long “Ol Man Bilong Autim Tok Long Bel Isi God i Save Givim” Kibung Distrik!
● Ol i bin mekim wok long balus i gat tupela ensin bilong Sosaiti Was Taua na bai ol inap planim pikinini kaikai, em tok bilong Kingdom, long 150 liklik ples long bikpela kantri Alaska—ol dispela ples wan wan i stap planti handet kilomita longwe long narapela narapela. Bilong man i ken kamap strong long ol samting bilong spirit, em i mas stadi long Baibel long olgeta taim, tasol ol inap mekim dispela samting long rot bilong raitim pas tasol. Planti man i hatwok long raitim pas, olsem na ol tisa bilong Baibel i mas tingim ol gutpela gutpela rot bilong skulim ol Baibel-stadi bilong ol bai ol i ken laikim stadi. Olsem wanem ol inap mekim olsem?
Kathy i gat wanpela Baibel-stadi, em Edna, na em i wok long kamap strong, maski em i stap 600 kilomita longwe long em! Long wanpela hap pepa, Kathy i save raitim ol askim bilong buk tupela i stadi long en, na em i larim hap spes i stap long pinis bilong ol wan wan askim bambai Edna i ken raitim ol bekim long en. Taim Edna i raitim pinis ol bekim, Kathy i raitim sampela tok bilong helpim Edna long save long sampela tok em i no klia long en, na em i salim pas i go bek. Kathy i tok olsem: “Mi makim Trinde apinun bilong mekim ‘stadi’ bilong mipela, na mi wok long bihainim dispela sedyul olsem mi save bihainim long ol narapela Baibel-stadi. Na tu, mi salim long Edna wanpela skinpas i gat stem na atres bilong mi long en. Tupela wik i mas lus i go inap long taim Edna i kisim dispela pas, olsem na i luk olsem pasin bilong mekim stadi long rot bilong raitim ol pas i wok isi isi.”
Tenpela mun bihain long Kathy na Edna i kirap long stadi long rot bilong raitim ol pas, tupela i amamas nogut tru taim tupela i bung wantaim long kibung distrik long Ankoris! Ol Witnes i amamas tu long bung wantaim ol Baibel-stadi na ol manmeri i gat laik long harim tok bilong Baibel, em ol i kam long sampela longwe ples i stap nabaut long Alaska.
Maski i luk olsem sampela “yangpela diwai” i kamap bikpela isi isi, taim ol i kisim lait bilong tok i tru, ol i save kamap bikpela hariap. Winim wan handet nupela manmeri bilong litimapim nem bilong Jehova ol i kisim baptais long olgeta wan wan yia long Alaska! Mipela i tok, “Tenkyu Jehova,” long mekim ol samting i kamap bikpela!