Mi Amamas Long Bihainim Tok Jehova i Givim Long Mi
EM STORI BILONG ULYSSES V. GLASS
Em narapela kain taim tru. I gat 127 sumatin tasol long dispela klas i laik winim skul. Tasol i gat 126,387 manmeri i bung na ol i kam long planti kantri. Dispela em i bung bilong namba 21 klas i winim Wastaua Baibel Skul Bilong Gileat, ol i wokim long Yanki Stediam long Nu Yok Siti long Julai 19, 1953. Bilong wanem dispela bung em i bikpela samting tru long i stap bilong mi? Bai mi stori liklik long ol samting bilong mi na famili.
MAMA i karim mi long Vinsens long Indiana, Amerika, long Februeri 17, 1912, olsem 2-pela yia samting paslain long Krais i kamap King long Kingdom, olsem Kamapim Tok Hait 12:1-5 i stori long en. Long yia paslain, papamama bilong mi i kirap stadi long Baibel na ol buk Studies in the Scriptures. Long olgeta Sande long moningtaim, papa i save kaunim wanpela stori long wanpela bilong ol dispela buk, na bihain mipela i save toktok wantaim long dispela stori.
Mama i save mekim wok long ol tok em i lainim bilong stiaim tingting bilong ol pikinini bilong em. Em i gutpela meri tru, em i gat gutpela pasin, na em i save laik long helpim ol narapela. Mipela i 4-pela pikinini, tasol mama i laikim ol narapela pikinini tu em ol i stap klostu. Em i save mekim ol samting wantaim mipela. Em i save laik long stori long mipela long ol stori bilong Baibel na singsing wantaim mipela.
Em i save singautim sampela man i save mekim wok bilong God long olgeta de i kam long haus bilong mipela. Ol i save stap wanpela o tupela de, na ol i save mekim miting na mekim tok long haus bilong mipela. Mipela i laikim moa yet ol brata i save mekim ol tok piksa na mekim ol stori long mipela. Long wanpela taim long 1919, olsem wanpela yia bihain long Namba Wan Pait i pinis, wanpela brata i kam lukim mipela na em i kolim sampela tok long mipela ol pikinini. Em i toktok long mipela i mas givim mipela yet long God—long nau yumi save kolim olsem dediket—na em i helpim mipela long save olsem wanem dediket inap helpim mipela. Long nait bihain long dispela, taim mi laik slip mi beten long Papa bilong mi long heven na tokim em olsem mi laik mekim wok bilong em long olgeta taim.
Tasol bihain long 1922 ol narapela samting i kamap long i stap bilong mi na i daunim dispela tingting i go nambatu. Mipela i go sindaun long narapela narapela ples na mipela i no bung wantaim wanpela kongrigesen bilong ol lain bilong Jehova. Papa i no stap, long wanem, em i save wok long ol rot bilong tren. Mipela i no mekim stadi long olgeta taim. Mi gat tingting long kamap man bilong wokim piksa bilong ol toksave bilong salim ol samting, olsem na mi kisim ol kos long skul na mi tingting long i go long wanpela bikpela yunivesiti.
Senisim Tingting Long Ol Samting Mi Laik Mekim
Long 1935 samting, ol lain bilong graun i laik kirapim gen pait bilong olgeta hap. Mipela i stap long Klivlan, Ohaio, na wanpela Witnes Bilong Jehova i kam long haus bilong mipela. Mipela i kirap tingting strong gen long ol samting mipela i lainim taim mipela i pikinini. Bikbrata bilong mi, Russell, i save tingting stret, na em i namba wan long kisim baptais. Mi narapela kain liklik long em, olsem sampela taim mi no save tingting stret, tasol long Februeri 3, 1936, mi tu mi kisim baptais. Mi pilim tru wok man i mas mekim taim em i dediket long Jehova, na mi lain long bihainim rot Jehova i stiaim mi long en. Long dispela yia yet tupela susa bilong mi, Kathryn na Gertrude, ol tu i kisim baptais. Mipela olgeta i mekim wok bilong God long olgeta de olsem painia.
Tasol i no olsem mipela i no tingim ol narapela samting tu. Yau bilong mi i sanap taim mi harim tambu meri bilong mi i tokim mi long wanpela naispela meri, nem bilong em Ann, em i “givim bel tru” long tok i tru em i bin harim, na em bai i kam long ol miting long haus bilong mipela. Long dispela taim Ann i wok olsem kuskus long wanpela ofis bilong loya, na insait long wanpela yia em i kisim baptais. Mi no bin tingting long marit, tasol Ann i kamapim long ples klia olsem em i laikim tru tok i tru. Em i laik insait tru long wok bilong Jehova. Em i no meri bilong tok olsem, “Inap mi mekim?” Tasol em i save tok olsem, “Wanem gutpela rot long mi ken mekim dispela samting?” Na em i save amamas long mekim i go inap long pinis bilong dispela wok. Dispela gutpela pasin bilong em i mekim na mi laikim em tru. Na tu, em i naispela meri tru, na nau em i naispela yet. Em i kamap meri bilong mi, na i no longtaim na em i kamap poroman bilong mi long mekim wok painia.
Wok Painia i Skulim Gut Mipela
Taim mipela i mekim wok painia, mipela i lain long rot bilong i stap belgut taim mipela i no gat planti samting na long taim mipela i gat planti samting. (Filipai 4:11-13) Long wanpela de long apinun mipela i no gat wanpela samting bilong kaikai. Mitupela i gat 15 toea tasol. Mi go insait long haus mit na mi askim man, “Inap yu givim mit long mipela inap long 15 toea?” Em i lukluk long mipela na em i katim 4-pela hap mit. Mi save pe bilong dispela mit i winim 15 toea. Na mipela i kaikai dispela mit na kisim liklik strong.
Sampela taim ol man i birua long mipela taim mipela i mekim wok autim tok. Long wanpela taun klostu long Sirakyus, Nu Yok, mipela i wok long tilim liklik pepa na mipela i pasim ol bikpela pepa long bros bilong mipela, i gat toksave bilong pablik-tok, na bai dispela i ken pulim ai bilong ol man na ol bai i kam long dispela bikpela pablik-tok. Tupela traipela man i holim mi na subim mi nabaut. Wanpela em i plisman, tasol em i no putim yunifom, na mi tokim em olsem mi laik lukim bes bilong em tasol em i no laik harim mi. Long dispela taim stret, Grant Suiter bilong Betel long Bruklin i kam na em i tok olsem mipela mas i go long polis-stesin bilong stretim dispela hevi. Na em i ring long ofis bilong Sosaiti long Bruklin, na ol i tokim mitupela long i go mekim gen wok bilong mipela long pasim na soim ol bikpela pepa i gat nem bilong pablik-tok na tilim liklik pepa bilong kamapim as bilong kot. Ol i kalabusim mipela, olsem mipela i bin ting ol bai mekim. Tasol mipela i tokim ol polis olsem mipela bai kotim ol long ol i bin giaman na kalabusim mipela nating, na ol i lusim mipela i go.
Long de bihain sampela bikhetmanki i kam insait long haus bung bilong mipela. Wanpela pris i bin kirapim ol long mekim olsem, na ol polis i no kam liklik long dispela hap. Ol dispela bikhetmanki i paitim stik bilong pilai beisbal long plua, na ol i rausim sampela man i sindaun long ol bang, na ol i go sanap antap long ol bang na ol i apim wanpela plak bilong Amerika na singaut olsem, “Salut long en! Salut long en!” Na ol i kirap mekim wanpela singsing (“Beer Barrel Polka”), em planti man long Amerika i save mekim. Ol i bagarapim tru miting. Nau mipela i lukim tru insait bilong tok bilong Jisas taim em i tok: “Yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela.”—Jon 15:19.
Dispela pablik-tok em tok J. F. Rutherford i bin mekim na i stap long masin pikap; long dispela taim em i presiden bilong Sosaiti Was Taua. Mitupela Ann i stap long dispela taun inap sampela de na mipela i go long haus bilong ol man na bai rot i op long ol i ken harim dispela tok long haus bilong ol. Wan wan i orait long dispela.
Volantia Long Mekim Wok Long Narapela Kantri
Bihain ol nupela nupela wok i kamap. Ol i singautim brata bilong mi Russell, na meri bilong em, Dorothy, long i go long namba wan klas bilong Skul Gileat long 1943, na ol i salim tupela i go long Kuba olsem misineri. Susa bilong mi Kathryn i bin i go long namba 4 klas. Em tu, ol i makim em bilong go long Kuba. Bihain ol i salim em i go long Ripablik Dominika na bihain long Pueto Riko. Olsem wanem long mi na Ann?
Taim mipela i harim stori bilong Skul Gileat na harim tok olsem Sosaiti i laik salim ol misineri i go long ol narapela kantri, mipela i pilim olsem mipela i mas redi long mekim dispela wok long narapela kantri. Pastaim mipela i tingting long mipela yet i mas i go, ating long Meksiko. Tasol bihain mipela i ting em i gutpela long wet na larim Sosaiti i salim mipela i go long narapela kantri taim mipela i go long Skul Gileat. Mipela i save olsem Jehova i mekim wok long dispela rot.
Sosaiti i singautim mipela i go long namba 4 klas bilong Skul Gileat. Tasol klostu long taim skul i laik kirap, N. H. Knorr, em i presiden bilong Sosaiti Was Taua long dispela taim, em i kisim save olsem i gat sampela samting Ann i no inap mekim, long wanem, em i bin kisim sik polio taim em i liklik yet. Em i toktok wantaim mi na em i tok olsem i no gutpela long salim mipela i go mekim wok long narapela kantri.
Long 2-pela yia samting bihain, taim mi mekim wok bilong redim ol samting bilong wanpela kibung, Brata Knorr i lukim mi gen na i askim mi olsem mi gat laik yet long i go long Gileat o nogat. Em i tokim mi olsem mipela bai no inap i go mekim wok long narapela kantri; i gat narapela wok em i tingting long mipela i mas mekim. Olsem na taim ol i rejistaim nem bilong ol sumatin bilong namba 9 klas long Februeri 26, 1947, mipela tu i insait long dispela klas.
Mipela i no inap lusim tingting long ol dispela mun mipela i bin stap long Gileat. Ol kos i lainim mipela long planti samting bilong spirit. Mipela i kisim planti gutpela poroman na ol i stap yet olsem. Tasol bihain mi insait long sampela wok moa bilong dispela skul.
Long Wosington na Gileat
Skul Gileat em i olsem nupela yet. Gavman bilong Amerika i no save gut tumas long wok dispela skul i save mekim, olsem na ol i bin kamapim planti askim. Sosaiti i laik bai wanpela mausman bilong en i mas i stap long Wosington D.C. Ol i salim mipela i go long dispela hap sampela mun bihain long taim mipela i winim Skul Gileat. Ol lain bilong narapela kantri em Sosaiti i singautim ol i kam long Gileat, mi mas helpim ol long kisim visa bilong ol na stretim ol pepa long gavman na bai Sosaiti i ken salim ol sumatin i winim skul i go mekim wok misineri long narapela kantri. Sampela man bilong gavman i gat stretpela tingting na i gat laik long helpim mipela. Tasol sampela i no laikim ol Witnes. Wan wan ol i gat strongpela tingting politik, olsem na ol i ting mipela i save bung wantaim ol lain nogut.
Wanpela man mi bin i go long ofis bilong en, em i bin tok bilas nogut tru long mipela, long wanem, mipela i no save salut long plak o i go long pait. Em i toktok planti long dispela na bihain mi tokim em: “Mi laik yu mas save, na yu save pinis, olsem ol Witnes Bilong Jehova i no save mekim pait wantaim wanpela lain long dispela graun. Mipela i no save insait long ol samting bilong dispela graun. Mipela i no insait long ol pait bilong ol, o ol wok politik bilong ol. Mipela i no save mekim ol dispela samting. Mipela i daunim pinis ol dispela hevi yupela i wok long kisim; mipela i gat pasin wanbel long oganaisesen bilong mipela. . . . Orait, yu laik bai mipela i mas mekim wanem? Yu laik bai mipela i mas bihainim ol pasin bilong yupela long mekim ol samting na lusim pasin bilong mipela?” Bihain long dispela, em i no mekim wanpela tok liklik.
Mi makim tupela de long olgeta wan wan wik long mekim wok wantaim ol ofis bilong gavman. Na tu, mipela i mekim wok painia salim. Long bipo, mipela i mas winim 175 aua long autim tok long olgeta mun (bihain ol i senisim i kam daun long 140 aua), olsem na mipela i save autim tok i go inap long apinun tru. Mipela i bin kisim gutpela amamas. Mipela i bin mekim stadi Baibel wantaim ol famili olgeta. Ol i kamap strong hariap. Mitupela Ann i pasim tok long mipela bai i no gat pikinini, tasol long spirit mipela i gat ol pikinini na ol tumbuna pikinini na ol pikinini bilong ol tumbuna pikinini. Bel bilong mipela i amamas tru long ol!
Long pinis bilong 1948, mi kisim wanpela wok moa. Brata Knorr i tokim mi olsem Brata Schroeder—em brata i save rejistaim nem bilong ol sumatin na em wanpela tisa bilong Skul Gileat—em bai i gat planti wok tru na em bai mekim ol narapela bikpela wok, olsem na em i askim mi long skulim ol klas bilong Gileat taim i gat wok long mekim. Mi wantaim Ann i kam bek gen long Gileat, long Saut Lansing, Nu Yok, long Disemba 18. Mi tingting planti. Pastaim mipela i save stap sampela wik tasol na bihain mipela i go bek gen long Wosington. Tasol nau mi wok long stap longpela taim long Gileat, winim long taim mi stap long Wosington.
Em long dispela taim, olsem mi bin stori long yu long kirap bilong dispela stori, namba 21 klas bilong Gileat i winim skul long Yanki Stediam long Nu Yok. Mi wanpela tisa bilong dispela skul, olsem na mi inap insait long dispela program bilong winim skul.
Wok Long Nambawan Ofis
Long Februeri 12, 1955, mipela i kirap mekim narapela nupela wok. Mipela i kamap hap bilong lain famili Betel long nambawan ofis bilong oganaisesen bilong Jehova long graun. Tasol bai mipela i mekim wanem wok? Bikpela samting em olsem, mipela i save amamas long wanem wanem wok ol i givim long mipela—mipela i laik long mekim ol kain wok em mipela i mas wok gut wantaim ol narapela long mekim. Mipela i bin mekim olsem bipo, tasol nau mipela i mas wok wantaim planti lain moa—em lain famili bilong Betel long nambawan ofis. Mipela i amamas long mekim dispela nupela wok na dispela i olsem mak bilong soim olsem Jehova i stiaim mipela.
Bikpela wok bilong mi em bilong mekim ol samting bilong helpim wok bilong raitim ol nius. Ol niusman i save laik long raitim planti stori ol man i save kirap nogut long en, na ol i save kisim ol stori i kam long ol lain i save tingting nogut long mipela, olsem na ol i raitim sampela stori giaman bilong daunim ol Witnes Bilong Jehova. Mipela i wok strong long stretim dispela pasin.
Brata Knorr i laik bai mipela i mas i gat planti wok long mekim, olsem na em i givim ol narapela wok tu long mipela. Sampela bilong ol dispela wok i stret wantaim save mi bin lain long en olsem man bilong wokim piksa bilong ol toksave bilong salim ol samting. Na ol narapela wok em mi mekim long redio-stesin bilong Sosaiti, em WBBR. I gat wok tu bilong wokim ol piksa wokabaut em Sosaiti i save wokim. Stori bilong sampela samting i bin kamap insait long oganaisesen bilong God em wanpela hap kos bilong Skul Gileat, tasol long nau Sosaiti i wokim ol kain kain samting bilong toksave long planti manmeri moa bilong Jehova na long ol narapela manmeri tu, long stori bilong ol samting i bin kamap long oganaisesen long nau. Narapela kos long Skul Gileat em pasin bilong mekim tok long pletfom, olsem na i gat wok long wokim planti samting moa bilong helpim ol brata long kongrigesen long lain long mekim tok long pletfom. Em nau, i gat planti samting long mekim.
Wok Oltaim Long Skul Gileat
Long 1961, ol i laik kirapim skul bilong lainim ol wasman bilong raun na ol komiti bilong brens, olsem na ol i kisim Skul Gileat i go long Bruklin, em nambawan ofis bilong Sosaiti Was Taua i stap long en. Mi go bek gen long klas-rum tasol nau mi no go bek olsem tisa i skulim ol sumatin long wan wan taim tasol, nogat, mi kamap wanpela tisa tru bilong dispela skul. Man! Em gutpela wok tru. Mi bilip tru olsem Skul Gileat em i presen Jehova i givim long yumi, na dispela presen i bin helpim tru oganaisesen olgeta bilong em hia long graun.
Long Bruklin, rot i op long ol sumatin i insait long klas bilong Gileat long mekim sampela samting moa em ol sumatin i bin kam long ol narapela klas long bipo i no bin mekim. I gat planti brata i save kam mekim tok long dispela skul, na ol sumatin i save bung planti taim wantaim Lain Bilong Bosim Ol Witnes na ol i bung oltaim wantaim ol famili Betel long nambawan ofis. Ol sumatin inap lain tu long ol wok bilong ofis, long pasin bilong mekim wok long Betel, na long ol narapela narapela wok bilong faktori.
Insait long ol dispela yia namba bilong ol sumatin i narapela narapela, na namba bilong ol tisa tu i narapela narapela. Na planti taim ol i bin senisim tu ples bilong skul. Nau skul i stap long gutpela hap tru long Patesen, long Nu Yok.
Wok Wantaim Ol Sumatin
Mi bin amamas tru long skulim ol dispela sumatin! Long dispela skul ol dispela yangpela manmeri i no gat laik long mekim ol samting bilong dispela graun. Ol i lusim famili bilong ol, ol pren bilong ol, ples bilong ol, na ol man i gat wankain tok ples olsem bilong ol. Olgeta samting bai i narapela kain—narapela kain kaikai, taim bilong ren na san na kol bai i narapela kain. Na tu, ol i no save wanem kantri ol bai i go long en, tasol mak ol i putim em bilong kamap misineri. I no gat wok long yumi mas kirapim ol man i gat kain tingting olsem.
Taim mi go insait long klas-rum, mi save laik long mekim ol sumatin i stap bel isi. No gat man inap lain gut sapos em i pret na bel i no stap isi. Tru, mi wanpela tisa, tasol mi save long pasin bilong i stap olsem sumatin. Long bipo mi tu i bin sindaun long ol dispela sia olsem sumatin. Tru ol i save stadi strong na lainim planti samting long Gileat, tasol mi laik bai ol i amamas long i stap bilong ol.
Mi save taim ol i go long ples wok bilong ol, i gat sampela samting ol i mas i gat bambai wok bilong ol i ken kamap gutpela. Ol i mas i gat strongpela bilip. Ol i mas i gat pasin daun tru. Ol i mas lain long wok wantaim ol narapela manmeri, ol i mas orait long ol samting i kamap, ol i mas lusim tingting long rong bilong ol narapela. Ol i mas wok yet long kisim ol pasin em spirit holi i save kamapim. Ol i mas laikim ol arapela manmeri na laikim wok em ol i bin i go bilong mekim. Em ol dispela samting mi save tokim ol sumatin planti taim long tingim taim ol i stap long Gileat.
Mi no save gut hamas sumatin mi bin skulim. Tasol mi save long tingting bilong mi long ol dispela sumatin. Taim mi stap 5-pela mun wantaim ol long klas-rum, i hatwok tru long mi lusim ol. Na long bung bilong winim skul, taim mi lukim ol i wokabaut i go long pletfom na kisim ol pepa bilong ol long winim skul, mi save olsem ol i bin pinisim tru kos bilong ol na i no longtaim na ol bai i go. Em i olsem wanpela long famili bilong mi i laik lusim mi na i go. Olsem wanem yu inap pasim bel bilong yu long laikim ol manmeri em long laik bilong ol ol i givim ol yet long mekim wok em ol dispela yangpela man na meri bai mekim?
Planti yia bihain, taim ol i save limlimbur na kam bek, mi save harim ol i stori long amamas bilong ol long wok ol i mekim na mi save olsem ol i stap yet long wok bilong ol, em wok ol i bin skul long mekim. Mi pilim olsem wanem long ol dispela samting? Man! Bel bilong mi i gutpela tru.
Tingim Ol Samting Bai Kamap Bihain
Long nau ai bilong mi i no gutpela, na mi save kisim hatwok long dispela samting. Mi no inap skulim ol sumatin moa long klas-rum long Gileat. Pastaim mi bel hevi long dispela samting i kamap, tasol long olgeta yia mi stap laip mi bin lain long orait long ol senis i kamap na mekim yet wok. Sampela taim mi save tingim aposel Pol em i gat dispela hevi bilong ‘nil . . . i save sutim skin’ bilong em. Tripela taim Pol i bin beten long dispela hevi i mas pinis, tasol Bikpela i tokim em: “Marimari bilong mi em inap long yu. Long wanem, strong bilong mi em i save kamap strong tru long man i no gat strong.” (2 Korin 12:7-10) Pol i karim dispela hevi i go inap long taim em i dai. Sapos em inap karim, orait mi mas traim. Tru, mi no inap skulim ol sumatin long klas, tasol mi amamas olsem mi save lukim yet ol sumatin i save kam i go long ol wan wan de. Sampela taim mi inap toktok wantaim ol, na taim mi tingim gutpela pasin ol i save mekim, bel bilong mi i amamas tru.
Em i gutpela samting tru long tingim ol samting bai painim yumi bihain. Ol samting i kamap long nau i olsem as bilong dispela samting. Gileat i bin mekim bikpela wok long dispela samting. Taim bikpela hevi tru i pinis, long taim dispela buk em Kamapim Tok Hait 20:12 i toktok long en i op, inap wan tausen yia bai yumi kisim gutpela skul tru long ol pasin Jehova i laik bai yumi mekim. (Aisaia 11:9) Tasol em i no pinis bilong dispela skul yumi bai kisim. Em kirap tasol bilong en. Taim yumi stap laip oltaim, bai i gat planti samting moa Jehova bai lainim yumi long en, na bai i gat planti samting moa yumi mekim taim ol laik bilong em i wok long kamap klia moa. Mi bilip tru olsem Jehova bai truim olgeta tok promis em i bin mekim, na mi laik i stap na insait long ol samting Jehova bai tokim yumi long mekim.
[Piksa long pes 26]
Bung bilong winim Skul Gileat long Yanki Stediam long Nu Yok long 1953
[Piksa long pes 26]
Gertrude, mi, Kathryn, na Russell
[Piksa long pes 26]
Mi wok wantaim N. H. Knorr (arere tru long han kais) na M. G. Henschel long stretim ol samting bilong kibung
[Piksa long pes 26]
Mi stap insait long WBBR redio-stesin
[Piksa long pes 29]
Mi stap long klas-rum long Gileat
[Piksa long pes 31]
Mi wantaim Ann, i no bipo tumas