Stadi 7
Ol Samting Bilong Bipo i Olsem Tok Lukaut
Jehova bai no inap larim ol man nogut i bagarapim Paradais. Ol pren bilong em ol tasol bai stap long en. Wanem samting bai painim ol manmeri nogut? Bilong kisim save long bekim bilong dispela askim, skelim stori bilong Noa. Noa i bin stap planti tausen yia bipo. Em i gutpela man na oltaim em i save wok strong long bihainim laik bilong Jehova. Tasol ol narapela manmeri ol i mekim ol pasin nogut. Olsem na Jehova i tokim Noa olsem Em bai kamapim tait wara na bagarapim olgeta manmeri i mekim pasin nogut. Em i tokim Noa long wokim wanpela sip na em wantaim famili bilong em ol i no inap bagarap taim Bikpela Tait i kamap.—Stat 6:9-18.
Noa na famili bilong em ol i wokim sip. Noa i toksave long ol manmeri olsem Bikpela Tait bai kamap, tasol ol i no harim tok bilong em. Ol i wok yet long mekim ol pasin nogut. Taim ol i wokim pinis sip, Noa i kisim ol animal i go insait long sip, na em wantaim famili bilong em ol tu i go insait. Nau Jehova i kamapim bikpela win na ren. Ren i pundaun inap 40 de na 40 nait. Wara i karamapim olgeta hap bilong graun.—Stat 7:7-12.
Ol manmeri nogut i dai, tasol Noa wantaim famili bilong em ol i no bagarap. Jehova i lukautim ol na ol i no bagarap long Bikpela Tait, na em i bringim ol i go insait long graun i no gat pasin nogut i stap long en. (Stat 7:22, 23) Baibel i tok, bihain wanpela taim bai kamap gen na Jehova bai bagarapim ol man i no laik mekim ol stretpela pasin. Ol gutpela manmeri bai i no inap bagarap. Ol bai i stap oltaim long Paradais long graun.—2 Pita 2:5, 6, 9.
Long nau planti manmeri i save mekim ol pasin nogut. Ol hevi i pulap long dispela graun. Planti taim Jehova i salim ol Witnes bilong em bilong givim tok lukaut long ol manmeri, tasol planti man i no laik harim tok bilong Jehova. Ol i no laik senisim pasin bilong ol. Ol i no laik bihainim ol tok God i givim long ol long wanem pasin i stret na wanem pasin i no stret. Wanem samting bai painim ol dispela man? Yu ting ol bai senisim pasin bilong ol? Planti bai i no inap senisim pasin bilong ol. Klostu nau wanpela taim bai i kamap na ol man nogut bai bagarap na ol i no inap i stap moa.—Song 92:7.
Graun bai i no inap bagarap; em bai i kamap wanpela paradais. Ol man i kamap pren bilong God, ol bai stap oltaim long Paradais long graun.—Song 37:29.