Ol i Husat?

EM LAIK bilong ol Witnes Bilong Jehova long yu ken save gut long ol. Ating sampela i sindaun klostu long yu, o ol i wanwok bilong yu, o yu bungim ol taim yu mekim ol narapela wok bilong olgeta de. Ating yu bin lukim ol long rot taim ol i tilim ol nius long ol manmeri i wokabaut i go i kam. O ating yu bin toktok liklik wantaim ol taim ol i kam long haus bilong yu.

Ol Witnes Bilong Jehova i save tingim yu na i stap bilong yu. Ol i laik mekim pasin pren long yu na stori moa long ol samting bilong ol, long bilip bilong ol, oganaisesen bilong ol, na long tingting bilong ol long ol manmeri na long dispela graun yumi olgeta i stap long en. Bilong mekim olsem ol i bin redim dispela nius bilong yu.

Long planti samting ol Witnes Bilong Jehova i wankain olsem ol narapela man. Ol i save karim ol hevi, olsem hevi bilong mani, long skin, na long bel na tingting. Sampela taim ol i popaia, long wanem, ol i no gutpela olgeta. Tasol ol i laik kisim save long rot bilong ol samting i painim ol, na ol i givim bel long stadi long Baibel bilong stretim pasin bilong ol. Ol i dediket long God bilong mekim laik bilong em, na ol i wok strong long truim dispela dediket. Long olgeta samting ol i mekim, ol i laik bai Tok Bilong God na spirit holi bilong em i stiaim ol.

Ol i ting em i bikpela samting tru long Baibel i mas i stap olsem as bilong ol bilip bilong ol, na tingting bilong ol man o ol lo bilong lotu, nogat. Ol i gat wankain tingting olsem bilong aposel Pol taim spirit holi i kirapim em long tok: “Olgeta man i save giaman, tasol God wanpela i save mekim tok tru oltaim.” (Rom 3:​4, Buk Baibela) Taim ol i harim ol tok em ol man i tok em i tok i tru bilong Baibel, ol Witnes i strong long bihainim pasin bilong ol Beria taim ol i harim tok aposel Pol i autim: “Ol i harim tok bilong Pol, na ol i laikim tru. Na long olgeta de ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.” (Aposel 17:11) Ol Witnes Bilong Jehova i ting ol man i mas skelim olgeta bilip bilong lotu wantaim Baibel​—⁠em ol bilip bilong ol Witnes na ol bilip bilong ol narapela​—⁠bilong ol i ken save Baibel i as bilong ol dispela bilip o nogat. Ol i kirapim yu, yes strongim yu, long mekim olsem taim yu toktok wantaim ol.

Dispela i kamapim klia olsem ol Witnes Bilong Jehova i bilip olsem Baibel em i Tok Bilong God. Ol i ting God i kamapim ol tok bilong 66 buk bilong Baibel na ol tok i stret wantaim ol samting i bin kamap long bipo. Ol i kolim Nupela Testamen olsem Ol Skripsa Grik, na Olpela Testamen olsem Ol Skripsa Hibru. Ol i bilip long dispela tupela hap wantaim, Ol Skripsa Grik na Hibru, na ol i bilip olsem tok Baibel i mekim i makim stret ol samting em i stori long en, tasol sampela tok i olsem tok piksa o tok bokis na i makim narapela samting. Ol i save olsem truim bilong planti tok profet bilong Baibel i kamap pinis, na sampela i wok long kamap long nau, na ol narapela bai kamap long bihain.

NEM BILONG OL

Ol Witnes Bilong Jehova? Em nau, ol i save kolim ol yet olsem. Dispela nem i makim sampela samting, em i makim olsem ol i autim nem bilong Jehova na laik bilong em, na i kamapim klia em i God tru. “God,” “Bikpela,” na “Man bilong wokim yumi”​—⁠olsem “Presiden,” “King,” na “Jeneral”​—⁠em ol biknem na yumi inap givim kain biknem olsem long planti man. Tasol “Jehova” em i wanpela nem tru na i makim God i gat olgeta strong na Man bilong wokim olgeta samting. Song 83:18 i kamapim klia dispela samting, olsem Baibel King James Version i kolim: “Bai ol manmeri i mas save olsem yu, nem bilong yu tasol em JEHOVA, yu God antap tru, na yu save bosim olgeta hap bilong graun.”

Dispela nem Jehova (o Yahweh, olsem Baibel Katolik Jerusalem Bible na sampela saveman i kolim) i stap inap olsem 7,000 taim long Ol Skripsa Hibru bilong pastaim tru. Planti Baibel i no kamapim dispela nem, tasol ol i save raitim “God” o “Bikpela.” Tasol long ol dispela Baibel tu, man inap save long wanem ol ves nem Jehova i bin stap long tok Hibru bilong pastaim, long wanem, long ol dispela ves ol i raitim GOD na BIKPELA long bikpela rait. Planti Baibel ol i tanim long nau i gat nem Jehova o nem Yahweh long en.b Olsem na long Aisaia 42:8 Baibel New World Translation i tok: “Mi Jehova. Em nem bilong mi.”

Ol Witnes Bilong Jehova i kisim nem bilong ol long stori i stap long sapta 43 bilong Buk Aisaia. Long stori bilong dispela sapta i olsem ol manmeri bilong graun ol i stap long haus kot. Jehova i singautim ol god bilong ol lain man long mekim ol samting bilong truim tok bilong ol, em ol i tok ol i save mekim stretpela pasin, o bilong harim tok ol man i mekim bilong sapotim sait bilong Jehova na long luksave long tok i tru. Long dispela hap Baibel i tok olsem: “[“Jehova i tok:,” NW ] Yupela Israel, yupela i witnes bilong mi. Mi bin makim yupela bilong i stap wokman bilong mi. Olsem bai yupela inap save long mi na bilip long mi na bai yupela i save gut olsem mi wanpela tasol mi God tru. Bipo i no gat wanpela god i bin kamap na i stap pastaim long mi. Na bihain tu bai i no gat wanpela god i kisim ples bilong mi. Mi tasol mi Bikpela [“Jehova,” NW ], na oltaim mi save kisim bek yupela.”​—⁠Aisaia 43:​10, 11.

Insait long planti tausen yia paslain long taim mama i karim Jisas, God Jehova i gat ol man i autim tok bilong em, olsem ol witnes, hia long graun. Hibru sapta 11 i kolim nem bilong sampela bilipman, em long rot bilong toktok na pasin ol i mekim i olsem ol i autim tok o witnes long Jehova. Jisas i sanap long ai bilong Pontius Pailat na i tok: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.” Baibel i tok Jisas i “save autim tok tru tasol.” (Jon 18:37; KTH 3:14) Jisas i tokim ol disaipel bilong em olsem: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.”​—⁠Aposel 1:⁠8.

Olsem na long nau long 230 kantri, inap 6 milion manmeri i autim gutnius bilong Kingdom bilong Jehova i stap long han bilong Krais Jisas, na ol i ting i stret ol i kolim ol yet olsem ol Witnes Bilong Jehova.

[Ol Futnot]

[Rait long pes 4]

Ol i dediket long God bilong mekim laik bilong em

[Rait long pes 4]

Ol i bilip olsem Baibel em i Tok Bilong God

[Rait long pes 5]

Ol i stori long dispela nem long wanpela kot

[Rait long pes 5]

Inap 6 milion Witnes i stap long winim 230 kantri

[Piksa long pes 3]

Ol i save tingim yu

[Piksa long pes 4]

Nem bilong God long tok Hibru bilong pastaim tru