Ol Witnes Bilong Jehova i Bilip Long Wanem Samting?
Ol bilip bilong ol Witnes Bilong Jehova i no stap hait, long wanem, ol buk na nius bilong ol i stap long planti handet tokples. Daunbilo i gat ol sotpela tok long ol bikpela bilip bilong ol.
1. Baibel Ol Witnes i bilip olsem “spirit bilong God yet i bin kamapim olgeta tok i stap long buk bilong God.” (2 Timoti 3:16) Jason D. BeDuhn, em wanpela profesa bilong ol tok bilong lotu, em i tok: “[Ol Witnes Bilong Jehova i kisim] stret long Baibel ol bilip bilong ol na ol pasin ol i bihainim. Ol i no makim pastaim ol tok ol i laik bai i stap long Baibel.” Ol bilip bilong ol i stret wantaim Baibel; taim ol i kamapim mining bilong ol tok bilong Baibel, ol i no mekim bilong strongim samting ol i laik bilip long en. Na tu, ol i save olsem i no olgeta tok bilong Baibel i makim samting tru tru, nogat, sampela tok bilong en em ol tok piksa. Olsem: Ol 7-pela de we God i wokim olgeta samting, i no makim 7-pela de i gat 24 aua long en, nogat, ol i makim longpela haptaim.—Stat 1:31; 2:4.
2. Man Bilong Wokim olgeta samting Trupela God i bin givim nem long em yet—Jehova (o Yahweh, olsem i stap long Baibel Katolik Jerusalem Bible na olsem sampela saveman bilong nau i save kolim)—na dispela i mekim na em i stap narapela kain long ol god giaman.a (Song 83:18) Nem bilong God long tok Hibru i stap klostu 7,000 taim long ol rait bilong Baibel bilong pastaim. Bilong kamapim klia olsem nem bilong God i bikpela samting, Jisas i beten olsem: “Nem bilong yu i mas i stap holi.” (Matyu 6:9) I stret God i laik bai yumi lotu long em wanpela tasol. Olsem na ol Witnes i no save yusim ol imis na piksa long taim ol i mekim lotu.—1 Jon 5:21.
3. Jisas Krais Em i Man Bilong Kisim Bek yumi, “Pikinini Bilong God,” na ‘namba wan samting God i bin mekim i kamap.’ (Jon 1:34; Kolosi 1:15; Aposel 5:31) God i bin wokim Jisas, olsem na em i no hap bilong wanpela God Triwan. Jisas i tok: “Papa i stap namba wan tru na i winim mi.” (Jon 14:28) Jisas i bin stap long heven paslain long em i kam daun long graun, na bihain long em i dai olsem ofa na kirap bek, em i go bek long heven. “I no gat wanpela man inap i kam long Papa long narapela rot. Nogat. Long [Jisas] tasol.”—Jon 14:6.
4. Kingdom Bilong God Dispela em wanpela gavman tru tru i stap long heven na i gat King bilong en—Jisas Krais—na lain 144,000 i wok king wantaim em, em “God i bin baim bek ol namel long olgeta manmeri bilong graun.” (KTH 5:9, 10; 14:1, 3, 4; Daniel 2:44; 7:13, 14) Ol bai bosim graun i no gat moa pasin nogut long en, em graun we planti milion manmeri husat i daun long God, ol bai i stap long en.—Sindaun 2:21, 22.
5. Graun Saveman 1:4 i tok: “Graun i no save senis. Oltaim em i stap olsem tasol.” Bihain long taim God i bagarapim ol man nogut, graun bai kamap wanpela paradais na ol stretpela manmeri bai i stap oltaim long en. (Song 37:10, 11, 29) Tok Jisas i mekim long beten, olsem “laik bilong yu i mas kamap long graun,” dispela tok bai kamap tru.—Matyu 6:10, King Jems Nupela Testamen.
6. Tok profet bilong Baibel “[God] i no save giaman.” (Taitus 1:2) Olsem na ol tok profet bilong God i save kamap tru long olgeta taim, olsem ol tok profet Baibel i mekim long pinis bilong pasin bilong dispela graun. (Aisaia 55:11; Matyu 24:3-14) Husat bai abrusim bagarap bai kamap bihain? Namba 1 Jon 2:17 i tok: “Man i bihainim tok bilong God, em bai i stap oltaim.”
7. Ol gavman Jisas i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Mak 12:17) Olsem na ol Witnes Bilong Jehova i save bihainim ol lo bilong kantri sapos ol dispela lo i no pait wantaim ol lo bilong God.—Aposel 5:29; Rom 13:1-3.
8. Autim tok Jisas i tok profet olsem ol bai autim “dispela gutnius bilong kingdom” long olgeta hap bilong graun paslain long pinis bilong pasin bilong dispela graun i kamap. (Matyu 24:14) Ol Witnes Bilong Jehova i ting em i wanpela gutpela samting tru long ol i ken insait long dispela wok i helpim ol man long kisim laip. Ol man i laik harim o nogat, em samting bilong ol. Baibel i tok: “Man i laik dring, em i mas kam na kisim wara bilong givim laip.”—KTH 22:17.
9. Baptais Ol Witnes Bilong Jehova i baptaisim tasol ol lain husat i bin stadi gut long Baibel, na i laik mekim wok bilong God olsem wanpela Witnes bilong em. (Hibru 12:1) Ol i kisim baptais long wara bilong makim olsem ol i dediket pinis long God.—Matyu 3:13, 16; 28:19.
10. I no gat lain pris pasto Jisas i tokim ol disaipel bilong em olsem: “Yupela olgeta i stap brata brata.” (Matyu 23:8) Ol Kristen bilong bipo, na ol man bilong raitim Baibel, ol i no gat lain pris pasto. Ol Witnes Bilong Jehova i bihainim dispela pasin.
[Futnot]
a Ol Witnes Bilong Jehova i no bin kamapim nem “Jehova.” Long planti handet yia i go pinis, ol i raitim nem bilong God olsem “Jehova” long planti tokples em ol i no bin raitim Baibel long en, olsem tok Inglis na tok Jeman. Sori tru, long sampela Baibel long nau ol man i rausim nem bilong God na putim long ples bilong en ol biknem, olsem “God” na “Bikpela,” na long dispela rot ol i daunim Man i as bilong ol tok bilong Baibel.
[Rait long pes 8]
“Papa i stap namba wan tru na i winim mi.”—Jon 14:28
[Rait long pes 9]
“Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14