God Em i Husat?

“GOD em i nem planti man i givim long nambawan bikpela strong i as bilong skai na graun, na em i samting ol man i save lotu long en.” (Buk The Encyclopedia Americana) God em i wanem kain?

Yu ting God em i wanpela strong o em i wanpela man i stap tru? Em i gat wanpela nem? Em i wanpela God Triwan olsem planti man i tok? Olsem wanem yumi inap kisim save long God? Baibel i kamapim ol trupela tok bilong bekim gut ol dispela askim. Bilong kirapim yumi long go klostu long God, Baibel i tok: “Em i no stap longwe long yumi olgeta wan wan.”​—Aposel 17:27.

Wanpela Strong o Man i Stap Tru?

Planti man i bilip long God ol i tingim em olsem wanpela strong, ol i no tingim em olsem wanpela man i stap tru. Olsem: Long sampela ples ol i tingim God i olsem win o paia samting. Sampela i skelim ol save ol saientis i bin kisim long heven na graun na long ol samting i stap laip na ol i kisim tingting olsem i mas i gat As bilong ol samting i kamap. Tasol ol i no laik tok dispela As bilong ol samting i kamap i gat sampela pasin bilong en olsem wanpela man i stap tru.

Tasol ol samting bilong graun i narapela kain na i soim olsem As bilong ol samting i kamap i mas i gat bikpela save tru, a? Bikpela save i soim olsem tingting i stap. Gutpela tingting i as bilong olgeta samting i stap laip em i bilong wanpela man i stap tru, God. Yes, God i gat wanpela bodi, i no bodi bilong graun olsem yumi gat, em bodi spirit. Baibel i tok: “I gat bodi bilong graun, na i gat bodi bilong heven tu.” (1 Korin 15:44) Bilong kamapim klia God em i wanem kain, Baibel i tok: “God em i Spirit.” (Jon 4:24) Bodi bilong wanpela spirit i narapela kain tru long bodi bilong yumi, na ai bilong ol man bilong graun i no inap lukim bodi spirit. (Jon 1:18) Na tu, i gat ol narapela spirit ol man i no inap lukim. Em ol ensel​—“ol pikinini man bilong God.”​—Stat 6:2.

I no gat wanpela man i bin wokim God, tasol God em i wanpela man i stap tru i gat bodi spirit, olsem na i stret long ting em i gat hap bilong sindaun long en. Baibel i stori long ples spirit na tokim yumi olsem heven em “ples bilong [God].” (1 King 8:43) Na tu, wanpela man bilong raitim Baibel, em Pol, em i tok: ‘Krais i bin go insait long heven stret. Na nau em i stap klostu tru long God, na em i wok long helpim yumi.’​—Hibru 9:24.

Long Baibel, dispela tok “spirit” i gat narapela mining bilong en tu. Elihu i tok: “Spirit bilong God I Gat Olgeta Strong i bin wokim mi.” (Jop 33:4) Spirit hia i no makim God yet, dispela spirit em i wanpela strong God i save mekim wok long en bilong mekim ol samting em i gat laik long mekim. God i bin mekim wok long en bilong wokim ples antap, graun, na olgeta samting i stap laip. (Stat 1:2; Song 33:6) Spirit holi em i nem bilong dispela spirit bilong God. God i bin mekim wok long spirit holi bilong em bilong kirapim ol man long raitim Baibel. (2 Pita 1:​20, 21) Olsem na spirit holi em i dispela strong ol man i no inap lukim na God i yusim bilong kamapim laik bilong em.

God i Gat Nem Bilong Em Yet

Man bilong raitim Baibel, em Agur, em i kamapim dispela askim: “Husat i bin holim win long han bilong en? Na husat i bin putim wara long ol klaut, olsem man i putim wanpela samting long laplap na karamapim? Husat i bin strongim olgeta hap bilong graun na nau graun i stap? Wanem nem bilong en na nem bilong pikinini man bilong en?” (Sindaun 30:4) I olsem Agur i laik askim man, ‘Yu save long nem o lain famili bilong wanpela man bilong graun i bin mekim ol dispela samting?’ God tasol inap bosim ol samting bilong graun i gat bikpela strong olsem win, na paia samting. Ol samting long graun i kamapim klia tru olsem God i stap, tasol ol dispela samting i no inap autim nem bilong God. Yumi bai i no gat rot long save long nem bilong God sapos God yet i no kamapim long yumi. Na em i bin mekim olsem na tok: “Mi tasol mi Bikpela. Bikpela [“Jehova,” NW ], em nem bilong mi.”​—Aisaia 42:8.

Nem tru bilong God, Jehova, i stap olsem 7,000 taim long Ol Skripsa Hibru. Jisas Krais i bin kamapim dispela nem long ol narapela na litimapim dispela nem long ai bilong ol. (Jon 17:​6, 26) Nem hia i stap long laspela buk bilong Baibel, em i olsem hap bilong dispela tok “Haleluya,” mining bilong en i olsem “litimapim nem bilong God.” “Ya” em i pasin bilong sotim nem “Jehova.” (KTH 19:​1-6, long sta daunbilo) Tasol planti Baibel bilong nau ol i no save mekim wok long dispela nem. Long sampela tok ples, ol i save yusim tok olsem “BIKPELA” o “GOD” long bikpela rait bilong kamapim klia ol i no stori long ol biknem tasol olsem “Bikpela” na “God.” Sampela saveman i ting ol i bin kolim nem bilong God olsem Yawe.

Bilong wanem ol man i gat kain kain tingting long nem bilong dispela Man i bikpela na i winim ol narapela? Dispela hevi i bin kamap planti handet yia i go pinis taim ol Juda i bihainim bilip kranki na ol i no kolim moa nem bilong God na ol i stat long yusim tok Hibru i makim “Bikpela” taim ol i ritim hap bilong Baibel em dispela nem i stap long en. Long tok Hibru bilong Baibel, ol i no bin raitim ol leta olsem a, e, i, o, u, olsem na i no gat rot bilong yumi ken save tru olsem wanem Moses, Devit, na ol narapela i bin kolim ol leta i makim nem bilong God. Tasol inap planti handet yia nau ol man i bin kolim olsem “Jehova” long tok Inglis na ol i kolim wankain long planti narapela tok ples.​—Lukim sta daunbilo bilong Kisim Bek 3:15; Aisaia 26:​4, King James Version.

Ol man i no inap save gut long pasin bilong kolim nem bilong God long tok Hibru bilong bipo, tasol mining bilong dispela nem i no stap hait. Mining bilong nem bilong em i olsem “Em i Mekim i Kamap.” Jehova i kamapim klia olsem em i Man bilong kamapim laik bilong em. Em i mekim olgeta samting em i tingting pinis long mekim na em i save truim ol tok promis bilong em. God tru i gat strong long mekim dispela samting, em tasol inap holim kain nem olsem.​—Aisaia 55:11.

Olsem na dispela nem Jehova i kamapim ples klia God i Gat Olgeta Strong em i no wankain olsem ol narapela god. Na em i as dispela nem i stap planti taim long Baibel. Planti Baibel i no save yusim dispela nem bilong God, tasol Song 83:18 (NW ) i tok klia olsem: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” Taim Jisas i stap long graun em i skulim ol lain bilong em olsem: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi.’ ” (Matyu 6:9) Olsem na taim yumi prea, na tokim ol narapela long em, na litimapim nem bilong em long ai bilong ol narapela yumi mas kamapim nem bilong God.

Yu Ting Jisas Em i God?

Jehova i kamapim klia tru olsem pikinini man bilong em i husat. Gutnius Matyu i raitim i tok olsem bihain long Jisas i baptais, “wanpela maus long heven i singaut olsem, ‘Dispela em i Pikinini bilong mi. Mi laikim em tumas. Bel bilong mi em i amamas long em.’ ” (Matyu 3:​16, 17) Jisas Krais em i Pikinini bilong God.

Tasol sampela manmeri bilong lotu ol i tok Jisas em i God. Na sampela i tok God em i God Triwan. Bilip bilong dispela i olsem, “Papa em i God, Pikinini em i God, na Spirit Holi em i God. Tasol i no gat tripela God, i gat wanpela God tasol.” Ol man i tok tripela wantaim “i stap oltaim na ol i bikpela wantaim.” (The Catholic Encyclopedia) Yu ting kain tingting olsem i stret?

Baibel i stori long Jehova na i tok olsem: “Oltaim oltaim yu stap God, long bipo na long bihain tu.” (Song 90:2) Em i “King bilong olgeta taim”​—em i no bin kamap nupela long wanpela taim na em i no save dai. (1 Timoti 1:17) Tasol Jisas em i “namba wan pikinini bilong God,” na em i namba wan “bilong olgeta samting God i bin wokim.” (Kolosi 1:​13-15; KTH 3:14) Jisas i stori olsem God em i Papa bilong em na tok: “Papa i stap namba wan tru na i winim mi.” (Jon 14:28) Na em i bin tok olsem i gat sampela samting Papa tasol i save long en na em yet na ol ensel nogat. (Mak 13:32) Na tu, Jisas i bin beten long Papa bilong em na i tok: “Yu no ken bihainim laik bilong mi. Nogat. Yu mas bihainim laik bilong yu tasol.” (Luk 22:42) Sapos Jisas i no beten long wanpela Man i winim em, orait em i beten long husat? Na God i bin kirapim bek Jisas long matmat, Jisas yet i no bin mekim dispela samting.​—Aposel 2:32.

Baibel i kamapim klia olsem Jehova em i God i Gat Olgeta Strong, na Jisas em i Pikinini bilong em. Tupela i no gat wankain strong paslain long Jisas i kam long graun o long taim em i stap long graun; na Jisas i no bin kisim strong olsem Papa taim em i kirap bek na go long heven. (1 Korin 11:3; 15:28) Olsem yumi skelim pinis, spirit holi, em ol i tok em namba 3 man bilong God Triwan, dispela i no makim wanpela man, nogat. Spirit holi em wanpela strong God i save yusim bilong mekim wanem samting em i laik mekim. Olsem na dispela tok bilong God Triwan i no wanpela tok bilong Baibel.a Baibel i tok: “Bikpela, em wanpela tasol em i God bilong yumi.”​—Lo 6:4.

Save Gut Long God

Bilong laikim tumas God na lotuim em wanpela tasol, yumi mas save long em i husat tru. Olsem wanem yumi inap save gut long God? Baibel i tok: “Stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en i stap oltaim oltaim.” (Rom 1:20) Wanpela rot bilong save gut long God, em yumi ken lukim na tingim ol samting em i bin wokim na tenkyu long en.

Tasol ol samting God i bin wokim i no helpim yumi long save long olgeta samting bilong God. Olsem: Bilong save olsem em i wanpela Man i stap tru​—em wanpela spirit​—na em i gat wanpela nem, yumi mas skelim Baibel. Pasin bilong stadi long Baibel em nambawan rot bilong save gut long God. Long Baibel Jehova i givim bikpela save moa long yumi long em i wanem kain God. Na tu, em i tokim yumi long ol samting em i tingting pinis long mekim na em i skulim yumi long bihainim pasin bilong em. (Amos 3:7; 2 Timoti 3:​16, 17) Yumi ken amamas tru olsem God i laik bai yumi “ken save long as bilong tok tru” na bai yumi inap kisim helpim long ol samting em i givim long yumi! (1 Timoti 2:4) Olsem na i gutpela tru sapos yumi wok strong tru long kisim save long Jehova.

[Futnot]

[Ol Piksa long pes 5]

God i bin mekim wok long spirit holi bilong em long wokim graun na long kirapim ol man long raitim Baibel

[Piksa long pes 5]

Wanpela nek long heven i bin tok: “Dispela em i Pikinini Bilong Mi”

[Piksa long pes 7]

Jisas i bin prea long God​—em Man i winim em

[Piksa long pes 7]

Jisas i kamapim nem bilong God long ol narapela

[Ol Piksa long pes 7]

I gat rot bilong yumi ken save gut long God