Yumi Mas Save Long God

LONG nait ating yu amamas tru long lukim ol sta long skai taim i no gat ol klaut i pasim, a? Smel bilong ol plaua i gat kala kala i naispela tru, a? Olsem wanem? Yu save amamas long harim singsing bilong ol pisin na liklik pairap bilong ol lip i meknais long win? Na tingting bilong yumi i kirap tru long ol traipela weil na ol narapela pis samting i stap long solwara! Na tu, bel bilong olgeta manmeri inap kotim ol long wanem ol pasin i stret na wanem ol pasin i no stret, na kru bilong ol i narapela kain samting tru. Bai yu tok wanem bilong stori long ol dispela gutpela samting i bin kamap olsem wanem?

Sampela i bilip olsem ol dispela samting i bin kamap nating tasol. Sapos dispela tok i tru, orait bilong wanem ol manmeri i save bilip long God? Na i gat wanem as na sampela marasin samting i bung nating wantaim inap kamapim ol man em laik bilong lotu i stap long skin bilong ol?

“Lotu i bikpela pasin tru bilong man na em samting ol man i mekim maski ol i maniman o rabisman o ol i gat bikpela skul o liklik skul.” Dispela em i bikpela tingting Profesa Alister Hardy i bin kamapim long wanpela buk (The Spiritual Nature of Man). I no longtaim i go pinis na wok bilong skelim kru bilong man i kirapim sampela saientis long tok olsem pasin bilong mekim lotu em i samting i stap long tingting bilong olgeta man. Wanpela buk (Is God the Only Reality?) i tok: “Wok bilong painimaut as bilong laip long rot bilong lotu . . . em i wanpela wok olgeta lain bilong olgeta ples i bin mekim kirap long taim ol man i stat long kamap long graun.”

Tingim tok wanpela saveman i bin kamapim klostu 2,000 yia i go pinis. Em i tok: “Olgeta wan wan haus i gat man i bin wokim em. Tasol God i bin wokim olgeta samting.” (Hibru 3:4) Namba wan ves bilong Baibel i tok: “Bipo bipo tru God i mekim kamap skai na graun na olgeta samting i stap long en.”​—Stat 1:1.

Tasol, God em i husat tru? Ol man i no wanbel long bekim bilong dispela askim. Taim ol i askim wanpela yangpela man Japan, nem bilong em Yoshi, long God i husat, em i tok: “Mi no klia. Mi wanpela Budis, na i no bikpela samting long mi yet long save long God i husat.” Tasol Yoshi i tok olsem i tru planti man i ting Buda yet em i wanpela god. Nick em i wanpela bisnisman i gat 60 samting krismas, em i bilip long God na tingim em i olsem wanpela bikpela strong. Taim ol i askim em long stori long ol samting bilong God em yet i save long en, Nick i wokim tingting inap longpela taim liklik na i tok: “Pren, dispela askim i hatwok tru long bekim. Mi inap tok olsem God i stap, na em tasol.”

Sampela pipel i save “lotu long ol samting God i bin wokim” na ol i no lotu long God yet. (Rom 1:25) Planti milion pipel i save lotuim ol tumbuna bilong ol i dai pinis, long wanem, ol i ting God i stap longwe tumas na ol i no gat rot bilong i go klostu long em. Long lotu Hindu i gat planti god man na god meri. Long taim bilong ol aposel bilong Jisas Krais, ol man i bin lotuim kain kain god, nem bilong sampela em Sus na Hermes. (Aposel 14:​11, 12) Planti lotu i gat nem Kristen ol i save skulim ol man olsem God em i God Triwan, olsem Papa em i God, Pikinini em i God, na Spirit Holi em i God.

Tru, olsem Baibel i tok “i gat planti samting ol i kolim ‘god,’ na planti samting ol i kolim ‘bikpela.’ ” Tasol Baibel i tok moa olsem: “Yumi gat wanpela God tasol, em God Papa. Em i as bilong olgeta samting.” (1 Korin 8:​5, 6) Yes, i gat wanpela tasol i God tru. Tasol em i husat? Em i gat wanem kain pasin? Em i bikpela samting long yumi mas save long bekim bilong ol dispela askim. Jisas yet i prea long God tru na tok olsem: “Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) I gat as na yumi ken tok olsem yumi mas save long God em i husat tru bilong yumi ken stap oltaim oltaim.

[Piksa long pes 3]

Ol i kamap olsem wanem?

[Kredit Lain]

Whale: Courtesy of Tourism Queensland

[Piksa Kredit Lain long pes 2]

COVER: Index Stock Photography © 2002