God Em i Husat?
BAI yu bekim dispela askim olsem wanem? Sampela i ting ol i save gut long God, na em i wanpela gutpela pren bilong ol. Na sampela i tingim God olsem wanpela wanblut, tasol ol i no save tumas long em. Ol i bilip olsem em i stap, tasol ol i no save gut long em. Sapos yu bilip long God, bai yu bekim ol askim daunbilo olsem wanem?
1. God em i wanpela man tru?
2. God i gat wanpela nem?
3. Jisas em i God i Gat Olgeta Strong?
4. God i save tingim mi?
5. God i save laikim olgeta kain lotu?
Sapos yu askim ol narapela man long bekim ol dispela askim, ating bai ol i kamapim ol kain kain bekim. Olsem na yumi no kirap nogut long ol man i bin kamapim ol kain kain stori nating na ol kain kain tingting kranki long God.
Ol Bekim i Bikpela Samting
Wanpela taim Jisas Krais i toktok wantaim wanpela lotumeri em i bin bungim long wanpela hulwara, na em i tokim meri, ol man i mas save gut long God. Meri hia em i wanpela Samaria, na em i tokaut olsem Jisas em i wanpela profet. Tasol em i tingting planti long wanpela samting. Lotu bilong Jisas i narapela kain long lotu bilong em. Taim em i kamapim dispela tingting bilong em, Jisas i tokim em stret: “Yupela Samaria i save lotu long samting yupela i no save long en.” (Jon 4:19-22) Em nau, tok bilong Jisas i soim olsem i no olgeta lotuman i save gut long God.
Orait yu ting dispela tok bilong Jisas i makim olsem i no gat wanpela man inap save gut long God? Nogat. Jisas i tok moa long dispela meri: “Olgeta man i laik lotu tru bai ol i lotu long Papa long strong bilong Holi Spirit na long pasin i tru. Na Papa i laikim tumas bai ol kain man olsem i mas lotu long em.” (Jon 4:23) Olsem wanem long yu? Yu insait long dispela lain ol i save lotuim God long “Holi Spirit na long pasin i tru”?
Yu mas save gut long bekim bilong dispela askim. Bilong wanem dispela em i bikpela samting? Long beten bilong em, Jisas i kamapim klia olsem yumi mas kisim stretpela save, em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Tru tumas, bilong kisim laip long bihain yu mas save gut long God!
Tasol yu ting yumi inap save gut long God? Yes, yumi inap! Orait yu inap painim dispela save olsem wanem? Jisas i tok olsem long em yet: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:6) Na em i tok moa: “I no gat wanpela man i save long Papa. Pikinini tasol wantaim ol man Pikinini i soim Papa long ol, ol tasol i save long Papa.”—Luk 10:22.
Olsem na rot bilong save long God, em yumi mas save long ol tok bilong Jisas Krais, em Pikinini Bilong God. Jisas i tok promis long yumi olsem: “Sapos yupela i holim strong tok bilong mi, orait yupela bai i stap ol disaipel tru bilong mi. Na yupela bai i save long tok tru, na tok tru bai i mekim yupela i kamap fri.”—Jon 8:31, 32.
Orait dispela 5-pela askim yumi bin kamapim pastaim, Jisas bai bekim olsem wanem?
[Piksa long pes 4]
Yu save lotuim wanpela God yu no save gut long em?