Ol Kristen i Lotuim God Long Spirit na Long Pasin i Tru
“God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.”—JON 4:24.
1. God i laikim wanem kain lotu?
PIKININI bilong Jehova, Jisas Krais, em i kamapim klia wanem kain lotu Papa bilong em long heven i save laikim. Taim Jisas i autim tok long wanpela meri Samaria long hulwara klostu long taun Sikar, em i tok: “Yupela Samaria i save lotu long samting yupela i no save long en. Tasol mipela Juda i save lotu long samting mipela i save long en, long wanem, God i bin makim mipela Juda long i go pas long dispela wok bilong kisim bek ol manmeri. Tasol taim i laik kamap, na nau i kamap pinis, na olgeta man i laik lotu tru bai ol i lotu long Papa long strong bilong Holi Spirit [“long spirit,” NW ] na long pasin i tru. Na Papa i laikim tumas bai ol kain man olsem i mas lotu long em. God em i Spirit. Na ol man i lotu long em, ol i mas lotu long strong bilong Holi Spirit [“long spirit,” NW ] na long pasin i tru.” (Jon 4:22-24) Wanem insait bilong dispela tok?
2. Wanem samting i as bilong lotu bilong ol Samaria?
2 Ol Samaria i gat sampela bilip kranki. Ol i bilip long 5-pela buk tasol bilong Baibel, em Stat i go inap Lo, em ol i bin tanim tok bilong ol na kolim Rait Bilong Ol Samaria. Ol Samaria i no save tru long God, tasol ol Juda i bin kisim Tok bilong God bilong lukautim. (Rom 3:1, 2) I gat rot na God i ken laikim ol gutpela Juda na ol narapela man. Tasol ol i mas mekim wanem?
3. Bilong lotuim God long ‘spirit na long pasin i tru,’ yumi mas mekim wanem?
3 Bilong mekim ol samting Jehova i laikim, ol Juda, ol Samaria, na ol narapela man i bin stap bipo ol i mas mekim wanem? Ol i mas lotuim em long ‘spirit na long pasin i tru.’ Yumi tu i mas mekim olsem. Tru, taim yumi lotu long God, yumi mas givim bel long lotuim em na pasin bilong laikim em tumas na bilip tru long em i mas kirapim yumi long mekim olsem, tasol bilong lotuim God long spirit, yumi mas kisim spirit holi bilong em na larim dispela i stiaim yumi. Long rot bilong stadi na bihainim Tok Bilong God, spirit bilong yumi, olsem tingting yumi holim, i mas stret wantaim tingting bilong em. (1 Korin 2:8-12) Na tu, bilong Jehova i ken orait long lotu bilong yumi, yumi mas lotuim em long tok i tru. Lotu yumi mekim i mas stret wantaim ol tok em Baibel i kamapim bilong God na ol samting em i tingting pinis long mekim.
Yumi Inap Painim Tok i Tru
4. Sampela i gat wanem tingting long tok i tru?
4 Sampela man i bin skul long save bilong ol man, ol i ting yumi no inap painim wanpela tok i tru em i tru olgeta. Wanpela man bilong Swiden, Alf Ahlberg, em i raitim buk na i tok: “Planti askim ol man i mekim bilong painim save, em ol kain askim i no gat bekim tru bilong en.” Tru, sampela man i tok i no gat wanpela tok i tru em i tru olgeta, tasol yu ting dispela tok bilong ol i stret? Krais Jisas i no bin ting olsem.
5. I gat wanem as na Jisas i kam long graun?
5 Tingim olsem yumi stap na lukim dispela samting: Em yia 33 C.E., na Jisas i sanap long ai bilong Gavena Pontius Pailat bilong Rom. Jisas i tokim Pailat: “Mama i karim mi na mi kam long dispela graun bilong mekim wanpela wok tasol, em bilong autim tok tru.” Pailat i askim em: “Tok tru, em wanem samting tru?” Tasol em i no wet long Jisas i mekim sampela tok moa.—Jon 18:36-38.
6. (a) Dispela tok “tok i tru” i makim wanem samting? (b) Jisas i givim wanem wok long ol disaipel bilong em?
6 Dispela tok “tok i tru” i makim olsem samting i stap tru, na samting i bin kamap tru tru, na tok bilong wanpela samting i stret. Tasol olsem wanem? Jisas i bin autim tok i tru bilong ol kain kain samting? Nogat. Em i tingim wanpela tok i tru stret. Na em i givim wok long ol disaipel bilong em long autim dispela tok i tru. Em i tokim ol: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Paslain long pinis bilong dispela pasin nau yumi stap long en, ol disaipel tru bilong Jisas bai autim “tok tru bilong gutnius” long olgeta hap bilong graun. (Galesia 2:14) Dispela wok bai inapim dispela tok bilong Jisas: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Olsem na i bikpela samting long yumi mas save long husat ol i wok long autim gutnius bilong Kingdom na lainim olgeta lain manmeri long tok i tru.
Rot Bilong Save Long Tok i Tru
7. Olsem wanem yu inap kamapim klia olsem Jehova em i As bilong tok i tru?
7 Jehova em i As bilong olgeta tok i tru bilong em yet na bilong ol samting em i tingting pinis long mekim. Devit, man bilong raitim song, em i kolim Jehova olsem “God bilong mekim pasin tru tasol.” (Song 31:5; 43:3) Jisas i tokaut olsem tok bilong Papa bilong em i tru olgeta, na em i tok tu olsem: “Tok i stap long buk bilong ol profet olsem, ‘God bai i skulim olgeta manmeri.’ Orait olgeta manmeri i harim tok bilong Papa na i kisim save long em, ol i save kam long mi.” (Jon 6:45; 17:17; Aisaia 54:13) Olsem na ol man i wok long painim tok i tru, Jehova, Nambawan Tisa, i mas skulim ol. (Aisaia 30:20, 21) Ol i mas “save gut long God.” (Sindaun 2:5) Na long gutpela pasin sori Jehova i bin skulim ol man long tok i tru, o kamapim long ol, long kain kain rot.
8. God i bin givim tok i tru long wanem ol rot?
8 Olsem: Long rot bilong ol ensel, God i bin givim Lo long ol Israel. (Galesia 3:19) Na long rot bilong ol driman, em i bin tok promis long Abraham na Jekop olsem ol bai kisim sampela blesing. (Stat 15:12-16; 28:10-19) Na tu, God i stap long heven na mekim tok, olsem em i bin mekim long taim Jisas i kisim baptais na long graun ol i harim dispela tok: “Dispela em i Pikinini bilong mi. Mi laikim em tumas. Bel bilong mi em i amamas long em.” (Matyu 3:17) Na yumi ken tenkyu olsem God i bin kirapim ol man bilong raitim Baibel long kamapim tok i tru. (2 Timoti 3:16, 17) Olsem na taim yumi lain long Tok Bilong God, yumi inap ‘bilip long tok i tru.’—2 Tesalonaika 2:13.
Tok i Tru na Pikinini Bilong God
9. Olsem wanem God i bin mekim wok long Pikinini bilong em bilong kamapim tok i tru?
9 God i bin kamapim tok i tru long ol man long rot bilong Pikinini bilong em, Jisas Krais. (Hibru 1:1-3) I no gat wanpela man i bin autim tok i tru olsem Jisas i bin mekim. (Jon 7:46) Taim em i go bek long heven, long dispela taim tu em i kamapim tok i tru em i bin kisim long Papa bilong em. Olsem: Aposel Jon i kisim ‘tok i stap hait em Jisas Krais i bin kamapim ples klia. God i soim dispela tok long Jisas, bilong em i ken soim ol wokman bilong en long ol samting i mas kamap kwiktaim.’—KTH 1:1-3.
10, 11. (a) Tok i tru Jisas i bin autim em i samting bilong wanem wok? (b) Olsem wanem Jisas i bin mekim tok i tru i kamap samting tru?
10 Jisas i tokim Pontius Pailat olsem Em i bin kam long graun bilong autim tok i tru. Taim Jisas i mekim wok bilong em long graun, em i kamapim klia olsem dispela tok i tru em i samting bilong wok em Kingdom bilong God long han bilong Krais bai mekim bilong kamapim klia olsem i stret Jehova i stap Nambawan Bos. Tasol bilong autim tok i tru, Jisas i mas mekim sampela samting moa—em i no ken autim tok na skulim ol man tasol, nogat. Jisas i mekim dispela tok i tru i kamap samting tru—em inapim dispela tok i tru. Olsem na aposel Pol i tok: “Yupela i no ken larim wanpela man i sutim tok long yupela, na tok yupela i no bihainim ol lo bilong kaikai na dring na ol lo bilong ol bikpela de bilong lotu na bilong ol lotu bilong nupela mun na bilong de Sabat. Dispela ol samting ol i olsem ol piksa nating bilong ol samting i laik kamap bihain. Tasol Krais em i samting tru.”—Kolosi 2:16, 17.
11 Wanpela samting tok i tru i bin kamap tru long en i olsem: Mama i karim Jisas long Betlehem olsem tok profet i bin makim. (Maika 5:2; Luk 2:4-11) Na tok i tru i bin kamap tru taim Mesaia i kamap long pinis bilong 69 “taims 7-pela yia” olsem tok profet bilong Daniel i makim. Dispela samting i bin kamap taim Jisas i givim em yet long God long taim em i kisim baptais na spirit holi i makim em, long taim stret, long 29 C.E. (Daniel 9:25; Luk 3:1, 21, 22) Na tok i tru i bin kamap tru long wok Jisas i mekim bilong autim tok bilong Kingdom. (Aisaia 9:1, 2, 6, 7; 61:1, 2; Matyu 4:13-17; Luk 4:18-21) Na em i kamap tru long taim em i dai na kirap bek.—Song 16:8-11; Aisaia 53:5, 8, 11, 12; Matyu 20:28; Jon 1:29; Aposel 2:25-31.
12. Bilong wanem Jisas inap tok, “Mi as bilong tok tru”?
12 Jisas Krais em i bikpela samting bilong tok i tru, olsem na em inap tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot.” (Jon 14:6) Taim ol man i “bihainim tok tru” na bilip long wok bilong Jisas insait long samting God i tingting pinis long mekim, ol i no paul moa long pasin bilong lotu long God. (Jon 8:32-36; 18:37) Ol man i gat pasin olsem bilong sipsip ol i kisim tok i tru na bihainim Krais, olsem na ol bai kisim laip i stap gut oltaim oltaim.—Jon 10:24-28.
13. Bai yumi skelim wanem 3-pela samting bilong tok i tru bilong Baibel?
13 Olgeta tok i tru em Jisas na ol disaipel i bin autim, olgeta wantaim i insait long bilip Kristen tru. Olsem na ol man i “bihainim tok bilong God na ol i bilip,” ol i “save wokabaut long pasin bilong tok tru.” (Aposel 6:7; 3 Jon 3, 4) Orait husat long nau i wokabaut long pasin bilong tok i tru? Husat tru i lainim olgeta lain manmeri long tok i tru? Bilong bekim ol dispela askim, bai yumi stori long ol Kristen bilong pastaim na skelim 3-pela samting bilong tok i tru bilong Baibel long ol samting bilong (1) bilip, (2) pasin bilong lotu long God, na (3) pasin bilong yumi yet.
Tok i Tru na Ol Bilip
14, 15. Ol Kristen bilong pastaim na ol Witnes Bilong Jehova ol i gat wanem tingting long Baibel?
14 Ol Kristen bilong pastaim i save litimapim Tok bilong Jehova. (Jon 17:17) Baibel i as bilong olgeta bilip na pasin bilong lotu bilong ol. Clement bilong Aleksandria, bilong 200 yia samting bihain long Krais, em i tok: “Ol man i wok strong long painim tok i tru, bai ol i no les long painim; bai ol i painim i go i go inap long ol i ken save, Baibel i stap olsem as bilong ol bilip ol i holim.”
15 Olsem ol Kristen bilong pastaim, ol Witnes Bilong Jehova i save litimapim ol tok bilong Baibel. Ol i bilip olsem: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru.” (2 Timoti 3:16) Orait yumi ken stori long sampela bilip bilong ol Kristen bilong pastaim em ol wokboi bilong Jehova long nau i bin kisim save long en, long wanem, ol i save mekim wok long Baibel olsem nambawan buk ol i stadi long en.
Tok i Tru na Man i Dai Pinis
16. Wanem samting tru i painim man i dai pinis?
16 Ol Kristen bilong pastaim i bilipim ol tok bilong Baibel, olsem na ol i lainim ol man long samting tru i painim man i dai pinis. Ol i save olsem ‘taim man i dai, em i pinis olgeta.’ (Jop 14:10) Na tu ol i save, ‘man i dai pinis, em i no inap save long wanpela samting.’—Saveman 9:5, 10.
17. Bai yu stori olsem wanem long gutpela samting i wetim man i dai pinis?
17 Tasol ol disaipel bilong Jisas i bin bilip olsem, ol man God i tingim yet ol, ol bai kirap bek, olsem kisim laip gen. Pol i kamapim klia dispela bilip taim em i tok: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Bihain, Minucius Felix, em man i tok em i Kristen, em i tok: “God i bin wokim man, olsem na sapos sampela i tok God i no inap wokim gen man i kamap nupela, ating ol dispela man ol i longlong na i no gat tingting, a?” Olsem ol Kristen bilong pastaim, ol Witnes Bilong Jehova ol i holimpas ol tok i tru bilong Baibel long indai na kirap bek. Orait nau yumi ken stori long God na Krais ol i husat tru.
Tok i Tru na God Triwan
18, 19. Olsem wanem yumi ken tok, bilip bilong God Triwan i no wanpela tok bilong Baibel?
18 Ol Kristen bilong pastaim ol i no bilip olsem God na Krais na spirit holi ol i God Triwan. Wanpela buk (The Encyclopædia Britannica) i tok: “Dispela tok God Triwan na dispela bilip bilong God Triwan em i no stap long Nupela Testamen, na tu, Jisas na ol disaipel bilong em ol i no tok pait long Sema [wanpela beten Hibru] long Olpela Testamen: ‘Yupela Israel, harim gut. Bikpela, em wanpela tasol em i God bilong yumi’ (Lo 6:4).” Ol Kristen i no lotuim god triwan bilong ol Rom o ol narapela god. Ol i bilip long tok bilong Jisas olsem yumi mas lotu long Jehova wanpela tasol. (Matyu 4:10) Na tu ol i bilipim tok bilong Krais: “Papa i stap namba wan tru na i winim mi.” (Jon 14:28) Long nau ol Witnes Bilong Jehova i holim wankain tingting.
19 Ol disaipel bilong Jisas bilong pastaim ol i kamapim klia olsem God i narapela, na Krais i narapela, na spirit holi i narapela. Ol i baptaisim ol disaipel (1) long nem bilong Papa, (2) long nem bilong Pikinini, na (3) long nem bilong spirit holi, i no long nem bilong God Triwan. Ol Witnes Bilong Jehova tu i lainim ol man long tok i tru bilong Baibel, olsem God na Pikinini bilong em na spirit holi ol i narapela narapela.—Matyu 28:19.
Tok i Tru na Baptais
20. Ol man bilong kisim baptais ol i mas save long wanem samting?
20 Jisas i tokim lain disaipel bilong em long lainim ol man long tok i tru na long dispela rot kamapim ol disaipel. Bilong inapim mak bilong kisim baptais, ol i mas save long ol as tok bilong Baibel. Olsem: Ol i mas save long namba na strong bilong Papa na Pikinini bilong em, Jisas Krais. (Jon 3:16) Ol man bilong kisim baptais ol i mas save tu olsem spirit holi i no wanpela man, em strong bilong God.—Luk 24:49.
21, 22. Olsem wanem yu inap tok olsem baptais em samting bilong ol man i bilip?
21 Man i gat save na i bin tanim bel na i dediket pinis long God long mekim laik bilong em, em dispela kain man tasol ol Kristen bilong pastaim i bin baptaisim. Ol Juda na ol man bilong ol narapela lain i bihainim lotu Juda, em ol i bung long Jerusalem long Pentikos 33 C.E., ol i save pinis long ol tok bilong Ol Skripsa Hibru. Taim ol i harim aposel Pita i toktok long Mesaia Jisas, dispela tok “i sutim bel” bilong 3,000 manmeri na ol i “kisim baptais.”—Aposel 2:41; 3:19–4:4; 10:34-38.
22 Baptais Kristen i bilong ol man i bilip. Ol man long Samaria i kisim tok i tru, na “taim Filip i autim gutnius bilong kingdom bilong God na bilong nem bilong Jisas Krais, ol man na meri wantaim i bilip na ol i kisim baptais.” (Aposel 8:12) Wanpela man Itiopia em i bihainim lotu Juda na i gat save long Jehova, pastaim em i kisim ol tok Filip i kamapim long truim bilong ol tok profet bilong Mesaia, na bihain em i kisim baptais. (Aposel 8:34-36) Bihain, Pita i tokim Kornilius na sampela moa bilong ol narapela lain olsem: “[God] i save laikim ol manmeri i aninit long em na i mekim stretpela pasin” na em i save lusim sin bilong olgeta manmeri i bilip long Jisas Krais. (Aposel 10:35, 43; 11:18) Olgeta dispela samting i stret wantaim dispela tok bilong Jisas long ‘mekim olgeta lain manmeri i kamap disaipel, na lainim ol long bihainim olgeta tok bilong em.’ (Matyu 28:19, 20; Aposel 1:8) Ol Witnes Bilong Jehova i save mekim wankain pasin. Man i gat save long ol as tok bilong Baibel na i dediket pinis long God, em dispela kain man tasol ol i baptaisim.
23, 24. Wanem stretpela pasin bilong ol Kristen long kisim baptais?
23 Stretpela pasin bilong ol bilipman bilong kisim baptais, em ol i mas go insait olgeta long wara. Taim Jisas i kisim baptais pinis, “em i lusim wara na i kam antap.” (Mak 1:10) Man bilong Itiopia i bin go insait long “wanpela wara” na kisim baptais. Em wantaim Filip “i go daun long wara” na ol i “lusim wara na i kam antap.” (Aposel 8:36-40) Baibel i bungim baptais wantaim tok piksa bilong planim man, na dispela tu i makim olsem man i mas go insait olgeta long wara.—Rom 6:4-6; Kolosi 2:12.
24 Wanpela buk (The Oxford Companion to the Bible) i tok: “Ol stori long Nupela Testamen bilong ol man i kisim baptais ol i makim olsem man i kisim baptais em i bin go insait olgeta long wara.” Narapela buk (Larousse du XXe Siècle [Paris, 1928]) i tok: “Ol Kristen bilong pastaim i save kisim baptais long wanem wanem hap i gat wara na ol i go insait olgeta long en.” Na narapela buk (After Jesus—The Triumph of Christianity) i tok: “Man i laik kisim baptais, pastaim em i mas autim bilip, na bihain em i go insait olgeta long wara long nem bilong Jisas.”
25. Bai yumi toktok long wanem samting long stori i kamap bihain long dispela?
25 Em nau, yumi stori pinis long sampela bilip na pasin bilong ol Kristen bilong pastaim. Bai yumi inap stori long sampela bilip moa bilong ol i wankain long ol bilip bilong ol Witnes Bilong Jehova. Long stori i kamap bihain long dispela, bai yumi stori long sampela rot moa bilong yumi ken save husat ol i lainim ol man long tok i tru.
Bai Yu Bekim Olsem Wanem?
• God i laik bai yumi mas lotuim em long wanem kain pasin?
• Olsem wanem tok i tru i bin kamap samting tru long rot bilong Jisas Krais?
• Wanem samting tru i painim man i dai pinis?
• Ol Kristen i save kisim baptais long wanem kain pasin? Ol man bilong kisim baptais ol i mas winim wanem ol mak?
[Piksa long pes 16]
Jisas i tokim Pailat: ‘Mi kam bilong autim tok tru’
[Piksa long pes 17]
Yu inap stori olsem bilong wanem Jisas i tok: “Mi as bilong tok tru”?
[Piksa long pes 18]
Wanem tok i tru bilong baptais Kristen?