Bihainim God Bilong Tok Tru
“God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.”—EFESUS 5:1.
1. Sampela man i gat wanem tingting long tok tru? Bilong wanem tingting bilong ol i kranki?
“TOK TRU, em wanem samting tru?” (Jon 18:38) Dispela askim Pontius Pailat i kamapim olsem 2,000 yia i go pinis i kamapim tingting bilong em olsem i no gat rot long save long tok tru. Planti man long nau i gat wankain tingting. Kain tingting olsem i wok long daunim tok i tru. Ating yu bin harim sampela man i tok, olgeta man wan wan inap makim wanem tok i tru, o i no gat wanpela tok i tru olgeta, o tok i tru i wok long senis senis. Kain tingting olsem i kranki. As tru na ol man i wok long kisim save, em bilong kisim stretpela save long ol samting bilong dispela graun yumi stap long en. Tok tru i no samting bilong ol wan wan yet i ken makim, nogat. Olsem: Spirit bilong man inap i dai, o em i no inap i dai. Satan i stap, o em i no stap. I gat as bilong i stap bilong yumi, o i no gat as bilong i stap bilong yumi. Long dispela 3-pela samting wan wan, wanpela i stret na wanpela i no stret—tupela wantaim i no inap stret.
2. Long wanem ol samting Jehova em i God bilong mekim tok tru? Bai yumi stori long wanem ol askim?
2 Long stori i kamap paslain long dispela yumi bin stori olsem Jehova em God bilong mekim tok tru tasol. Jehova i save long tok i tru long olgeta samting. Em i save tok tru oltaim, na long dispela samting em i narapela kain long birua bilong em, Satan. Na tu, Jehova i amamas long kamapim tok i tru long ol man. Aposel Pol i tokim ol wanlain Kristen: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.” (Efesus 5:1) Olsem wanem yumi ol Witnes Bilong Jehova inap bihainim pasin bilong em long mekim tok tru tasol na bihainim tok i tru long wokabaut bilong yumi? Bilong wanem i bikpela samting long mekim olsem? Na olsem wanem yumi ken bilip tru olsem Jehova i save orait long ol man em ol i bihainim pasin bilong tok tru? Orait nau yumi ken stori long dispela.
3, 4. Aposel Pol na Pita i tok wanem samting bai kamap long “taim bilong las de”?
3 Nau long taim bilong yumi i gat planti tok giaman long ol samting bilong lotu. Olsem aposel Pol i tok profet pinis, em God i bin kirapim em long mekim, planti man long dispela “taim bilong las de” ol i bihainim pasin bilong God long skin tasol. Sampela, em “tingting bilong ol i paul olgeta,” ol i sakim tok i tru. Na tu, “ol man nogut na ol giaman profet . . . i wok long giamanim ol manmeri.” Maski ol dispela kain man i save laikim tumas long kisim skul, ol i no kisim stretpela save long “tok tru bilong God.”—2 Timoti 3:1, 5, 7, 8, 13.
4 God i bin kirapim aposel Pita tu long raitim tok i stori long taim bilong las de. Olsem em i tok profet pinis, ol man i sakim tok i tru na ol i tok bilas tu long Tok Bilong God na long ol man i autim ol tok tru bilong en. Ol dispela man bilong tok bilas “i no laik . . . save” olsem bikpela tait i bin karamapim graun long taim bilong Noa na i makim de bilong bikpela kot i kamap bihain. Ol i no laik save, na dispela bai nogutim ol long taim God i kam bilong bagarapim ol man i givim baksait long em.—2 Pita 3:3-7.
Ol Wokboi Bilong Jehova i Save Long Tok i Tru
5. Profet Daniel i tok wanem samting bai kamap long “taim bilong las de”? Dispela tok profet i bin kamap tru olsem wanem?
5 Tasol taim profet Daniel i stori long “taim bilong las de,” em i tok profet long narapela kain samting—namel long lain bilong God, tok i tru bilong lotu bai kamap strong gen. Em i tok: “Planti manmeri bai i raun long olgeta hap, na stretpela save bai kamap planti.” (Daniel 12:4, NW ) Lain bilong Jehova i no larim Man bilong giamanim ol manmeri i paulim tingting bilong ol. Ol i “raun” long ol pes bilong Baibel na kisim stretpela save. Taim Jisas i stap long graun, em i givim stretpela save long ol disaipel bilong em. Em i “helpim ol long tingting gut long as bilong ol tok i stap long buk bilong God.” (Luk 24:45) Long taim bilong yumi, Jehova i bin mekim wankain wok. Long rot bilong Baibel, na holi spirit, na oganaisesen bilong em, em i bin helpim planti milion manmeri long olgeta hap bilong graun long kisim save long ol samting em yet i save pinis long en—tok i tru.
6. Lain bilong God long nau i save long wanem ol tok i tru bilong Baibel?
6 Yumi save long planti samting em yumi no inap save long en sapos yumi no stap lain bilong God. Yumi save long bekim bilong planti askim em ol saveman bilong graun i bin wok planti tausen yia long kisim save long en. Olsem: Yumi save i gat wanem as na i gat pen na hevi, na ol man i dai, na ol man i no inap kamapim gutaim na pasin wanbel. Na yumi save long wanem samting bai kamap bihain—Kingdom bilong God, graun i kamap Paradais, na laip oltaim i stap gutpela olgeta. Yumi bin kisim save long Jehova, em Nambawan Bikpela. Yumi save pinis long ol gutpela pasin bilong em na ol samting yumi mas mekim na bai em i ken mekim gut long yumi. Yumi save long tok i tru na dispela i helpim yumi long save long wanem ol tok i no stret. Yumi bihainim tok i tru, na dispela i helpim yumi long i stap gut, na yumi wetim gutpela samting i kamap bihain, na i lukautim yumi na yumi no mekim sampela samting i no inap helpim tru yumi.
7. Ol tok i tru bilong Baibel i bilong wanem kain man? Wanem kain man i no inap kisim?
7 Olsem wanem? Yu save long tok i tru bilong Baibel? Sapos olsem, orait em wanpela gutpela blesing tru. Taim wanpela man i raitim buk, em i save raitim bilong wanpela lain stret. Sampela buk i bilong ol man i bin kisim bikpela skul, na sampela i bilong ol pikinini, na sampela i bilong ol man i mekim wanpela kain wok. Tru, olgeta man i gat rot long kisim Baibel, tasol i no olsem olgeta inap pilim tru na kisim gut ol tok bilong en. Jehova i wokim Baibel bilong ol man i gat pasin daun. Ol kain man olsem inap kisim gut ol tok bilong Baibel, maski ol i bilong wanem lain o skin o sindaun o ol i bin skul gut o nogat. (1 Timoti 2:3, 4) Tasol ol man i no gat stretpela bel, ol i no inap kisim gut tok i tru bilong Baibel, maski tingting bilong ol i sap tru o ol i bin kisim bikpela skul. Ol man i gat pasin antap ol i no inap kisim gut as bilong ol tok i tru bilong Baibel. (Matyu 13:11-15; Luk 10:21; Aposel 13:48) God tasol inap kamapim kain buk olsem.
Ol Wokboi Bilong Jehova i Save Tok Tru
8. Olsem wanem na Jisas em yet em as bilong tok tru?
8 Olsem Jehova, ol Witnes bilong em i save tok tru tasol. Jisas Krais, nambawan Witnes bilong Jehova, i bin strongim tok i tru long rot bilong ol tok em i bin skulim ol man long en na long wokabaut na i dai bilong em. Em i bin sambai long ol tok na ol promis bilong Jehova. Olsem na Jisas yet em as bilong tok tru, olsem em yet i bin tok.—Jon 14:6; KTH 3:14; 19:10.
9. Baibel i tok wanem long pasin bilong mekim tok tru?
9 “Marimari na pasin i tru i pulap” long Jisas na “em i no bin mekim wanpela tok giaman.” (Jon 1:14; Aisaia 53:9) Ol trupela Kristen i save bihainim pasin bilong Jisas long mekim tok tru tasol long ol narapela. Pol i tokim ol wanbilip: “Yupela olgeta i mas mekim tok tru tasol long ol arapela Kristen, long wanem, yumi olgeta i stap hap bilong wanpela bodi.” (Efesus 4:25) Profet Sekaraia i bin tok: “Yupela olgeta i mas mekim tok tru tasol long ol arapela man.” (Sekaraia 8:16) Ol Kristen i save mekim tok tru tasol, long wanem, ol i laik mekim ol pasin God i save laikim. Jehova i save mekim tok tru tasol, na em i save long ol samting nogut em pasin bilong giaman inap kamapim. Olsem na i stret em i laik bai ol wokboi bilong em i mas mekim tok tru tasol.
10. Wanem samting inap mekim na man i tok giaman? Wanem sampela samting nogut inap kamap long dispela?
10 Long planti manmeri, pasin bilong mekim tok giaman i olsem wanpela rot bilong helpim ol yet. Sampela i tok giaman bilong abrusim strafe, o bilong helpim ol yet, o bilong ol narapela i ken litimapim nem bilong ol. Tasol pasin bilong mekim tok giaman em wanpela pasin nogut. Na tu, God i no orait liklik long man bilong mekim tok giaman. (KTH 21:8, 27; 22:15) Taim yumi gat nem olsem man bilong tok tru, ol narapela i save bilipim ol tok bilong yumi; ol i trastim yumi. Tasol sapos yumi tok giaman na dispela i kamap ples klia, orait maski em wanpela taim tasol yumi mekim, ating ol narapela i no inap bilipim ol tok yumi mekim bihain. Wanpela savetok bilong Afrika i tok: “Wanpela tok giaman tasol inap bagarapim wan tausen tok tru.” Narapela savetok i tok: “Ol man i no save bilipim man bilong giaman, maski em i tok tru.”
11. Olsem wanem na pasin bilong tok tru i no samting yumi mekim long maus tasol?
11 Pasin bilong tok tru i no samting yumi mekim long maus tasol, nogat. Dispela pasin i mas bosim olgeta samting yumi mekim. Em i makim yumi wanem kain man. Yumi kamapim tok i tru long ol narapela long ol tok yumi mekim, na long pasin tu yumi mekim. Aposel Pol i tok: “Yupela i save skulim ol arapela manmeri, tasol bilong wanem yupela i no save skulim yupela yet? Yupela i save tok, ol man i no ken stil, tasol ating yupela yet i save stil? Yupela i save tok, ‘Ol marit i no ken mekim pasin pamuk,’ tasol ating yupela yet i save mekim olsem?” (Rom 2:21, 22) Bilong helpim ol man long save long tok i tru, yumi mas bihainim pasin bilong tok tru long olgeta samting yumi mekim. Nem yumi holim olsem man bilong tok tru tasol, dispela bai mekim bikpela samting long ol man yumi skulim ol.
12, 13. Wanpela yangpela i tok wanem long pasin bilong mekim tok tru? Wanem samting i as na em i laik bihainim stretpela pasin?
12 Ol yangpela namel long ol wokboi bilong Jehova ol tu i save olsem pasin bilong mekim tok tru em i bikpela samting. Long wanpela stori Jenny i raitim long skul—em i gat 13 krismas long dispela taim—em i tok: “Long tingting bilong mi, pasin bilong tok tru em wanpela bikpela samting. Tasol sori tru, planti man long nau i no save tok tru oltaim. Mi pasim tok long bel olsem oltaim mi bai bihainim pasin bilong tok tru. Na mi bai mekim olsem, maski dispela i no helpim mi o ol pren bilong mi wantu tasol. Ol pren mi kisim em ol manmeri i save mekim tok tru tasol.”
13 Tisa bilong Jenny i ritim dispela stori na i tok: “Maski yu yangpela tru, yu bin kisim bikpela laik long bihainim stretpela pasin. Mi save yu bai holimpas dispela tingting bilong yu, long wanem, yu gat strongpela tingting.” Wanem samting i as na dispela skulmeri i strong long bihainim stretpela pasin? Long kirap bilong dispela stori, Jenny i tok, lotu bilong em i “makim ol pasin em i laik bihainim long wokabaut bilong em.” Inap 7-pela yia i go pinis Jenny i bin raitim dispela stori. Olsem tisa bilong em i tok pinis, Jenny i save bihainim yet stretpela pasin long wokabaut bilong em olsem wanpela Witnes Bilong Jehova.
Ol Wokboi Bilong Jehova i Save Kamapim Tok i Tru
14. Olsem wanem na ol wokboi bilong God i gat wok long sambai long tok i tru?
14 Tru, ol narapela tu inap mekim tok tru na bihainim stretpela pasin—i no ol Witnes Bilong Jehova tasol. Tasol yumi ol wokboi bilong God, yumi gat wok long sambai long tok i tru. God i bin givim ol tok i tru bilong Baibel long yumi—ol dispela tok i tru inap bringim man long laip oltaim. Olsem na yumi gat wok long helpim ol narapela long kisim dispela save. Jisas i tok: “Ol man i kisim planti samting, ol i mas bekim planti samting gen.” (Luk 12:48) Tru tumas, ol man i bin kisim save long God ol i mas “bekim planti samting.”
15. Yu save kisim wanem amamas long givim tok i tru bilong Baibel long ol narapela?
15 Man i givim tok i tru bilong Baibel long narapela em i kisim amamas long dispela. Olsem ol disaipel bilong Jisas long taim bilong ol aposel, yumi save autim gutnius—long ol gutpela samting bai kamap bihain—long ol man “i stap nogut tru, olsem ol sipsip i no gat wasman,” na long ol man em ‘tok bilong ol spirit nogut’ i save pasim na paulim nabaut tingting bilong ol. (Matyu 9:36; 1 Timoti 4:1) Aposel Jon i tok: “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.” (3 Jon 4) Taim Jon i lukim ol “pikinini” bilong em i stap gut long God—ating Jon i bin lainim ol long tok i tru—dispela i givim bikpela amamas long em. Yumi tu i save kisim bikpela amamas taim yumi lukim ol man i pilim tru Tok Bilong God na bihainim.
16, 17. (a) I gat wanem as na i no olgeta man i kisim tok i tru? (b) Yumi inap kisim wanem kain amamas taim yumi autim tok i tru bilong Baibel?
16 Tru, i no olgeta man bai kisim tok i tru. Jisas i autim tok tru bilong God, maski planti man i no laikim. Em i tokim ol Juda i birua long em: “Watpo yupela i no bilipim tok bilong mi? Ol pikinini bilong God i save harim olgeta tok bilong God. Yupela i no pikinini bilong God, olsem na yupela i no save harim tok bilong em.”—Jon 8:46, 47.
17 Olsem Jisas, yumi no surik long autim ol trupela tok bilong Jehova. Yumi save, i no olgeta man bai kisim ol tok yumi autim long ol, long wanem, i no olgeta man i bin kisim tok bilong Jisas. Tasol yumi kisim amamas, long wanem, yumi save olsem yumi mekim ol samting i stret. Jehova i mekim gutpela pasin sori na em i laik bai tok i tru i ken kamap ples klia long olgeta manmeri. Ol Kristen i save pinis long tok i tru, olsem na ol i kamap man bilong givim lait long ol manmeri i stap long tudak. Taim yumi larim lait bilong tok i tru i kamap ples klia long ol tok na ol pasin bilong yumi, yumi inap helpim ol narapela long litimapim nem bilong Papa bilong yumi i stap long heven. (Matyu 5:14, 16) Yumi kamapim long ples klia olsem yumi sakim ol tok em Satan i tok em i tru, na yumi litimapim Tok Bilong God i no gat tok giaman long en. Dispela tok i tru yumi save long en na yumi autim long ol narapela, em inap helpim ol man long kamap fri tru.—Jon 8:32.
Bihainim Pasin Bilong Tok Tru
18. Bilong wanem na olsem wanem Jisas i mekim gut long Nataniel?
18 Jisas i laikim tumas tok i tru, na em yet i save tok tru tasol. Taim em i mekim wok bilong em hia long graun, em i save mekim gut long ol man i mekim tok tru. Taim Jisas i lukim Nataniel, em i tok: “Lukim. Dispela man i kam, em i man tru bilong Israel. I no gat wanpela giaman tok o giaman pasin i stap long em.” (Jon 1:47) Bihain, Jisas i makim Nataniel, narapela nem bilong em Bartolomyu, long kamap wanpela bilong ol 12-pela aposel. (Matyu 10:2-4) Em wanpela gutpela blesing tru!
19-21. Wanpela man, bipo em i aipas, em i kisim wanem gutpela blesing, long wanem, em i no pret long mekim tok tru?
19 Wanpela sapta olgeta long Buk Jon bilong Baibel i stori long narapela man i mekim tok tru na Jisas i mekim gut long en. Tru, yumi no save long nem bilong em, tasol yumi save olsem em man bilong askim ol man long mani, na taim mama i karim em, em i aipas pinis. Ol man i kirap nogut tru taim Jisas i oraitim ai bilong em. Ol tok bilong dispela mirakel i kamap long yau bilong sampela Farisi. Ol Farisi i save birua long tok i tru na ol i bin pasim tok olsem sapos wanpela man i tokaut em i bilip long Jisas, ol bai tambuim em long kam lotu wantaim ol. Papamama bilong dispela man, bipo em i aipas, ol i save long dispela samting, olsem na ol i pret na ol i mekim tok giaman long ol Farisi. Ol i tok husat i bin opim ai bilong em o ai bilong em i op olsem wanem, ol i no save.—Jon 9:1-23.
20 Ol Farisi i singautim gen dispela man. Maski wanem hevi inap painim em, em i strongim bel na autim tru samting i bin kamap. Em i stori long olsem wanem em i bin kamap orait, na man i bin oraitim em, em Jisas. Em i kirap nogut tru olsem ol dispela bikman i bin kisim bikpela skul ol i no bilip olsem Jisas i bin kam long God, na em i no pret long tokim ol: “Sapos God i no bin salim dispela man i kam, orait em i no inap mekim wanpela samting.” Ol i no inap bekim tok long em, olsem na ol Farisi i tok bilas long em na rausim em i go.—Jon 9:24-34.
21 Taim Jisas i kisim save long dispela samting, em i lusim hap taim long go painim dispela man. Taim Jisas i lukim em, em i strongim dispela bilip em man bipo em i aipas i bin tokaut long en. Jisas i tokaut klia em i Mesaia. Man! Dispela man i kisim gutpela blesing tru, long wanem, em i bin mekim tok tru! Em nau, God i save mekim gut long ol man i save tok tru.—Jon 9:35-37.
22. I gat wanem as na yumi mas bihainim pasin bilong mekim tok tru tasol?
22 Pasin bilong mekim tok tru em i bikpela samting. Yumi mas mekim olsem bambai yumi ken pas gut wantaim God na ol narapela. Man i tok tru, em i kamapim tok i tru, ol narapela i no pret long go toktok wantaim em, ol i bilip long em, na Jehova i orait long em. (Song 15:1, 2) Man i tok giaman, em i no bihainim tok bilong em, em i haitim tok i tru, em i giamanim ol narapela, na Jehova i no ken mekim gut long em. (Sindaun 6:16-19) Olsem na yumi mas tingting strong long bihainim pasin bilong tok tru tasol. Tru tumas, bilong bihainim pasin bilong God, em God bilong mekim tok tru tasol, yumi mas save long tok i tru, mekim tok tru, na larim tok tru i bosim olgeta samting yumi mekim.
Bai Yu Bekim Olsem Wanem?
• I gat wanem as na yumi ken amamas olsem yumi save long tok i tru?
• Olsem wanem yumi ken bihainim pasin bilong Jehova long mekim tok tru?
• Wanem ol gutpela samting inap kamap long rot bilong autim tok i tru bilong Baibel long ol narapela?
• Bilong wanem i bikpela samting long yumi mas bihainim pasin bilong mekim tok tru?
[Ol Piksa long pes 17]
Ol Kristen i bin kisim tok i tru bilong Baibel, olsem na ol i givim bel long autim long ol narapela
[Ol Piksa long pes 18]
Aipas man Jisas i oraitim em, em i kisim blesing, long wanem, em i autim tru samting i bin kamap