No Ken Abrusim Rot Bilong Kisim Save Long Tok i Tru

ATING Pailat i save, sapos em i bilipim tok i tru i gat sampela samting em i mas mekim. Sapos em i kamap disaipel bilong Krais, em i mas stretim pasin bilong em na em i mas save, Krais em i King, na em i mas daun long em. Tasol long Provep 23:23 Solomon i tok: “Yu mas strong long kisim save long ol pasin i tru na long gutpela tingting na long olkain gutpela save. Yu no ken tromoi ol dispela gutpela pasin.”

Yes yumi mas “strong” long kisim save long ol tok i tru na long kisim gutpela tingting na save. Dispela tok long Baibel i helpim yumi long save, ol dispela samting i gutpela samting tru! Tok i tru em i gutpela samting moa yet, olsem na Solomon i tok, yumi no ken “tromoi”!

Tasol planti man i save mekim askim wankain olsem bilong Pailat, ol i tok: “Tok tru em i wanem samting?” Planti man long nau ol i hatwok long save long tok i tru. Wanpela saveman em i bin tok: ‘Mi no klia long dispela tok olsem “tok i tru bilong saiens,” long wanem yumi mas skelim tok pastaim—ol saveman bilong saiens i bin lukim sampela samting tru na ol i mekim dispela tok, o ol i bin bungim sampela namba samting na ol i mekim, o ol i tok nating tasol? Na mi no klia liklik long dispela tok olsem “tok i tru bilong lotu.”’ (Ideas and Opinions, bilong Albert Einstein) Dispela saveman i no inap save long tok i tru, tasol olsem wanem long yu? Yu ting yu no inap save long tok i tru? Yu inap save long en.

Jisas i tok klia olsem: “Mi yet mi rot, na mi as bilong tok tru, na mi as bilong laip.” (Jon 14:6) Tru tumas, ol “tok tru” i samting bilong Krais Jisas na ol wok God Jehova i laik bai Krais i mekim olsem Man bilong truim ol tok profet, na Man bilong baim bek ol sinman, na King bilong Kingdom bilong God, na Hetpris, na Man bilong kilim i dai ol man nogut. (Rom 15:8; 1 Timoti 2:5, 6; Jon 3:16; Efesas 1:20-22; Danyel 7:13, 14; Matyu 6:9, 10; Hibru 4:14; Revelesen 19:11-21; 2 Tesalonaika 1:7-9) Tasol yumi mas mekim wanem na yumi ken “strong” long kisim save long tok i tru?

‘Kisim Save’

Bilong kisim save long tok i tru, yumi mas bihainim tok bilong Jisas long Jon 17:3, em i tok: “Na laip i stap gut oltaim em i olsem: Ol i save long yu, yu wanpela tasol yu God tru, na ol i save long Jisas Krais, em yu bin salim i kam.” Sapos yu wanpela tasol yu mas wok long kisim dispela save na i no gat man bilong helpim yu, em bai hatwok, a? Dispela hatwok i painim wanpela Itiopia long taim bilong ol aposel. Evanselis Filip i lukim dispela man i hatwok long save long wanpela strongpela tok profet bilong Baibel em i kaunim, na Filip i tok: “Ating yu save as bilong dispela tok yu ritim, o nogat?” Na Itiopia i bekim tok olsem: “Sapos man i no soim rot long mi, bai mi inap save olsem wanem?” (Aposel 8:28-31) Ating yu tu yu pilim olsem?

Olsem na ol Witnes Bilong Jehova i laik i kam long haus bilong yu na helpim yu long kisim save long ol tok bilong Baibel, no gat pe.a Jisas i tok: “Samting yupela i bin kisim, em yupela i kisim nating, na i no gat pe bilong en. Olsem na yupela i mas givim dispela long ol, na yupela i no ken kisim pe long en.” (Matyu 10:8) Tasol i gat sampela samting moa yu mas mekim bilong wok strong long kisim save long tok i tru—yu mas givim taim na strong bilong yu long mekim. Tasol yu no ken lusim tingting olsem Krais Jisas—em i stap laip na mekim wok long heven—em i laik helpim yu long kisim save long tok i tru. (Lukim Luk 5:13.) Em i tok promis long ol disaipel bilong pastaim olsem spirit bilong God ‘bai i stiam ol long olgeta tok i tru.’ (Jon 16:13) Spirit bilong God inap stiaim yu tu long kisim save long olgeta tok i tru. Olsem na yu no ken pilim olsem i hatwok tumas long kisim save long tok i tru. Nogat. Yu inap mekim.

Na bilong helpim ol man long stadi na kisim gut as bilong ol tok bilong Baibel, ol Witnes Bilong Jehova i bin wokim planti buk bilong Baibel. Sapos yu lukim nem bilong sampela bai yu save ol dispela buk inap tru long helpim yu long kisim save long tok i tru: Tok i Tru i Bringim Man long Laip Oltaim; Yu Inap i Stap Oltaim long Paradais long Graun; Rot Bilong Abrusim Bagarap na i Stap long Nupela Graun; Wanbel long Lotuim Dispela Wanpela God Tru. Em nem bilong sampela buk ol Witnes i save wokim.b

Ol dispela buk i save kamapim gut as bilong ol tok bilong Baibel na tok bilong ol i no hatwok long save long en. Ol tok bilong ol dispela buk i save kirapim tingting na bel bilong man i kaunim. Bai yu pilim tru olsem tok bilong ol dispela buk i tru, long wanem ol man i raitim ol dispela tok ol i tok stret, na ol i bin skelim gut ol samting pastaim, na ol dispela tok i gutpela bilong helpim yu. Taim yu kaunim ol dispela buk na yu kisim save long ol tok i tru bilong Baibel, bai yu pilim insait bilong tok bilong Jisas, em i tok: “Yupela bai i save long tok tru. Na tok tru em bai i mekim yupela i kamap fri.” (Jon 8:32) Long dispela skripsa, dispela tok olsem “tok tru” i makim olgeta tok i tru bilong Krais nau i stap long Baibel, em Tok Bilong God. (2 Timoti 2:15; Efesas 1:13) Tasol taim yu kisim save long tok i tru, olsem wanem dispela i helpim yu long “kamap fri” o i stap gutpela?

Orait, tingim dispela samting: Ol manmeri “i pret long dai” na “olgeta taim ol i stap long graun, dispela pret i bin kalabusim ol.” (Hibru 2:15) Maski planti man i tok ol i bilip olsem taim ol i dai bai ol i go i stap long heven na bai ol i stap gutpela tru, tasol ol i pret long i dai. Tasol ol tok i tru bilong Baibel i helpim yumi long lusim dispela pret i bin kalabusim ol man na bai yumi kamap fri. Long wanem Baibel i tok, ol man i dai pinis ol i no karim bikpela pen long wanpela ples paia; Baibel i tok “ol man i dai pinis ol i no save long wanpela samting.” (Eklisiastis 9:5, 10, NW; lukim tu Sam 146:4 na Eklisiastis 3:19, 20.) Na Baibel i tok, ol man i no gat laik long i dai na i go long heven. Nogat. God i bin “putim tingting long bel bilong ol man na ol inap tingting long taim bihain bihain.” Tru tumas, ol man i laik i stap oltaim oltaim!—Eklisiastis 3:11, NW; lukim tu Rom 5:12; 6:23.

Taim dispela “nupela graun” Baibel i stori long en em i kamap, bai ol man inap i stap oltaim oltaim. (2 Pita 3:13; lukim tu Matyu 6:9, 10.) Jisas i makim olsem ol man i kisim laip long dispela “nupela graun” ol bai stap long “paradais.” (Luk 23:43) Sampela tok moa bilong Baibel i helpim yumi long save olsem long dispela “nupela graun” bai i no gat pen moa na bai ol man i no krai moa! (Revelesen 21:4; Aisaia 11:6-9) Ol dispela gutpela samting i laik kamap bihain inap senisim tru sindaun bilong yu, a? Tasol pastaim yu mas kisim save long dispela samting.

No Ken Hambak

Long Sam 25:9 Baibel i tok: “Em i save stiaim ol man i stap aninit long em, na ol i bihainim stretpela pasin.” God i no save givim tok i tru long ol man i save hambak na bikhet. “God i save sakim ol man bilong bikhet, tasol em i save marimari long ol man i daunim bel bilong ol yet.” (1 Pita 5:5) Ating Pailat i laik save long tok i tru. Tasol ol man bilong raitim stori long ol man bilong bipo ol i tok, Pailat em i hambakman; em i save bikhet na em i gat pasin antap. Ol Rom i save tingim ol Juda i samting nating na lotu bilong ol i narapela kain, olsem na ol i save daunim ol! Pailat i hambak na em i laik kisim nem long wok politik—dispela tupela samting i pasim em na em i no kisim save long tok i tru—Provep 16:18.

Long nau tu planti man i laik save long tok bilong ol Witnes Bilong Jehova. Tasol ating ol i lukim ol Witnes i no gat planti samting na haus lotu bilong ol (ol Haus Kingdom) i no gat planti bilas bilong en olsem ol haus lotu bilong ol misin ol i kolim Kristen, na planti Witnes ol i no bin winim bikpela skul. Tasol lukim tok bilong Baibel long 1 Korin 1:26-29, em Baibel i tok: “Ol brata, yupela mas tingting long bipo God i singautim yupela na yupela i kamap Kristen. Namel long yupela i no gat planti man i gat save bilong dispela graun. I no gat planti man i gat strong. I no gat planti man i gat nem. Tasol pasin ol man bilong graun ol i save kolim pasin kranki, em God i bin kisim bilong semim ol saveman. Na samting ol man bilong graun ol i save kolim samting i no gat strong, em God i bin kisim bilong semim samting i gat strong. Na em i kisim samting i no gat nem long dispela graun, na samting ol man i save kolim rabis. Yes, em i kisim samting i no i stap, bilong pinisim samting nau i stap. Olsem na wanpela man i no ken litimapim nem bilong em yet long ai bilong God.”

Man i hambak, ating em i no laik bai ‘ol man i no gat nem’ i lainim em long tok i tru. Tasol nogut yu hambak na yu abrusim rot bilong kisim save long tok i tru, a?

Mekim Wok long Save Yu Bin Kisim

Sapos yumi kisim save—save long tok i tru—tu dispela tasol i no inap. Olsem na Baibel i tok yumi mas ‘wok strong long kisim gutpela tingting.’ (Provep 23:23) Sapos yumi mekim wok long save yumi bin kisim, bai yumi kisim gutpela tingting. Solomon i tok, “Nambawan samting yu mas kisim, em i gutpela tingting.” (Provep 4:5-7) Tru tumas, sapos yu kisim save tasol na yu no mekim wok long dispela save yu bin kisim, dispela bai helpim yu olsem wanem? Olsem na taim yu kisim save pinis long ol lo na tok na pasin bilong God, nau yu mas lain long bihainim dispela. Jisas i tok: “Ol wok bilong God i soim save bilong em i samting tru.”—Matyu 11:19.

Pailat i sakim tok i tru. Tasol nogut yu popaia olsem. Nogut yu abrusim rot bilong kisim save long tok i tru, long wanem yu hambak o yu laik kisim nem o yu laikim wanpela pasin i no stret wantaim Baibel. Sapos yu mekim olsem, yu mekim longlong pasin tru. Yu mas bihainim pasin bilong man bilong raitim sam, em i beten long God na em i tok: “Yu helpim mi bai mi kisim save long dispela tok na mi ken i stap laip.” (Sam 119:144) Tru tumas, man i redi long wok strong bambai em i ken kisim save long tok i tru na kisim gutpela tingting na save, dispela man inap “i stap laip,” long wanem ol man i wok strong long kisim ol dispela gutpela samting, ol i save “kisim laip, na Bikpela i save belgut long ol.”—Provep 8:35.

Wanpela man i kirap lainim tok bilong Baibel wantaim ol Witnes Bilong Jehova na em i tok: ‘Mi amamas, long wanem tok i tru i bin helpim tru mipela.’ Tok i tru inap helpim yu tu. Olsem na yu no ken abrusim rot bilong kisim save long tok i tru! Wok strong long kisim dispela save na long kisim gutpela tingting, na bai yu inap i stap amamas oltaim long bihain.

[Ol futnot]

[Piksa long pes 4]

Pailat i gat pasin antap na ating dispela samting i mekim na em i abrusim rot bilong kisim save long tok i tru