Yumi Mas Lotuim Wanem God?

YUMI ol man yumi no olsem ol animal; God i wokim yumi bambai yumi inap lotuim em. Dispela pasin i stap long skin bilong yumi taim mama i karim yumi. Na God i wokim yumi bambai yumi inap pilim wanpela pasin, i stret o nogat; yumi gat maus bilong bel bilong soim yumi wanem pasin i stret na wanem pasin i no stret. Long narapela narapela rot yumi olgeta i save bihainim maus bilong bel bilong yumi. Planti man i bihainim maus bilong bel na dispela i kirapim ol long lotuim wanpela god o sampela god bilong soim rot long ol.

Tasol insait long wan handet o tu handet yia i go pinis, sampela saveman bilong graun i bin tok, i no gat wanpela God i gat olgeta strong na em i Man bilong wokim olgeta samting. Long yia 1844 Karl Marx i tok, lotu “em i olsem drak i save paulim tingting bilong ol man.” Bihain liklik, Charles Darwin i kamapim tingting olsem yumi bin kamap nating long rot bilong ol animal. Na bihain ol Rasia i daunim gavman na kamapim gavman komyunis. Long ol kantri long Isten Yurop gavman i tok, i no gat God, na ol i tok, taim lain bilong yia 1917 i dai, bai lotu tu i pinis. Tasol ol dispela man i no bilip long God ol i no inap senisim pasin God i bin putim long skin bilong man taim em i wokim man. Dispela i kamap ples klia long nau, long wanem, lotu i wok long kamap strong gen long hap bilong Isten Yurop.

Tasol olsem Baibel i tok, i gat “planti samting ol i kolim ‘god,’ . . . i stap long heven o long graun.” (1 Korin 8⁠:⁠5) Long bipo yet na i kam inap long nau ol man i bin lotuim planti planti god, olsem god bilong helpim ol long kamapim ol pikinini, na god bilong bel i kirap, na god bilong helpim ol long pait, na god bilong wain na amamas samting. Ol man i bihainim lotu Hindu i save lotuim sampela milion god.

Long Babilon na Asiria na Isip na long ol kantri i bihainim lotu Buda, ol man i bin lotuim ol god triwan. Ol misin i gat nem Kristen ol tu i gat God Triwan bilong ol. Lotu Islam i sakim God Triwan na ol i gat “wanpela god tasol, em Ala.” Na ol man i no bilip na ol i tok i no gat wanpela God i gat olgeta strong, ol tu i gat ol god bilong ol. Olsem: Long Filipai 3⁠:​19, Baibel i tok: “Ol i save bihainim ol laik bilong bodi bilong ol yet, na ol dispela laik i stap olsem god bilong ol.”

Planti man i save lotuim wanpela god o ol god em ol wanples o lain bilong ol i save lotuim. Olsem na i gat sampela askim. Yu ting olgeta kain kain lotu inap bringim yumi i go long God​—⁠olsem olgeta rot long wanpela maunten i bringim man i go long het bilong maunten? O yu ting planti lotu i bringim ol man i go long bagarap​—⁠olsem ol rot i bringim man i go long wanpela ples nogut long maunten? Yu ting i gat planti rot bilong lotuim God na olgeta dispela rot i stret, o i gat wanpela rot tasol i stret? Yu ting i gat planti god yumi inap litimapim nem bilong ol, o i gat wanpela God tasol i gat olgeta strong na i stret yumi mas givim bel olgeta long em na lotuim em?

Ol God Giaman i Kamap

Yumi mas skelim gut ol dispela askim. Bilong wanem yumi mas mekim olsem? Long wanem olpela buk tru bilong lotu, em Baibel, i stori long wanpela god giaman i bin mekim wok long rot bilong wanpela snek, na em i pulim namba wan tumbuna papamama bilong yumi i go long rot nogut na tupela i bagarap. Yumi karim yet ol hevi dispela wok bilong em i bin kamapim. (Stat 3⁠:​1-13, 16-19; Buk Song 51⁠:⁠5) Jisas, em “Pikinini Bilong God,” em i stori long dispela god giaman i bikhet na Jisas i tok, em i “hetman i save bosim dispela graun.” Wanpela aposel bilong Jisas i kolim dispela bikhetman olsem “god bilong dispela graun.” (Jon 1⁠:34; 12⁠:31; 16⁠:11; 2 Korin 4⁠:⁠4) Long Kamapim Tok Hait sapta 12 ves 9, Baibel i stori long em na i tok, “em dispela snek bilong bipo yet, na ol i kolim em Satan . . . Em i man bilong giamanim olgeta manmeri bilong graun.” Olgeta lotu giaman i bosim ol man long olgeta hap bilong graun ol i stap aninit long strong bilong Satan.

Satan em i namba wan man bilong giaman. (1 Timoti 2⁠:14) I gat wanpela laik i stap long skin bilong ol man, em laik bilong mekim lotu, na Satan i save mekim wok long dispela laik bilong grisim ol long lotuim kain kain god​—⁠olsem ol tewel bilong ol tumbuna, na ol god giaman, na ol piksa bilong lotu, na ol piksa bilong Maria. Em i kirapim ol man long lotuim ol man bilong graun olsem god bilong ol, olsem ol strongpela bos bilong graun, na ol bikpela kepten bilong ami i save winim pait, na ol manmeri i gat biknem long ol piksa wokabaut o long pilai spot. (Aposel 12⁠:​21-23) Olsem na yumi mas was gut. Yumi mas pasim tok strong long bel long painim God tru na lotuim em wanpela tasol, “em i no i stap longwe long yumi olgeta wan wan.”​—⁠Aposel 17⁠:27.

Orait, husat dispela wanpela God yumi mas lotu long em? Inap 3,000 yia bipo wanpela man bilong raitim song long Baibel i stori long dispela God na em i tok, em i “God Antap Tru, . . . God I Gat Olgeta Strong, . . . God bilong mi. Mi save bilip long yu.” Nem bilong dispela God em Jehova. (Buk Song 91⁠:​1, 2) Moses i stori long dispela God na em i tok: “[Jehova], em wanpela tasol em i God bilong yumi.” (Lo 6⁠:⁠4) Na profet Aisaia i kolim tok bilong God olsem: “Mi tasol, mi Bikpela. [Jehova], em nem bilong mi, na yupela i mas givim biknem long mi wanpela tasol. Yupela i no ken litimapim nem bilong ol giaman god, em ol man yet i wokim.”​—⁠Aisaia 42⁠:⁠8.

Satan i bagarapim tru nem bilong God Jehova, tasol Jehova i tingting pinis long stretim bek nem bilong em. Long yia 1513 paslain long Krais, long rot bilong profet Moses, Jehova i kisim bek lain bilong em, em lain Israel, long wok kalabus long Isip. Dispela i makim rot em bai bihainim bilong stretim bek nem bilong em. Taim em i laik kisim bek ol Israel, em i kolim nem bilong em Jehova na em i tok em bai mekim ol samting em i tok pinis long mekim. (Kisim Bek 3⁠:​14, 15) Em i daunim king bilong Isip na stretim bek nem bilong em yet, tasol pastaim em i tokim dispela king nogut: “Mi bin larim [yu] i stap olsem bai mi ken soim bikpela strong bilong mi long [yu], na bai ol manmeri i ken tokaut long biknem bilong mi long olgeta hap bilong graun.”​—⁠Kisim Bek 9⁠:16.

Wankain samting i kamap long nau. King bilong Isip i bin bikhet long God Jehova na olsem tasol Satan, em god bilong dispela graun, i bikhet long God. Em i save giamanim ol man na mekim pait long ol manmeri i laikim tumas stretpela pasin na tok i tru. (Efesus 6⁠:​11, 12, 18) Olsem na long nau tu God i laik litimapim nem bilong em na daunim pasin birua bilong Satan. Em i laik soim bikpela strong bilong em long Satan na pinisim Satan wantaim olgeta wok bilong Satan, tasol pastaim em i salim ol man i lotuim em ol i go autim nem bilong em long olgeta hap bilong graun. Em bikpela hap wok bilong ol manmeri i lotu tru long God.

Olsem na i stret God yet i tok, ol dispela manmeri i lotuim em ol bai stap witnes bilong em, olsem ol Witnes Bilong Jehova. Em i tok: “Mi bin mekim ol dispela manmeri i kamap lain manmeri bilong mi yet, bai ol i ken amamas na tokaut long biknem bilong mi.” (Aisaia 43⁠:​10-12, 21) Ol i tokaut na litimapim nem bilong em olsem wanem? Ol i save go long haus bilong ol man na autim tok long ol na lainim ol. Ol i autim gutpela tok bilong Kingdom bilong Jehova, em Pikinini bilong God, Krais Jisas, i bosim, na dispela Kingdom bai kamapim ol blesing bilong oltaim long ol manmeri i bihainim tok. Ol i mekim dispela wok bilong autim tok na long dispela rot ol i bihainim pasin bilong ol Kristen bilong pastaim​—⁠ol i “no lusim” wok bilong lotuim God. (Aposel 5⁠:42; 20⁠:​20, 21) Ol i mekim olsem na yu ting ol i bin kisim blesing? Orait, tok long ol pes i kamap bihain long dispela i ken bekim dispela askim.