Bai Yu Stap Witnes Bilong Trupela God?
“Jehova i tok: ‘. . . yupela i witnes bilong mi, na mi God.’ ”−AISAIA 43:12, NW.
KLOSTU long taim Jisas i dai “em i lukluk antap long heven” na em i beten long God na i kolim em olsem “God tru.” Em i tok: “Yu wanpela tasol yu God tru.” (Jon 17:1, 3) Dispela tok i stret, long wanem, i no inap i gat tupela God tru. I mas i gat wanpela tasol, em King bilong olgeta hap, em dispela God i bin wokim olgeta samting. Dispela God tru i bin wokim yumi na yumi stap laip, olsem na yumi mas daun long em na givim biknem long em. Revelesen 4:11 i tok: “[Jehova], yu God bilong mipela. Yu inap tru long olgeta man i ken amamas long yu, na litimapim nem bilong yu, na stap aninit long strong bilong yu. Long wanem yu bin wokim olgeta samting. Long laik bilong yu yet yu wokim na i kamap, na nau dispela olgeta samting i stap.”
2 Pasin nogut i pulap long dispela graun God i bin wokim; tasol yumi save em i God tru, olsem na em i no inap larim dispela pasin nogut i stap olgeta taim na mekim nogut long ol man na animal na diwai samting em i bin wokim hia long graun. Liklik taim em bai kirap mekim ol samting bilong stretim dispela rong. Em i God tru, olsem na em i no inap haitim ol dispela samting em i laik mekim na ol samting em i laik bai yumi mekim; nogat. Em i mas toksave long yumi pastaim, na bihain em bai kirap givim strafe long ol man nogut. (Emos 3:7) Wanem rot bilong God long salim tok long yumi? Em i mekim wok long ol man, ol i olsem wailis o witnes bilong em. “Jehova i tok: ‘Yupela i witnes bilong mi. . . . Paslain long mi i no gat wanpela God i bin stap, na bihain long mi i no gat tu. Mi−mi Jehova, na mi tasol inap long helpim ol man; i no gat narapela.’ ” (Aisaia 43:10, 11, NW ) Husat dispela lain i save kamapim tok bilong God tru, olsem ol witnes bilong em? Olsem wanem yumi ken save? Olsem wanem ol i narapela kain long lain bilong ol narapela god? Na olsem wanem tok ol i autim em i narapela kain?
Jehova i Gat Tok long Ol Narapela God
3 Jehova i kirapim Aisaia long givim sampela askim long ol narapela god olsem: “Husat namel long ol [god bilong ol lain man] inap tokaut long dispela [tok profet i stret]? Ol inap kolim ol samting bilong paslain [em bai kamap bihain]? Ol [dispela god] i mas bringim ol witnes bilong ol i kam tokaut, na bai ol man i ken save ol i stretpela [god], o ol [lain man] i ken harim na tok, ‘Em i stret!’ ”(Aisaia 43:9, NW ) Em nau, Jehova i kotim ol god bilong ol man. Em i tokim ol long mekim sampela samting o kamapim sampela tok na bai ol man i ken save, ol i god tru o nogat. Ol witnes bilong ol dispela god ol i mas kamapim sampela samting na bai ol man i ken save ol inap bilip long ol dispela god na lotuim ol.
4 Orait, yumi laik save, wanem ol gutpela wok samting ol dispela god na lain bilong ol i bin mekim? Olsem wanem? Ol i bin pinisim ol pait na sik? Ol god bilong bipo i no gat strong na ol i no bin helpim ol man liklik. Ol i bagarap na lain bilong ol i no inap lotu moa long ol. Long nau ol i no stap. Ol god bilong Isip na Asiria na Babilon na Midia na Pesia na Grik na Rom na ol narapela lain tu ol i lus olgeta, olsem na yumi save ol i god giaman tasol. Long nau i gat sampela buk i stori long ol, na i gat sampela piksa bilong ol i stap long ol haus tumbuna na ol man i ken lukim, na em tasol.
5 Orait, olsem wanem long ol god bilong nau na lain bilong ol? Ol i save winim ol dispela god giaman bilong bipo? Ol Hindu i gat planti milion god. Ol Budis na Katolik na Konfusias na Juda na Muslim na Angliken na Sinto na Tao na planti lain moa ol i gat ol god bilong ol. Long Afrika na Esia na sampela hap moa ol man i save lotuim ol diwai na animal o sampela samting bilong graun na ol dispela samting i olsem god bilong ol. Na sampela man i litimapim kantri bilong ol, o mani kago, o ol yet, na dispela samting i olsem god bilong ol, long wanem ol i save givim bel olgeta long en. Orait, wanem lotu i stret? Wanem lain i save lotuim dispela God em i bin tok: “Mi Jehova, na i no gat narapela. Mi tasol mi God, na i no gat narapela”?−Aisaia 45:5, NW.
“Long Pasin Bilong Ol Yupela i Ken Save long Ol Yet”
6 Jisas i kolim wanpela gutpela pasin bilong skelim ol lotu, i stret o i giaman. Em i tok: “Long pasin bilong ol yupela i ken save long ol yet. . . . olgeta gutpela diwai i save karim gutpela kaikai. Na diwai nogut i save karim kaikai nogut. . . . Olgeta diwai i no save karim gutpela kaikai, em ol i save katim na tromoi long paia.” (Matyu 7:16-19) Olsem na sapos yumi laik save husat i God tru na husat i god giaman, na husat ol man ol i bihainim lotu i tru na husat i bihainim lotu giaman, yumi mas skelim wok ol i kamapim. Wok o “kaikai” ol i kamapim, em i “gutpela” o em i “nogut”?
7 Wanem lotu i bin kamapim pasin wanbel long lain bilong en na ol i stap wanbel tru? Lain bilong trupela lotu ol i mas i stap olsem brata brata tru long spirit, na narapela i no ken kilim i dai narapela. Tasol planti handet milion man i bin dai long ol bikpela pait nau long taim bilong yumi, na ol misin i bin helpim ol dispela pait. Ol man bilong lotu i bin kilim i dai ol narapela man bilong lotu. Planti man i bin kilim i dai ol wanlotu bilong ol. Katolik i kilim i dai Katolik, na Angliken i kilim i dai Angliken, na Muslim i kilim i dai Muslim, na ol narapela lotu tu i bin mekim olsem.
8 Long wanpela nius, wanpela man, em Mike Royko, em i raitim wanpela tok i gat het-tok olsem: “Long Nem Bilong God Ol i Mekim Planti Rong.” Em i raitim dispela tok olsem em i toktok long God, na em i stori long wok ol lotu i bin mekim. Em i tok: “Ol i laik mekim laik bilong yu, olsem na narapela i kilim i dai narapela na planti handet handet i dai. Ating ol i tok, sapos ol i pinisim narapela lotu na kilim i dai lain bilong en, dispela i makim lotu bilong ol yet i stret na yu orait long en.” Na em i stori long Pop na em i tok, long ai bilong ol man em Pop i olsem man bilong bel isi, tasol “taim lain bilong em i kros ol i save kapsaitim blut bilong planti man.” Na wanpela presiden bilong Amerika bipo, em Presiden Carter, em i tok ol man i “kamap longlong.” Em i tok, “Pasin bilong givim bel long lotu, dispela pasin i mas helpim ol man long mekim pasin sori long ol narapela man na bai olgeta wantaim i ken i stap wanbel, tasol ol i no olsem. Ol i kirap na kilim i dai ol narapela narapela.”
9 Ol dispela wok nogut o “kaikai” nogut ol i kamapim, em i narapela kain long ol wok em man i mas kamapim sapos em i lotuim trupela God. (Galesia 5:19-23) Olsem na sapos man i insait long ol lotu i save pait, em i helpim lotu giaman olsem ol Isip na Asiria na Babilon i bin mekim, na i olsem em i lotuim god giaman “i no inap helpim man na i no inap toktok.” (Habakak 2:18, NW ) Bipo God tru i bin truim tok profet bilong em na em i bin mekim save long ol lotu giaman; em bai mekim olsem gen long taim bilong yumi. “Ol god i no save helpim man ol bai pinis olgeta.” (Aisaia 2:18, NW ) Jehova i tok tru olsem: “Yupela no ken givim bel long ol god giaman.”−Levitikas 19:4, NW.
Husat i Autim Tok Bilong Jehova, Olsem Ol Witnes Bilong Em?
10 Sapos man i stap witnes bilong God tru, dispela man i mas kamapim tok bilong God na stori long God. Olsem wanem? Ol man bilong ol lotu bilong graun ol i save mekim olsem? Hamas taim ol i bin bungim yu na stori long yu long lotu bilong ol? Wanem taim ol i bin kam long haus bilong yu na tokim yu long god bilong ol, olsem kamapim tok witnes bilong god bilong ol? God tru i bin tokim ol god giaman long kamapim witnes bilong ol, tasol ol i no mekim. Lain bilong ol lotu bilong dispela graun ol i no save raun na autim tok witnes long lotu bilong ol. Ol i no inap tokim yu husat i God tru na dispela God bai mekim wanem. Ol pasto na pris bilong ol i no bin lainim ol long tok i tru. “Ol i aipas, . . . Tasol sapos aipas i soim rot long aipas, bambai tupela wantaim i pundaun long hul.”−Matyu 15:14.
11 Husat i laik lusim taim na mani na ol samting bilong skin na laip bilong ol bilong autim tok witnes bilong God tru? Husat ol i save tokim ol man long God tru em i bin tok: “Mi Jehova. Em nem bilong mi”? (Aisaia 42:8, NW ) Husat ol i save lainim ol man olsem Jehova ‘em wanpela tasol em i Bikpela, na em i God Antap Tru, na em i save bosim olgeta graun’? (Sam 83:18) Jisas i no haitim nem bilong dispela God tru, olsem na taim em i beten long God em i tok: “Mi telimautim pinis nem bilong yu long ol man.” (Jon 17:6) Nau long taim bilong yumi, ol Witnes Bilong Jehova tasol inap tok olsem Jisas i bin tok hia. Olsem na nem bilong ol i stret tru−ol Witnes Bilong Jehova!
Autim Tok Bilong Kingdom
12 Ol witnes bilong trupela God ol i save lainim ol man long nem bilong Em, tasol wanem narapela bikpela tok ol i mas kamapim tu? Jisas yet i kolim taim em i skulim lain bilong em long pasin bilong beten long God, olsem: “Kingdom bilong yu i mas i kam.” (Matyu 6:10) Kingdom bilong God long heven em i wanpela gavman na em bai bosim olgeta hap bilong graun. (Danyel 2:44) Tok bilong Kingdom em i as bilong ol tok Jisas i bin mekim. (Matyu 4:23) Dispela Kingdom tasol inap stretim na pinisim ol hevi bilong graun, olsem na Jisas i tok strong olsem: “Yupela i mas wok pastaim long painim kingdom bilong God wantaim stretpela pasin bilong em.”−Matyu 6:33.
13 Long nau husat ol i save kamapim tok bilong Kingdom bilong God? Profesa C. S. Braden i save lukim gut ol lotu na stori bilong ol, na em i tok, ol Witnes Bilong Jehova i autim tok witnes bilong ol long olgeta hap bilong graun, na i no gat narapela lain i givim bel olsem long autim gutpela tok bilong Kingdom. Em i mekim dispela tok 40 yia bipo, tasol long nau planti planti Witnes moa i stap na wok bilong ol long autim tok i go bikpela tru! Long nau lain Witnes i winim 3,500,000, na ol i stap long 54,900 kongrigesen long olgeta hap bilong graun. Lain bilong ol i wok long i go bikpela hariap; wok bilong ol i ‘karim gutpela kaikai,’ olsem na yumi save Jehova i blesim ol na truim tok profet em i bin mekim. Jehova i bin kirapim Pikinini bilong em, Jisas, long mekim tok profet olsem: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.”−Matyu 24:14; Jon 8:28.
Bihainim Pasin Sori Bilong God
14 Ol witnes tru bilong God ol i mas bihainim wanpela bikpela pasin bilong God, em pasin bilong sori. Baibel i tok: “God i save laikim yumi tru. Olsem na man i no save laikim ol brata, em i no save long God.” (1 Jon 4:8) “Sapos yumi laik save husat i pikinini bilong God, na husat i pikinini bilong Seten, orait yumi ken save olsem: Man i no mekim stretpela pasin, em i no bilong God. Na man i no save laikim tru brata bilong en, em tu i no bilong God. . . . Yumi mas laikim tru ol brata. Yumi no ken i stap olsem Ken. Em i man bilong Seten, na em i kilim i dai brata bilong en.”−1 Jon 3:10-12.
15 Ol Witnes Bilong Jehova tasol i save bihainim dispela pasin bilong sori. Ol i no save go insait long ol pait, na ol i no save litimapim ples o lain bilong ol, na ol i no save litimapim kala bilong skin bilong ol na mekim pasin antap na daunim ol narapela skin. Ol i no save helpim ol pait bilong dispela graun, olsem na i no gat sampela taim ol i insait long wanpela pait na i wok long pait wantaim ol wanlotu bilong ol bilong narapela lain o ples o kantri. Ol i stap olsem Jisas i tok, “ol i no bilong dispela graun.” Ol i lusim tru olgeta pasin bilong pait, olsem ‘putim bek bainat bilong ol.’−Jon 17:14; Matyu 26:52.
16 Ol man i bin skelim pasin bilong pait na bagarapim man na ol i tok olsem: ‘Ol Witnes Bilong Jehova i no save pait; em lo bilong ol; ol i tok, dispela pasin bilong ol em pasin Kristen. . . . Ol i sakim olgeta pasin bilong pait na ol i no litimapim lain o kantri bilong ol, olsem na long planti kantri ol man i save biruaim ol na putim ol long kot na kalabusim ol. . . . Tasol ol Witnes i no bin kirap na bekim kros o pait.’ Na wanpela nius bilong kantri Brasil (O Tempo) i stori long ol Witnes na i tok: ‘Long olgeta hap bilong graun i gat ol lotu i stap na ol i mekim planti tok bilong litimapim lotu bilong ol, tasol i no gat tru wanpela i save bihainim pasin bilong sori olsem ol Witnes Bilong Jehova i save mekim.’ Jisas i tok, dispela pasin sori bilong ol em i makim ol i olsem ol witnes tru bilong God. Jisas i tok: “Sapos yupela i laikim tru ol brata, orait bambai olgeta man i save, yupela i disaipel bilong mi.”−Jon 13:35.
Ol i Mekim Nogut long Ol, Tasol Dispela i Mekim Wok Witnes i Go Bikpela
17 Planti taim, sapos ol man i biruaim ol Witnes na mekim ol samting bilong daunim wok bilong ol, dispela i save mekim wok bilong autim tok bilong Kingdom i go bikpela. Olsem long India: Long India i gat 8,000 tasol Witnes Bilong Jehova, tasol wanpela samting i bin kamap na nau planti man i harim nem bilong Jehova na ol samting em i laik mekim. Skul i rausim 11-pela pikinini Witnes, long wanem ol i no mekim wanpela singsing i save litimapim kantri India. Ol dispela pikinini i bihainim pasin bilong ol Kristen bilong bipo taim ol man i subim ol long brukim lo bilong God, tasol ol dispela Kristen i bin tok: “Mipela i mas bihainim tok bilong God tasol. Mipela no ken bihainim tok bilong ol man.” (Aposel 5:29) Tasol Sprim Kot bilong India i tok, i no gat lo i tok, ol man i mas mekim dispela singsing, na Kot i tok, ol dispela pikinini i no bin mekim pasin bikhet. Olsem na Kot i salim ol i go bek long skul na Kot i tokim skul long kisim bek ol. Wanpela nius bilong biktaun Bangalo (Deccan Herald) i bin kamapim stori bilong dispela samting.
18 Na dispela nius i tok, ol dispela pikinini Witnes i no mekim dispela singsing bilong litimapim kantri, long wanem, ol Witnes Bilong Jehova i bihainim pasin Kristen na ol i givim bel olgeta long mekim wok bilong Kingdom bilong God, olsem na ol i no insait liklik long wok politik bilong gavman. Na narapela nius (The Telegraph) bilong biktaun Kalkata i tok, bipo ol man bilong India i no bin save tumas long ol Witnes Bilong Jehova na long wok bilong ol, tasol dispela samting ol pikinini Witnes i mekim, em stori bilong en i kamap bikpela long olgeta hap na ol man i harim. Em nau, ‘ol i mas autim dispela gutnius bilong kingdom long olgeta hap na bai olgeta lain man i ken harim’ na bihain bai pinis i kamap.−Matyu 24:14.
Wok Bilong Bungim Ol Witnes Bilong God Tru
19 Jehova, em God tru, em i givim wok long lain bilong em long autim tok na tokim ol man long wok king bilong em na long ol samting em i laik mekim. Ol man bilong olgeta hap ol i harim dispela tok ol Witnes i autim, na sampela i gat gutpela stretpela bel ol i kirap na i kam insait long lain bilong ol man i save lotuim Jehova. (Aisaia 2:2-4) Ol i lusim ol god giaman na ol i kirap lotuim God tru. Ol i mekim olsem ol dispela man i bin stap kalabus long Babilon long bipo. Ol dispela man i laik lotuim Jehova, tasol ol i stap namel long ol man i lotuim ol god giaman, olsem na Jehova i bin opim rot na ol i lusim Babilon.−Aisaia 43:14.
20 Olsem wanem long yu? Yu laik i stap witnes bilong God tru? Bai yu kirap bihainim lotu i tru bambai yu inap abrusim strafe bai painim ol man bilong dispela graun ol i gat asua long kilim man i dai na mekim ol pasin nogut bilong ol god giaman? Jehova i tok strong olsem: “Ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long sin bilong en. Na nogut bai yupela i poroman wantaim em long kisim pe nogut bilong sin.” (Revelesen 18:4) Tru tumas, yu mas “lusim dispela ples” hariap, nogut taim i pinis na rot i pas na yu no inap na strafe bilong ol lotu giaman i kisim yu! Nogut yu stap olsem wanpela man, em nius Katolik i askim em, wanem lotu i gutpela, na em i tok: “Ating mi wanpela Arere Witnes. Mi gat wankain bilip olsem bilong ol Witnes Bilong Jehova, tasol mi no laik insait tru long lain bilong ol.”
21 Liklik taim bai Jehova i kirap pinisim ol god giaman na ol man i save lotuim ol god giaman, na olgeta man bilong graun i mas tingim dispela samting. Baibel i tok: “Ol god i no bin wokim ples antap na graun, ol i mas bagarap na pinis long graun na long olgeta hap aninit long ples antap.” (Jeremaia 10:11, NW ) Taim dispela samting i kamap i no inap man i stap arere. Bai i gat tupela lain tasol, em lain witnes bilong God tru, na lain man i no witnes bilong God tru; i no inap man i stap namel. (Matyu 24:37-39; 2 Pita 2:5; Revelesen 7:9-15) Olsem wanem? Bai yu kamap witnes bilong God tru? Yu mas mekim olsem, long wanem, dispela God “i save helpim yumi na yumi stap gut. God [Jehova] . . . i save helpim yumi na yumi no i dai.”−Sam 68:20.
Sampela Askim Bilong Helpim Yumi long Tingim Gen Ol Bikpela Tok
◻ God tru i kotim ol god giaman na em i tok wanem long ol?
◻ Olsem wanem yumi ken save wanem lotu i tru na wanem lotu i giaman?
◻ Ol god bilong dispela graun i bin kamapim wanem kain pasin o wok na yumi save ol i god giaman tasol?
◻ Ol witnes bilong God tru i mas kamapim wanem ol gutpela pasin o wok? Husat i kamapim dispela gutpela wok?
◻ Bilong wanem ol man i mas hariap lusim lotu giaman?
[Askim Bilong Stadi]
1. Bilong wanem yumi mas givim biknem long dispela God tru?
2. (a) Jehova em i God tru, olsem na em i mas mekim wanem? (b) Olsem wanem em i salim tok i kam long ol man i laik lotu long em?
3. Jehova i givim wanem tok long ol narapela god?
4. Olsem wanem yumi ken save ol god bilong bipo ol i god giaman tasol?
5. Yumi ken tok wanem long ol god bilong nau?
6. Olsem wanem yumi ken save wanem lotu i gutpela na wanem lotu i giaman?
7. Ol lotu bilong dispela graun ol i bin mekim wanem long taim bilong yumi?
8. Sampela ol man i stori olsem wanem long ol lotu i mekim pasin nogut?
9. Bilong wanem yumi no ken givim bel long ol god giaman?
10. Lain bilong ol lotu bilong graun ol i stap witnes bilong God tru?
11. Husat tasol i autim tok na kamapim nem bilong dispela God tru?
12. Ol witnes tru i mas kamapim tok long wanem bikpela samting?
13. (a) Olsem wanem long dispela wok bilong ol Witnes Bilong Jehova long autim tok bilong Kingdom? (b) Wok ol Witnes Bilong Jehova i mekim bilong autim tok bilong Kingdom, olsem wanem dispela i makim Jehova tasol em i God bilong truim tok profet bilong em?
14. Wanem pasin bilong God em ol witnes tru bilong God ol i mas bihainim? Na olsem wanem sapos ol i no bihainim dispela pasin?
15. Olsem wanem i stret yumi ken tok, ol Witnes Bilong Jehova i bihainim tru pasin sori?
16. Sampela man i bin tok wanem na dispela i makim ol Witnes Bilong Jehova i witnes tru bilong God?
17, 18. Wanem samting i bin kamap long nau na yumi save, taim ol i mekim nogut long ol Witnes, dispela i helpim planti man moa long harim tok bilong Kingdom?
19. Ol man i gat gutpela bel ol i mas mekim wanem sapos ol i laik lotuim God tru?
20, 21. Bilong wanem yumi mas hariap lusim ol god giaman na yumi no ken i stap olsem arere?
[Ol Piksa long pes 17]
Ol god giaman bilong ol lain bilong bipo ol i pinis na long nau ol man i no lotuim ol moa
[Piksa long pes 18]
Long taim bilong yumi inap olsem wan handet milion man i bin dai long ol pait, na ol lotu i bin helpim ol dispela pait
[Kredit Lain]
U S Army photo
[Piksa long pes 19]
Jisas i tok, ol man bai save husat i witnes tru, long wanem ol bai lukim pasin bilong sori i stap namel long ol dispela witnes