Baibel i Tok Wanem?

Husat Tasol i God Tru?

MOLEK, Astarte, Bal, Dagon, Marduk, Sus, Hermes, Artemis, em sampela god na god meri em nem bilong ol i stap long Baibel. (Wok Pris 18:21; Hetman 2:​13; 16:23; Jeremaia 50:2; Aposel 14:12; 19:24) Tasol Baibel i kolim Jehova wanpela tasol olsem God i Gat Olgeta Strong. Long wanpela singsing bilong winim pait, Moses i kirapim ol manmeri long singim song olsem: “Bikpela [“Jehova,” NW ], wanem arapela god i stap na i strongpela olsem yu? . . . Husat inap olsem yu? I no gat wanpela.”​​—⁠Kisim Bek 15:⁠11.

Em nau, Baibel i tok long Jehova olsem em i antap tru, winim olgeta arapela god. Tasol olsem wanem? Ol dispela god na planti arapela god ol man i bin lotuim i kam inap nau, ol i god i stap tru tru, aninit long God i Gat Olgeta Strong, em Jehova?

Ol i No Stap Tru

Long tok ples ol i raitim Baibel pastaim long en, Baibel i tok long Jehova (Tok Hibru יהוה, YHWH) olsem em wanpela tasol i God tru. (Song 83:​18, NW; Jon 17:⁠3) Profet Aisaia i raitim dispela tok em God yet i bin mekim: “Bipo i no gat wanpela god i bin kamap na i stap pastaim long mi. Na bihain tu bai i no gat wanpela god i kisim ples bilong mi. Mi tasol mi Bikpela [“Jehova,” NW ], na oltaim mi save kisim bek yupela.”​​—⁠Aisaia 43:​10, 11.

Olgeta arapela god ol i no bikpela olsem Jehova, tasol i no dispela samting tasol. Klostu olgeta ol i no god i stap tru​—⁠ol i stap long tingting tasol bilong ol man. Baibel i tok “ol man yet” i bin wokim ol dispela god. Ol “i no inap lukluk o harim toktok o kaikai o smelim samting.” (Lo 4:​28) Baibel i tokaut klia olsem Jehova em dispela wanpela God tru.

Olsem na i gat as na Baibel i tok yumi no ken lotu long ol arapela god​—⁠yumi mas lotu long Jehova wanpela tasol. Long Tenpela Lo God i givim long Moses, namba wan Lo i tokim ol Israel olsem ol i no ken lotu long ol arapela god. (Kisim Bek 20:⁠3) Bilong wanem?

Namba wan samting: Pasin bilong lotu long wanpela god em i no stap tru, dispela i save daunim Man Bilong Wokim olgeta samting. Baibel i stori long ol man i lotu long ol giaman god, olsem: “Ol i bin lusim tok tru bilong God na senisim na kisim tok giaman. Na ol i bin givim baksait long God i bin mekim kamap olgeta samting, na ol i lotu long ol samting God i bin wokim, na ol i aninit long ol dispela samting.” (Rom 1:​25) Ol i bin wokim piksa bilong ol dispela god​—⁠em ol i stap long tingting tasol bilong ol man​—⁠long ol samting God yet i bin wokim, olsem ain o diwai samting. Planti god olsem i makim ol samting God yet i bin mekim i kamap, olsem pairap bilong klaut, solwara, na win. Pasin bilong lotu long ol dispela giaman god i no soim rispek long God i Gat Olgeta Strong, nogat tru!

Long ai bilong Man Bilong Wokim olgeta samting, ol giaman god na ol piksa bilong ol i samting nogut tru. Tasol strongpela tok God i mekim long ol em i go stret long ol man i bin wokim ol dispela giaman god. Em i tok: “Ol arapela lain i bin wokim ol giaman god bilong ol long silva na gol. Han bilong ol man yet i bin wokim ol giaman god. Ol dispela giaman god i gat maus, tasol ol i no inap toktok. Na ol i gat ai, tasol ol i no inap lukim samting. Na ol i gat yau, tasol ol i no inap harim samting, na ol i no inap pulim win. Mi laik bai ol man i bin wokim ol giaman god na i save bilip long ol dispela samting, ol i ken kamap wankain olsem ol dispela giaman god.”​​—⁠Song 135:​15-​18.

I gat narapela as na Baibel i tokaut strong olsem yumi no ken lotu long wanpela man o wanpela samting​—⁠yumi mas lotuim God Jehova wanpela tasol. Hap taim na strong ol man i lusim long lotuim wanpela giaman god, dispela i no save helpim ol liklik. Profet Aisaia i tok: “Ol i gat wanem kain tingting na ol i save wokim ol piksa bilong ol giaman god? Ol dispela giaman god i no inap helpim ol liklik. Nogat tru.” (Aisaia 44:10) Na Baibel i tok, “olgeta god bilong ol arapela lain manmeri, ol i giaman god tasol.” (Song 96:⁠5) Ol giaman god ol i no god i stap tru, ol i no inap helpim ol man i lotuim ol.

Jisas, Ol Ensel, na Satan

Tasol i gat sampela ves long Baibel i kolim ol man olsem god. Tasol taim yumi skelim gut ol dispela ves, yumi kisim save olsem dispela tok “god” long ol dispela ves i no makim ol dispela man olsem wanpela man yumi mas lotuim olsem wanpela god, nogat. Long ol tok ples ol i bin raitim Baibel pastaim long en, dispela tok “god” inap makim tu wanpela man em i gat bikpela strong o i kain olsem God o i stap wantaim dispela God i Gat Olgeta Strong.

Olsem: Sampela ves long Baibel i tok long Jisas Krais olsem em i wanpela god. (Aisaia 9:​6, 7; Jon 1:​1, 18) Olsem wanem? Dispela i makim olsem yumi mas lotu long Jisas? Jisas yet i tok: “Yu mas aninit long God, Bikpela bilong yu, na yu mas lotu long em wanpela tasol.” (Luk 4:⁠8) I klia tru olsem, maski Jisas i gat bikpela strong na i kain olsem God, Baibel i no kamapim olsem em wanpela man yumi mas lotu long em.

Ol ensel tu i “kain olsem God.” (Song 8:​5, NW; Hibru 2:​7) Tasol i no gat wanpela tok long Baibel i kirapim ol man long lotuim ol ensel. Wanpela taim, lapun aposel Jon i kisim driman na lukim wanpela ensel na dispela i kirapim tru bel bilong em na em i brukim skru na i laik lotu long ensel. Tasol ensel i tok: “Yu no ken mekim olsem! . . . Yu mas lotu long God wanpela tasol.”​​—⁠KTH 19:⁠10.

Aposel Pol i tok Satan em “giaman god bilong dispela graun.” (2 Korin 4:⁠4) Satan, “dispela hetman i save bosim dispela graun,” em i bin wok long kirapim ol man long lotuim planti giaman god. (Jon 12:31) Olsem na taim ol man i lotu long ol god em ol man yet i bin wokim, i olsem ol i lotu long Satan yet. Tasol Satan i no wanpela god i stret yumi lotu long em, nogat. Em i bin makim em yet i kamap hetman na kisim ples bilong God. Bihain, Satan, na olgeta lotu giaman tu, ol bai pinis, ol i no ken i stap moa. Taim dispela samting i kamap, olgeta manmeri​​—⁠yes, olgeta samting God i bin wokim⁠​—⁠ol bai tokaut olsem Jehova em dispela wanpela God tru na i God bilong i stap oltaim.​​—⁠Jeremaia 10:⁠10.

YU LAIK SAVE?

◼ Baibel i tok wanem long pasin bilong lotuim imis?​​—⁠Song 135:​15-​18.

◼ I stret yumi lotu long Jisas na ol ensel olsem wanpela god?​​—⁠Luk 4:⁠8.

◼ Husat i dispela wanpela God tru?​​—⁠Jon 17:⁠3.

[Ol Piksa long pes 20, 21]

Ol imis, han kais i go han sut: Maria, Itali; god bilong kon, Maya, Meksiko na Sentral Amerika; Astarte, Kenan; imis tambaran, Siera Leon; wanpela Buda, Japan; Sikomekoatil, Astek, Meksiko; pisin Horas, Isip; Sus, Grik

[Kredit Lain]

Maize god, Horus falcon, and Zeus: Photograph taken by courtesy of the British Museum