Olgeta Lotu i Wankain? Olgeta i Stiaim Ol Man i Go Long God?

Bekim Bilong Baibel

Nogat, olgeta lotu i no wankain. Baibel i stori long planti lotu we God i no orait long ol. Ol dispela lotu i stap aninit long tupela grup.

Namba 1 grup: Ol i lotuim ol god giaman

Baibel i stori long pasin bilong lotuim ol god giaman na i kolim ol kain tok olsem “i no gat as bilong en” na “ol samting nating tasol.” (Jeremaia 10:3-5; 16:19, 20) Jehovaa God i tokim lain Israel bilong bipo olsem: “Yupela i no ken lotuim ol arapela god.” (Kisim Bek 20:3, 23; 23:24) Taim ol Israel i lotuim ol arapela god, “Jehova i belhat long ol Israel.”—Namba 25:3; Wok Pris 20:2; Hetman 2:13, 14.

God i holim yet wankain tingting long ol man i lotuim ol samting “em ol i kolim ol olsem god.” (1 Korin 8:5, 6; Galesia 4:8) Em i tokim ol man i laik lotuim em long stop long bung wantaim ol manmeri bilong lotu giaman, olsem: “Yupela i mas lusim ol, na stap longwe long ol.” (2 Korin 6:14-17) Sapos olgeta lotu i wankain na ol i stiaim ol man i go long God, orait wai na God i givim kain tok olsem?

Namba 2 grup: Ol i lotuim God tru long pasin we em i no orait long en

Sampela taim lain Israel i bungim bilip na pasin bilong lotuim ol god giaman wantaim lotu ol i mekim long Jehova. Tasol Jehova i no laikim dispela pasin bilong bungim lotu tru wantaim lotu giaman. (Kisim Bek 32:8; Lo 12:2-4) Jisas i krosim ol bikman bilong lotu long taim bilong em bikos long pasin ol i bihainim bilong lotuim God; long ai bilong ol man ol i mekim olsem ol i lotu tru long God, tasol ol i giaman, ol “i no tingim ol bikpela tok bilong Lo, olsem stretpela pasin na pasin marimari na pasin bilong bilip.”—Matyu 23:23.

Long nau, lotu em tok i tru i as bilong en i stiaim ol man i go long God. Dispela tok i tru i stap long Baibel. (Jon 4:24; 17:17; 2 Timoti 3:16, 17) Ol lotu em ol i skulim ol man long ol bilip we Baibel i no as bilong en, ol i stiaim ol man i go longwe long God. Planti bilip em ol man i ting i kam long Baibel—kain olsem bilip bilong God triwan, bilip olsem taim man i dai, wanpela hap bilong em i stap laip yet, na man i save kisim pen long paia inap oltaim oltaim—ol dispela bilip ol i kisim long ol man i save lotuim ol god giaman. Ol lotu i skulim ol man long ol kain bilip olsem, ol i “lotu nating” o ol kain lotu olsem i no gat as bilong en, long wanem, ol i no bihainim ol lo bilong God, nogat, ol i bihainim ol lo bilong lotu.—Mak 7:7, 8.

God i heitim tru ol lotu i save mekim pasin giaman. (Taitus 1:16) Lotu i tru i helpim ol man long i go klostu long God na i stiaim ol long olgeta disisen na olgeta samting long laip bilong ol, na ol i no bihainim tasol wanpela pasin bilong lotu. Olsem, Baibel i tok: “Sapos wanpela man i ting em i lotuim God, tasol em i no bosim gut maus bilong em, orait dispela man i giamanim bel bilong em yet na em i lotu nating tasol. Pasin bilong mekim lotu i klin na i no gat doti long en long ai bilong God Papa bilong yumi i olsem: yumi mas lukautim gut ol pikinini i no gat papamama na ol wido, na helpim ol long karim ol hevi bilong ol. Na yumi mas stap longwe olgeta long pasin doti bilong dispela graun.”—Jems 1:26, 27.