Wokim Han na Mekim Wok Long Pes

SAMPELA lain manmeri i save wokim han samting planti taim, winim narapela lain. Tasol klostu olgeta man i save wokim pes na han samting taim ol i toktok. Ol i mekim taim ol i toktok wantaim wanpela man na taim ol i toktok long ai bilong planti man.

Jisas na ol disaipel bilong em ol i bin wokim han samting. Wanpela taim ol man i kam tokim Jisas olsem mama bilong em na ol brata bilong em i laik toktok wantaim em. Jisas i bekim tok olsem: “Husat em i mama bilong mi? Na husat em i brata bilong mi?” Baibel i tok moa olsem: “Em i makim ol disaipel bilong en long han na i tok, ‘Lukim mama bilong mi wantaim ol brata bilong mi.’” (Mt. 12:​48, 49) Na long Aposel 12:17 na 13:​16, Baibel i soim olsem Pita na Pol i bin wokim han taim ol i toktok.

Yumi no ken yusim nek tasol bilong kamapim tingting na bel bilong yumi, nogat. Yumi save mekim long rot bilong wokim han na pes. Sapos yu no mekim olsem, ol man inap kisim tingting olsem yu no pilim tru tok yu mekim. Tasol taim yu mekim gutpela wok long dispela pasin, toktok bilong yu bai kamap gutpela tru. Na maski yu toktok long telefon, sapos yu wokim han na mekim nais long pes, nek bilong yu bai kamapim olsem tok yu mekim em i bikpela samting, na em bai kamapim tingting bilong yu long samting yu stori long en. Olsem na maski yu mekim tok long tingting tasol o yu ritim tok, o ol man i lukluk long yu o long Baibel bilong ol yet, pasin bilong wokim han na pes inap helpim tok yu mekim.

Yu no ken wokim han na pes long pasin i olsem yu bin lainim long wanpela buk. Yu no bin lainim long wanpela buk pasin bilong lap o kros. Taim yu wokim han samting, dispela i mas kamapim samting yu pilim long bel. Olsem na taim yu pilim tok yu mekim na yu wokim han samting, em i gutpela tru.

I gat tupela kain pasin bilong wokim han samting: taim yu stori long wanpela samting na taim yu laik strongim tok yu mekim. Taim yu stori long wanpela samting, han i ken makim samting i kamap o samting i bikpela olsem wanem o i stap we. Long skul, taim ol i makim yu long wok long dispela stadi, yu no ken wokim han wanpela o tupela taim tasol. Long kirap bilong tok i go inap long pinis bilong en, traim long wokim han long pasin yu bai mekim taim yu toktok nating wantaim man. Sapos yu hatwok long mekim olsem, ating yu ken painim ol tok i makim samting i stap we, i longwe olsem wanem, bikpela bilong en, i stap long wanem hap, o wanpela i stap klostu na narapela i stap long hap. Tasol no ken tingting planti long ol man bai ting olsem wanem. Tingim gut ol samting tok i kamapim na mekim ol samting yu save mekim taim yu toktok wantaim ol man long ol narapela taim. Taim bel i stap isi, pasin bilong wokim han i no hatwok.

Taim yu wokim han bilong strongim tok, dispela i makim olsem yu pilim tru dispela tok na yu bilip long en. Pasin bilong wokim han i save strongim ol tingting yu laik kamapim. Dispela pasin i gat bikpela wok, tasol was gut! Em inap kamap olsem wanpela pasin yu save mekim nating tasol. Sapos yu wokim han planti taim long wankain pasin, ol man bai tingim dispela tasol, na tok bilong yu nogat. Sapos wasman skul i tokim yu olsem yu gat dispela hevi, orait pastaim, mobeta yu wokim han tasol taim yu stori long wanpela samting na yu laik makim olsem em i stap we o sais bilong en o kain tok olsem. Bihain yu ken kirap gen long wokim han bilong strongim tok bilong yu.

Bilong save long wanem kain pasin bilong wokim han bilong strongim tok yu bai mekim, yu mas tingim tingting bilong ol man yu toktok long ol. Ating ol man bai i no amamas sapos yu sutim pinga long ol. Long sampela ples sapos wanpela man i putim han long maus bilong em bilong soim olsem em i kirap nogut long samting, ol man bai ting em i gat pasin olsem meri. Long sampela hap bilong graun ol i pilim olsem em i no gutpela pasin long ol meri i wokim han taim ol i toktok. Olsem na long kain ples olsem ol sista i mas strong moa long mekim wok long pes. Na long klostu olgeta hap, taim yu givim tok long wanpela liklik grup, ol man bai lap sapos yu wokim han bikpela tru.

Taim yu wok long kisim save long pasin bilong mekim tok na bel bilong yu i stap isi moa taim yu toktok, pasin bilong yu long wokim han bilong strongim tok bai kamapim tru bel bilong yu, na soim olsem yu bilipim tru tok yu mekim. Dispela bai helpim tok bilong yu long kamap gutpela moa.

Lukluk Bilong Pes Bilong Yu. Pes bilong yu, winim ol narapela hap bilong bodi, i save kamapim samting yu pilim long bel. Ai, pasin bilong opim maus na slipim het liklik, ol dispela samting tu i gat wok. Maski yu no mekim wanpela tok, tasol pes bilong yu inap kamapim olsem yu les, o nolaik tru, o tingting planti, o kirap nogut, o amamas. Taim yu toktok na pes i kamapim ol dispela pasin, ol man inap lukim na pilim gut tok yu kamapim. Man bilong wokim yumi i bin putim 30 samting masol long pes bilong yumi. Yumi yusim planti bilong ol dispela masol taim yumi smail.

Maski yu sanap long pletfom o yu mekim wok autim tok, yu laik givim gutpela tok long ol man, em tok i save mekim bel bilong ol i amamas. Taim yu smail na pes i lait dispela i save kamapim dispela laik bilong yu. Tasol sapos yu pes drai, ol man bai i gat tupela tingting, yu bilip tru long tok yu mekim o nogat.

Taim yu smail i olsem yu tokim ol narapela olsem yu laik mekim gut long ol. Dispela em i bikpela samting long nau, long wanem, ol man i save pret long ol man ol i no save long ol. Taim yu smail, dispela inap mekim bel bilong ol man i stap isi na ol i laik harim tok bilong yu.