STADI 29

Krai Bilong Nek

OL MANMERI i save tingim tok yu mekim na tu ol i save tingim pasin bilong yu long mekim dispela tok. Taim man i toktok wantaim yu, sapos nek bilong em i gutpela na i kamapim olsem em i tingim yu na em i laik stap pren bilong yu, bai yu amamas long harim tok bilong em, winim nek bilong man i tok strong olsem em i gat hatpela pasin na i no gat pasin sori, a?

Bilong kamapim nek i gutpela long harim, i no samting bilong nek tasol. Ating pasin bilong man yet i insait long dispela. Taim man i wok long kisim save long tok i tru bilong Baibel na bihainim, ol narapela inap lukim sampela senis long pasin bilong em long toktok. Pasin bilong em long kolim tok bai kamapim ol gutpela pasin bilong God olsem pasin sori, amamas, na helpim ol man. (Ga. 5:22, 23) Taim em i tingim tru ol narapela, nek bilong em i kamapim dispela. Taim pasin bilong tok tenkyu i senisim pasin bilong toktok planti oltaim, ol tok na pasin bilong kolim dispela tok i kamapim dispela. (Kra. 3:39-42; 1 Ti. 1:12; Ju. 16) Maski yu no save long tok ples man i mekim, yu inap harim long nek olsem man i gat pasin antap, na pasin bilong strong tumas, na toktok planti, na hatpela pasin, o man i gat pasin daun, na pasin bilong isi long narapela, na mekim gut long narapela, na pasin sori.

Sampela taim krai bilong nek i no gutpela, long wanem, man i bin kisim wanpela sik i bagarapim nek bilong em o em i kisim dispela nek nogut long papamama. Sampela kain hevi olsem, ating yumi no inap stretim olgeta nau long dispela taim yumi stap long en. Tasol planti taim, sapos yumi lainim stretpela rot long yusim maus, nek, na waitlewa samting, nek bilong yumi inap kamap gutpela moa.

Yumi save nek bilong ol man i narapela narapela. Yu no laik kisim nek i wankain stret olsem narapela. Nogat. Wok long kisim ol gutpela pasin bilong nek bilong yu yet. Wanem samting inap helpim yu long mekim olsem? I gat tupela bikpela samting.

Pasin Bilong Pulim Gut Win. Bilong mekim gutpela wok long nek bilong yu, yu mas pulim planti win liklik na bosim gut win yu pulim. Sapos yu no mekim olsem bai nek bilong yu i no krai strong, na bai yu kolim liklik tok, pulim win na kolim liklik tok moa na pulim win gen.

Bikpela hap bilong waitlewa i no stap long hap bilong bros antap, nogat; em i luk olsem, long wanem, ol bun bilong sol i bikpela. Tasol hap bilong waitlewa i bikpela moa, em i stap daunbilo long hap klostu long bel em ol i kolim daiafram. Daiafram em i pas long ol bun bilong banis daunbilo, namel long bros na bel.

Sapos yu pulim win i kam insait long hap bilong waitlewa i stap antap tasol, kwiktaim bai yu sotwin. Nek bilong yu bai i no gat strong na skin bai les kwik. Bilong pulim gut win yu mas sindaun o sanap stret na pulim sol bilong yu i go baksait. Taim yu laik toktok, no ken pulim win i kam insait long hap bilong bros tasol. Pulim win insait long hap daunbilo klostu long bel pastaim. Taim win i pulap long dispela hap, orait hap bilong ol bun bilong banis long sait sait bai go bikpela. Long dispela taim daiafram bilong yu bai i go daun na isi isi em i subim bel i go daun, na nau bai yu pilim olsem let bilong yu na klos tu bai pas long bel. Tasol waitlewa i no stap long dispela hap; em i stap insait long ol bun bilong banis. Bilong mekim traim, putim han long tupela sait bilong bodi long hap daunbilo bilong ol bun bilong banis. Nau pulim bikpela win. Sapos yu mekim stret, bai yu no pulim bel i kam insait na sol bilong yu bai i no kam antap. Bai yu pilim ol bun bilong banis i meknais i go antap na solap liklik.

Bihain, wok long pasin bilong rausim win. No ken lusim nating dispela win na rausim hariap. Rausim isi isi. No ken taitim ol masol bilong nek bilong rausim win isi isi. Dispela bai mekim krai bilong nek i go antap. Ol masol bilong bel na ol masol namel long ol bun bilong banis i mekim na waitlewa i wok long rausim win, na daiafram i mekim na bai win i raus hariap o isi isi.

Olsem wanpela man i save trening bilong insait long resis, man bilong mekim tok i ken mekim sampela eksasais bilong lain long pulim gut win. Sanap stret na pulim sol bilong yu i go baksait liklik. Pulim win i go insait long hap bilong waitlewa daunbilo, na isi isi rausim dispela win. Taim yu wok long rausim win, kaunim ol namba i go i go inap win bilong yu i pinis. Bihain wok long rit long maus na pulim na rausim win long wankain pasin olsem yu mekim long dispela eksasais.

Slekim Ol Masol Liklik. Narapela samting em inap helpim krai bilong nek em i olsem—stap isi! Sapos yu lain long stap isi taim yu toktok, dispela bai helpim krai bilong nek i kamap gutpela moa. Tingting na bodi wantaim i mas i stap isi, long wanem, sapos yu tingting planti dispela bai mekim ol masol i tait.

Tingting bilong yu i ken stap isi sapos yu kisim stretpela tingting long ol man i harim tok bilong yu. Sapos em ol man yu bungim long wok autim tok, orait maski yu bin stadi long Baibel inap sampela mun tasol, yu save pinis long sampela gutpela samting bilong laik bilong Jehova yu ken stori wantaim ol long en. Na yu save go lukim ol, long wanem, ol i mas kisim sampela helpim, maski ol i save long dispela o nogat. Tasol sapos yu mekim tok long Haus Kingdom, klostu olgeta manmeri i stap em ol lain bilong Jehova. Em ol pren bilong yu na ol i laik bai yu mekim gut tok bilong yu. Long kain taim olsem yumi save toktok wantaim ol man i gat pasin sori na pasin pren, winim ol narapela lain man.

Tingting strong long slekim ol masol bilong nek. Tingim, ol vokal kod insait long nek i save meknais taim yu rausim win. Krai bilong nek i save senis taim yu taitim o slekim ol masol bilong nek, kain olsem krai bilong gita i save senis taim yu taitim o slekim string bilong en. Taim yu slekim ol vokal kod, krai bilong nek i go daun. Na tu, taim yu slekim ol masol bilong nek dispela i mekim na ol hap bilong nus bai op i stap, na dispela i save mekim krai bilong nek i kamap gutpela.

Slekim olgeta hap bilong bodi—ol skru, han, sol, nek. Dispela bai helpim nek bilong yu i krai gut na ol man inap harim krai bilong en longwe, long wanem, krai bilong nek i save meknaisim sampela hap bilong bodi. Tasol sapos olgeta hap bodi i tait, krai bilong nek i no inap mekim olsem. Krai bilong nek i save kirap long nek na i meknaisim hap i stap baksait long nus na ol bun bilong bros, tit, na rup bilong maus. Ol dispela i mekim na nek i krai gut. Sapos yu putim wanpela samting i hevi antap long bel bilong gita, krai bilong en i no inap go longwe; bilong gita i ken krai gut, yu no ken putim wanpela hevipela samting antap long en. I wankain long ol bun bilong bodi bilong yumi, em ol masol i holimpasim ol. Taim krai bilong nek i meknaisim ol hap bilong bodi dispela i mekim na yu inap kamapim long nek ol samting yu pilim long bel. Na tu, taim yu toktok long wanpela bikpela lain ol inap harim gut tok na yu no gat wok long singaut strong na bagarapim nek bilong yu.

ROT TOKTOK I KAMAP LONG EN

As bilong olgeta nois bilong ol tok yu mekim em win i save lusim waitlewa na i kam antap. Win i pulap long waitlewa na waitlewa i save subim win i go long winpaip na insait long hap ol i kolim vois boks, em i stap namel long nek. Insait long vois boks bilong yu i gat tupela liklik hap masol i stap ol i kolim vokal kod. Long dispela hap, krai bilong nek i save kamap. Dispela tupela masol i save opim na pasim rot bilong win i go insait o kam ausait, na tu ol i no larim ol pipia samting i go insait long waitlewa. Taim man i pulim win tasol, i no gat krai samting i kamap. Tasol taim man i laik toktok, orait ol masol i taitim ol vokal kod, na ol i meknais taim win i lusim waitlewa na i kisim ol. Orait long dispela rot nois o toktok i kamap.

Taim ol masol i taitim strong moa ol vokal kod, ol i save meknais hariap moa na dispela i save mekim krai bilong nek i antap. Tasol taim ol vokal kod i slek, krai bilong nek i daunbilo. Orait taim krai bilong nek i lusim dispela hap, em i save go antap moa long nek na i go insait long maus na hap bilong nus. Long dispela hap ol kain kain senis i kamap long krai bilong nek. Rup bilong maus, tang, tit, maus, na wasket i wok wantaim long brukbrukim dispela krai bilong nek. Long dispela rot ol toktok i save kamap na ol man inap harim na save long en.

Nek bilong man i narapela kain tru, winim ol samting ol man yet i kamapim. Em inap kamapim ol samting yumi pilim, olsem man i laikim tru narapela o em i no laikim narapela na i laik bagarapim em. Taim man i lainim gut nek bilong em, em inap mekim gutpela singsing i go antap tru na i go daun tru na mekim ol tok i kirapim bel bilong man.

WINIM SAMPELA HEVI

Nek i no strong. Nek i no krai strong i no olsem em i no gat strong. Sapos em i gat ol naispela krai bilong en, ol narapela bai amamas long putim yau long en. Tasol bilong mekim gutpela wok, krai bilong nek i mas antap inap ol man i ken harim.

Bilong ol i ken harim nek bilong yu longwe moa yu mas wok long mekim krai bilong nek i meknaisim ol hap bilong bodi. Bilong mekim olsem yu mas lain long slekim ol masol bilong bodi, olsem yumi bin stori long en long dispela stadi. Sapos yu slekim ol masol bilong bodi na mekim singsing long nek tasol taim maus i pas, dispela bai helpim yu. No ken pasim maus strong. Taim yu mekim olsem yu ken pilim insait bilong het na bros bilong yu i meknais.

Sampela taim nek i no strong, long wanem, man i sik o em i no bin malolo gut long nait. Olsem na sapos em i kamap orait o kisim gut malolo, orait krai bilong nek bai kamap gutpela moa.

Krai bilong nek i antap tumas. Taim yu taitim moa ol vokal kod dispela i mekim na krai bilong nek bai go antap moa. Sapos nek i krai olsem man i pret liklik, ol man i harim bai pilim olsem tu. Taim yu slekim ol masol i stap long nek, dispela bai mekim na krai bilong nek i no antap tumas. Traim mekim olsem taim yu toktok wantaim ol man long olgeta de. Pasin bilong pulim bikpela win tu i save helpim dispela.

Krai bilong nek i olsem man i pasim nus na toktok. Sampela taim as bilong dispela hevi i olsem samting i pasim nus, tasol dispela i no kamap planti taim. Sampela taim man bai taitim ol masol bilong nek na maus na dispela i pasim nus, na win i no inap kamaut long nus. Dispela i mekim na krai bilong nek i narapela kain. Bilong abrusim dispela hevi yu mas stap isi.

Nek i krai olsem man i gat hatpela pasin. Ol man i save pret long kamapim tingting bilong ol long man i gat kain nek olsem.

Sampela man i gat nek olsem, ol i mas wok oltaim long senisim sampela pasin bilong ol. (Kl. 3:8, 12) Sapos ol i mekim dispela samting pinis, ol i mas bihainim ol pasin i save helpim nek bilong ol i kamap gutpela moa. Slekim ol masol bilong nek na wasket. Long dispela rot ol man bai amamas moa long krai bilong nek bilong yu na bai yu no pasim tit na toktok na paulim krai bilong toktok.