Ol Tok Ol Man Inap Kisim Gut

TAIM yu toktok, yu no ken kamapim sampela save tasol. Wok long mekim ol tok ol man inap long kisim gut. Dispela bai helpim yu long toktok gut wantaim ol, maski yu toktok long kongrigesen o long ol man ol i no Witnes.

I gat planti samting yu ken mekim bilong kamapim tok ol man inap kisim gut. Sampela bilong ol dispela samting i stap long Stadi 26, “Skruim Gut Narapela Hap Tok i Go Long Narapela.” Sampela moa i stap long Stadi 30, “Soim Olsem Yu Tingim Narapela.” Long dispela stadi, bai yumi stori long sampela samting moa.

Ol Tok na Pasin Bilong Kolim Tok i No Hatwok Long Kisim. Ol tok i no hatwok long kisim na ol sotpela sentens ol i olsem ol strongpela tul bilong toktok wantaim ol narapela. Tok Jisas i bin mekim antap long maunten em wanpela tok ol man inap kisim gut mining bilong en maski ol i husat o ol i stap we. Ating samting em i stori long en i nupela long ol. Tasol ol inap kisim gut tok bilong Jisas, long wanem, em i toktok long ol samting yumi olgeta i tingting long en: rot bilong i stap amamas, stap gut wantaim ol narapela, rot bilong karim ol hevi, na painim as bilong i stap bilong yumi. Na em i kamapim tingting bilong em long ol tok i no hatwok long ol man nating long kisim. (Mt., sap. 5-7) Na tu, long Baibel i gat kain kain sentens na longpela bilong ol i no wankain. Namba wan samting yu laik mekim em bilong kamapim klia tingting bilong yu long rot ol man inap kisim gut.

Maski yu toktok long sampela tok i hatwok long kisim mining bilong en, sapos yu kamapim long wanpela pasin i no hatwok long bihainim, dispela inap mekim na em i isi liklik long kisim. Yu ken mekim olsem wanem? No ken kamapim planti tok i no helpim ol bikpela tok. Stretim gut na kamapim ol tok i save helpim ol bikpela tok. Skelim gut na makim ol skripsa yu bai kamapim. No ken ritim wanpela skripsa na kwiktaim ritim narapela, nogat, ritim na stori long wanpela pastaim na bihain kirap ritim narapela. No ken mekim planti toktok na dispela i haitim gutpela tingting yu laik kamapim.

Bihainim wankain tingting taim yu mekim wanpela Baibel-stadi. No ken kamapim olgeta liklik liklik samting. Helpim sumatin long kisim gut ol nambawan bikpela tingting. Bihain, taim em i mekim stadi bilong em yet na long ol miting bilong kongrigesen, em i ken kisim save long ol dispela narapela samting.

Bilong kamapim ol tok i isi long kisim gut, yu mas redi gut pastaim. Bilong kamapim ol tok ol narapela inap kisim gut, yu yet yu mas save gut long samting yu laik stori long en. Taim yu save gut long wanpela samting, orait yu inap kamapim sampela as na dispela tok i stret. Na tu, yu inap kamapim dispela stori long toktok bilong yu yet.

Kamapim Mining Bilong Ol Tok Ol Man i No Save Long En. Sampela taim, bilong helpim odiens long save long samting yu stori long en yu mas kamapim mining bilong ol tok ol i no save long en. No ken ting olsem odiens i gat save long samting yu stori long en, tasol no ken kisim tingting olsem ol i no inap lain. Save yu kisim taim yu stadi long Baibel, dispela i mekim na ating yu save kolim sampela tok ol man inap paul long en. Sapos yu no stori long mining bilong ol kain tok olsem “remnan,” “wokboi i gat gutpela tingting,” “ol arapela sipsip” na “bikpela lain,”ol man i no save bung wantaim ol Witnes Bilong Jehova bai i no inap save olsem ol dispela tok i makim stret sampela lain manmeri. (Ro. 11:​5, NW; Mt. 24:45; Jo. 10:16; KTH 7:​9, NW) Na i wankain long ol tok olsem “pablisa,” “painia,” “wasman sekit,” na “Memorial.” Sapos man i no save long oganaisesen bilong ol Witnes Bilong Jehova, ating em i no inap save long mining bilong ol dispela tok.

Sampela tok bilong Baibel ol man i no Witnes ol i save kolim, ating yu mas kamapim mining bilong ol dispela tok tu. Planti man i ting, “Armagedon” i makim bagarap bai kamap long rot bilong bom nuklia. Ating ol i ting “Kingdom bilong God” em i wanpela pasin bilong bel o em i samting bilong heven, tasol i no wanpela gavman. Dispela tok “spirit” inap kirapim ol man long tingim wanpela samting i stap laip long ples spirit bihain long bodi i dai pinis. Lotu i bin lainim planti milion man olsem “holi spirit” em i wanpela man, na em i hap bilong wanpela God Triwan. Planti manmeri tumas i bin lusim ol stretpela lo bilong Baibel, olsem na ating ol i mas kisim helpim long save long insait bilong tok bilong Baibel taim em i tok: “Oltaim yupela i mas i stap longwe long pasin pamuk.”​—1 Ko. 6:18.

Ol man i no save ritim Baibel long olgeta taim ol inap paul sapos yu tok tasol olsem, “Pol i tok . . . ” o “Luk i tok . . . ” Ating ol i gat ol pren o ol man i stap klostu long ol i gat ol dispela nem. Ating yu mas kolim sampela tok na bai ol man i ken save yu stori long wanpela aposel Kristen o wanpela man bilong raitim Baibel.

Planti taim ol man bilong nau i mas kisim helpim long kisim gut ol skripsa i stori long sais bilong samting o long sampela pasin bilong bipo. Maski Buk Baibel i kolim sais bilong sip bilong Noa olsem longpela bilong en inap 130 mita, bikpela bilong en inap 22 mita, na antap bilong en inap 13 mita, yu inap mekim sampela samting moa bilong helpim ol man long save gut long sais bilong en. (St. 6:15) Sapos yu stori olsem sais bilong sip i kain olsem wanpela samting ol man i save gut long en, dispela bai helpim kwik odiens long tingim sip i bikpela olsem wanem.

Kamapim Gut Mining. Bilong odiens i ken klia gut long tok yu mekim, ating yu no ken kamapim mining tasol bilong wanpela tok. Long Jerusalem long taim bilong Esra, ol i bin ritim Lo na ol i kamapim mining tru bilong en. Bilong helpim ol man long kisim gut mining bilong ol tok, ol Livai i save kamapim as bilong ol tok na olsem wanem ol i mas bihainim dispela Lo long i stap bilong ol long dispela taim bipo. (Neh. 8:​8, 12) Long wankain pasin, yu mas kamapim insait bilong ol skripsa yu ritim na stori long olsem wanem ol skripsa inap helpim ol.

Bihain long indai na kirap bek bilong em, Jisas i stori long ol disaipel olsem ol samting nau tasol i bin kamap i truim tok bilong ol skripsa. Na tu, em i kamapim strong olsem ol i gat wok long autim tok long ol samting i bin kamap na ol yet i bin lukim. (Lu. 24:​44-48) Taim yu helpim ol man long save olsem ol samting ol i lainim i mas mekim wanem long i stap bilong ol, em i isi moa long ol i ken kisim gut ol tok yu lainim ol long en.

Tingting Bilong Bel. Tasol maski yu kamapim klia mining bilong ol tok, sampela samting moa inap mekim na man bai kisim gut dispela tok o nogat. Taim bel bilong man i pas, dispela i olsem rot-blok na man i no inap kisim mining bilong tok yu mekim. (Mt. 13:​13-15) Long ol man i tingting tasol long ol samting bilong skin, ol samting bilong spirit em i kranki samting tasol. (1 Ko. 2:14) Taim wanpela man i kamapim dispela kain tingting, ating pastaim em i gutpela long pinisim toktok.

Tasol sampela taim bel bilong man i pas, long wanem, em i gat planti hevi long i stap bilong em. Sapos kain man olsem i harim tok i tru bilong Baibel i go i go, ating bel bilong em bai senis na bai em i laik long harim tok i tru. Taim Jisas i tokim ol aposel olsem ol man bai wipim em na kilim em i dai, ol i no kisim insait bilong dispela tok. Bilong wanem? Ol i no ting dispela samting bai kamap, na tu, ol i no laik bai dispela samting i painim ol! (Lu. 18:​31-34) Tasol bihain, 11-pela bilong ol i bin kisim gut dispela tok, na ol i soim olsem taim ol i bihainim ol tok Jisas i bin lainim ol long en.

Stap Olsem Gutpela Piksa. Ol tok yumi mekim na pasin yumi bihainim i save helpim ol man long kisim save. Planti man i stori long namba wan taim ol i bin kam long Haus Kingdom, na ol i tok ol i tingim pasin sori ol man i kamapim​—ol tok bilong miting nogat. Na tu, pasin bilong yumi long amamas i bin helpim planti man long opim bel na tingting bilong ol long harim tok i tru bilong Baibel. Sampela i lukim gutpela pasin tru ol lain bilong Jehova i mekim long ol wanbilip na gutpela pasin ol i mekim long ol narapela man taim ol i bungim hevi, na dispela i kirapim ol long ting olsem ol Witnes i holim lotu i tru. Olsem na taim yu wok long helpim ol man long kisim save long tok i tru bilong Baibel, tingim pasin bilong yu long kamapim klia ol dispela tok, na tingim pasin yu save bihainim long wokabaut bilong yu.