Yu Ting Yu Gat Wanpela Spirit i No Save Dai?
I GAT laip bihain long taim yumi dai? Inap planti tausen yia ol man i laik save long bekim bilong dispela askim. Kirap long bipo yet na i kam inap long nau, ol pipel bilong olgeta hap i bin tingting long dispela askim na ol i bin kamapim ol kain kain bilip long dispela.
Long olgeta hap bilong graun, na long ol hap bilong Pasifik olsem Polinisia, Melanisia, na Maikronisia, planti manmeri i bilip olsem taim man i dai, i gat wanpela “spirit,” o tewel, i stap laip yet. Olsem wanem? I gat wanpela samting i stap insait long man na taim em i dai dispela samting i save lusim bodi na i stap laip ausait long bodi? Dispela spirit i stap insait long man i stap laip, em i wanem samting? Wanem samting i painim dispela spirit taim man i dai? Tok bilong God, em Baibel, i save kamapim ol gutpela bekim bilong ol dispela askim.
Spirit Em i Wanem Samting?
Long Baibel, mining bilong ol dispela tok ol i tanim olsem “spirit,” em “pulim win.” Tasol dispela tok i no makim pasin bilong pulim win tasol. Jems, em man bilong raitim hap bilong Baibel, i tok: “Bodi i no gat spirit i stap long en, em i dai pinis.” (Jems 2:26) Olsem na spirit em i wanpela strong i helpim bodi long i stap laip.
Dispela strong i no olsem win yumi pulim. Bilong wanem yumi tok olsem? Long wanem, taim yumi no pulim win moa, laip i stap yet insait long ol sel bilong bodi inap sotpela taim—“inap sampela minit,” olsem buk The World Book Encyclopedia i tok. Long dispela as yu inap winim win i go insait long man na kirapim em long pulim win, na ol dokta inap katim hap bodi bilong wanpela man na putim insait long narapela man. Tasol taim dispela strong bilong laip i lusim ol sel bilong bodi, yu no inap kirapim dispela man na bai em i stap laip gen. Maski yu winim planti win i go insait long bodi, dispela i no inap kirapim wanpela sel. Olsem na spirit em i strong bilong laip—em yumi no inap lukim—i helpim ol sel i stap laip. Bilong dispela strong i ken stap, yumi mas pulim win.—Jop 34:14, 15.
Olsem wanem? Dispela spirit i save wok insait long ol man tasol? Tok bilong Baibel i save helpim yumi long kisim stretpela save long dispela. Saveman King Solomon i tok: “Sampela man i ting spirit bilong man i go antap na spirit bilong ol abus i go daun long graun. Tasol husat inap save tru long dispela samting?” (Saveman 3:21) Olsem na ol animal na ol man i gat wanpela spirit. Dispela tok i tru olsem wanem?
Yumi ken tok piksa olsem dispela spirit, o strong bilong laip, i kain olsem pawa i save ran long wanpela masin o redio samting. Pawa, yumi no inap lukim, inap mekim kain kain wok, olsem: Em inap mekim stov i kamap hat, na kompiuta i bungim ol namba samting, na televisen i kamapim piksa na musik. Pawa i kirapim ol masin long mekim wok, tasol pawa yet i no kisim pasin bilong ol dispela masin. Nogat. Em i stap olsem wanpela strong tasol. Olsem tasol, dispela strong bilong laip i stap insait long ol man na ol animal i no kisim pasin bilong ol dispela man na animal, nogat. Em i no gat pasin o tingting. Spirit bilong ol man na ol animal i wankain. (Saveman 3:19) Olsem na taim man i dai, spirit bilong em i no stap laip yet long wanpela ples spirit.
Orait, ol man i dai pinis ol i stap olsem wanem? Na wanem samting i kamap long spirit bilong man taim em i dai?
“Bai Yu Go Bek Gen Long Graun”
Taim namba wan man Adam i bikhet na sakim lo bilong God, Jehova i tokim em: “Bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.” (Stat 3:19) Taim Jehova i no wokim yet Adam long graun, em i stap we? Em i no stap. Olsem na taim God Jehova i tokim Adam, “bai yu go bek gen long graun,” i olsem em i tokim Adam em bai dai. Adam i no go long wanpela ples spirit. Taim em i dai, em i kamap gen olsem graun—em i no gat laip, em i no stap. Strafe bilong Adam em indai—em i no stap laip moa—i no bilong i go i stap long narapela ples.—Rom 6:23.
Tasol olsem wanem long ol narapela i bin i dai? Saveman 9:5, 10 i tokaut klia long man i dai pinis i stap olsem wanem. Em i tok: “Ol man i dai pinis, ol i no inap save long wanpela samting . . . Yu no inap mekim wok o tingting o kisim gutpela tingting na save long ples bilong ol man i dai pinis.” Olsem na taim man i dai, em i no i stap.
Samting i kamap ples klia i olsem: Ol man i dai pinis ol i no gat tingting na ol i no inap mekim wanpela samting. Ol i no inap lukim yu, harim yu, o toktok wantaim yu. Ol i no inap helpim yu o mekim nogut long yu. I no gat as na yumi pret long ol man i dai pinis. King Solomon i tok: “Long taim bilong dai, spirit bilong yumi i laik lusim bodi bilong yumi, na yumi no inap pasim.” (Saveman 8:8) Tasol olsem wanem spirit i “lusim” bodi bilong man taim em i dai?
God ‘i Kisim Bek Spirit Bilong Em’
Baibel i tok sapos God “i kisim bek spirit na win bilong em long olgeta samting i gat laip, orait olgeta samting bai i dai wantu tasol.” (Jop 34:14, 15) Olsem wanem? Dispela i makim olsem wanpela spirit i save lusim man na wokabaut i go long ples antap na kamap long God? Nogat! Long Baibel, dispela tok “kisim bek” i no makim olsem samting i lusim wanpela hap na i go long narapela hap. Olsem: God i tokim ol Israel ol i no stap gut long em: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.” (Malakai 3:7) Taim Jehova i tok long “kisim bek” Israel, dispela i makim olsem em i orait gen long ol manmeri bilong em. Olsem na bilong Jehova i “kisim bek” lain Israel, i no olsem ol i mas lusim wanpela hap na i go stap long narapela hap. Nogat.
I wankain tu taim man i dai. Taim God i “kisim bek” spirit, spirit i no lusim graun na i go long heven. Tingim: Spirit em i strong bilong laip. Taim dispela strong i lusim bodi bilong man, God tasol inap givim bek dispela strong long em. Olsem na taim God i “kisim bek spirit,” dispela i makim olsem God tasol inap givim laip gen long dispela man long bihain.
Tingim tok Baibel i mekim long i dai bilong Jisas. Luk i tok: “Jisas i singaut strong moa olsem, ‘Papa, mi putim spirit bilong mi long han bilong yu.’ Em i tok olsem, na em i dai.” (Luk 23:46) Taim spirit bilong Jisas i lusim em, long dispela taim Jisas i no go long heven. Nogat. Tripela de i lus pastaim na Jisas i kirap bek. Na inap 40 de moa na em i go antap long heven. (Aposel 1:3, 9) Tasol taim em i dai, Jisas i putim spirit bilong em long han bilong Papa—em i bilip tru long strong bilong Jehova long givim laip gen long em.
Tru tumas, God tasol inap givim laip gen long man. (Song 104:30) Long dispela rot yumi inap kisim planti gutpela samting long bihain!
Yumi Ken Bilip Tru
Baibel i tok: “Taim i laik kamap na olgeta manmeri i stap long matmat [“bilong ol man God i tingim yet ol,” NW ] ol bai i harim maus bilong Pikinini, na ol bai i lusim matmat na i kam ausait.” (Jon 5:28, 29) Yes, Jisas Krais i tok promis olsem olgeta man Jehova i tingim yet ol, ol bai kirap bek, olsem kisim laip gen. Bai i no gat moa ol toksave olsem man i dai na yumi pilim bel hevi, nogat, bai yumi pilim amamas long harim ol toksave olsem ol man i kisim laip gen. Bai yumi amamas tru long sekanim ol manmeri yumi laikim ol tru i kirap bek long matmat!
Olsem wanem? Yu laik kisim sampela save moa long olsem wanem dispela bilip em God i as bilong en inap helpim yu? Mipela i laik kirapim yu long raitim pas i go long wanpela atres i stap daunbilo bilong kisim wanpela liklik buk, nem bilong en Tewel Bilong Ol Daiman—Yu Ting Ol Inap Helpim o Nogutim Yu? Tru Ol i Stap o Nogat?
Ol tok bilong Baibel long dispela nius mipela i kisim long Buk Baibel; tasol taim mipela i kisim long Baibel Inglis New World Translation of the Holy Scriptures na tanim long tok Pisin, mipela i putim NW bihain long en.