Yu Ting Yu Gat Wanpela Spirit i No Save Dai?

APOSEL Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God.” (2 Timoti 3:16) Tru tumas, Baibel em i wanpela buk bilong tok tru na yumi kisim long God tru, em Jehova.​—⁠Song 83:⁠18.

Jehova em i Man bilong wokim yumi na olgeta samting, olsem na em i save gut long wanem samting i painim yumi taim yumi dai. (Hibru 3:4; KTH 4:11) Na long Baibel em i givim ol bekim i tru na i stret long tingting bilong yumi long ol askim long laip bihain long indai.

Spirit Em i Wanem Samting?

Long Baibel, mining bilong ol dispela tok ol i tanim olsem “spirit,” em “pulim win.” Tasol dispela tok i no makim pasin bilong pulim win tasol. Jems, em man bilong raitim hap bilong Baibel, i tok: “Bodi i no gat spirit i stap long en, em i dai pinis.” (Jems 2:26) Olsem na spirit em i wanpela strong i helpim bodi long i stap laip.

Dispela strong i no olsem win yumi pulim. Bilong wanem yumi tok olsem? Long wanem, taim yumi no pulim win moa, laip i stap yet insait long ol sel bilong bodi inap sotpela taim​—⁠“inap sampela minit,” olsem buk The World Book Encyclopedia i tok. Long dispela as yu inap winim win i go insait long man na kirapim em long pulim win, na ol dokta inap katim hap bodi bilong wanpela man na putim insait long narapela man. Tasol taim dispela strong bilong laip i lusim ol sel bilong bodi, yu no inap kirapim dispela man na bai em i stap laip gen. Maski yu winim planti win i go insait long bodi, dispela i no inap kirapim wanpela sel. Olsem na spirit em i strong bilong laip​—⁠em yumi no inap lukim​—⁠i helpim ol sel i stap laip. Bilong dispela strong i ken stap, yumi mas pulim win.​—⁠Jop 34:​14, 15.

Olsem wanem? Dispela spirit i save wok insait long ol man tasol? Tok bilong Baibel i save helpim yumi long kisim stretpela save long dispela. Saveman King Solomon i tok: “Sampela man i ting spirit bilong man i go antap na spirit bilong ol abus i go daun long graun. Tasol husat inap save tru long dispela samting?” (Saveman 3:21) Olsem na ol animal na ol man i gat wanpela spirit. Dispela tok i tru olsem wanem?

Yumi ken tok piksa olsem dispela spirit, o strong bilong laip, i kain olsem pawa i save ran long wanpela masin o redio samting. Pawa, yumi no inap lukim, inap mekim kain kain wok, olsem: Em inap mekim stov i kamap hat, na kompiuta i bungim ol namba samting, na televisen i kamapim piksa na musik. Pawa i kirapim ol masin long mekim wok, tasol pawa yet i no kisim pasin bilong ol dispela masin. Nogat. Em i stap olsem wanpela strong tasol. Olsem tasol, dispela strong bilong laip i stap insait long ol man na ol animal i no kisim pasin bilong ol dispela man na animal, nogat. Em i no gat pasin o tingting. Spirit bilong ol man na ol animal i wankain. (Saveman 3:19) Olsem na taim man i dai, spirit bilong em i no stap laip yet long wanpela ples spirit.

Orait, ol man i dai pinis ol i stap olsem wanem? Na wanem samting i kamap long spirit bilong man taim em i dai?

“Bai Yu Go Bek Gen Long Graun”

Taim namba wan man Adam i bikhet na sakim lo bilong God, Jehova i tokim em: “Bai yu hatwok oltaim inap yu dai na yu go bek long graun. Long wanem, mi bin wokim yu long graun, na bai yu go bek gen long graun.” (Stat 3:19) Taim Jehova i no wokim yet Adam long graun, em i stap we? Em i no stap. Olsem na taim God Jehova i tokim Adam, “bai yu go bek gen long graun,” i olsem em i tokim Adam em bai dai. Adam i no go long wanpela ples spirit. Taim em i dai, em i kamap gen olsem graun​—⁠em i no gat laip, em i no stap. Strafe bilong Adam em indai​—⁠em i no stap laip moa​—⁠i no bilong i go i stap long narapela ples.​—⁠Rom 6:⁠23.

Tasol olsem wanem long ol narapela i bin i dai? Saveman 9:​5, 10 i tokaut klia long man i dai pinis i stap olsem wanem. Em i tok: “Ol man i dai pinis, ol i no inap save long wanpela samting . . . Yu no inap mekim wok o tingting o kisim gutpela tingting na save long ples bilong ol man i dai pinis.” Olsem na taim man i dai, em i no i stap.

Samting i kamap ples klia i olsem: Ol man i dai pinis ol i no gat tingting na ol i no inap mekim wanpela samting. Ol i no inap lukim yu, harim yu, o toktok wantaim yu. Ol i no inap helpim yu o mekim nogut long yu. I no gat as na yumi pret long ol man i dai pinis. King Solomon i tok: “Long taim bilong dai, spirit bilong yumi i laik lusim bodi bilong yumi, na yumi no inap pasim.” (Saveman 8:⁠8) Tasol olsem wanem spirit i “lusim” bodi bilong man taim em i dai?

God ‘i Kisim Bek Spirit Bilong Em’

Baibel i tok sapos God “i kisim bek spirit na win bilong em long olgeta samting i gat laip, orait olgeta samting bai i dai wantu tasol.” (Jop 34:​14, 15) Olsem wanem? Dispela i makim olsem wanpela spirit i save lusim man na wokabaut i go long ples antap na kamap long God? Nogat! Long Baibel, dispela tok “kisim bek” i no makim olsem samting i lusim wanpela hap na i go long narapela hap. Olsem: God i tokim ol Israel ol i no stap gut long em: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.” (Malakai 3:⁠7) Taim Jehova i tok long “kisim bek” Israel, dispela i makim olsem em i orait gen long ol manmeri bilong em. Olsem na bilong Jehova i “kisim bek” lain Israel, i no olsem ol i mas lusim wanpela hap na i go stap long narapela hap. Nogat.

I wankain tu taim man i dai. Taim God i “kisim bek” spirit, spirit i no lusim graun na i go long heven. Tingim: Spirit em i strong bilong laip. Taim dispela strong i lusim bodi bilong man, God tasol inap givim bek dispela strong long em. Olsem na taim God i “kisim bek spirit,” dispela i makim olsem God tasol inap givim laip gen long dispela man long bihain.

Tingim tok Baibel i mekim long i dai bilong Jisas. Luk i tok: “Jisas i singaut strong moa olsem, ‘Papa, mi putim spirit bilong mi long han bilong yu.’ Em i tok olsem, na em i dai.” (Luk 23:46) Taim spirit bilong Jisas i lusim em, long dispela taim Jisas i no go long heven. Nogat. Tripela de i lus pastaim na Jisas i kirap bek. Na inap 40 de moa na em i go antap long heven. (Aposel 1:​3, 9) Tasol taim em i dai, Jisas i putim spirit bilong em long han bilong Papa​—⁠em i bilip tru long strong bilong Jehova long givim laip gen long em.

Tru tumas, God tasol inap givim laip gen long man. (Song 104:30) Long dispela rot yumi inap kisim planti gutpela samting long bihain!

Yumi Ken Bilip Tru

Baibel i tok: “Taim i laik kamap na olgeta manmeri i stap long matmat [“bilong ol man God i tingim yet ol,” NW ] ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Yes, Jisas Krais i tok promis olsem olgeta man Jehova i tingim yet ol, ol bai kirap bek, olsem kisim laip gen. Namel long ol em ol wokboi bilong Jehova, em ol i bin bihainim stretpela pasin. Tasol i gat planti milion man ol i dai pinis na ol i no bin kamapim paslain long indai bilong ol olsem ol bai bihainim ol stretpela lo bilong God o nogat. Ol i no bin save long ol samting Jehova i laik bai ol i mekim o ol i no bin i gat taim long kamapim ol senis ol i mas mekim bilong stap gut wantaim God. Ol kain man olsem, ol tu i stap long tingting bilong God na ol bai kirap bek, olsem Baibel i tok: “God bai i kirapim bek ol man i dai pinis, em ol stretpela man na ol man nogut wantaim.”​—⁠Aposel 24:⁠15.

Long nau, pasin birua na bel nogut, pasin bilong pait na kapsaitim blut, na pasin bilong bagarapim graun, na win, na wara, na ol man i kisim kain kain sik, ol dispela pasin i pulap long graun. Sapos ol daiman i kisim laip gen long kain ples olsem, orait amamas bilong ol bai stap sotpela taim tasol. Tasol Man bilong wokim yumi i tok promis olsem klostu nau em bai pinisim ol pasin nogut bilong nau em Satan i bosim. (Sindaun 2:​21, 22; Daniel 2:44; 1 Jon 5:19) Wanpela stretpela lain man​—⁠olsem “nupela graun”​—⁠bai kamap tru tru.​—⁠2 Pita 3:⁠13.

Long dispela taim bai “i no gat man . . . i tok olsem, ‘Mi gat sik.’ ” (Aisaia 33:24) Na bikpela pen yumi pilim taim man i dai, dispela tu bai pinis, long wanem, God i tok “em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:⁠4) Gutpela samting tru i wetim ol man ‘i stap long matmat bilong ol man God i tingim yet ol’!

Taim Jehova i bagarapim ol man nogut, em i no ken bagarapim ol stretpela man, nogat. (Song 37:​10, 11; 145:20) I gat “planti manmeri tru” ol i bilong ‘olgeta lain na olgeta kantri na olgeta kain skin na olgeta tok ples,’ ol bai winim taim bilong “bikpela hevi tru.” Dispela “bikpela hevi tru” bai pinisim ol pasin nogut bilong dispela graun bilong nau. (KTH 7:​9-13; 7:​14, NW ) Olsem na bai i gat wanpela bikpela lain bilong sekanim ol daiman i kirap bek long matmat.

Olsem wanem? Yu gat bikpela laik long lukim gen ol famili bilong yu? Yu gat laik long i stap oltaim oltaim long Paradais long graun? Orait, yu mas kisim stretpela save long ol laik bilong God. (Jon 17:⁠3) Jehova i gat laik long “kisim bek olgeta manmeri, bai ol i ken save long as bilong tok tru.”​—⁠1 Timoti 2:​3, 4.

[Piksa long pes 4]

“Mi bin wokim yu long graun, na bai yu go bek gen long graun”

[Piksa long pes 5]

Yumi ken tok piksa olsem dispela spirit i kain olsem pawa

[Piksa long pes 7]

Kirap bek bilong ol daiman bai kamapim amamas i no inap pinis