Sapta 2
Litimapim Nem Bilong Jehova Em Wanpela Tasol i God Tru
1. Husat wanpela tasol em i God tru?
BAIBEL i tok i gat planti samting ol man i kolim god, tasol “yumi gat wanpela God tasol, em God Papa.” (1 Korin 8:5, 6) Dispela “wanpela God tasol” em Jehova, em Man bilong wokim olgeta samting. (Lo 6:4; KTH 4:11) Jisas i kolim em olsem “God bilong mi na God bilong yupela.” ( Jon 20:17) Em i wanbel wantaim tok Moses i bin mekim, em i tok: “Em [“Jehova,” NW ] wanpela tasol i God. Na i no gat narapela God i stap.” (Lo 4:35) Jehova i winim tru ol narapela samting ol man i save lotuim, olsem ol imis, ol man i kamap olsem god, o birua bilong em Satan, em “god bilong dispela graun.” (2 Korin 4:3, 4) Jehova i narapela kain long ol dispela samting, em ‘wanpela tasol i God tru,’ olsem Jisas i tok.—Jon 17:3.
2. Taim yumi kisim save long God, dispela i mas kirapim yumi long mekim wanem?
2 Ol man i kisim save long ol gutpela pasin bilong God, na ol samting em i bin mekim na em bai mekim long bihain bilong helpim yumi, ol i laik go klostu long em. Taim pasin bilong ol long laikim Jehova i kamap strong, bel bilong ol i kirapim ol long litimapim nem bilong em. Ol i mekim olsem wanem? Wanpela rot em ol i save tokim ol narapela man long em. Rom 10:10 i tok: “Long maus yumi save autim bilip bilong yumi na God i kisim bek yumi.” Narapela rot em ol i save bihainim pasin bilong em long toktok bilong ol na long ol samting ol i mekim. Efesus 5:1 i tok: “Yupela i mas bihainim ol pasin em yet i save mekim.” Bilong mekim moa yet dispela samting, yumi mas save gut tru long Jehova.
3. Wanem ol bikpela pasin bilong God?
3 Planti hap bilong Baibel i kolim ol pasin bilong God. Fopela bikpela pasin bilong em, em gutpela tingting na save, stretpela pasin, strong, na pasin bilong laikim tru ol arapela. ‘God i gat gutpela tingting na save.’ ( Jop 12:13) “Pasin bilong en i gutpela na stretpela tasol.” (Lo 32:4) “Em i gat olgeta strong.” (Aisaia 40:26) “God em i as bilong dispela pasin bilong laikim ol arapela.” (1 Jon 4:8) Tasol long ol dispela pasin, wanem pasin i kamapim klia moa olsem em i wanem kain God?
“Laikim Ol Arapela”
4. Wanem pasin bilong God i kirapim em long wokim heven na graun na olgeta samting i gat laip?
4 Tingim wanem samting i kirapim Jehova long wokim heven, graun, ol ensel na man. Yu ting save o strong bilong em i kirapim em long mekim olsem? Nogat. Tru, God i mekim wok long ol dispela pasin, tasol ol i no kirapim em long wokim ol samting. Na stretpela pasin bilong em i no mekim na em i mas givim laip long ol narapela. Tasol pasin bilong God long laikim tru ol narapela i kirapim em long givim amamas bilong i stap laip long ol. Dispela pasin i mekim na em i laik bai ol man i bihainim tok ol i mas i stap oltaim long Paradais. (Stat 1:28; 2:15) Pasin bilong laikim ol narapela i kirapim em long stretim rot bilong rausim strafe em sin bilong Adam i kamapim long ol manmeri.
5. Olsem Baibel i tok, Jehova em i as tru bilong wanem pasin, na bilong wanem i olsem?
5 Olsem na nambawan gutpela pasin bilong God em pasin bilong laikim ol arapela. Em i pasin tru bilong em. Tru, gutpela tingting na save, stretpela pasin, na strong, ol i bikpela samting, tasol i no gat wanpela taim Baibel i tok Jehova i as bilong ol dispela pasin. Tasol Baibel i tok em i as tru bilong laikim ol arapela. I gat lo i stiaim dispela pasin bilong laikim ol arapela—bel i no kirap nating long mekim olsem. Tok i tru na stretpela pasin i stiaim dispela pasin bilong God. Em i nambawan gutpela pasin bilong laikim ol narapela, olsem God Jehova yet i kamapim. Kain pasin olsem em pasin bilong tingim gut ol narapela na i no tingim em yet, na oltaim dispela pasin i kamap klia long rot bilong ol gutpela wok.
6. Wanem samting i mekim na yumi inap bihainim pasin bilong God, maski em i winim tru yumi?
6 Dispela pasin bilong laikim ol narapela i mekim na yumi inap bihainim pasin bilong kain God olsem. Yumi ol man nating i gat sin na i save popaia, na nogut yumi ting yumi no inap bihainim gut pasin bilong God. Tasol narapela samting i kamapim klia pasin bilong Jehova long laikim tru ol narapela i olsem: Em i save long skel bilong yumi long mekim ol samting na em i no ting yumi mas mekim olgeta samting i stret olgeta. Em i save yumi no gutpela olgeta. (Song 51:5) Long dispela as Song 130:3, 4 i tok: “Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela.” Yes, Jehova em i ‘as bilong marimari na sori. Na em i no save belhat kwik. Em i save laikim tru olgeta manmeri.’ (Kisim Bek 34:6) “Bikpela, yu gutpela tru na yu save rausim sin bilong mipela.” (Song 86:5) Dispela tok i mekim gut bel bilong yumi, a? Em i gutpela samting tru long mekim wok bilong dispela gutpela God na lukim pasin bilong em long sori na marimari long yumi!
7. Olsem wanem pasin bilong Jehova long laikim ol narapela i kamap ples klia long ol samting em i bin wokim?
7 Pasin bilong Jehova long laikim ol narapela i kamap klia tu long ol samting em i bin wokim. Tingim planti gutpela samting Jehova i bin givim bilong yumi ken amamas long en, olsem ol gutpela maunten, bikbus, ol raunwara, na solwara. Em i bin givim yumi kain kain kaikai i swit long maus na i strongim skin. Na Jehova i bin givim yumi planti kain kain naispela plaua i gat gutpela smel, na ol gutpela animal tu. Em i wokim ol samting bilong givim amamas long ol manmeri, maski i no olsem em i mas mekim dispela. Tru, yumi stap long dispela graun i gat pasin nogut long en na skin bilong yumi i no gutpela olgeta, olsem na yumi no inap kisim bikpela amamas tru long ol samting em i bin wokim. (Rom 8:22) Tasol tingim ol samting Jehova bai mekim bilong helpim yumi long Paradais! Man bilong raitim song i tok: “Yu save opim han bilong yu na inapim laik bilong olgeta samting i gat laip.”—Song 145:16, NW.
8. Wanem nambawan bikpela samting Jehova i mekim bilong soim olsem em i laikim tru yumi?
8 Wanem nambawan bikpela samting Jehova i mekim bilong soim olsem em i laikim tru ol man? Baibel i tok: “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” ( Jon 3:16) Yu ting Jehova i mekim olsem, long wanem, ol manmeri i gat gutpela pasin? Rom 5:8 i bekim: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” Yes, God i salim Pikinini bilong em i gutpela olgeta i kam daun long graun bilong givim laip bilong em olsem ofa bilong baim bek yumi long sin na indai. (Matyu 20:28) Dispela i opim rot long ol manmeri i laikim tru God na bai ol i ken kisim laip i stap gut oltaim. Yumi ken tenkyu tru long God, em i laikim tru olgeta manmeri i laik mekim laik bilong em. Baibel i tok: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
9. Jehova i bin givim Pikinini bilong em olsem pe bilong baim bek yumi, na dispela i mas mekim wanem long yumi?
9 Jehova i bin givim Pikinini bilong em bilong baim bek yumi, olsem na rot i op long yumi ken kisim laip oltaim. Orait dispela i mas mekim wanem long i stap bilong yumi long nau? Pasin bilong yumi long laikim trupela God Jehova i mas kamap strong moa. Na tu, yumi mas i gat laik long harim tok bilong Jisas, em mausman bilong God. “[ Jisas] i mekim olsem bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long dispela man . . . i dai pinis.” (2 Korin 5:15) Em i gutpela samting tru long bihainim lek bilong Jisas, long wanem, em i bihainim tru pasin bilong Jehova long laikim tru na marimari long ol man! Dispela i kamap klia long tok Jisas i mekim long ol man i gat pasin daun, em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. . . . Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.”—Matyu 11:28-30.
Laikim Tru Ol Arapela
10. Long wanem sampela rot yumi ken soim olsem yumi laikim tru ol wanbilip Kristen?
10 Olsem wanem yumi ken soim olsem yumi laikim tru ol wanbilip Kristen wankain olsem Jehova na Jisas i save laikim yumi? Tingim ol dispela planti rot bilong mekim olsem: ‘Man i save givim bel bilong en long ol arapela, em i no save kros kwik na bekim pasin nogut ol i mekim long em. Em i save mekim gutpela pasin long olgeta man. Em i no save bel nogut long ol man i gat planti samting, litimapim nem bilong em yet, hambak, bikhet nabaut, tingting tumas long em yet, belhat kwik, tingim rong ol i mekim long em, amamas long pasin i no stret. Nogat. Em i save amamas long stretpela pasin, em i no save larim wanpela samting i daunim em. Oltaim em i save bilip long God na wetim God i helpim em. Na long taim bilong hevi em i save sanap strong. Dispela pasin bilong givim bel long ol arapela, em i no inap pinis.’—1 Korin 13:4-8; 1 Jon 3:14-18; 4:7-12.
11. Husat moa yumi mas laikim tru, na olsem wanem yumi ken soim dispela?
11 Yumi mas laikim husat moa, na olsem wanem yumi ken soim dispela? Jisas i tok: ‘Yupela i mas i go mekim olgeta lain manmeri i kamap disaipel. Na baptaisim ol long nem bilong Papa na bilong Pikinini na bilong Holi Spirit. Na lainim ol long bihainim olgeta tok mi bin givim long yupela.’ (Matyu 28:19, 20) Bilong mekim olsem yumi mas autim gutnius long ol man i no kamap yet olsem ol wanbilip Kristen na tokim ol long nupela taim olsem paradais em God bai kamapim. Jisas i kamapim klia olsem yumi no ken laikim ol wanbilip tasol. Em i tok: “Sapos yupela i laikim tasol ol man i save laikim yupela, bai yupela i kisim wanem pe? Ol man bilong kisim takis, ol tu i save mekim wankain pasin. Na sapos yupela i givim gude long ol brata bilong yupela tasol, bai yupela i winim ol arapela man long wanem samting? Ol haiden tu i save mekim olsem.”—Matyu 5:46, 47; 24:14; Galesia 6:10.
“Wokabaut Long Nem Bilong Jehova”
12. Bilong wanem nem bilong God i stret long em tasol?
12 Narapela bikpela samting bilong litimapim nem bilong trupela God, em pasin bilong save na mekim wok long gutpela nem bilong em, Jehova, na lainim ol narapela long en. Man bilong raitim song i kamapim dispela gutpela laik bilong em: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” (Song 83:18, NW ) Mining bilong nem Jehova i olsem “Em i Mekim i Kamap.” Em i Bikpela Man bilong makim ol samting em i laik mekim, na oltaim em i save kamapim tru ol dispela samting. Na i stret trupela God tasol i gat dispela nem, long wanem, ol man i no inap save olsem wok bilong ol bai kamap gutpela o nogat. ( Jems 4:13, 14) Jehova tasol inap tok olsem tok bilong em “bai i mekim ol samting i kamap” olsem em i gat laik long ol i mas kamap. (Aisaia 55:11) Planti ol i amamas tru taim ol i lukim nem bilong God long Baibel bilong ol long namba wan taim na ol i kisim save long mining bilong em. (Kisim Bek 6:3) Tasol dispela save bai helpim ol sapos ol i “wokabaut long nem bilong Jehova . . . inap oltaim oltaim.”—Maika 4:5, NW.
13. Bilong save long nem bilong Jehova na wokabaut long nem bilong em, yumi mas mekim wanem?
13 Song 9:10 i tok long nem bilong God olsem: “Ol man i save long [“nem bilong,” NW ] yu bai ol i bilip tru long yu.” I no olsem yumi save tasol long dispela nem Jehova—dispela samting yet i no makim olsem yumi bilip long em. Pasin bilong save long nem bilong God i makim olsem yumi save long Jehova i wanem kain God, yumi daun long wok bos bilong em, bihainim ol lo bilong em, na bilip long em long olgeta samting. (Sindaun 3:5, 6) Na bilong wokabaut long nem bilong Jehova, yumi mas dediket long em na stap olsem maus bilong em, olsem ol man bilong lotuim em, na yumi bihainim tru laik bilong em long olgeta samting yumi mekim. (Luk 10:27) Yu save mekim olsem?
14. Yumi save yumi mas mekim wok bilong Jehova, tasol i mas i gat wanem samting moa i kirapim yumi na bai yumi inap mekim olsem inap oltaim oltaim?
14 Yumi save yumi mas mekim wok bilong Jehova, tasol i mas i gat sampela samting moa i kirapim yumi na bai yumi inap mekim olsem inap oltaim oltaim. Timoti i bin mekim wok bilong Jehova inap planti yia pinis, tasol aposel Pol i tokim em olsem: “Yu mas lain gut long pasin bilong [“givim bel long,” NW ] God.” (1 Timoti 4:7) Sapos yumi pilim ol gutpela pasin bilong man yumi laik lotuim, dispela bai kirapim yumi long givim bel long em. “Pasin bilong givim bel long God” i olsem yumi rispek tru long Jehova. Yumi laikim em tru, long wanem, yumi ting nem na pasin bilong em i nambawan tru. Yumi laik bai olgeta man i litimapim nem bilong em. Yumi mas kisim pasin bilong givim bel long God sapos yumi laik wokabaut long nem bilong Jehova, em wanpela tasol i God tru, inap oltaim oltaim.—Song 37:4; 2 Pita 3:11.
15. Olsem wanem yumi ken givim bel olgeta long God?
15 Bilong mekim wok bilong God long pasin em i laikim, yumi mas lotuim em wanpela tasol, long wanem, em i ‘no inap larim wanpela giaman god i senisim em.’ (Kisim Bek 20:5) Yumi no inap laikim God na laikim tu pasin nogut bilong dispela graun em Satan i god bilong en. ( Jems 4:4; 1 Jon 2:15-17) Jehova i save gut long yumi olgeta wan wan i laik kamap wanem kain man. ( Jeremaia 17:10) Sapos yumi laikim tru stretpela pasin, em i lukim dispela na em bai helpim yumi long karim ol hevi bilong wan wan de. Em bai givim holi spirit bilong strongim yumi, na em bai helpim yumi long winim pasin nogut bilong dispela graun i go bikpela tru. (2 Korin 4:7) Em bai helpim yumi tu long holimpas pasin bilong wet long kisim laip oltaim long Paradais long graun. Em i wanpela gutpela samting tru bilong wetim! Yumi mas pilim tru dispela gutpela samting na amamas long mekim wok bilong trupela God, Jehova, em i man bilong wokim rot na bai yumi ken kisim dispela laip i stap oltaim.
16. Yu mas i gat laik long mekim wanem wantaim planti milion manmeri moa?
16 Planti milion manmeri long olgeta hap i bin amamas long bihainim tok man bilong raitim song i mekim: “Yumi tokaut long biknem bilong God. Yumi litimapim nem bilong em.” (Song 34:3) Jehova i singautim yu long kam insait long wanpela bikpela lain manmeri i wok long go bikpela moa long olgeta hap em ol i save litimapim nem bilong Jehova.
Stori Gen Long Ol Dispela Tok
• Jehova i gat wanem kain pasin? Sapos yumi save gut long ol pasin bilong em, dispela i helpim yumi olsem wanem?
• Yumi ken mekim wanem bilong soim olsem yumi laikim tru ol arapela?
• Yumi mas mekim wanem bilong save long nem bilong Jehova na wokabaut long nem bilong em?
[Ol Piksa long pes 14]
Jehova i laikim tru ol narapela, na ‘em bai opim han bilong em na inapim laik bilong olgeta samting i gat laip’