Sapta 2
Litimapim Nem Bilong Jehova, Em i God Tru
POL i raitim pas long ol brata Kristen na em i tok, i gat planti samting ol man i kolim “god,” tasol “yumi gat wanpela God tasol, em God Papa. . . . Na i gat wanpela Bikpela tasol, em Jisas Krais.” (1 Ko. 8:5, 6) Dispela “wanpela God tasol” em Jehova, em Man bilong wokim olgeta samting. (Diu. 6:4; Re. 4:11) Sampela man, taim ol i kisim save long ol gutpela pasin bilong Jehova na ol samting em i bin mekim bilong helpim ol man, ol i pilim tru na ol i tanim bel i go long Em. Na ol i kirap mekim wanem? Ol i litimapim nem bilong Em, long wanem ol i laikim tru Em. Ol tok na pasin ol i mekim i litimapim nem bilong Em. Ol i laikim tumas God na dispela samting i kirapim ol long tokim ol narapela man long em, na ol i wok long bihainim pasin bilong em. Baibel i tok, yumi olgeta yumi mas “bihainim pasin [God] i mekim,” na yumi mas “wokabaut long pasin bilong sori.” (Ef. 5:1, 2) Yumi mas save tru long Jehova bambai yumi inap bihainim dispela tok.
Ol Pasin Bilong Jehova
2 Baibel i kolim ol gutpela pasin bilong God. Taim yu kaunim ol dispela tok long Baibel, tingim gut ol dispela gutpela pasin bilong God na olsem wanem em i bikpela samting long yu. Yumi ken tingim sampela pasin bilong God em Baibel i kolim, olsem: “God i save laikim yumi tru.” (1 Jon 4:8) “Olgeta pasin bilong em i stret.” (Diu. 32:4, NW) ‘Gutpela stretpela tingting i stap long em.’ (Jop 12:13) Em i gat “bikpela strong.” (Ais. 40:26, NW) Taim yu tingim ol dispela pasin bilong God, bel bilong yu i kirap na yu laikim tumas God, a? Na yu laik litimapim nem bilong Em, a?
3 Na Baibel i tok, Jehova em i “as bilong marimari na sori.” Em i “no save belhat kwik.” Em i save “laikim tru olgeta manmeri,” na em i bihainim olgeta tok bilong em. (Eks. 34:6) Em i “gutpela tru,” na em i save “rausim sin” bilong yumi. (Sam 86:5) “Ai bilong Jehova i save lukluk nabaut long olgeta hap bilong graun bambai em i ken kamapim strong bilong em na helpim ol man i givim bel olgeta long em.” (2 Kro. 16:9, NW) “God i no tingting tumas long nem na long lain bilong man. Nogat. Long olgeta lain em i save laikim ol man i pret long em na i mekim stretpela pasin.” (Ap. 10:34, 35) Jehova i save “givim planti samting long olgeta man,” na em i “as bilong amamas.” (Jems 1:5; 1 Ti. 1:11) Sapos yu mekim wok bilong dispela gutpela God na em i lukautim yu, bai yu stap amamas tru!
4 God i gat ol dispela gutpela pasin, olsem na Baibel i tok, yumi mas lotuim em wanpela tasol. God i tok: “Mi no inap larim wanpela god giaman i senisim mi.” (Eks. 20:5) Yumi mas givim bel olgeta long em na bai em i amamas long ol wok yumi mekim bilong lotuim em. Yumi no ken laikim pasin bilong dispela graun, em Seten i god bilong en. (1 Jon 2:15-17; 2 Ko. 4:3, 4) Yumi no inap giaman long bihainim stretpela pasin, long wanem Jehova i save long olgeta samting yumi mekim, na yumi gat wanem tingting long ol dispela samting yumi mekim, na yumi laik kamap wanem kain man. Sapos yumi laik tru long bihainim stretpela pasin, em i save helpim yumi. (Jer. 17:10; Pro. 15:9) Planti milion manmeri long olgeta hap ol i tingim ol gutpela pasin bilong Jehova na ol i mekim olsem man bilong raitim sam i tok: “Yumi tokaut long biknem bilong God. Yumi litimapim nem bilong em.” (Sam 34:3) Olsem wanem long yu? Yu mekim olsem?
5 Sapos yu skelim gut olgeta gutpela gutpela pasin bilong Jehova bai yu laik moa yet long tokim ol narapela man long em, na bai yu inap bihainim gut ol pasin bilong em. Bilong mekim olsem, yu mas wok long kisim save long ol samting olsem: (1) Wanem ol wan wan pasin bilong Jehova, na olsem wanem ol i narapela narapela kain? (2) Jehova i mekim wanem na em i kamapim long ples klia ol dispela pasin? Em i kamapim bilong helpim husat? (3) Olsem wanem mi ken bihainim dispela pasin? Em i mas givim wanem tingting long mi?
6 Yumi ken skelim wanpela pasin bilong Jehova olsem: Baibel i tok: “God i save laikim yumi tru.” Em i Man bilong pasin sori. (1 Jon 4:8) I gat kain kain pasin bilong sori, tasol taim Jon i raitim dispela tok em i raitim long tok Grik na em i kolim dispela tok ‘sori’ olsem a.gaʹpe. Dispela tok i makim nambawan gutpela pasin bilong sori, em God Jehova yet i gat dispela kain pasin. Man i gat dispela kain pasin bilong sori em i no save tingim em yet. Orait, tingim dispela samting na bekim ol dispela askim, na lukim ol skripsa tu.
Ol samting Jehova i wokim, olsem wanem dispela i soim yumi God i laikim tru yumi? (Ap. 14:16, 17)
Wanem nambawan bikpela samting Jehova i mekim na em i kamapim bel bilong em, olsem em i laikim tru ol man? (Jon 3:16) Ating God i tingim gutpela pasin bilong ol man na em i mekim dispela samting, o olsem wanem? (Rom 5:8)
Ol samting Jehova i mekim long rot bilong Pikinini bilong em, dispela i mas kirapim yumi long wokabaut olsem wanem? (2 Ko. 5:14, 15, 18, 19)
Yumi ol Kristen i ken mekim wanem na bai yumi soim olsem yumi gat wankain sori long ol wanlotu bilong yumi? (1 Ko. 13:4-7; 1 Jon 4:10, 11; 3:16-18)
Yumi mas sori long husat moa? Olsem wanem yumi ken mekim? (Mt. 5:43-48; 28:19, 20; Ga. 6:10)
7 Yu laik save long sampela pasin moa bilong Jehova? Orait, yu yet yu ken stadi na kisim save long “stretpela pasin” na “save” na “pasin sori” na “marimari” bilong em. Yu ken lukim Indeks bilong Wastaua na sampela buk bilong Baibel na kisim dispela save.
Helpim Ol Narapela Long Save Tru Long God
8 I gat wanpela God tru, tasol ol man i save lotuim planti milion god giaman. Long yia 350 samting, lotu ol i kolim Kristen i kirap bihainim bilip bilong ol Babilon na Isip na ol Hindu na Budis na ol i tok, God em i tripela, olsem God Triwan. Na sampela man i save litimapim nem bilong sampela bikpela bos bilong graun o man bilong spot o bilong singsing samting na putim ol i stap olsem ‘bikpela’ o ‘god’ bilong ol. Na sampela ol i laikim tumas mani na ol yet na maritpasin, na ol dispela samting tu i kamap olsem ‘god’ bilong ol. Husat i as bilong dispela? Seten yet. Em i “god giaman bilong dispela graun.” (2 Ko. 4:4; 1 Ko. 10:20) Em i mekim kain kain pasin giaman bilong pulim ol man na bai ol i lusim Jehova o givim hap bel tasol long Em.
9 Ol man i tok ol i Kristen na ol narapela man tu, olsem wanem yumi ken helpim ol bambai ol i ken save tru long God? Wanpela gutpela rot em olsem: Helpim ol long save long ol tok Baibel i mekim long God. Olsem bai ol inap save long dispela God em i God tru na long ol pasin bilong em. Na taim yumi helpim ol olsem, orait yumi yet i mas bihainim ol stretpela pasin bilong God.—1 Pi. 2:12.
10 Tasol olsem wanem sapos sampela man bilong ol misin ol i kolim Kristen, ol i tokim yu Baibel i tok God em i tripela, olsem God Triwan? Tru, planti misin i bilip long God Triwan, tasol planti man ol i gat tingting bilong ol yet long dispela samting. Olsem na pastaim yu mas tokim ol long kamapim tingting bilong ol long God Triwan na ol i ken skelim tingting bilong ol wantaim tok i stap long Baibel bilong ol yet. Na bihain yu ken kirapim ol long skelim tok bilong misin bilong ol wantaim tok bilong Baibel.
11 Yumi laik helpim ol man i gat gutpela bel, olsem na nau yu ken skelim ol tok bilong Baibel i stap daunbilo na yu ken tingting olsem: Olsem wanem mi inap mekim wok long ol dispela tok na helpim ol man? Yu ken tingim tu ol tok i stap klostu long ol dispela skripsa:
(1) Sampela man i bilip long tok bilong God Triwan ol i ting i gat tripela Man i stap (em Papa na Pikinini na Holi Spirit), tasol i gat wanpela God tasol.
Tasol yu ting tok bilong Aposel 2:4, 17 i makim olsem “Holi Spirit” i wanpela man?
Bilong wanem i gutpela yumi mas skelim hamas man tru ol dispela ves i stori long ol? (Jon 17:20-22; Ap. 7:56; Re. 7:10)
(2) Sampela man i ting olgeta tripela man insait long God Triwan ol i gat wankain biknem, na narapela i no antap o aninit long narapela, na tripela wantaim i bin i stap oltaim.
Tasol Baibel i tok wanem? (Lukim Jon 14:28; Matyu 24:36; Revelesen 3:14 na bai yu save.)
(3) Sampela man i tok Jon 1:1 i makim God em i God Triwan. Ol i tok, long Jon 1:1 long tok Grik i no gat dispela tok “wanpela.” Olsem na ol i tok, ol man i mas tanim tok bilong Jon 1:1 olsem: “Tok em i God,” na ol i no ken tanim olsem: “Tok em i wanpela god.”
Tasol Jon 1:1 i tok long hamas man? Tripela? o tupela tasol? Na Jon 1:18 i tok wanem na yumi ken save, tok bilong God Triwan i no stret?
Tru, long tok Grik ol i no gat dispela tok “wanpela,” tasol planti tok ples i gat na ol i mas putim bambai ol i kamapim stret as bilong dispela tok long tok ples bilong ol. Sapos ol man i ting i no stret long putim dispela tok “wanpela” long Jon 1:1, bilong wanem ol i putim long Aposel 28:6 na long sampela ves moa? (Sampela Baibel, olsem An American Translation, i tanim tok bilong Jon 1:1 olsem: “Tok em i wankain olsem God,” na insait bilong dispela tok i olsem em i gat ol gutpela pasin wankain olsem bilong God.)
(4) Sampela man i bilip olsem God em i tripela, olsem God Triwan, na ol i tok Jenesis 1:1, 26 i helpim dispela tok, long wanem tok Hibru “El.o.himʹ” ol i tanim olsem “God” long dispela tupela ves, dispela tok i no makim wanpela God tasol, olsem na ol i mas tanim olsem “ol God.”
Olsem wanem na dispela i no helpim dispela tok olsem i gat tripela God insait long “wanpela God”?
Na sapos long Jenesis 1:1 dispela tok i makim “God Triwan,” orait olsem wanem long tok bilong Hetman 16:23? Long dispela ves long tok Hibru ol i raitim tok el.o.himʹ, tasol taim ol i raitim stori long ol samting dispela “god” i mekim, ol i raitim olsem wanpela tasol i mekim.
Long ol dispela ves, bilong wanem ol i raitim dispela tok Hibru el.o.himʹ em olsem “ol God”? Long wanem long tok Hibru dispela tok i makim wanpela God em i gat bikpela nem tru. Dispela tok i no makim olsem planti god insait long wanpela God, olsem God Triwan samting. Nogat. Olsem na taim ol i stori long ol samting El.o.himʹ (God) i mekim ol i raitim olsem wanpela tasol i mekim.
(5) Ol misin i save mekim bikpela tok long Jisas (na long planti Baibel ol i no raitim nem Jehova), olsem na sampela man taim ol i harim dispela tok “God,” ol i save tingim Jisas.
Tasol Jisas i mekim wanem na em i makim stretpela pasin bilong lotuim God? (Luk 4:8)
12 Baibel i kolim Jisas olsem “wanpela god” na “Strongpela God,” tasol Jisas i litimapim nem bilong Papa bilong em na kolim em olsem “God bilong mi na God bilong yupela.” (Jon 1:1, NW; 20:17; Ais. 9:6, NW) Em i wanbel wantaim Moses, em longtaim bipo Moses i tok: “Jehova, em i God tru, na i no gat narapela.” (Diu. 4:35, NW) Jehova em i narapela kain olgeta long ol samting ol man i save lotuim, olsem sampela samting ol i bin wokim long han bilong ol, o sampela bikpela man, o Seten. Olgeta dispela “god” ol i god giaman, tasol Jehova em i God tru. Olsem na Jisas i tok: “Yu wanpela tasol yu God tru.”—Jon 17:3.
“Wokabaut Long Nem Bilong Jehova”
13 Planti man ol i no save God em i husat. Inap longtaim pinis ol i longlong long dispela samting. Olsem na taim ol i save nem bilong em Jehova, ol i amamas. Tru, ol i no inap lukim dispela nem long Baibel Pisin, tasol ol inap lukim long sampela olpela Baibel Pisin na long Baibel tok Motu na long sampela narapela Baibel long Papua Niugini. (Lukim buk “Yu Inap i Stap Oltaim long Paradais long Graun” pes 40-44.) Ol i save, nem bilong God em Jehova, tasol ol i mas ‘wokabaut oltaim long nem bilong Jehova’ bambai dispela save i ken helpim ol inap long olgeta taim bihain. (Mai. 4:5) Ol i no ken save tasol long nem bilong Jehova o tok tasol ol i witnes bilong Jehova.
14 Nem bilong God em i bikpela samting, olsem na Sam 9:10 (NW) i tok: “Jehova, . . . ol man i save long nem bilong yu bai ol i bilip tru long yu.” I no olsem yumi mas save tasol long dispela nem Jehova. Nogat. Yumi mas pilim tru ol gutpela pasin bilong Jehova, na daun long em, na bihainim tok bilong em. Sapos yumi mekim olsem, yumi ken tok yumi ‘save’ long nem bilong God. Na yumi mas dediket long em na bihainim tru laik bilong em, na bai yumi ken tok yumi “wokabaut long nem bilong Jehova.” (Luk 10:27) Yu mekim olsem?
15 Yumi save yumi mas mekim wok bilong Jehova, tasol i mas i gat sampela samting moa bilong kirapim yumi na bai yumi mekim wok bilong Em inap long olgeta taim bihain. Bel bilong yumi mas laik long mekim wok bilong Jehova. Timoti i bin mekim wok bilong Jehova inap planti yia pinis, tasol Pol i tokim em: “Yu mas skul gut long pasin bilong God.” (1 Ti. 4:7) Yumi mas skulim bel bilong yumi. Bel bilong yumi i mas pilim tru ol gutpela pasin bilong Jehova na bai yumi kirap givim bel long em na bihainim pasin bilong em. Bai yumi laikim tru em na litimapim nem bilong em. Na yumi laik bai olgeta man i litimapim nem bilong em. Yumi mas givim bel long God na bihainim pasin bilong em, na bai yumi inap wokabaut long nem bilong Jehova, em God tru, inap oltaim oltaim.—Sam 37:4; 2 Pi. 3:11.
Stori Gen Long Ol Dispela Tok
●Jehova i gat wanem kain pasin? Sapos yumi save gut long olgeta wan wan pasin bilong em, dispela inap helpim yumi olsem wanem?
●Olsem wanem yumi ken helpim ol narapela man long save tru long God?
●Yumi mas mekim wanem na bai yumi “save” long nem bilong Jehova na ‘wokabaut long nem bilong em’?
[Askim Bilong Stadi]
1. (a) Husat em i God tru? (b) Taim yumi kisim save long Em, dispela i mas kirapim yumi long wokabaut olsem wanem?
2. Wanem sampela gutpela pasin tru bilong God i kirapim yumi long litimapim nem bilong Em?
3. Wanem sampela pasin moa bilong Jehova i kirapim yumi long laikim em tru?
4. (a) Yumi ken givim hap bel tasol long Jehova o lotuim narapela god tu wantaim? Em bikpela samting o nogat? (b) Sam 34:3 i kirapim yumi long mekim wanem?
5. Taim yu wok long kisim save long ol pasin bilong Jehova, yu ken mekim wanem na bai ol dispela save inap helpim yu tru?
6. Stori long ol samting yu ken mekim sapos yu laik skelim pasin sori bilong God. Bilong mekim olsem yu ken lukim ol tok bilong Baibel na bekim ol askim long pinis bilong dispela paragraf.
7. Taim yu yet yu stadi, olsem wanem yu ken kisim save long sampela pasin moa bilong Jehova?
8. (a) Ol man bilong dispela graun i putim wanem ol samting i stap olsem god bilong ol? (b)
Husat i as bilong dispela? Bilong wanem yu tok olsem?
9. Wanem nambawan gutpela rot bilong helpim man long save tru long God?
10. Taim yu toktok wantaim man i bilip long God Triwan, bilong wanem yu no ken ting yu save pinis long tingting bilong em long dispela samting?
11. Stori long ol faipela tok i stap long dispela paragraf na skelim ol askim na skripsa tu bilong soim man olsem tok bilong God Triwan i no i stap long Baibel.
12. Olsem wanem na i stret Jisas i toktok long Papa bilong em na em i tok: “Yu wanpela tasol yu God tru”?
13, 14. Yumi mas mekim wanem na bai yumi “save” long Jehova na ‘wokabaut long nem bilong em’?
15. Yumi save yumi mas mekim wok bilong Jehova, tasol i mas i gat wanem samting moa bilong kirapim yumi na bai yumi inap mekim wok bilong Jehova i go inap long olgeta taim bihain?