Sapta 15
Harim na Bihainim Tok Bilong Stretim Yu
1. (a) Bilong wanem yumi olgeta i mas kisim tok bilong stretim yumi? (b) Yumi mas tingim wanem askim?
LONG Jems 3:2, Baibel i tok: “Planti taim . . . yumi save popaia.” Planti taim yumi no bihainim gut ol pasin Baibel i tok yumi mas bihainim. Olsem na yumi save tok bilong Baibel i stret taim em i tok: “Sapos yu larim man i skulim yu na givim gutpela tingting long yu, orait bihain bai yu gat gutpela tingting na save.” (Sindaun 19:20) Ating yumi bin stretim wokabaut bilong yumi na bai pasin bilong yumi i stret wantaim tok bilong Baibel. Tasol yumi save mekim wanem sapos narapela Kristen i givim sampela tok bilong stretim yumi?
2. Taim wanpela man i givim gutpela tok bilong stretim yumi, yumi mas mekim wanem?
2 Sampela i tok i gat as na ol i mekim rong, o ol i tok rong bilong ol i no bikpela, o ol i tok em asua bilong narapela man. Tasol em i gutpela moa long harim na bihainim tok bilong stretim yumi. (Hibru 12:11) Tru, man i no ken ting pasin bilong ol narapela i mas gutpela olgeta, na em i no ken givim tok kaunsel long narapela long olgeta taim long ol liklik liklik samting o long ol samting Baibel i larim man yet i makim. Na tu, ating man i givim tok kaunsel i no bin skelim gut olgeta samting i bin kamap, olsem na man i kisim tok kaunsel i ken kamapim dispela long em long pasin daun. Tasol long dispela sapta bai yumi stori long ol tok kaunsel Baibel i as bilong en na i stret. Orait yumi mas mekim wanem?
Pasin Bilong Sampela Man Inap Lainim Yumi
3, 4. (a) Baibel i save kamapim wanem ol stori bilong helpim yumi long kisim stretpela tingting long ol tok narapela i mekim bilong stretim yumi? (b) King Sol i mekim wanem taim narapela i stretim em? Wanem samting i kamap?
3 Baibel i save kamapim ol stori bilong ol man i bin kisim tok bilong stretim ol. Sampela taim ol i kisim strafe tu. Wanpela man olsem em King Sol bilong Israel. Em i no harim tok bilong Jehova long ol samting em i mas mekim long ol Amalek. Ol Amalek i bin birua long ol wokman bilong God, na strafe Jehova i makim bilong ol i olsem: Ol Amalek na olgeta bulmakau sipsip bilong ol i mas i dai. Tasol King Sol i no kilim i dai king bilong ol na ol nambawan gutpela animal bilong ol.—1 Samuel 15:1-11.
4 Jehova i salim profet Samuel long stretim Sol. Sol i mekim wanem? Em i tok em i daunim ol Amalek, tasol em i no kilim i dai king bilong ol. Tasol Jehova i no bin tokim em long mekim olsem. (1 Samuel 15:20) Sol i tok em i asua bilong ol manmeri na em i no kilim i dai ol bulmakau sipsip. Em i tok: “Mi pret long ol soldia bilong mi, olsem na mi bihainim tok bilong ol.” (1 Samuel 15:24) Em i tingim nem bilong em yet tasol, na em i askim Samuel long litimapim nem bilong em long ai bilong ol manmeri. (1 Samuel 15:30) Bihain, Jehova i rausim Sol long wok king bilong em.—1 Samuel 16:1.
5. Wanem samting i painim King Usia taim em i no harim tok bilong stretim em?
5 King Usia bilong Juda i “no bihainim tok bilong God, Bikpela bilong en, na em i go long alta i stap insait long haus bilong Bikpela, na em yet i laik mekim ofa bilong kamapim smok i gat gutpela smel.” (2 Stori 26:16) Tasol lo i tok ol pris tasol inap mekim dispela wok. Taim hetpris i laik pasim Usia long mekim dispela samting, king i kros. Wanem samting i kamap? Baibel i tok: ‘Wantu sik lepra i kamap long pes bilong en, Bikpela i bin mekim dispela sik i kamap long en bilong mekim save long em. Dispela sik lepra i stap long skin bilong King Usia i no inap pinis.’—2 Stori 26:19-21.
6. (a) Bilong wanem Sol na Usia i no laik harim tok bilong stretim ol? (b) Bilong wanem pasin bilong sakim tok kaunsel em i wanpela bikpela hevi long nau?
6 Bilong wanem Sol na Usia i hatwok long harim tok bilong stretim ol? Long wanem, tupela i gat pasin antap, na ol i ting ol yet i namba wan. Planti man i gat kain pasin olsem na hevi i painim ol. Ol i ting sapos ol i harim tok kaunsel, dispela i makim olsem ol i no gutpela tumas o dispela i bagarapim nem bilong ol. Tasol pasin antap em i pasin bilong ol man i no gat strong. Pasin antap i mekim na man i no tingting stret na em i no laik kisim helpim em Jehova i givim long rot bilong Tok na oganaisesen bilong em. Olsem na Jehova i mekim dispela tok lukaut: “Pasin bilong hambak na litimapim nem bilong yu yet bai i mekim yu i pundaun na bagarap.”—Sindaun 16:18; Rom 12:3.
Harim Tok Bilong Stretim Yu
7. Pasin bilong Moses inap lainim yumi long wanem ol gutpela samting?
7 Tasol Baibel i stori tu long sampela man i harim gut tok bilong stretim ol, na pasin bilong ol inap lainim yumi. Tingim Moses, tambu papa bilong em i givim gutpela tok long em long pasin bilong mekim bikpela wok bilong em. Moses i harim tok bilong em na kwiktaim em i bihainim. (Kisim Bek 18:13-24) Maski Moses i gat bikpela namba, bilong wanem em i redi long harim dispela gutpela tok? Long wanem, em i gat pasin daun. “Dispela man Moses em i man bilong daunim em yet, na i no gat wanpela man long dispela graun i save daunim em yet inap olsem Moses.” (Namba 12:3) Pasin bilong man i daunim em yet em i bikpela samting olsem wanem? Long Sefanaia 2:3, Baibel i soim olsem dispela pasin i helpim yumi long kisim laip.
8. (a) Devit i mekim wanem ol sin? (b) Devit i mekim wanem taim Natan i stretim em? (c) Devit i karim wanem ol hevi long ol sin em i mekim?
8 King Devit i pamuk wantaim Batseba na em i traim long haitim dispela rong taim em i stretim rot bilong ol i kilim i dai man bilong Batseba, em Uria. Jehova i salim profet Natan i go bilong stretim Devit. Devit i tanim bel na kwiktaim em i tokaut olsem: “Mi mekim sin long ai bilong Bikpela.” (2 Samuel 12:13) Devit i tanim bel na God i lusim rong bilong em, tasol Devit bai karim ol hevi pasin nogut bilong em i kamapim. Jehova i tokim em olsem ‘long olgeta taim bihain ol man bai kilim i dai sampela bilong ol lain tumbuna bilong [em],’ na God bai i “kisim ol meri bilong [em] na givim ol long narapela man,” na pikinini man i kamap long pasin pamuk bilong tupela “em bai i dai.”—2 Samuel 12:10, 11, 14.
9. Sapos yumi kisim tok bilong stretim yumi o kisim strafe, yumi no ken lusim tingting long wanem samting?
9 King Devit i save olsem gutpela samting i save kamap taim man i harim tok bilong stretim em. Em i tenkyu long God taim Em i salim Abigel long givim tok bilong stretim em. (1 Samuel 25:32-35) Olsem wanem? Yumi gat dispela kain pasin? Sapos olsem, bai yumi no mekim ol tok o pasin em bihain bai yumi inap bel hevi long en. Tasol olsem wanem sapos yumi mekim sampela samting na ol i givim tok bilong stretim yumi o givim strafe long yumi? Yumi no ken lusim tingting olsem dispela i kamapim klia olsem Jehova i laikim yumi tru, na em i laik helpim yumi long kisim laip oltaim.—Sindaun 3:11, 12; 4:13.
Ol Gutpela Pasin Yumi Mas Kisim
10. Jisas i tok ol man i mas i gat wanem pasin na bai ol inap i go insait long Kingdom?
10 I gat sampela gutpela pasin yumi mas kisim na bai yumi inap i stap gut wantaim Jehova na ol brata Kristen bilong yumi. Jisas i stori long wanpela bilong ol dispela pasin taim em i putim wanpela pikinini namel long ol disaipel na i tok: “Sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven. Man i daunim em yet na i kamap olsem dispela liklik pikinini, dispela man bai i gat biknem tru long kingdom bilong heven.” (Matyu 18:3, 4) Ol disaipel bilong Jisas i mas kisim pasin daun, long wanem, ol i bin tok pait namel long ol yet long husat bilong ol i nambawan.—Luk 22:24-27.
11. (a) Yumi mas daunim yumi yet long ai bilong husat? Bilong wanem yumi mas mekim olsem? (b) Sapos yumi gat pasin daun, bai yumi mekim wanem taim narapela i givim tok bilong stretim yumi?
11 Aposel Pita i tok: “Yupela olgeta i mas bihainim pasin bilong daunim yupela yet na i stap aninit long ol arapela manmeri bilong God. Yumi save, ‘God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ ” (1 Pita 5:5) Yumi save yumi mas daunim yumi yet long ai bilong God, tasol dispela ves i soim olsem yumi mas daunim yumi yet long ai bilong ol wanbilip tu. Sapos yumi mekim olsem, bai yumi no bel hevi taim ol i givim sampela gutpela tok bilong helpim yumi, nogat; tok bilong ol bai lainim yumi.—Sindaun 12:15.
12. (a) Wanem bikpela pasin i save poroman wantaim pasin daun? (b) Bilong wanem yumi mas tingim ol samting pasin bilong yumi i mekim long ol narapela?
12 Pasin bilong tingim gut ol narapela i save poroman wantaim pasin daun. Aposel Pol i tok: “Yumi no ting long helpim yumi yet. Nogat. Yumi mas ting long helpim ol arapela. . . . Olsem na sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God. Yupela i mas ting long ol Juda na ol Grik na ol manmeri bilong sios bilong God, na yupela i no ken mekim olkain pasin inap long mekim ol i pundaun long sin.” (1 Korin 10:24-33) Pol i no tok olsem yumi mas lusim olgeta samting yumi yet i gat laik long mekim, nogat, tasol em i laik kirapim yumi long yumi no ken mekim ol samting em inap kirapim narapela man long mekim samting bel bilong em i gat tok long en.
13. Wanem samting inap makim olsem yumi save bihainim tok bilong Baibel o nogat?
13 Olsem wanem? Yu save tingim ol narapela na putim laik bilong ol i go pas long laik bilong yu? Yumi olgeta i mas lain long mekim olsem. I gat planti rot bilong mekim dispela. Tingim ol klos na bilas. Olgeta inap long makim wanem kain klos na bilas ol i laik putim, tasol ol i mas bihainim ol stiatok bilong Baibel na putim klos na bilas i stret na i klin. Tasol bai yu senisim pasin bilong yu long bilas sapos yu kisim save olsem ol klos o bilas bilong yu i mekim na ol manmeri bilong narapela lain long hap bilong yu ol i no laik harim tok bilong Kingdom? Pasin bilong helpim narapela man long kisim laip oltaim i bikpela samting moa long pasin bilong inapim laik bilong yumi yet, a?
14. Bilong wanem em i bikpela samting long kisim pasin daun na pasin bilong tingim tru ol narapela?
14 Jisas i stap olsem gutpela piksa long pasin daun na pasin bilong tingim tru ol narapela, na em i wasim lek bilong ol disaipel bilong em. ( Jon 13:12-15) Baibel i tok olsem long em: “Yupela i mas holim wankain tingting olsem Krais Jisas i bin holim. Em i stap God tru, tasol em i no ting long holimpas dispela pasin bilong i stap wankain olsem God. Nogat. Em i lusim dispela pasin, na em i kamap olsem wokboi nating. Em i kamap olsem man na ol man i lukim em i stap man tru. Na em i daunim em yet na i bihainim tok bilong God, i go inap long em i dai.”—Filipai 2:5-8; Rom 15:2, 3.
No Ken Sakim Tok Bilong Jehova Long Stretim Yu
15. (a) Yumi mas kamapim wanem ol senis long pasin bilong yumi na bai God i laikim yumi? (b) Long wanem ol rot Jehova i save givim tok bilong skulim na stretim yumi olgeta?
15 Yumi olgeta i gat sin, olsem na yumi mas senisim sampela tingting na pasin bilong yumi sapos yumi laik bihainim ol pasin bilong God. Yumi mas kamap “nupela man.” (Kolosi 3:5-14) Gutpela tok bilong skulim na stretim yumi i helpim yumi long save long ol pasin yumi mas stretim na olsem wanem yumi ken mekim. Baibel em i as bilong ol gutpela tok yumi mas kisim. (2 Timoti 3:16, 17) Ol buk na nius bilong Baibel na ol miting oganaisesen bilong Jehova i redim i helpim yumi long bihainim Tok Bilong God. Olsem wanem? Maski yumi harim pinis wanpela tok kaunsel, bai yumi luksave olsem yumi mas bihainim dispela tok na traim long stretim moa yet pasin bilong yumi?
16. Jehova i save givim wanem helpim long yumi olgeta wan wan?
16 Jehova i save tingim tru yumi na helpim yumi long karim ol hevi bilong yumi. Planti milion manmeri i bin kisim helpim pinis long rot bilong Baibel-stadi. Ol papamama i skulim na stretim ol pikinini bilong ol na bai ol i no ken mekim ol pasin ol inap kisim bel hevi long en. (Sindaun 6:20-23) Insait long kongrigesen, sampela i save askim ol brata o sista long givim sampela gutpela tok bilong helpim wok autim tok bilong ol long kamap gutpela moa. Sampela taim ol elda inap askim narapela elda o narapela brata i gat save long mekim gut wok autim tok long givim sampela gutpela tok long ol. Ol strongpela brata i mekim wok long Baibel bilong helpim ol man i mas kisim helpim, na ol i mekim long pasin isi. Sapos yu givim tok kaunsel long narapela, yu ‘mas lukaut gut long yu yet. Nogut Satan i traim yu na yu tu i pundaun long sin.’ (Galesia 6:1, 2) Yes, yumi olgeta i mas kisim tok bilong skulim na stretim yumi na bai yumi ken wanbel long lotuim dispela wanpela God tru.
Stori Gen Long Ol Dispela Tok
• Olsem wanem Jehova i helpim yumi long save long ol pasin na tingting yumi mas stretim?
• Bilong wanem planti man i hatwok long harim tok kaunsel? Dispela pasin i nogut olsem wanem?
• Wanem ol gutpela pasin tru inap helpim yumi long harim gut tok kaunsel? Jisas i mekim wanem na em i stap olsem gutpela piksa long ol dispela pasin?
[Piksa long pes 142]
Usia i sakim tok bilong stretim em na em i kisim sik lepra
[Piksa long pes 142]
Moses i harim tok bilong Jetro na dispela i helpim em gut