Sapta 17
Bihainim Pasin Bilong Givim Bel Long God Insait Long Famili
1. Pasin bilong bihainim ol tok bilong Baibel i bin mekim wanem long ol marit?
JEHOVA em i As bilong marit, na Tok bilong em i gat nambawan gutpela tok bilong stiaim ol famili. Planti manmeri i bihainim ol dispela tok, olsem na marit bilong ol i kamap gutpela. Sampela manmeri, bipo ol i no marit tru, ol i sindaun nating wantaim, tasol tok bilong Baibel i bin kirapim ol long rejistaim marit bilong ol long gavman. Sampela ol i lusim pasin bilong slip wantaim ol narapela i no poroman marit bilong ol. Ol man i bin paitim meri na pikinini bilong ol, ol i bin lain long mekim gutpela pasin na pasin isi.
2. I gat wanem ol samting i insait long sindaun bilong famili Kristen?
2 Sindaun bilong famili Kristen i gat planti samting i insait long en, olsem yumi ting marit i bilong i stap oltaim o nogat, yumi mekim wanem bilong inapim ol wok bilong yumi insait long famili, na yumi mekim wanem kain pasin long wan wan insait long famili. (Efesus 5:33–6:4) Ating yumi save long tok Baibel i mekim long ol samting bilong famili, tasol i hatwok long bihainim dispela tok. I no gat wanpela bilong yumi i laik i stap olsem ol man Jisas i bin krosim ol, long wanem, ol i no bihainim ol lo bilong God. Ol i tingting kranki olsem pasin bilong givim bel long lotu em inap. (Matyu 15:4-9) Yumi no laik kamap man bilong bihainim pasin bilong givim bel long God long ai bilong ol man, tasol yumi no givim bel long God insait long famili. Nogat. Yumi laik bihainim tru pasin bilong givim bel long God na bai yumi ken “kisim planti gutpela samting.”—1 Timoti 5:4; 6:6; 2 Timoti 3:5.
Marit i Bilong i Stap Hamas Yia?
3. (a) Wanem samting i wok long kamap long planti marit long nau? Tasol yumi mas tingting strong long mekim wanem? (b) Mekim wok long Baibel bilong bekim ol askim i stap long dispela paragraf.
3 Long nau planti marit moa i bruk. Sampela man na meri i bin marit inap planti yia pinis, ol i katim marit na maritim nupela poroman. Na tu, planti yangpela i marit inap sotpela taim tasol na narapela i lusim narapela. Tasol maski ol narapela i mekim wanem, yumi mas i gat laik long mekim ol samting Jehova i laikim. Nau yumi ken skelim ol askim na ol skripsa hia bilong painimaut Baibel i tok marit i bilong i stap hamas yia.
Taim man na meri i marit, tupela i mas ting long i stap wantaim inap hamas yia? (Mak 10:6-9; Rom 7:2, 3)
Long ai bilong God i gat wanem as tasol bilong katim marit na maritim nupela poroman? (Matyu 5:31, 32; 19:3-9)
Jehova i ting olsem wanem long pasin bilong katim marit i no stret wantaim Tok bilong em? (Malakai 2:13-16)
Olsem wanem? Baibel i tok narapela i ken lusim narapela bilong stretim hevi i kamap insait long marit? (1 Korin 7:10-13)
Long wanem taim man o meri i ken lusim poroman bilong em? (Sindaun 3:31; Luk 4:8; 1 Timoti 5:8)
4. Bilong wanem sampela marit i stap gut wantaim?
4 Sampela marit ol i stap gut wantaim, na ol i no katim marit. Bilong wanem? Wanpela bikpela samting i olsem: Ol i no marit hariap, ol i marit taim ol i bikpela pinis na i gat gutpela tingting. Narapela bikpela samting i olsem: Yu mas painim wanpela poroman i gat wankain tingting na laik olsem yu, na yu inap toktok gut wantaim em long olgeta samting. Tasol bikpela samting tru i olsem: Yu mas painim poroman i laikim tru Jehova na i ting Baibel em i rot bilong stretim ol hevi. (Song 119:97, 104; 2 Timoti 3:16, 17) Kain man o meri olsem i no ting sapos marit i no wok gut, em i ken lusim poroman o katim marit. Nogat. Em i no inap tok olsem ol liklik pasin kranki bilong poroman i mekim na em i ken lusim wok bilong em yet insait long marit. Nogat. Em bai karim ol hevi na painim rot bilong stretim.
5. (a) Pasin bilong i stap gut long Jehova i gat wanem wok insait long marit? (b) Maski poroman i birua, wanem ol gutpela samting inap kamap taim man i bihainim ol lo bilong Jehova?
5 Satan i tok taim pen na hevi i painim yumi, bai yumi lusim rot Jehova i makim. ( Jop 2:4, 5; Sindaun 27:11) Tasol planti Witnes Bilong Jehova husat i bin karim hevi, long wanem, poroman bilong ol i birua long ol, ol i no bin brukim tok promis ol i mekim long de bilong marit. Ol i wok yet long i stap gut long Jehova na ol lo bilong em. (Matyu 5:37) Sampela ol i bin sanap strong na karim hevi na bihain ol i kisim amamas taim poroman bilong ol i kirap mekim wok bilong Jehova wantaim ol—maski poroman i bin birua long ol inap planti yia! (1 Pita 3:1, 2) Ol Kristen em pasin bilong poroman bilong ol i no senis liklik o poroman i lusim ol, long wanem, ol i mekim wok bilong Jehova, ol tu i save olsem ol bai kisim blesing taim ol i bihainim pasin bilong givim bel long God insait long famili.—Song 55:22; 145:16.
Olgeta Wan Wan i Mekim Wok Bilong Ol
6. Bilong marit inap wok gut, tupela i mas daun long wanem pasin Jehova i putim?
6 Maski tupela marit i sindaun wantaim, dispela samting tasol i no makim olsem marit bilong ol i wok gut, i gat planti samting moa ol i mas mekim. Tupela wantaim i mas daun long pasin Jehova i putim bilong bosim ol. Dispela bai mekim na ol samting long famili i wok gut na ol i stap bel isi. Long 1 Korin 11:3, Baibel i tok: “Het bilong olgeta man em Krais, na het bilong meri em man bilong en, na het bilong Krais em God.”
7. Man i mas mekim wok bos bilong em olsem wanem?
7 Olsem wanem? Yu lukim namba wan tok bilong dispela ves? Yes, olgeta man i gat Het bilong em, Krais, na em i mas daun long em. Dispela i makim olsem man i mas bihainim pasin bilong Jisas long mekim wok bos bilong em. Krais i daun long Jehova, em i laikim tru kongrigesen, na i lukautim ol. (1 Timoti 3:15) Em i “givim laip bilong em yet bilong helpim” kongrigesen. Jisas i no gat pasin antap na em i no mekim pasin i bagarapim bel bilong narapela, tasol em i save ‘mekim pasin isi long ol man na daunim em yet.’ Ol man i stap aninit long em ol i stap gutpela, olsem ol i “kisim malolo.” Taim man i mekim kain pasin olsem long famili bilong em, em i soim olsem em i daun long Krais. Na meri Kristen bai pilim olsem em i gutpela long wok gut wantaim man bilong em na daun long wok bos bilong em.—Efesus 5:25-33; Matyu 11:28, 29; Sindaun 31:10, 28.
8. (a) Bilong wanem i luk olsem ol pasin Kristen i no helpim sampela famili? (b) Sapos kain samting olsem i painim yumi, yumi mas mekim wanem?
8 Tasol ol hevi bai kamap. Taim famili i no kirap yet long bihainim ol stiatok bilong Baibel, ating ol i no gat laik tru long narapela man i givim tok long ol o bosim ol. Maski narapela i askim narapela long mekim wanpela wok samting na em i toktok long gutpela pasin sori, ating narapela i no laik harim. Yumi save Baibel i tok, yumi mas “rausim olgeta pasin bilong bel nogut na kros na belhat na bikmaus.” (Efesus 4:31) Tasol yu ken mekim wanem sapos i luk olsem yu mas kros na bikmaus bilong narapela i ken harim tok bilong yu? Jisas i no bihainim pasin bilong ol man husat i toknogutim em na tok long kilim em i dai. Nogat. Em i wetim Papa bilong em long helpim em. (1 Pita 2:22, 23) Olsem na taim hevi i kamap insait long famili, soim olsem yu bihainim pasin bilong givim bel long God na beten askim Jehova long helpim yu na no ken bihainim pasin bilong ol man bilong graun.—Sindaun 3:5-7.
9. Planti man marit Kristen i lusim pasin bilong toktok planti long popaia bilong narapela na ol i lain long mekim wanem?
9 Ating pasin bilong famili i no senis kwiktaim, tasol ol tok bilong Baibel i helpim tru famili taim ol i givim bel long bihainim na ol i no les. Planti man marit i lukim olsem marit bilong ol i kirap long kamap gutpela taim ol i pilim tru pasin Krais i bin mekim long kongrigesen. Ol manmeri bilong dispela kongrigesen i no gutpela olgeta. Tasol Jisas i laikim tumas ol na em i stap olsem gutpela piksa bilong ol i ken bihainim, na em i mekim wok long Baibel bilong helpim ol long stretim pasin bilong ol. Em i dai bilong helpim kongrigesen. (1 Pita 2:21) Pasin bilong em i bin kirapim planti man marit Kristen long stap olsem gutpela het bilong famili, na mekim gutpela pasin bilong helpim marit bilong ol i kamap gutpela. Dispela kain pasin i kamapim gutpela samting, winim tru pasin bilong toktok planti long popaia bilong narapela o pasin bilong pasim maus na i no laik toktok.
10. (a) Sampela man o meri marit—na sampela ol i tok ol i Kristen—ol i mekim wanem na ol i putim hevi long famili? (b) Famili i ken mekim wanem bilong stretim dispela hevi?
10 Tasol olsem wanem sapos man i no pilim ol samting em i mas mekim bilong helpim famili long i stap belgut na amamas? O em i no go pas long bungim famili bilong toktok wantaim long Baibel o bilong mekim ol narapela wok? O olsem wanem sapos meri i no wok gut wantaim man na i no daun long em? Sampela famili i bin toktok gut wantaim long dispela hevi na gutpela samting i bin kamap. (Stat 21:10-12; Sindaun 15:22) Tasol maski ol samting i no kamap gutpela tru olsem yumi gat laik long en, yumi ken wok long bihainim ol gutpela pasin em spirit bilong God i save kamapim na tingim gut ol narapela long famili, dispela samting bai helpim famili long i stap amamas. (Galesia 5:22, 23) Yumi no ken wetim narapela i kirap mekim gut wok insait long famili, nogat; yumi yet i mas kirap mekim wok na ol gutpela samting bai kamap, na bai yumi kamapim klia olsem yumi bihainim pasin bilong givim bel long God insait long famili.—Kolosi 3:18-21.
Rot Bilong Painim Bekim
11, 12. Jehova i givim wanem samting bilong helpim sindaun bilong famili i kamap gutpela?
11 Ol man i painim kain kain rot bilong kisim save long ol samting ol i mas mekim insait long famili. Tasol yumi save Tok Bilong God i gat nambawan gutpela tok bilong helpim yumi, na yumi tenkyu long God long em i helpim yumi long bihainim dispela tok long rot bilong oganaisesen bilong em long graun. Yu save bihainim ol dispela tok bilong helpim yu?—Song 119:129, 130; Maika 4:2.
12 Yu save go long ol miting bilong kongrigesen, tasol yu save makim tu taim bilong mekim Baibel-stadi wantaim famili? Ol famili husat i save mekim olsem ol inap wok long kamap wanbel long lotuim God. I stap bilong famili i kamap gutpela taim ol i bihainim Tok Bilong God long sindaun bilong ol yet.—Lo 11:18-21.
13. (a) Sapos yumi gat ol askim long ol samting bilong famili, planti taim yumi ken kisim helpim we? (b) Ol samting yumi tingting pinis long mekim i mas soim olsem yumi mekim wanem?
13 Ating yu gat sampela askim long ol samting bilong famili. Olsem: Olsem wanem long ol samting man o meri i ken mekim na bai ol i no kamapim ol pikinini? Sampela taim i stret long mama i ken rausim bel? Sapos pikinini i no tingim tumas ol samting bilong spirit, papamama i mas strong long em i lotu wantaim famili o nogat? Ol buk na nius ol Witnes Bilong Jehova i wokim i bin skelim planti kain askim olsem. Lain long mekim wok long ol buk bilong stadi long Baibel, na ol indeks tu, bilong painim bekim bilong ol askim. Sapos yu no gat ol buk na nius em indeks i kolim, yu ken lukim long laibreri long Haus Kingdom. O sapos yu gat kompiuta, ating yu ken skelim ol dispela buk long rot bilong kompiuta. Na tu, yu ken toktok wantaim ol strongpela man na meri Kristen long ol askim bilong yu. Tasol yu no ken ting bai yu kisim bekim olsem yes o nogat long olgeta askim. Planti taim yu yet o yutupela marit i mas makim ol samting yupela i laik mekim. Ol samting yu tingting pinis long mekim i mas soim olsem yu givim bel long God taim yu stap long ai bilong ol man na insait long famili tu.—Rom 14:19; Efesus 5:10.
Stori Gen Long Ol Dispela Tok
• Taim yumi stap gut long poroman marit, olsem wanem yumi stap gut long Jehova tu?
• Taim ol hevi insait long famili i givim hevi long yumi, wanem samting bai helpim yumi long bihainim pasin God i laikim?
• Maski ol narapela long famili i no mekim gutpela pasin, yumi ken mekim wanem bilong helpim famili long i stap gut?
[Piksa long pes 155]
Wok bos bilong man i mas kamapim ol pasin bilong Jisas
[Piksa long pes 157]
Pasin bilong stadi oltaim long Baibel wantaim famili i helpim ol long i stap wanbel