Pas i Kam Long Wanpela Gutpela God

TOKIM mi, wanem feiveret buk bilong yu?— Sampela pikinini bai makim buk i stori long ol animal. Sampela bai makim buk i gat planti piksa long en. Pasin bilong ritim ol kain buk olsem inap givim bikpela amamas.

Tasol ol buk i winim tru olgeta arapela buk long graun, em ol buk i tokim yumi long tok tru bilong God. Wanpela bilong ol dispela buk i gutpela moa, winim olgeta arapela buk. Yu save long nem bilong dispela buk?— Em Baibel.

Bilong wanem Baibel em i bikpela samting tru?— Long wanem, dispela buk i kam long God. Baibel i tokim yumi long God, na long ol gutpela samting em bai mekim bilong helpim yumi. Na em i tokim yumi long ol samting yumi mas mekim bilong amamasim God. Em i olsem wanpela pas i kam long God.

Orait tingim, God inap long raitim olgeta tok bilong Baibel long heven na givim long ol man. Tasol em i no bin mekim olsem. Maski ol tok i stap long Baibel i kam long God, em i bin yusim ol wokman bilong em long graun long raitim ol dispela tok.

God i bin mekim dispela olsem wanem?— Bilong kliagut long dispela samting, tingim dispela. Taim yumi harim nek bilong wanpela man long redio, ating dispela nek i bilong wanpela man i stap longwe. Taim yumi lukim televisen, yumi inap lukim piksa bilong ol man i stap long ol narapela kantri, na yumi inap harim tok ol i mekim.

Ol man inap kalap long roket na go antap long mun, na ol inap salim ol tok i kam bek long graun. Yu bin save long dispela?— Sapos ol man inap mekim dispela samting, yu ting God long heven inap salim ol tok i kam long graun?— Yes, em inap mekim! Na em i bin mekim dispela paslain tru long taim ol man i gat redio o televisen.

Moses em wanpela man i bin harim God i toktok. Moses i no inap lukim God, tasol em inap harim nek bilong God. Planti milion man i bin i stap taim dispela samting i kamap. Long dispela taim, God i bin mekim na maunten i guria na tanda i pairap na laitning i kamap. Ol man i save olsem God i bin toktok, tasol ol i pret nogut tru. Olsem na ol i tokim Moses: “Nogut God i tok long mipela, na bai mipela i dai.” Bihain, Moses i raitim ol samting God i bin tokim em long en. Na ol tok Moses i bin raitim i stap long Baibel.—Kisim Bek 20:​18-21.

Moses i raitim faipela buk bilong Baibel, Buk Stat i go long Buk Lo. Tasol i no em tasol i raitim ol tok bilong Baibel, nogat. God i bin yusim 40 man long raitim ol hap bilong Baibel. Ol dispela man i bin stap bipo bipo tru, na planti yia i lus pastaim na bihain wok bilong raitim Baibel i pinis. Yes, ol i bin raitim Baibel insait long 1,600 yia! Samting yumi kirap nogut tru long en i olsem: Maski sampela bilong ol dispela man i no bin bungim narapela narapela, ol tok ol i raitim i no pait wantaim.

Sampela man God i bin yusim ol long raitim Baibel em ol man i gat nem. Maski Moses i bin mekim wok olsem wasman bilong ol sipsip, em i kamap lida bilong lain Israel. Solomon em i king i gat savetingting na em i gat planti mani kago, winim olgeta man long graun. Tasol sampela man bilong raitim Baibel ol i no gat nem. Amos i save lukautim ol diwai fik.

Na wanpela man bilong raitim Baibel em i wanpela dokta. Yu save long nem bilong em?— Nem bilong em Luk. Narapela man bilong raitim Baibel i bin wok olsem man bilong kisim takis. Nem bilong em Matyu. Na narapela em wanpela loya, em i saveman bilong lo bilong lotu Juda. Em i raitim planti buk bilong Baibel, winim ol arapela. Yu save long nem bilong em?— Nem bilong em Pol. Na ol disaipel bilong Jisas, em Pita na Jon, ol tu i raitim Baibel, bipo ol i man bilong kisim pis.

Planti bilong ol dispela man bilong raitim Baibel, ol i bin raitim tok long ol samting God bai mekim long bihain. Olsem wanem ol i save long ol dispela samting taim ol i no kamap yet?— God i bin toksave long ol. Em i bin tokim ol long ol samting bai kamap.

Taim Jisas, Bikpela Tisa, em i kamap long graun, ol i bin raitim pinis planti hap bilong Baibel. Orait tingim, pastaim dispela Bikpela Tisa i bin stap long heven. Em i save long ol samting God i bin mekim. Yu ting em i bilip olsem Baibel i kam long God?— Yes, em i bin bilip olsem.

Taim Jisas i tokim ol man long ol wok God i bin mekim, em i save ritim long Baibel. Sampela taim em i save kolim ol tok bilong Baibel long tingting. Na Jisas i bringim tu sampela tok moa i kam long God. Jisas i tok: “Olgeta tok mi harim long em, em mi save autim long ol manmeri bilong graun.” (Jon 8:26) Jisas i bin harim planti tok long God, long wanem, em i bin stap wantaim God. Na yumi inap ritim we ol dispela tok Jisas i bin mekim?— Long Baibel. Ol i bin raitim olgeta dispela tok bilong yumi ken ritim.

Tru, taim God i yusim ol man long raitim Baibel, ol i raitim ol tok long tok ples ol man i save yusim long olgeta de. Olsem na bikpela hap bilong Baibel ol i bin raitim long tok Hibru, sampela hap long tok Aram, na planti hap long tok Grik. Planti man long nau ol i no inap rit long ol dispela tok ples, olsem na ol i bin tanim ol tok bilong Baibel long ol narapela tok ples. Long nau ol man inap ritim sampela hap bilong Baibel long 2,260 tok ples. Man! Tingim dispela bikpela namba! Baibel em i pas bilong God i go long ol man long olgeta hap. Tasol maski ol i bin tanim ol tok bilong en i go long hamas tok ples, ol tok bilong en i kam long God.

Ol tok bilong Baibel i bikpela samting long yumi. Ol i bin raitim long bipo yet, tasol em i toktok long ol samting i wok long kamap long nau. Na em i tokim yumi long ol samting God bai mekim liklik taim bihain. Yumi amamas tru long ol tok bilong en! Em i helpim yumi long wetim ol gutpela samting bai kamap bihain.

Baibel i tokim yumi long pasin God i laik yumi mas bihainim long laip bilong yumi. Em i tokim yumi long wanem samting i stret na wanem samting i no stret. Yu mas save long dispela samting, na mi tu mas save. Em i tokim yumi long ol man i bin mekim ol pasin nogut na ol samting i painim ol na bai yumi ken abrusim ol dispela pasin. Em i tokim yumi tu long ol man i mekim stretpela pasin na ol gutpela samting i painim ol. Ol i bin raitim olgeta dispela samting bilong helpim yumi.

Tasol bilong Baibel i ken helpim tru yumi, yumi mas save long bekim bilong wanpela askim. Dispela askim i olsem: Husat i givim Baibel long yumi? Bai yu bekim olsem wanem?— Yes, Baibel olgeta i kam long God. Orait, olsem wanem yumi inap soim olsem yumi gat savetingting?— Long rot bilong harim tok bilong God na mekim ol samting em i tokim yumi long mekim.

Olsem na yumi mas lusim taim long ritim Baibel wantaim. Taim yumi kisim pas long wanpela man yumi laikim tumas, yumi save ritim planti taim, a? Dispela pas i bikpela samting tru long yumi. Yumi mas i gat wankain tingting long Baibel tu, long wanem, em i wanpela pas i kam long Man i laikim yumi tumas. Em pas i kam long wanpela gutpela God.