Kisim Skul Long Tok Bilong God

Bilong Wanem Yumi Mas Kisim Skul Long God?

Dispela atikol i kamapim sampela askim ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Bilong wanem yumi mas kisim skul long God?

God i gat gutnius bilong ol gutpela samting bai painim ol manmeri. Em i tokim yumi long ol dispela samting long rot bilong Baibel. Baibel i olsem wanpela pas em Papa bilong yumi long heven i raitim i kam long yumi.​—⁠Ritim Jeremaia 29:⁠11.

2. Wanem dispela gutnius?

Ol man i mas i gat gutpela gavman. I no gat wanpela bikman bilong graun i bin pinisim ol hevi bilong ol manmeri olsem pait na bagarapim ol man, pasin i no stret, sik, na dai. Tasol i gat gutnius bilong gutpela samting bai kamap. God bai kamapim wanpela gutpela gavman bilong helpim ol man, na dispela gavman bai pinisim tru ol samting i save kamapim pen na hevi.​—⁠Ritim Daniel 2:⁠44.

3. Bilong wanem em i bikpela samting long yumi mas kisim skul long God?

Klostu nau God bai pinisim ol manmeri i save kamapim pen na hevi long dispela graun. Long nau, em i skulim planti milion manmeri i gat pasin daun long rot bilong stap gut, em pasin laikim i as bilong en. Long rot bilong Tok Bilong God, ol man i kisim save long olsem wanem ol i ken karim ol hevi long i stap bilong ol, kisim amamas, na mekim ol samting God i laikim.​—⁠Ritim Sefanaia 2:⁠3.

4. Husat i kamapim ol tok bilong Baibel?

I gat 66 liklik buk long Baibel. Inap olsem 40 man i bin raitim ol dispela buk. Moses i bin raitim Buk Stat i go long Buk Lo inap 3,500 yia i go pinis. Aposel Jon i raitim laspela buk inap 1,900 yia i go pinis. Ol man bilong raitim Baibel i bin kamapim tingting bilong God, na i no bilong ol yet. Olsem na God em i Man i kamapim olgeta tok bilong Baibel.​—⁠Ritim 2 Timoti 3:16; 2 Pita 1:⁠21.

Yumi save olsem Baibel i kam long God, long wanem, em i tokaut stret long ol samting bai kamap bihain. I no gat wanpela man inap mekim olsem. (Aisaia 46:​9, 10) Na tu, Baibel i kamapim ol gutpela pasin bilong God. Tok bilong en i gat strong bilong senisim i stap bilong ol man i kamap gutpela moa. Ol dispela samting i kirapim planti milion man long bilip tru olsem Baibel em Tok Bilong God.​—⁠Ritim Josua 23:14; 1 Tesalonaika 2:⁠13.

5. Olsem wanem yu inap kliagut long ol tok bilong Baibel?

Planti man i save long Jisas olsem em i tisa bilong Tok Bilong God. Tru, planti man em i bin toktok wantaim ol, ol i save long ol tok bilong Baibel, tasol ol i mas kisim helpim bilong kliagut long en. Bilong helpim ol, Jisas i kolim planti ves na kamapim klia “as bilong ol tok i stap long buk bilong God.” Dispela atikol, “Kisim Skul Long Tok Bilong God,” bai helpim yu long kliagut long mining bilong ol tok bilong Baibel.​—⁠Ritim Luk 24:​27, 45.

Em i gutpela samting tru long kisim skul long God long as bilong i stap bilong yumi. Tasol ating sampela man bai i no amamas long yu ritim Baibel. No ken larim dispela i daunim yu. Bilong kisim laip oltaim, yu mas kisim save long God.​—⁠Ritim Matyu 5:​10-12; Jon 17:⁠3.

Bilong kisim sampela save moa, lukim sapta 2 bilong dispela buk, em ol Witnes Bilong Jehova i wokim. Tru Tru Baibel i Tok Wanem?