Bilong Wanem Ol Man i Kisim Sik?

YU SAVE long wanpela man em i sik?— Ating sampela taim yu yet i sik. Ating yu kisim strongpela kus o bel i pen. Sampela ol i gat bikpela sik. Ol yet i no inap long sanap, olsem na i mas i gat man bilong helpim ol. Dispela samting i save kamap taim ol man i lapun tru.

Olgeta man i save sik sampela taim. Yu save bilong wanem sampela man i save sik, kamap lapun, na i dai?— Wanpela taim ol i bringim wanpela man i go long Jisas. Dispela man i no inap long wokabaut, na Jisas i kamapim as na ol man i save sik na i dai. Mi laik stori long yu long dispela samting.

Jisas i stap long wanpela haus long taun klostu long raunwara Galili. Ol man i kam lukim em. Planti man i kam na i no gat spes long sampela moa i ken i go insait long haus. I no gat spes long i go klostu long dua tu. Tasol planti man i wok long kam yet! Sampela man i bringim wanpela man ol bun bilong em i dai olgeta na em i no inap wokabaut. Fopela man i karim em long wanpela liklik bet.

Yu save long as na ol i laik bringim dispela sikman i go long Jisas?— Ol i bilip olsem Jisas inap helpim em, olsem oraitim sik bilong em. Yu save olsem wanem ol i bringim dispela man i go long Jisas, maski ol man i pulap insait long haus?—

Piksa yu lukim hia i soim samting ol i mekim. Pastaim ol i karim dispela man i go antap long rup bilong haus. Rup i stretpela. Ol i wokim bikpela hul long rup, na slekim bet i go daun insait long haus. Ol dispela man i gat strongpela bilip!

Olgeta manmeri long haus ol i kirap nogut taim ol i lukim dispela samting. Dispela man long bet i kam daun stret namel long ol. Yu ting Jisas i kros taim em i lukim samting ol dispela man i bin mekim?— Nogat tru! Em i amamas tru long lukim olsem ol i gat bilip. Em i tokim dispela man bun bilong em i dai olgeta: “Mi lusim pinis ol sin bilong yu.”

Sampela man i ting i no stret long Jisas i mekim dispela tok. Ol i ting em i no inap lusim sin bilong ol man. Olsem na bilong soim olsem em inap mekim olsem, Jisas i tokim dispela man: “Yu kirap na kisim bet bilong yu, na yu go long haus bilong yu.”

Taim Jisas i tok olsem, dispela man i kamap orait! Bun bilong em i no i dai moa. Nau em yet inap kirap sanap na wokabaut. Ol man i lukim dispela mirakel ol i kirap nogut tru. I no gat wanpela taim ol i bin lukim kain samting olsem i kamap! Ol i litimapim nem bilong Jehova long em i bin givim dispela Bikpela Tisa em inap oraitim sik bilong ol man.—Mak 2:​1-​12.

Dispela mirakel i skulim yumi long wanem samting?— Yumi kisim save olsem Jisas i gat strong bilong lusim sin na oraitim ol sikman. Tasol yumi kisim save long narapela samting tu, em i wanpela bikpela samting tru. Yumi kisim save olsem sin i mekim na ol man i save kisim sik.

Yumi olgeta i save sik long sampela taim, olsem na yu ting dispela i makim olsem yumi olgeta i gat sin?— Yes, Baibel i tok taim mama i karim yumi, sin i stap pinis long skin bilong yumi. Yu save dispela i makim wanem samting?— Em i makim olsem yumi no gutpela olgeta taim mama i karim yumi. Sampela taim yumi mekim pasin kranki, maski yumi no laik mekim olsem. Yu save olsem wanem yumi olgeta i bin kisim sin?—

Yumi kamap sinman, long wanem, namba wan man Adam, em i no bin bihainim tok bilong God. Em i mekim sin taim em i brukim lo bilong God. Na yumi olgeta i kisim sin long Adam. Yu save olsem wanem yumi kisim sin long em? Mi laik stori long dispela samting long pasin yu inap kliagut long en.

Ating yu bin lukim wanpela i kukim bret long wanpela tin samting. Wanem samting bai kamap long bret sapos tin i krungut liklik? Yu save?— Dispela wankain mak, o krungut, bai kamap long olgeta bret ol i kukim long dispela tin, a?—

Adam i kain olsem dispela tin, na yumi olsem bret. Em i kamap sinman taim em i brukim lo bilong God. I olsem em i kamap krungut, o em i kisim wanpela mak nogut. Olsem na taim em i kamapim ol pikinini, ol bai wanem kain?— Olgeta pikinini bilong em bai kisim dispela wankain mak bilong sin.

Planti pikinini i no kamap wantaim bikpela bagarap i stap ples klia taim mama i karim ol, nogat. Ol i no sot long wanpela han o lek. Tasol ol i gat sin i stap long skin, olsem na ol i save kisim sik, na bihain ol i dai.

Tru, sampela man i save kisim sik planti taim moa long ol arapela. Bilong wanem i olsem? Yu ting dispela i makim olsem ol i gat bikpela sin moa taim mama i karim ol?— Nogat, olgeta man i kamap wantaim wankain mak bilong sin. Yumi olgeta i sinman pinis taim mama i karim yumi. Olsem na olgeta man bai kisim sampela kain sik. Ol man i laik bihainim olgeta lo bilong God na ol i no mekim bikpela rong, ol tu inap kisim sik.

Sapos olsem, bilong wanem sampela man i save kisim sik planti taim moa long ol arapela?— I gat planti samting i as bilong en. Ating ol i sot long kaikai. O ol i no kisim ol kaikai i stret long kisim. Ating ol i kaikai planti tumas ol kek na loli samting. Narapela as em ating ol i save go slip leit na slip sotpela taim tasol. O ating ol i no karamapim gut skin long taim bilong ren. Sampela man, bodi bilong ol i no strong tumas, na ol i no inap daunim sik, maski ol i wok strong long lukautim ol yet.

Yu ting wanpela taim bai i kamap na yumi no kisim sik moa? Yu ting yumi inap kamap fri long sin?— Orait, Jisas i bin mekim wanem long dispela man bun bilong em i dai olgeta?— Jisas i bin lusim sin bilong em na oraitim em. Long dispela rot Jisas i soim samting em bai mekim long olgeta man i wok strong long mekim stretpela pasin.

Sapos yumi soim olsem yumi no laik mekim sin na yumi nolaik tru long pasin i no stret, Jisas bai oraitim yumi. Long bihain, em bai rausim dispela sin yumi gat long nau. Em bai mekim dispela taim em i stap King long Kingdom Bilong God. Em bai no pinisim sin wantu tasol, nogat. Isi isi sin bai wok long pinis. Na taim sin bilong yumi i pinis olgeta, yumi no inap kisim sik gen. Yumi olgeta bai gat gutpela helt. Dispela i wanpela gutpela blesing tru!