Sapta 7
Yumi Stap Bilong Mekim Wanem?
1. Ol man i gat tingting ol i ting olsem wanem?
PLANTI manmeri i askim olsem: Yumi stap bilong mekim wanem? Ol man i gat tingting ol i lukim ol sta na ol gutpela diwai na maunten samting na ol i ting olsem: Ol dispela samting i no kamap nating; i gat wok bilong en na ol i kamap na i stap. Tasol ol i laik save: Yumi ol manmeri yumi stap bilong mekim wanem?—Sam 8:3, 4.
2. Planti man i laik save long wanem ol askim?
2 Planti manmeri i laik save: Yumi bilong i stap sotpela taim tasol, na painim liklik amamas, na i dai? Olsem wanem long yumi long bihain? Mama i karim yumi na yumi stap liklik taim na yumi dai na em tasol? (Jop 14:1, 2) Yumi mas save long bekim bilong wanpela askim na bai yumi inap save long dispela samting. Dispela askim i olsem: Yumi kamap olsem wanem?
YUMI KAMAP NATING O GOD I WOKIM YUMI?
3. Wanem dispela tok bilong evolusen?
3 Long sampela hap ol i save lainim ol manmeri olsem: Olgeta samting i kamap nating tasol. Ol i tok, pastaim tru i gat sampela liklik samting olsem liklik binatang i stap, na inap planti milion yia ol dispela samting i senis senis na i tanim i kamap narapela narapela samting na bihain yumi ol manmeri i kamap. Dispela tok ol i kolim tok bilong evolusen, na ol i lainim ol man long en olsem em i wanpela tok i gat as bilong en. Tasol yu ting wanpela kain monki bilong bipo yet em i tumbuna bilong yumi? Yu ting olgeta samting i kamap nating?
4. Bilong wanem yumi inap bilip olsem ‘God i wokim heven na graun’?
4 Baibel i tok: “Bipo, bipo tru . . . God i stat long mekim kamap heven na graun.” (Jenesis 1:1) Sampela saveman tu i kisim save olsem na ol i tok: Bipo tru heven o ples antap wantaim ol planti planti sta na dispela graun ol i stat o i kirap long kamap. Wanpela man i mekim i kamap. Olgeta sta wan wan i gat rot bilong en na spid bilong en, i wankain long olgeta taim. Ol saveman i save long dispela samting, olsem na ol inap makim wanpela taim bilong bihain bihain na kolim ples stret sta bai stap long en long dispela taim. I gat lo bilong bosim wokabaut bilong ol sta. Wanpela saveman i tok: ‘Yumi skelim dispela samting na yumi save, God em i gat bikpela save long ol dispela lo em i bin putim. Em i mekim wok long ol dispela lo na wokim ol samting bilong graun na bilong antap.’—P. Dirac long nius Scientific American.
5. Taim yumi tingim skin bilong yumi, olsem wanem yumi inap save, God i wokim yumi na yumi no bin kamap nating?
5 Baibel i tok: “Bikpela, em wanpela tasol i God tru. Em wanpela tasol i bin wokim yumi.” (Sam 100:3) Yumi lukim gutpela skin bilong yumi na yumi save, wanpela man em i gat save em i bin tingim na wokim olsem. Wanpela man bilong raitim Baibel em i tok: “Mi save litimapim nem bilong yu. [Long wanem] yu wokim [skin bilong mi] i narakain na i nambawan tru. . . . Taim mi kamap isi isi long ples hait insait long bel bilong mama, yu bin lukim olgeta bun bilong mi i kamap na i pas wantaim.” (Sam 139:14-16) Taim pikinini i kamap isi isi insait long bel bilong mama, dispela samting i narapela kain tru. Wanpela nius (Newsweek) i tok: “Em i wanpela mirakel tru.” Na dispela nius i tok: “No gat wanpela saveman inap stori long ol narapela kain strong i mekim wok insait long bel bilong meri na kamapim olgeta hap skin bilong pikinini.”
6. Bilong wanem i stret yumi bilip olsem God i wokim yumi na yumi no bilipim tok bilong evolusen?
6 Tingim dispela graun na ples antap na skin bilong yumi. Olgeta dispela samting i narapela narapela kain na i gutpela tru na i gat lo bilong en. Na yumi save, ol dispela samting i no inap kamap nating. Wanpela Man em i bin tingim ol dispela samting na em i wokim olsem. Tingim ol samting i stap long haus bilong yu—tebol, sia, bet, na haus yet. Ol dispela samting i kamap nating o wanpela man i bin wokim? Tru tumas, wanpela man em i gat save na tingting em i bin wokim ol dispela samting! Olsem na i no stret sampela man i tok ol sta na ol kain kain samting i stap long graun na yumi ol manmeri tu, olgeta i kamap nating. Nogat. I gat Man bilong wokim yumi. Na sapos i gat Man bilong wokim yumi, orait, i gat as na Em i bin wokim yumi.
7. (a) Jisas i tok wanem na yumi save, em i bilip olsem God i bin wokim olgeta samting? (b) I gat wanem samting moa na yumi inap save, Adam em i wanpela man tru na i bin i stap long bipo?
7 Krais Jisas i stori long namba wan man na meri na em i tok: “Bipo tru God i bin wokim olgeta samting, na em i wokim ol i kamap man na meri. Na em i tok, ‘Olsem na bai man i lusim papamama na i pas wantaim meri bilong en.’ ” (Matyu 19:4, 5) Jisas i kolim tok bilong Jenesis 1:27 na 2:24 i stori long God i wokim Adam na Iv. Olsem na Jisas i soim yumi dispela stori bilong Baibel i tru. (Jon 17:17) Na Baibel i tok, “Inok em i namba seven man i kamap bihain long Adam.” (Jut 14) Sapos Adam i no wanpela man tru i bin i stap long bipo, Baibel i no ken stori long em olsem.—Luk 3:37, 38.
8. Sampela man i tok wanem, tasol Baibel i no tok olsem?
8 Sampela man i tok, God i wokim yumi ol manmeri long rot bilong evolusen. Ol i tok, God i wokim ol animal, orait nau ol animal i senis senis na bihain ol i tanim i kamap man. Na ol i tok, taim ol man i kamap pinis, nau God i putim tewel insait long skin bilong ol. Tasol Baibel i no tok olsem. Baibel i tok, God i wokim ol diwai samting na ol animal i “kain kain.” (Jenesis 1:11, 21, 24) Yumi save, i gat kain kain diwai na kain kain animal, na narapela kain diwai i no inap tanim i kamap narapela kain diwai, na narapela kain animal i no inap tanim i kamap narapela kain animal.
GOD I WOKIM MAN OLSEM WANEM?
9. (a) Olsem Baibel i tok, God i wokim man olsem wanem? (b) Taim God i winim “win bilong laip” i go insait long nus bilong man, wanem samting i kamap?
9 God i kisim graun na wokim man bilong i stap long graun, olsem Baibel i tok: “Yawe God i kisim graun na em i wokim man long en. Na em i winim win bilong laip i go insait long nus bilong dispela man, na man i kamap laip.” (Jenesis 2:7) Olsem na yumi save, God yet em i wokim man. God i wokim olgeta hap skin bilong man na em i kamap wanpela man tru. Taim God i winim “win bilong laip” i go insait long nus bilong man, win i pulap long waitlewa bilong em. Na narapela samting tu i kamap. Man i kamap laip. God i givim strong bilong laip long man, na man i mas pulim win bambai dispela strong bilong laip i ken i stap long skin bilong em.
10. Man i gat laip, God i wokim em olsem wanem?
10 Baibel i no tok, ‘God i putim wanpela tewel insait long skin bilong man.’ Nogat. Baibel i tok, ‘God i winim win i go insait long nus bilong man na man i kamap laip.’ God i no givim tewel long man, God i givim laip long man. Adam i kamap man i gat laip. (1 Korin 15:45) Baibel i tok, God i kisim graun na wokim skin bilong man na putim win bilong laip long en. Dispela graun yet na dispela win yet i no wanpela man i gat laip. Nogat. Tasol taim God i bungim dispela tupela samting wantaim, em nau, wanpela man i gat laip i kamap.
11. Baibel i tok wanem na yumi save, yumi no gat tewel?
11 Yumi no gat wanpela samting olsem tewel i stap insait long yumi na taim yumi dai dispela samting i lusim skin na i stap laip yet. Nogat. Baibel i tok, ol man i gat laip na taim ol i dai ol i no gat laip moa. Ol i no gat tewel. Taim ol i dai ol i dai olgeta na tanim i kamap graun gen.—Jenesis 3:19.
BILONG WANEM GOD I PUTIM MAN LONG GRAUN?
12. God i gat wanem laik long ol man?
12 God i no laik bai Adam tupela Iv i stap liklik taim tasol long graun na tupela i dai na i go i stap long narapela hap. Nogat. God i putim tupela long graun bilong i stap oltaim na bilong lukautim graun na olgeta samting i stap laip long en. Baibel i tok: “God i blesim tupela, i spik, ‘Yutupela karim planti pikinini, na bai ol i go sindaun long olgeta hap bilong graun na bosim olgeta samting i stap long en.’ ” (Jenesis 1:28; 2:15) Adam tupela Iv na olgeta pikinini bilong ol tu, ol inap i stap amamas oltaim long graun na mekim ol samting God i laik bai ol i mekim.
13. (a) Olsem wanem yumi inap i stap amamas? (b) Yumi mas mekim wanem na bai i stap bilong yumi i gat as tru bilong en?
13 Baibel i tok, “God i blesim tupela.” God i laikim tumas dispela tupela pikinini bilong em. Olsem na em i tokim tupela long ol samting ol i mas mekim bambai ol inap i stap gutpela. Sapos tupela i bihainim tok, tupela i ken amamas. Jisas i tok olsem: “Ol man i harim tok bilong God na i bihainim em, ol i ken amamas.” (Luk 11:28) Jisas i bihainim tok bilong God. Em i tok: “Oltaim mi save mekim ol samting em i laikim.” (Jon 8:29) Orait, yumi stap bilong mekim wanem? Yumi stap bilong bihainim laik bilong God bambai yumi inap mekim ol gutpela wok na i stap amamas. Sapos yumi mekim wok bilong Jehova, nau bai i stap bilong yumi i gat as tru bilong en. Na bihain bai yumi inap i stap oltaim long graun na i stap amamas.—Sam 37:11, 29.
BILONG WANEM YUMI GO LAPUN NA YUMI DAI?
14. Taim Adam tupela Iv i brukim lo bilong God i olsem tupela i mekim wanem?
14 Tasol nau yumi olgeta yumi save go lapun na i dai. As bilong dispela i olsem: Adam tupela Iv i bikhet long God. Jehova i putim wanpela traim long tupela bambai ol i ken save ol i mas bihainim tok bilong Em. Em i tokim Adam: “Yu inap kaikai pikinini bilong olgeta diwai long dispela gaden. Tasol yu no ken kaikai pikinini bilong dispela diwai bilong mekim man i ken save long wanem samting i gutpela na wanem samting i nogut. I tambu tru long yu kaikai pikinini bilong dispela diwai. Sapos yu kaikai bambai yu dai.” (Jenesis 2:16, 17) Taim Adam tupela Iv i kaikai pikinini bilong dispela diwai tambu, tupela i givim baksait long God na sakim tok bilong em. Ol i kisim samting em i no bilong tupela. Tupela inap i stap gutpela oltaim na i stap amamas, tasol tupela i mekim rong na ol i kisim pe olsem: Tupela i gat sin na ol i dai.—Rom 6:23.
15. Olsem wanem yumi kisim sin long Adam?
15 Tasol olsem wanem yumi kisim dispela sin? Adam i kamap sinman na em i givim dispela sin long yumi olgeta pikinini bilong em na yumi dai. (Jop 14:4; Rom 5:12) Yumi ken tok piksa long dispela samting olsem: Sapos man i wokim bret na samting em i wokim bret long en i krungut, orait, bai mak nogut bilong dispela samting i stap long olgeta bret em i wokim long en. Orait, yumi olsem dispela bret. Taim Adam i brukim lo bilong God em i gat sin; i olsem em i gat mak nogut i stap long em. Na dispela mak nogut i stap long yumi olgeta pikinini bilong em. Yumi olgeta yumi gat sin.
16, 17. Olsem wanem wanpela mirakel bilong Jisas i soim yumi, sin i mekim na nau sik i save painim yumi ol manmeri?
16 Nau sik i save painim yumi na yumi save go lapun, long wanem yumi olgeta yumi kisim sin long Adam. Wanpela mirakel bilong Jisas i kamapim gut dispela samting. Jisas i stap long haus bilong wanpela man na em i lainim ol manmeri. Planti manmeri ol i bung na haus i pulap. Nau 4-pela man i bringim wanpela sikman i kam bun bilong em i dai olgeta. Ol i lukim ples i pas, olsem na ol i tekewe hap rup bilong dispela haus Jisas i stap long en, na ol i kisim bet i gat sikman i slip long en na lusim i go daun insait long haus.
17 Jisas i lukim bilip bilong ol na em i tokim dispela sikman: “Pikinini, mi tekewe pinis sin bilong yu.” Tasol sampela man i ting Jisas i no inap tekewe sin long ol man. Olsem na Jisas i tok: “ ‘Mi laik yupela i save, Pikinini Bilong Man em i gat strong long dispela graun, inap long tekewe sin.’ Olsem na em i tokim dispela man, bun bilong en i dai olgeta, i spik, ‘Mi tokim yu, yu sanap na kisim bet bilong yu, na yu go long haus bilong yu.’ Olsem na em i kirap na . . . wokabaut i go.”—Mak 2:1-12.
18. Ol boi bilong God i wetim wanem kain taim i kamap long bihain?
18 Dispela strong bilong Jisas inap helpim tru yumi ol manmeri, a? Taim kingdom bilong God i bosim graun, bai Krais inap tekewe sin bilong olgeta manmeri i laikim tumas God na ol i mekim wok bilong Em. Olgeta sik na pen na hevi bai pinis. No gat wanpela man bai go lapun o i dai! Gutpela taim tru bai kamap long bihain! Tru tumas, yumi no bilong i stap sotpela taim na i dai na em tasol. Nogat. Sapos yumi wok long kisim save long God na yumi mekim wok bilong em, bai yumi inap tru long i stap oltaim long graun na i stap amamas.
[Piksa long pes 69]
Planti manmeri i laik save, yumi stap bilong mekim wanem
[Piksa long pes 70]
Ol dispela samting i kamap nating o wanpela man i bin wokim?
[Piksa long pes 75]
Jisas i oraitim wanpela man bun bilong em i dai olgeta, na stori bilong dispela long Baibel i soim yumi sik i save painim yumi long wanem yumi kisim sin long Adam