Yu Ken Bilip Tru Olsem Graun Bai Kamap Paradais
LONG bipo tru na i kam inap nau, planti milion manmeri ol i bin bilip olsem bihain ol bai lusim graun na go long heven. Sampela i bin pilim olsem Man bilong wokim yumi em i no bin tingting long yumi ol man bai sindaun olgeta long dispela graun. Na sampela lain em ol i strong long daunim olgeta laik bilong skin ol i ting dispela graun wantaim olgeta samting i stap long en i samting nogut tru—em samting bilong pasim ol na bai ol i no ken inapim ol laik bilong spirit na i stap klostu long God.
Ol man i kamapim ol dispela kain tingting, ol i no bin save long tok bilong God long graun bai kamap Paradais o ol i no laik harim dispela tok. Na long nau planti manmeri ol i no gat laik long skelim ol tok bilong dispela samting em God i bin kirapim ol man long raitim long Baibel. (2 Timoti 3:16, 17) Tasol em pasin bilong gutpela tingting sapos yumi bilip long tok bilong God long Baibel na yumi no kisim olkain tingting bilong ol man, a? (Rom 3:4) Em i bikpela samting long yumi mekim olsem, long wanem, Baibel i tok lukaut long yumi olsem wanpela strongpela spirit, em man nogut tru, em i bin pasim ai bilong ol man long ol samting bilong spirit na long nau em i wok long “giamanim olgeta manmeri bilong graun.”—KTH 12:9; 2 Korin 4:4.
Bilong Wanem Ol i Longlong Nabaut?
Ol man i gat kain kain tingting long laip na indai bilong ol man, na dispela i mekim na ol man i longlong nabaut long God i gat wanem laik long dispela graun. Planti ol i bilip olsem yumi gat wanpela spirit i no save dai, na taim yumi dai dispela spirit i stap yet. Na sampela i bilip olsem dispela spirit bilong ol man i bin i stap taim God i no bin wokim yet bodi bilong man. Wanpela buk i tok, wanpela saveman Grik, em Pleto, em i ting dispela spirit “i kalabus insait long bodi olsem strafe bilong ol sin em i bin mekim taim em i stap long heven.” Na wanpela tisa bilong lotu i bin stap olsem 200 yia bihain long Krais, em Origen, em i tok, “spirit bilong ol man i bin mekim sin [long heven] taim ol i no pas yet wantaim wanpela bodi,” na ol i bin “kalabus [insait long dispela bodi long graun] olsem strafe bilong ol sin ol i bin mekim.” Na planti milion manmeri ol i bilip olsem dispela graun em i ples bilong kisim ol traim tasol na bihain ol man bai i go i stap long heven.
Na i gat kain kain tingting tu long samting i save painim man taim em i dai. Wanpela buk (History of Western Philosophy), i tok ol Isip i kisim tingting olsem “spirit bilong ol man i dai pinis i save go daun long wanpela ples insait long graun.” Bihain, sampela saveman ol i tok pait olsem spirit bilong ol man i dai pinis i no i go daun long wanpela ples tudak insait long graun—ol i go antap long wanpela ples spirit i stap antap long graun. Ol i tok, wanpela man Grik, em Sokratis, em i bin bilip olsem taim man i dai, spirit bilong em “i save go long [wanpela] ples yumi ol man i no inap lukim . . . na em i save stap olgeta long dispela ples wantaim ol god.”
Baibel i Tok Wanem?
I no gat wanpela tok long Baibel i tok ol man i gat wanpela spirit i no save dai. Ritim tok i stap long Stat 2:7, i tok: “Bihain God, Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” Em nau, dispela tok i klia tru na yumi no inap kisim tupela tingting long en. Taim God i wokim namba wan man, Adam, Em i no bin putim wanpela kain spirit insait long em, nogat. Baibel i tok “man i kisim laip.” Em i no kisim wanpela samting olsem spirit i stap insait long skin bilong em.
Taim Jehova i wokim graun na namba wan man na meri, i no laik bilong em long man i mas i dai, nogat. God i bin wokim ol man bambai ol i ken i stap oltaim oltaim long graun i stap olsem Paradais. Adam i dai, long wanem, em i sakim lo bilong God. (Stat 2:8, 15-17; 3:1-6; Aisaia 45:18) Orait taim namba wan man i dai, yu ting em i go long wanpela ples bilong ol spirit? Nogat! Dispela man Adam em i go bek long graun God i bin wokim em long en.—Stat 3:17-19.
Yumi olgeta i bin kisim sin na indai long tumbuna bilong yumi, Adam. (Rom 5:12) Taim yumi dai, yumi no i stap moa, olsem Adam—taim em i dai em i no i stap moa. (Song 146:3, 4) Long olgeta 66 liklik buk bilong Baibel, i no gat wanpela tok i makim olsem man i gat wanpela samting insait long em i no save dai na taim man i dai dispela samting i stap yet. Baibel i tokaut klia olsem taim man i dai, laip bilong em i pinis olgeta.—Saveman 9:5, 10.
Yu Ting Ol Samting Long Graun i Nogut Tasol?
Olsem wanem long dispela tingting olsem ol samting long graun, na dispela graun tu, i samting nogut? Em tingting bilong wanpela lain bilong lotu em wanpela man nem bilong en Mani i bin kamapim long Persia long yia 200 C.E. samting. Wanpela buk (The New Encyclopædia Britannica) i tok: ‘Mani i kirapim dispela bilip, long wanem, i gat planti bel hevi i save painim ol man bilong graun.’ Mani i bilip olsem, pasin bilong i stap man bilong graun “em i narapela kain, na man i no inap karim dispela hevi, na em i nogut olgeta.” Na em i bilip olsem i gat wanpela rot tasol bilong lusim dispela “bel hevi”—spirit i stap insait long man em i mas lusim bodi, na lusim graun, na stap olsem spirit long wanpela ples spirit.
Tasol Baibel i tokim yumi olsem, God i lukim olgeta samting em i bin wokim “i gutpela, na em i amamas tru.” (Stat 1:31) Long dispela taim bipo, i no gat wanpela samting i pasim ol man long i go klostu long God. Adam na Iv inap toktok wantaim Jehova na pas gut wantaim em, olsem Jisas Krais, em man i gutpela olgeta, em i bin toktok na pas gut wantaim Papa bilong em long heven.—Matyu 3:17.
Sapos tupela tumbuna bilong pastaim, em Adam na Iv, i no bin bihainim rot bilong sin, ol inap pas gut wantaim God Jehova i go inap oltaim oltaim long Paradais long graun. Taim tupela i kamap nupela, ol i stap long Paradais, long wanem, Baibel i tok: “Orait God, Bikpela i wokim wanpela gaden i stap long Iden, long hap bilong sankamap. Na long dispela gaden God i putim dispela man em i bin wokim.” (Stat 2:8) Long dispela gaden Paradais yet God i bin wokim Iv. Sapos Adam tupela Iv i no bin mekim sin, tupela wantaim ol pikinini bilong ol i gutpela olgeta ol inap i stap amamas na wok wantaim i go inap long taim olgeta hap bilong graun i kamap wanpela paradais. (Stat 2:21; 3:23, 24) Ol man inap i stap long dispela Paradais long graun i go inap oltaim oltaim.
Bilong Wanem Sampela i Go Long Heven?
Ating bai yu tok olsem: ‘Tasol Baibel i tok long ol man i go long heven, a?’ Em i stret. Taim Adam i mekim sin pinis, Jehova i tingting pinis long kamapim wanpela Kingdom long heven na sampela tumbuna pikinini bilong Adam bai ‘stap king na bosim graun’ wantaim Jisas Krais. (KTH 5:10; Rom 8:17) Ol i bilong kirap bek na kisim laip long heven na ol i no inap i dai. Namba bilong dispela lain bilong i go long heven em inap olsem 144,000, na ol namba wan lain namel long ol em ol disaipel bilong Jisas long taim bilong ol aposel, em ol i stap gut long em.—Luk 12:32; 1 Korin 15:42-44; KTH 14:1-5.
Tasol i no laik bilong God long pastaim tru long ol stretpela man bai lusim graun na i go long heven. Taim Jisas i stap long graun em i tok: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” (Jon 3:13) Long rot bilong “Pikinini Bilong Man,” em Jisas Krais, God i givim pe bilong baim bek ol man, olsem na ol man i bilip long ofa bilong Jisas ol inap kisim laip i stap oltaim. (Rom 5:8) Tasol ol dispela planti milion manmeri ol bai stap oltaim we?
Laik Bilong God Long Pastaim Bai Kamap Tru
Tru, God i bin tingting pinis long kisim sampela man bilong graun bilong mekim wok olsem king wantaim Jisas Krais long Kingdom bilong heven, tasol dispela i no makim olsem olgeta gutpela man i save go long heven, nogat. Jehova i bin wokim graun bilong i stap olsem paradais ol manmeri bai sindaun long en. Klostu nau na dispela laik bilong God bai kamap tru.—Matyu 6:9, 10.
Taim Jisas Krais i bosim graun wantaim ol king i wok wantaim em long heven, bel isi na amamas bai stap long olgeta hap bilong graun. (Song 37:9-11) Ol manmeri i dai pinis na i stap long tingting bilong God, ol bai kirap bek na skin bilong ol bai i no gat sik long en. (Aposel 24:15) Ol manmeri i bihainim tok bilong God na i stap gut long em, ol bai kisim samting i bin lus long tupela tumbuna bilong pastaim—em laip i stap oltaim oltaim long Paradais long graun, na skin bilong ol i nambawan olgeta.—KTH 21:3, 4.
God Jehova i no save lus long kamapim samting em i tingting pinis long mekim. Long rot bilong profet bilong em, Aisaia, em i tok: “Ren i save pundaun long skai, em i no save go bek nating antap long skai. Nogat. Em i save givim wara long graun na mekim ol kaikai i kamap long gaden, na ol man i save kisim. Sampela ol i save kaikai na sampela pikinini kaikai ol i save planim. Olsem tasol tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.”—Aisaia 55:10, 11.
Long Buk Aisaia long Baibel, yumi kisim sampela tingting long kain sindaun yumi inap kisim long Paradais long graun. I no gat wanpela man long Paradais bai i tok, “Mi gat sik.” (Aisaia 33:24) Ol animal i no inap bagarapim ol man. (Aisaia 11:6-9) Ol man bai wokim ol gutpela gutpela haus na sindaun long en na ol bai planim gaden na kisim kaikai inap tru long ol. (Aisaia 65:21-25) Na tu, God “bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.”—Aisaia 25:8.
Liklik taim nau na ol man i bihainim tok bilong God ol bai i gat gutpela sindaun tru olsem ol dispela ves bilong Baibel i makim. ‘God bai i pinisim dispela kalabus bilong bagarap nau olgeta samting i stap long en, na bai olgeta i stap gutpela tru olsem ol pikinini bilong God.’ (Rom 8:21) Em bai i gutpela samting tru long i stap oltaim oltaim long dispela Paradais long graun em God i promis pinis long en! (Luk 23:43, Nupela Testamen na Ol Sam) Yu inap i stap long en sapos yu kisim stretpela save long Baibel na yu kirap nau long mekim ol samting i stret wantaim dispela save, na yu bilip long God Jehova na Jisas Krais. Na yu ken save olsem yu inap bilip tru long graun bai kamap olsem paradais.
[Piksa long pes 5]
God i bin wokim Adam na Iv bilong i stap oltaim oltaim long Paradais long graun
[Ol Piksa long pes 7]
Long Paradais i stap long graun . . .
ol bai wokim ol haus
ol bai planim ol gaden wain
Jehova bai mekim gut tru long ol
[Piksa Kredit Lain long pes 4]
U.S. Fish & Wildlife Service, Washington, D.C./NASA