Bilong Wanem i Luk Olsem Laip i No Gat As Bilong En?

BILONG WANEM yu ken bilip olsem yumi no bilong i “stap sotpela taim tasol long graun, olsem tewel bilong diwai i save pinis kwik,” olsem King Solomon i tok? (Saveman 6:12) Baibel​—⁠em ol tok yumi ken bilip tru long en​—⁠i tok promis olsem laip long bihain bai i gat as tru bilong en.​—⁠2 Timoti 3:​16, 17.

Baibel i tokim yumi long laik bilong God long pastaim tru long dispela graun. Em i kamapim klia as na pasin i no stret, pasin bilong daunim ol man, na pen na hevi i pulap long graun. Bilong wanem em i bikpela samting long yumi mas save gut long ol dispela samting? Long wanem, nambawan samting i mekim na ol man i ting laip i no gat as tru bilong en em ol i no save​—⁠o ol i no laik save​—⁠long laik bilong God long dispela graun na ol man.

I Gat Wanem As na God i Wokim Dispela Graun?

God Jehovaa i bin wokim dispela graun bilong i stap olsem gutpela ples paradais we ol man i ken stap long en​—⁠em ples we ol man na meri i ken stap gutpela olgeta na stap amamas inap oltaim oltaim. Dispela tok i tru i pait wantaim tok em planti man i bilip long en olsem God i wokim graun we em i traim ol man bilong save olsem ol inap kisim gutpela laip moa long ples spirit o nogat. Baibel i no as bilong dispela tok.​—⁠Lukim blok “Yu Ting Yumi Mas Lusim Graun Bambai Laip i Gat As Bilong En?” long pes 6.

God i wokim man na meri i kain olsem Em yet, na Em i inapim ol long kamapim ol gutpela pasin bilong Em. (Stat 1:​26, 27) Em i wokim ol i gutpela olgeta. Ol i gat olgeta samting ol i mas i gat bambai ol inap mekim gutpela wok na laip bilong ol i gat as tru bilong en. Na tu, ol i mas kamapim planti pikinini na pulimapim graun na bosim olgeta samting i stap long en, na mekim graun olgeta i kamap wanpela paradais wankain olsem gaden Iden.​—⁠Stat 1:​28-31; 2:​8, 9.

Wanem Hevi i Bin Kamap?

Yumi save olsem wanpela bikpela hevi i bin kamap. Ol man long nau i no save kamapim ol pasin bilong God. Graun i no stap olsem wanpela paradais. Wanem samting i bin kamap? Tupela tumbuna papamama bilong yumi, Adam na Iv, ol i mekim nabaut long rait bilong ol long i stap fri long makim ol samting ol i mas mekim. Ol i laik “kamap wankain olsem God,” na ol yet i laik makim “wanem samting i gutpela, na wanem samting i nogut.” Taim ol i mekim olsem, ol i bihainim pasin bikhet wankain olsem Satan i bin mekim.​—⁠Stat 3:​1-6.

Olsem na pasin nogut em i no samting God i bin makim pinis, nogat. Pasin nogut i kamap taim Satan​—⁠na bihain Adam na Iv​—⁠i bikhet long wok bos bilong God. Taim ol i bikhet, Paradais na pasin bilong ol long stap gutpela olgeta i lus, na dispela i bringim sin na indai long tupela yet na long ol pikinini bilong ol​—⁠em olgeta manmeri bilong graun. (Stat 3:​17-19; Rom 5:12) Dispela samting i bin kamapim ol hevi long i stap bilong ol man, na i luk olsem laip i no gat as bilong en.

Bilong Wanem God i No Pinisim Pasin Nogut Wantu?

Sampela i tingting olsem, ‘Bilong wanem God i no pinisim pasin nogut wantu na bagarapim Satan na Adam na Iv, na wokim gen nupela lain manmeri?’ Yu ting em i savetingting sapos em i mekim olsem? Yu bai ting olsem wanem sapos yu harim olsem wanpela strongpela gavman i save kilim i dai nating ol man husat i salensim wok bilong en? Ating kain pasin olsem bai mekim na ol man i gat stretpela pasin bai kros long dispela na gavman bai i no stap olsem gutpela piksa long bihainim stretpela pasin.

God i no bagarapim ol bikhetlain wantu. Em i bihainim savepasin na larim haptaim i stap bambai inap long olgeta taim bihain em i ken stretim gut bikpela tok i bin kamap long Iden long wok bos bilong em.

Pinisim Olgeta Pasin Nogut

Nambawan bikpela samting long tingim em olsem: God i larim pasin nogut i stap inap liklik haptaim tasol. Em i mekim olsem, long wanem, em i save olsem taim em i stretim pinis ol bikpela tok i bin kamap long wok bos bilong em, em bai pinisim tru olgeta samting nogut i bin kamap.

God i no lusim tingting long samting em i laik mekim long dispela graun na ol man. Long rot bilong profet Aisaia, Jehova i tokim yumi olsem em i Man Bilong Wokim dispela graun, na “em i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Klostu nau, em bai kirap long kamapim bek Paradais long graun olsem em i bin tingting pinis long mekim long pastaim tru. Taim em i kamapim pinis olsem wok bos bilong em i stret, orait em bai yusim strong bilong em long kamapim laik bilong em na pinisim olgeta pasin nogut. (Aisaia 55:​10, 11) Long Beten Bilong Bikpela, Jisas Krais i askim God long mekim olsem. Jisas i skulim yumi long beten olsem: “Laik bilong yu i mas kamap long graun olsem em i save kamap long heven.” (Matyu 6:​9, 10) Wanem ol samting i insait long dispela?

Laik Bilong God Long Dispela Graun

Wanpela samting em olsem: “Ol manmeri i daunim nem bilong ol yet, bai God i givim olgeta graun long ol.” (Song 37:​9-11, 29; Sindaun 2:​21, 22) Jisas Krais bai “helpim ol rabisman i singaut long em. Na ol manmeri i sot long ol samting.” Em bai lukautim ol na ol man i no ken “daunim ol na bagarapim ol.” (Song 72:​12-14) Bai i no gat pait moa; ol man bai i no dai moa, na ol bai i no krai moa na pilim pen. (Song 46:9; Revelesen 21:​1-4) Planti manmeri tru em ol i bin dai long taim we God i bin larim ol pasin nogut i stap, ol bai kirap bek long graun, na ol bai inap kisim ol dispela gutpela blesing na ol narapela blesing tu.​—⁠Jon 5:​28, 29.

Tru tumas, Jehova bai pinisim olgeta samting nogut em pasin bikhet bilong Satan i bin kamapim. Em bai pinisim tru ol dispela samting na “ol [man] bai lusim tingting olgeta long ol bel hevi na trabel ol i bin i gat bipo.” (Aisaia 65:​16-19) Dispela samting bai kamap tru tru. God i no save giaman. Olgeta tok promis bilong em bai kamap tru. Laip bai i no olsem “man i ran i go bilong holimpas win.” Nogat! (Saveman 2:17) Laip bai i gat as tru bilong en.

Tasol olsem wanem long nau? Pasin bilong save long ol tok bilong God na kliagut long ol samting God i tingting pinis long mekim long dispela graun, yu ting dispela inap mekim na nau laip bilong yu i gat as tru bilong en? Atikol i kamap bihain long dispela bai bekim dispela askim.

[Futnot]

[Blok long pes 6]

Yu Ting Yumi Mas Lusim Graun Bambai Laip i Gat As Bilong En?

Inap planti handret yia, ol man husat i no gat save long laik bilong God long dispela graun, ol i bin skulim ol man olsem yumi mas lusim graun bambai laip i gat as tru bilong en.

Sampela i tok spirit bilong man “i stap long ples spirit paslain long em i go insait long bodi bilong ol man.” (New Dictionary of Theology) Sampela narapela i tok olsem spirit “i stap kalabus insait long bodi olsem strafe bilong ol sin em spirit i bin mekim taim em i stap long ples spirit.”​—⁠Cyclopedia of Biblical, Theological, and Ecclesiastical Literature.

Ol saveman Grik, olsem Sokratis na Pleto, i skulim ol man olsem: Taim spirit i lusim bodi bilong man, long dispela taim tasol spirit i “lusim kalabus bilong ol longlong pasin na pasin pret na laik nogut na olgeta narapela samting nogut i save painim ol man,” na spirit bai stap “wantaim ol god i go inap oltaim oltaim.”​—⁠Plato’s Phaedo, 81, A.

Bihain, sampela hetman em ol i tok ol i Kristen ol i bungim tingting bilong sampela saveman Grik wantaim ol bilip bilong ol​—⁠em dispela tingting olsem “ol man i gat spirit i no inap i dai.”​—Christianity​—A Global History.

Skelim ol dispela tingting wantaim 3-pela as tok i tru bilong Baibel:

1. God i laik bai graun i stap olsem ples we ol man bai i stap oltaim long en, na i no wanpela ples we em i traim ol man bambai em i ken save olsem ol i fit long i stap wantaim em long heven. Sapos Adam na Iv i bihainim ol lo bilong God, ol bai stap laip yet hia long Paradais long graun.​—⁠Stat 1:​27, 28; Song 115:⁠16.

2. Planti lotu i skulim ol man olsem man i gat spirit​—⁠em wanpela samting i stap insait long man​—⁠tasol Baibel i skulim yumi olsem God “i kisim graun na em i wokim man” na “man i kisim laip.” (Stat 2:⁠7) Baibel i no tok olsem man i gat wanpela spirit i no save dai, nogat. Em i tok man inap i dai na inap pinis olgeta. (Song 146:4; Saveman 9:​4, 5, 10; Esekiel 18:​4, 20) Namba wan man Adam i dai na em i go bek long graun, long wanem, God i bin wokim em long graun. Na em i no stap laip moa.​—⁠Stat 2:17; 3:​18, 19.

3. Bilong ol man i ken stap laip long bihain, God i tok promis olsem em bai kirapim bek ol long indai na ol bai stap long wanpela ples paradais long graun, ol man bai i no stap laip long bihain long rot bilong wanpela spirit i lusim ol na i go long wanpela ples spirit, nogat.​—Daniel 12:13; Jon 11:​24-​26; Aposel 24:15.