I Gat Wanem As na Sampela i Kamap Nupela Gen?

“SAPOS man i no kamap nupela gen, em i no inap lukim kingdom bilong God.” (Jon 3:⁠3) Dispela tok bilong Jisas i bin kirapim tru bel bilong planti man, na tu, ol i tingting planti long en.

Bilong kisim gut tok bilong Jisas long kamap nupela gen, yumi mas save long bekim bilong ol askim olsem: God i gat wanem laik long ol man? Wanem samting i painim ol man i dai pinis? Kingdom bilong God bai mekim wanem wok?

Laik Bilong God Long Ol Man

God i bin wokim namba wan man Adam i gutpela olgeta, na em i pikinini bilong God. (Luk 3:38) God Jehova i no laik bai Adam i mas i dai. Adam wantaim meri bilong em Iv ol inap kamapim ol pikinini i gutpela olgeta na i no gat sin, na ol bai pulap long graun na i stap oltaim long paradais. (Stat 1:28) God i no bin tingting long namba wan man na meri i mas i dai, nogat. Dai i kamap long ol man, long wanem, tupela i sakim lo bilong God.​—⁠Stat 2:​15-17; 3:​17-19.

Pasin bikhet bilong tupela i kamapim sampela bikpela tok bilong stretim, olsem: I stret God i stap King bilong heven na graun, o nogat? Na ol man inap i stap gut long God na bihainim ol lo bilong em, o nogat? Bikpela hap taim i mas lus bilong stretim ol dispela tok. Tasol God i no senisim laik bilong em long ol man, na em i no inap lus long kamapim laik bilong em. Em i gat laik yet long ol manmeri i gutpela olgeta ol i mas pulap long graun na i stap oltaim long Paradais. (Song 37:29; 104:5; Aisaia 45:18) Yumi mas putim gut dispela tok i tru bilong Baibel long tingting bilong yumi taim yumi skelim tok bilong Jisas long kamap nupela gen.

Taim Man i Dai Wanem Samting i Painim Em?

Ol saveman bilong ol Grik i no bin save long ol tok bilong Baibel em spirit holi bilong God i bin kirapim ol man long raitim, olsem na ol i hatwok long save, i stap bilong man i gat wanem as tru bilong en. Ol i no inap bilip olsem yumi man i mas i stap sampela yia tasol na karim ol hevi, na bihain yumi mas i dai na pinis olgeta. Tru, dispela tingting bilong ol i stret. Tasol ol i gat tingting kranki long ol samting i painim man taim em i dai pinis. Ol i bilip olsem taim man i dai, em bai stap laip yet long narapela skin, na ol i ting olgeta man i gat wanpela tewel i stap insait long skin bilong ol, na dispela tewel i no save dai.

Dispela tingting i kalap long ol Juda na ol lain i tok ol i Kristen. Wanpela buk (Heaven​—⁠A History) i tok, ‘Taim ol Juda i go nabaut long ol narapela kantri na ol i bungim ol saveman bilong lain Grik, ol i kisim dispela tingting olsem yumi gat tewel.’ Na buk i tok, ‘Bilip bilong ol Grik long tewel, em i go insait long bilip bilong ol Juda, na bihain ol Kristen tu i kisim dispela bilip. Filo i bungim bilip bilong Pleto wantaim sampela tok bilong Baibel, na dispela i stiaim tingting bilong ol Kristen i bin kamap bihain.’

Filo i gat wanem kain bilip? Dispela buk i tok, ‘Em i bilip olsem taim man i dai, tewel bilong em i kamap wankain gen olsem bilong pastaim, taim mama i no karim em yet. Tewel i bilong i stap long ples bilong ol spirit, olsem na taim yumi stap long bodi bilong yumi, yumi bilong i stap liklik taim tasol na karim planti hevi.’ Tasol taim Adam i no kamap yet, em i no bin i stap. Taim yumi kaunim Baibel yumi save, God i no bin tingting long kisim ol man i go long narapela hap taim ol i dai pinis. God i no wokim graun i olsem ples bilong traim ol man tasol.

Dispela bilip olsem yumi man i gat tewel, em i no stap long Baibel. I no gat wanpela tok bilong Baibel i tok, “man i gat tewel na dispela tewel i no save dai.” Baibel i tok, taim God i wokim Adam, Adam i kisim laip​—⁠em i no kisim wanpela tewel. Stat 2:7 i tok: “[Jehova] i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” God i no bin tokim Adam, em bai go i stap oltaim long heven o em bai go long bikpaia na karim pen oltaim, nogat. Baibel i kamapim klia olsem man i dai pinis em i no gat tingting moa. (Song 146:​3, 4; Saveman 9:​5, 10; Esekiel 18:⁠4) Olsem na dispela tingting long yumi gat tewel, em i no stret wantaim tok bilong Baibel. Yumi mas lukaut gut long ol bilip inap paulim tingting bilong yumi na yumi no inap kisim gut tok bilong Jisas long kamap nupela gen.

Ol i Kamap Nupela Gen Bilong Mekim Wok King

Jisas i bin tokim Nikodemus, ol man i “kamap nupela gen . . . [ol] inap i go insait long kingdom bilong God.” (Jon 3:​3-5) Dispela Kingdom em i wanem samting? Long taim bilong Adam, God i tokaut long laik bilong em long kamapim wanpela ‘pikinini’​—⁠em wanpela king bai kamap bihain​—⁠na em bai krungutim het bilong Snek, em Satan. (Stat 3:15; KTH 12:⁠9) Isi isi Baibel i wok long tokaut olsem dispela ‘pikinini’ em Krais Jisas, na em bai stap king long Kingdom, na sampela moa bai stap king wantaim em. (Song 2:​8, 9; Aisaia 9:​6, 7; Daniel 2:44; 7:​13, 14) Dispela Kingdom em i wanpela gavman long heven na em bai stretim dispela tok i bin kamap, na olgeta man bai save, i stret Jehova i stap King, na dispela Kingdom bai kisim bek ol man long kalabus bilong sin na dai.​—⁠Matyu 6:​9, 10.

Na i gat 144,000 manmeri ol bai stap king wantaim Jisas, em God i bin baim bek ol namel long ol manmeri bilong graun. (KTH 5:⁠9, 10; 14:​1-4) God i bin makim sampela long lain bilong Adam bilong kamap “ol manmeri bilong God,” na ol bai stap king wantaim Krais long Kingdom. (Daniel 7:27; 1 Korin 6:2; KTH 3:21; 20:⁠6) Ol i bilip long Krais Jisas, em dispela man i bin tok, ol bai “kamap nupela gen.” (Jon 3:​5-7) Orait, yumi laik save, olsem wanem ol i kamap nupela gen? Na bilong wanem ol i mas mekim olsem?

Ol i bin kisim baptais long wara na kamap disaipel bilong Jisas. Long rot bilong ofa bilong Jisas, God i lusim pinis sin bilong ol na em i kolim ol stretpela man, na ol i kamap pikinini bilong em. (Rom 3:​23-26; 5:​12-21; Kolosi 1:​13, 14) Pol i tokim ol: “Dispela Spirit God i bin givim long yupela . . . i save mekim yupela i kamap pikinini bilong God. Na long strong bilong Holi Spirit yumi save singaut long God olsem, ‘Aba, Papa.’ Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God. . . . Na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis.”​—⁠Rom 8:​15-17.

Ol dispela disaipel bilong Krais ol i bin kamap nupela gen, i olsem nupela laip. Dispela i mekim na nau ol i bilip strong olsem ol bai kisim samting olsem Jisas yet i bin kisim, em wok king long heven. (Luk 12:32; 22:​28-30; 1 Pita 1:23) Aposel Pita i stori long kamap nupela gen na em i tok: “God . . . i gat bikpela sori long yumi, na em i kirapim Jisas Krais long matmat, na long dispela rot God i givim yumi nupela laip. Na dispela nupela laip i strongim yumi long wetim em i inapim tru ol gutpela samting em i laik givim long yumi. Em i makim yumi pinis bilong kisim gutpela laip bilong heven . . . i no inap bagarap. (1 Pita 1:​3, 4) Ol inap kisim dispela nupela laip long heven, long wanem God i kirapim bek ol olsem em i bin mekim long Jisas.​—⁠1 Korin 15:​42-49.

Olsem Wanem Long Graun?

Tasol i no olsem olgeta manmeri i bihainim tok bilong God ol bai kamap nupela gen bilong lusim graun na i go antap long heven. Nogat. Dispela tingting kranki i wankain olsem tingting bilong ol man olsem Filo, em i bin ting, ‘taim yumi stap long bodi bilong yumi, yumi bilong i stap liklik taim tasol na karim planti hevi.’ Tasol taim God i bin wokim graun na olgeta samting long en, ol dispela samting i gutpela tasol na i no gat sampela samting nogut long en.​—⁠Stat 1:31; Lo 32:⁠4.

Taim God i wokim man, em i no laik bai ol man i stap liklik taim tasol long graun na kisim pen na hevi. Krais Jisas wantaim ol man i kamap nupela gen bilong i stap king na pris wantaim em long heven, ol bai tekewe ol dispela samting nogut em pasin bikhet bilong Satan i bin kamapim. (Efesus 1:​8-10) Ol i stap “pikinini bilong Abraham,” olsem na long rot bilong ol, ‘olgeta lain bilong graun bai i kisim blesing.’ (Galesia 3:9; Stat 22:18) Olsem na olgeta man i bihainim tok bilong God ol inap i stap oltaim long paradais long graun, na ol i no ken kisim pen o hevi moa.​—⁠Song 37:​11, 29; KTH 21:​1-4.

Ol Samting God i Mekim Bai Helpim Husat?

Ol samting God i mekim bilong mekim gut long ol man, dispela bai helpim tu ol man i kirap bek long matmat na ol i bilip long ofa bilong Jisas. (Jon 5:​28, 29; Aposel 24:15) Bipo planti bilong ol i no bin kisim save long God na Jisas, olsem na ol i no inap bilip long Jisas. Na ol narapela man bilong kirap bek em ol man olsem Jon Bilong Baptais, em i bin i dai taim Jisas i no i dai yet na opim rot bilong i go long heven. (Matyu 11:11) Na i gat narapela lain tu bai kisim ol blesing​—⁠em ol “planti manmeri tru” bilong olgeta lain, “ol i bin wasim ol klos bilong ol long blut bilong Pikinini Sipsip [Krais Jisas], na ol klos i kamap waitpela.” Ol i givim bel long wok bilong autim tok bilong Kingdom em dispela ol “brata” bilong Jisas i bin kamap nupela gen ol i go pas long mekim, olsem na ol bai abrusim bagarap long pait bilong God long Armagedon na i stap long dispela graun i kamap klinpela gen. (KTH 7:​9-14; 16:​14-16; Matyu 24:14; 25:​31-46) Olsem na God i wokim rot bilong kisim bek planti milion manmeri, tasol ol i no kamap nupela gen bilong mekim wok king wantaim Krais long heven.​—⁠1 Jon 2:​1, 2.

Olsem wanem? Bai yu tu i insait long dispela lain ol bai kisim laip oltaim long paradais long graun? Yu inap sapos yu bilip long ofa bilong Jisas na yu bung wantaim lain Kristen tru na wok wantaim ol long autim tok. Ol bilip kranki bilong ol man i no bin paulim dispela lain Kristen​—⁠ol i stap yet olsem “strongpela pos i karim tok tru.” (1 Timoti 3:15; lukim tu Jon 4:24; 8:​31, 32.) Sapos yu mekim olsem, bai yu inap tingting long kisim gutpela sindaun long bihain, taim ol pikinini bilong God i kamap nupela gen ol i mekim wok king long heven, na olgeta pikinini bilong God long graun bai kamap gutpela olgeta na i stap long paradais long graun. Olsem na taim rot i op yet, yu mas mekim ol samting bambai yu ken kisim laip i stap oltaim long nupela taim.​—⁠Rom 8:​19-21; 2 Pita 3:⁠13.

[Piksa long pes 6]

God i no bin tokim Adam, em bai go i stap oltaim long heven o em bai go long bikpaia na karim pen oltaim, nogat