Yu Ting Ol Man Bilong Mekim Pasin Nogut Inap Senis?

EM BAI nais tru sapos olgeta man i mekim gutpela pasin, a?— Tasol i no gat wanpela man i save mekim gutpela pasin long olgeta taim. Yu save i gat wanem as na yumi olgeta i save mekim pasin nogut long sampela taim, maski yumi laik mekim gutpela pasin?— As bilong dispela em sin i stap pinis long yumi taim mama i karim yumi. Tasol sampela man i save mekim planti pasin i nogut tru. Ol i nolaik tru long ol arapela man na ol i mekim ol samting bilong givim pen na hevi long ol. Yu ting ol inap senis na lain long mekim gutpela pasin?—

Lukim dispela yangpela man long piksa em i was long saket bilong ol man i tromoi ston long Stiven. Nem Hibru bilong dispela man em Sol, tasol nem Rom em Pol. Em i amamas long ol i kilim i dai Stiven, em wanpela disaipel bilong Bikpela Tisa. Yumi ken stori long as na Sol i mekim ol dispela kain pasin nogut.

Sol i insait long wanpela lain lotu bilong Juda ol i kolim Farisi. Ol Farisi i holim Tok Bilong God, tasol ol i strong moa long bihainim tok bilong sampela hetman bilong ol. Dispela i kirapim Sol long mekim ol pasin nogut.

Sol i stap taim ol i holim Stiven long Jerusalem. Ol i bringim Stiven i go long kot we sampela Farisi i mekim wok jas. Maski ol i mekim ol tok nogut long Stiven, em i no pret. Kwiktaim em i strongim bel na autim tok long ol jas long God Jehova na Jisas.

Tasol ol dispela jas i no laikim ol tok ol i harim. Ol i save pinis long planti samting long Jisas. I no longtaim i go pinis ol i bin stretim rot bilong kilim i dai Jisas! Tasol bihain, Jehova i kisim Jisas i go bek long heven. Ol dispela jas i no laik senisim pasin bilong ol, na ol i wok long pait long ol disaipel bilong Jisas.

Ol jas i holimpas Stiven na kisim em i go ausait long taun. Ol i paitim em strong tru na em i pundaun long graun na ol i tromoi ston long em. Na olsem yu ken lukim long piksa, Sol i wok long lukluk i stap. Em i ting i stret long kilim i dai Stiven.

Yu save long as na Sol i gat dispela tingting?— Long laip olgeta bilong em, Sol i bin stap olsem wanpela Farisi, na em i bilip olsem ol tok bilong ol Farisi i stret. Em i ting ol hetman bilong ol Farisi i makim gutpela pasin ol man i ken bihainim, olsem na em i bihainim pasin bilong ol.​—Aposel 7:​54-​60.

Taim ol i kilim pinis Stiven, Sol i mekim wanem?— Em i laik pinisim olgeta disaipel bilong Jisas! Em i go insait stret long haus bilong ol na pulim ol man na meri wantaim i kam ausait, na kalabusim ol. Planti disaipel i mas lusim Jerusalem, tasol ol i no lusim wok bilong autim tok long Jisas.—Aposel 8:​1-4.

Dispela i kirapim Sol long nolaik moa yet long ol disaipel bilong Jisas. Olsem na em i go long Hetpris Kaiafas na kisim tok orait bilong holim ol Kristen long taun Damaskus. Sol i laik bringim ol i go long Jerusalem olsem ol kalabusman na givim strafe long ol. Tasol taim em i raun long rot i go long Damaskus, wanpela narapela kain samting i kamap.

Lait i kamap long heven, na wanpela nek i tok: “Sol, Sol, bilong wanem yu wok long bagarapim mi?” Jisas i stap long heven na em i toktok long Sol! Lait i strong tumas na i mekim Sol i kamap aipas, na ol lain i go wantaim Sol ol i mas holim han bilong em na kisim em i go long Damaskus.

Tripela de bihain, long driman Jisas i kamap long wanpela disaipel bilong em long Damaskus, nem bilong em Ananaias. Jisas i tokim Ananaias long go lukim Sol, na oraitim ai bilong em, na toktok long em. Taim Ananaias i toktok long em, Sol i kisim tok i tru bilong Jisas. Em inap lukluk gen. Laip bilong em i senis olgeta, na em i kamap wanpela gutpela wokman bilong God.—Aposel 9:​1-​22.

Olsem wanem? Yu inap kliagut nau long as na Sol i bin mekim ol pasin nogut?— Em i bin mekim, long wanem, ol i bin lainim em long ol samting i no stret. Em i bihainim ol man i no stap gut long God. Na em i bilong wanpela lain em ol i strong moa long bihainim tingting bilong ol man, na Tok Bilong God nogat. Tasol bilong wanem Sol i senisim pasin bilong em na kirap mekim gutpela pasin, maski ol Farisi i pait yet long God?— Sol i mekim olsem, long wanem, i no olsem em i nolaik tru long tok i tru. Olsem na taim em i kisim save long pasin i stret, em i redi long bihainim.

Yu save bihain Sol i kamap husat?— Yes, ol man i save long em olsem aposel Pol, wanpela aposel bilong Jisas. Na tingim, Pol i raitim planti buk bilong Baibel, winim ol arapela man.

I gat planti man olsem Sol em ol inap senisim pasin bilong ol. Tasol i no isi long mekim olsem, long wanem, i gat wanpela man i wok strong tru long pulim ol man long mekim pasin nogut. Yu save dispela man i husat?— Jisas i bin mekim sampela tok long dispela man taim Jisas i kamap long Sol long rot i go long Damaskus. Jisas i stap long heven na em i tok: ‘Mi bai salim yu i go bilong opim ai bilong ol manmeri, bai ol i ken givim baksait long tudak na kam long lait, na lusim strong bilong Satan na kam long God.’—Aposel 26:​17, 18.

Yes, Satan i laik pulim olgeta man long mekim pasin nogut. Olsem wanem? Sampela taim yu pilim olsem i hatwok long mekim stretpela pasin?— Yumi olgeta i save pilim olsem. Satan i mekim na i hatwok. Tasol i gat narapela samting tu i mekim na sampela taim i hatwok long mekim stretpela pasin. Yu save long dispela samting?— Em sin i stap pinis long yumi taim mama i karim yumi.

Dispela sin i mekim na planti taim i isi moa long yumi mekim rong na i hatwok long mekim stretpela pasin. Olsem na yumi mas mekim wanem?— Yes, yumi mas taitim bun tru long mekim stretpela pasin. Taim yumi mekim olsem, yumi ken bilip tru olsem Jisas, em i laikim tru yumi, em bai helpim yumi.

Taim Jisas i stap long graun, em i laikim tru ol man em bipo ol i bin mekim ol pasin nogut, tasol ol i senisim pasin bilong ol. Em i save olsem i hatwok tru long ol i senisim pasin bilong ol. Olsem: I gat ol meri em ol i bin slip wantaim planti man. Dispela em pasin nogut. Baibel i kolim ol olsem pamukmeri.

Wanpela taim, wanpela meri olsem i harim stori bilong Jisas, na em i kam long Jisas long haus bilong wanpela Farisi. Em i kapsaitim wel long lek bilong Jisas na i yusim gras bilong em bilong draim aiwara bilong em long lek bilong Jisas. Em i sori tru long ol sin bilong em, olsem na Jisas i fogivim em. Tasol Farisi hia i ting i no stret long fogivim ol sin bilong dispela meri.—Luk 7:​36-​50.

Yu save long tok Jisas i bin mekim long sampela Farisi long wanpela narapela taim?— Em i tokim ol: ‘Ol pamukmeri bai go insait long kingdom bilong God paslain long yupela.’ (Matyu 21:31) Jisas i tok olsem, long wanem, ol pamukmeri i bilip long em, na ol i senisim pasin nogut bilong ol. Tasol ol Farisi i wok yet long mekim pasin nogut long ol disaipel bilong Jisas.

Olsem na taim Baibel i soim olsem pasin yumi mekim em i nogut, yumi mas redi long senisim pasin bilong yumi. Na taim yumi kisim save long samting Jehova i laik yumi mas mekim, yumi mas i gat laik tru long mekim. Taim yumi mekim olsem, Jehova bai amamas long yumi na givim laip oltaim long yumi.