Rot Bilong Save Yumi Mas Bihainim Tok Bilong Husat

SAMPELA taim i hatwok long save long yumi mas bihainim tok bilong husat. Ating mama o papa bilong yu i tokim yu long mekim wanpela samting. Tasol wanpela tisa o polis inap tokim yu long mekim narapela samting. Sapos dispela samting i kamap, bai yu bihainim tok bilong husat?—

Pastaim, long Sapta 7 bilong dispela buk, yumi bin ritim Efesus 6:​1-3 long Baibel. Dispela skripsa i tok ol pikinini i mas bihainim tok bilong ol papamama. Em i tok: ‘Yupela i mas bihainim tok bilong papamama bilong yupela na pas wantaim Bikpela.’ Yu save long mining bilong dispela tok “pas wantaim Bikpela”?— Ol papamama i pas wantaim Bikpela ol i save skulim ol pikinini bilong ol long bihainim ol lo bilong God.

Tasol sampela bikpela manmeri ol i no bilip long Jehova. Olsem na bai yu mekim wanem sapos wanpela bilong ol i tokim yu olsem i orait long mekim pasin giaman long tes long skul o kisim nating samting long stua? Yu ting i stret long wanpela pikinini i mekim pasin giaman o stilim samting?—

Tingim, wanpela taim King Nebukatnesar i bin tokim olgeta manmeri long brukim skru long imis gol em i bin sanapim. Tasol Satrak, Mesak, na Abetnego ol i no mekim olsem. Yu save bilong wanem ol i no mekim olsem?— Long wanem, Baibel i tok ol man i mas lotuim Jehova tasol.—Kisim Bek 20:3; Matyu 4:​10.

Bihain long taim Jisas i dai, ol i bringim ol aposel bilong em i go long kaunsil, em kot bilong ol Juda. Hetpris Kaiafas i tok: “Mipela i bin tambuim yupela tru long yupela i no ken autim tok long ol manmeri long nem bilong [Jisas]. Tasol yupela i wok yet long autim tok, na ol manmeri long olgeta hap bilong Jerusalem i harim pinis tok bilong yupela.” Bilong wanem ol aposel i no bihainim tok bilong kaunsil?— Pita i makim maus bilong olgeta aposel na em i bekim tok long Kaiafas olsem: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:​27-​29.

Long dispela taim bipo, ol hetman bilong lotu Juda i gat bikpela namba. Tasol kantri bilong ol i stap aninit long wok bos bilong gavman Rom. Het bilong dispela gavman em Sisar. Maski ol Juda i no laik bai Sisar i bosim ol, gavman Rom i mekim planti gutpela wok bilong helpim ol. Na ol gavman long nau tu ol i save mekim planti gutpela wok bilong helpim ol man. Yu save long sampela bilong ol dispela wok?—

Ol gavman i wokim ol rot bilong ol man i ken raun long en, na ol i baim ol polis na paiaman long lukautim yumi. Na ol inap kamapim tu ol skul bilong ol yangpela na ol haus sik. Gavman i mas lusim mani bilong wokim ol dispela samting. Yu save gavman i kisim mani we bilong mekim ol dispela wok?— Em i kisim mani long ol man. Ol i kolim dispela mani ol man i givim long ol gavman olsem takis.

Taim Bikpela Tisa i bin stap long graun, planti Juda i no laik givim takis long gavman Rom. Olsem na wanpela taim ol pris i baim sampela man long givim wanpela askim long Jisas bilong putim hevi long em. Askim bilong ol i olsem, “Yumi ken givim takis long Sisar, o nogat?” Dispela i wanpela trik askim. Sapos Jisas i tok, ‘Yes, yupela i mas baim takis,’ planti Juda bai i no amamas long dispela tok. Tasol Jisas i no inap tok, ‘Nogat, yupela i no ken baim takis.’ I no stret long tok olsem.

Olsem na Jisas i mekim wanem? Em i tok: “Soim wanpela mani long mi.” Taim ol i kisim wanpela mani i kam long em, Jisas i askim ol: ‘Piksa na nem bilong husat i stap long en?’ Ol i tok: “Bilong Sisar.” Olsem na Jisas i tok: “Orait samting bilong Sisar, em yupela i mas givim long Sisar. Na samting bilong God, em yupela i mas givim long God.”—Luk 20:​19-​26.

I no gat wanpela man inap painim wanpela rong long dispela tok. Sapos Sisar i mekim ol wok bilong helpim ol man, orait i stret ol i yusim mani Sisar i bin wokim bilong baim ol dispela samting. Olsem na long dispela rot, Jisas i soim olsem i stret long givim takis long gavman long ol samting yumi kisim long en.

Orait, ating yu no bikpela yet inap long yu baim takis. Tasol i gat wanpela samting yu mas givim long gavman. Yu save em wanem samting?— Em pasin bilong bihainim ol lo bilong gavman. Baibel i tok: ‘Bihainim tok bilong ol gavman.’ Olsem na God yet i tok yumi mas bihainim ol lo bilong gavman.—Rom 13:​1, 2.

Ating i gat lo i tok yumi no ken tromoi pepa o pipia long rot. Olsem wanem? Yu mas bihainim dispela lo?— Yes, God i laik bai yu bihainim. Na yu ting yu mas bihainim tok bilong ol polis tu?— Gavman i save baim ol polis long lukautim ol manmeri. Pasin bilong bihainim tok bilong ol polis i wankain olsem pasin bilong bihainim tok bilong gavman.

Olsem na sapos yu laik i go long hapsait bilong rot na polis i tok “Wet!” orait yu mas mekim wanem?— Sapos ol arapela i ran i go tasol, yu ting yu tu i mas mekim olsem?— Yu mas wet, maski yu wanpela tasol i wet. God i tokim yu long bihainim tok.

Ating sampela hevi inap kamap long hap yu stap long en, na polis i tok: “No ken raun long rot. No ken go ausait.” Tasol ating yu harim ol man i singaut na yu laik save long ol samting i wok long kamap. Yu ting i stret yu go ausait bilong lukim ol dispela samting?— Yu ting yu bihainim tok bilong “gavman” sapos yu mekim olsem?—

Long planti hap, gavman i wokim ol skul, na baim ol tisa. Olsem na yu ting God i laik bai yu bihainim tok bilong tisa?— Tingim dispela: Gavman i baim tisa long skulim ol man, wankain olsem em i baim ol polis long lukautim ol man. Olsem na taim yu bihainim tok bilong polis o tisa, dispela i olsem yu bihainim tok bilong gavman.

Tasol olsem wanem sapos tisa i tok yu mas lotuim wanpela imis? Bai yu mekim wanem?— Tripela Hibru i no bin brukim skru long imis, maski King Nebukatnesar i tokim ol long mekim. Yu inap tingim bilong wanem ol i no bin mekim dispela samting?— Long wanem, ol i no laik sakim tok bilong God.

Wanpela man bilong raitim stori bilong ol samting i kamap bipo, nem bilong em Will Durant, em i raitim stori bilong ol Kristen bilong pastaim na em i tok, ‘namba wan man ol i stap gut long em i no Sisar.’ Jehova em i namba wan man ol i stap gut long em! Olsem na tingim, God i mas i stap namba wan long laip bilong yumi.

Yumi bihainim tok bilong gavman, long wanem, em samting God i laik yumi mas mekim. Tasol sapos ol i tokim yumi long mekim samting God i tok yumi no ken mekim, yumi mas tok wanem?— Yumi mas mekim wankain tok ol aposel i bin mekim long hetpris: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:​29.