Sapta 15
Bilong i Stap Aninit Long Gavman Bilong God
1, 2. Yumi mas mekim wanem bilong kamap man bilong i stap aninit long gavman bilong God?
YU LAIK i stap oltaim long graun aninit long gavman bilong God? Gavman bilong God bai givim ol gutpela samting long ol man, olsem na ating yu bai tok, ‘Mi laik!’ Tasol yu no ken tok tasol, ‘Mi laik i stap aninit long gavman bilong God.’ Nogat. I gat sampela samting moa yu mas mekim.
2 Olsem: Sapos yu laik i go sindaun olgeta long narapela hap na kamap man bilong dispela hap, orait yu mas mekim ol samting gavman bilong dispela hap i kolim. Tasol pastaim yu mas kisim save long ol dispela samting yu mas mekim. Olsem tasol yu mas kisim save long ol samting God i tok ol man i mas mekim sapos ol i laik i stap aninit long gavman bilong em. Yu mas kisim save long ol dispela samting na yu mas bihainim.
YU MAS KISIM SAVE
3. Wanem wanpela samting yu mas mekim bilong kamap man bilong i stap aninit long gavman bilong God?
3 Wanpela bikpela samting yu mas mekim bambai yu ken i stap aninit long gavman bilong God, em olsem: Yu mas kisim save long “tok ples” bilong en. Na em i stret, long wanem sampela gavman bilong graun tu i tok, man i laik kamap man bilong ples bilong ol em i mas lain long tok ples bilong ol. Orait, ol man i laik i stap aninit long gavman bilong God, ol i mas lain long wanem “tok ples”?
4. Wanem dispela “gutpela tok ples” ol manmeri bilong God i mas lain long en?
4 Lukim dispela tok bilong Jehova long Baibel: “Long dispela taim bai mi givim wanpela gutpela tok ples long ol manmeri, bambai ol i ken kolim nem bilong Jehova na singaut long em, na ol i ken wok gut wantaim long mekim wok bilong em.” (Sefanaia 3:9, NW) Dispela “gutpela tok ples” em tok i tru bilong God i stap long Baibel. Em tok i tru bilong Kingdom o gavman bilong God. Olsem na sapos yu laik i stap aninit long gavman bilong God, yu mas kisim save long Jehova na long Kingdom bilong em na lain long dispela “tok ples.”—Kolosi 1:9, 10; Provep 2:1-5.
5. (a) Yumi mas save long wanem samting bilong gavman bilong God? (b) Yumi mas kisim wanem save bambai yumi inap kisim laip i stap oltaim?
5 Long nau sampela gavman bilong graun i tok, ol man i laik kamap olsem man bilong ples bilong ol, ol i mas save gavman bilong dispela ples i bin kamap olsem wanem na i wok olsem wanem. Olsem tasol sapos yu laik i stap aninit long gavman bilong God yu mas save long wankain samting bilong dispela gavman. Dispela save inap helpim yu long kisim laip i stap oltaim. Jisas i beten long Papa bilong em na em i tok: “Laip i stap gut oltaim em i olsem: Ol i save long yu, yu wanpela tasol yu God tru, na ol i save long Jisas Krais, em yu bin salim i kam.”—Jon 17:3.
6. (a) Ol man i laik i stap aninit long gavman bilong God, ol i mas i gat save inap long bekim wanem ol askim? (b) Yu inap bekim ol dispela askim?
6 Sapos yu lainim pinis sampela tok bilong dispela buk, ating yu kisim pinis sampela save long kingdom o gavman bilong God. Na ating yu inap bekim ol dispela askim: Wanem namba wan taim God i tokaut long laik bilong em long kamapim wanpela Kingdom o gavman? Yu inap kolim nem bilong sampela wokboi bilong God long bipo em ol i gat tingting long i stap long graun aninit long dispela gavman? I gat hamas manmeri ol bai stap king long dispela gavman bilong God? Bai ol i stap we na mekim wok king? God i makim husat pastaim bilong ol i kamap king long gavman bilong em? Olsem wanem yumi save Jisas bai mekim gutpela wok king? Tru ating yu inap bekim ol dispela askim, tasol yu no ken kisim save tasol long gavman bilong God. Sapos yu laik i stap aninit long dispela gavman, i gat sampela samting moa yu mas mekim.
YU MAS MEKIM STRETPELA PASIN
7. Ol gavman bilong graun i putim wanem ol narapela narapela lo long ol manmeri i laik kamap lain bilong ol?
7 Ol gavman bilong nau i save putim lo long pasin ol man i mas mekim sapos ol i laik kamap lain bilong ol. Olsem: Ating ol i tok, man i mas i gat wanpela meri tasol, na meri i mas i gat wanpela man tasol. Tasol sampela gavman i gat narapela kain lo. Ol i orait long ol man bilong ples bilong ol i ken kisim planti meri. Orait, ol manmeri i laik i stap aninit long gavman bilong God, ol i mas bihainim wanem kain pasin na lo? God i putim wanem lo long marit?
8. (a) God i putim wanem lo long marit? (b) Man o meri i mekim wanem na em i bagarapim marit? God i tok wanem long dispela samting?
8 God i givim wanpela meri tasol long Adam na i makim lo bilong em long marit. Em i tok: “Man i save lusim papamama na i pas wantaim meri bilong em, na tupela i kamap wanpela.” (Jenesis 2:21-24) Jisas i tok, dispela lo i stret long ol Kristen i mas bihainim. (Matyu 19:4-6) Taim man na meri i marit, tupela i “kamap wanpela.” Orait, sapos wanpela i pamuk em i bagarapim marit. God i tok em bai bekim pe nogut long ol manmeri i mekim pasin pamuk na bagarapim marit.—Hibru 13:4; Malakai 3:5.
9. (a) God i ting olsem wanem long ol manmeri i slip wantaim na traim marit, tasol ol i no marit tru? (b) Pasin pamuk i olsem man o meri i mekim wanem?
9 Tasol planti man na meri ol i sindaun wantaim, olsem marit nating; ol i no marit tru. God i no laikim dispela pasin; em i no laik bai ol man na meri i traim marit. Olsem na sapos man na meri i sindaun wantaim na tupela i no marit tru, ol i kalapim lo bilong God na ol i gat rong, long wanem God yet i makim lo bilong marit. Ol i mekim pasin pamuk. Pasin pamuk i olsem man i slip wantaim wanpela meri em i no marit tru long em, o meri i slip wantaim wanpela man em i no marit tru long em. Na Baibel i tok: “Laik bilong God em i olsem: . . . Yupela i mas abrusim pasin pamuk.” (1 Tesalonaika 4:3-5) Olsem na sapos man o meri singel i mekim maritpasin, em i gat rong.
10. Long nau planti man na meri i mekim wanem ol narapela kain pasin na dispela tu i brukim lo bilong God?
10 Long nau planti man i pilai nogut long narapela man, na meri i pilai nogut long meri; ol i save mekim pasin olsem ol i marit. Dispela pasin em pasin bilong Sodom. Baibel i tok dispela pasin ol i mekim i gat rong, em pasin “i gat sem.” (Rom 1:26, 27) Na tu, sapos man o meri i pilai nogut wantaim animal, em i kalapim lo bilong God na em i gat rong. (Levitikas 18:23) Man o meri em i laik i stap aninit long gavman bilong God, em i mas klia long ol dispela pasin i no stret.
11. (a) God i ting olsem wanem long dring bia o wain samting? (b) Ol man i laik i stap aninit long gavman bilong God ol i mas klia long wanem ol pasin i save bagarapim skin bilong ol man?
11 Man i dring wain o bia samting inap long skel bilong em, em i no brukim lo bilong God. Baibel i tok, liklik wain inap helpim skin bilong man. (Sam 104:15; 1 Timoti 5:23) Tasol man i dring planti na i spak, o em i pati wantaim ol manmeri i dring na mekim pasin i no stret, em i brukim lo bilong God. (Efesas 5:18; 1 Pita 4:3, 4) Na planti manmeri ol i kisim ol strongpela marasin tu, olsem drak, bilong mekim ol i “spak.” Na bilong painim amamas ol i save kisim marasin maruana o tabak na ol i smok, na sampela ol i kaikai buai na daka. Tasol ol dispela pasin i no klinpela pasin na i bagarapim skin bilong ol. Olsem na sapos yu laik i stap aninit long gavman bilong God, yu mas klia long ol dispela samting nogut i save bagarapim skin bilong man.—2 Korin 7:1.
12. (a) I gat wanem sampela pasin i no stret na i kalapim lo bilong God? (b) Sapos wanpela man i mekim ol dispela kain pasin em i mas mekim wanem na bai God i ken laikim em?
12 Yumi save, ol gavman bilong graun i no laikim ol man nogut i kamap man bilong ples bilong ol. Na Jehova i gat strongpela lo moa yet long dispela samting. Em i tok yumi mas “wokabaut stret long olgeta taim.” (Hibru 13:18) Ol manmeri i sakim lo bilong God, em i no ken larim ol i stap aninit long kingdom bilong em. Long nau planti man i giaman long wokabaut stret na ol i save kalapim planti lo. Tasol ol i no inap giamanim God; God inap lukim olgeta samting. (Hibru 4:13; Provep 15:3; Galesia 6:7, 8) Olsem na ol manmeri i mekim tok giaman o stil o brukim narapela lo bilong God, Jehova i no ken orait long ol i kamap man bilong i stap aninit long gavman bilong Em. (Efesas 4:25, 28; Revelesen 21:8) Tasol God i save isi long ol man na lusim tingting long rong bilong ol. Olsem na sapos wanpela man i lusim ol pasin nogut na em i kirap bihainim gutpela pasin, God bai orait long em.—Aisaia 55:7.
13. Ol boi bilong God i mas ting olsem wanem long lo bilong ol gavman bilong graun?
13 Tasol olsem wanem long ol gavman bilong graun? Yumi mas bihainim lo bilong ol? God i tok, ol boi bilong em i mas aninit long dispela “ol gavman.” Yumi mas givim takis long gavman, maski em i bikpela takis na yumi ting wok ol i mekim long dispela mani em i no stret. Na yumi mas bihainim ol lo bilong gavman. (Rom 13:1, 7; Taitas 3:1) Tasol sapos i gat wanpela lo na taim man i bihainim dispela lo em i brukim lo bilong God, orait yumi ken mekim olsem Pita na ol narapela aposel i tok: “Mipela mas bihainim tok bilong God tasol. Mipela no ken bihainim tok bilong ol man.”—Aposel 5:29.
14. Sapos yumi bihainim tingting bilong God long laip bilong man, bai yumi mekim wanem?
14 God i tingim tru laip bilong ol man. Ol manmeri i laik i stap aninit long gavman bilong em, ol i mas save long dispela samting. Tru yumi save, sapos man i kilim i dai wanpela man, em i brukim lo bilong God. Tasol sapos man i bel nogut long wanpela man na em i no lusim dispela pasin, orait em tu i no ken i stap aninit long gavman bilong God. (1 Jon 3:15) Olsem na em i bikpela samting, yumi mas bihainim tok bilong Baibel long Aisaia 2:4 i tok, yumi no ken pait na kilim i dai ol narapela man. Na pikinini i stap yet long bel bilong mama, Jehova i tingim laip bilong em tu i bikpela samting. (Eksodas 21:22, 23; Sam 127:3) Tasol planti planti meri i save rausim bel. Ol i kilim i dai ol dispela pikinini na ol i brukim lo bilong God, long wanem pikinini i stap long bel bilong mama em i gat laip na yumi no ken bagarapim em.
15. Olgeta manmeri i stap aninit long Kingdom ol i mas bihainim wanem ol tok bilong dispela King em God i makim?
15 Ol manmeri i laik i stap aninit long gavman bilong God, ol i mas abrusim pasin nogut, na ol i mas wok strong long mekim gutpela pasin long ol narapela man na helpim ol. Ol i mas bihainim lo bilong God em King Krais Jisas i givim long yumi, olsem: “Olgeta pasin yupela i laikim ol manmeri i mekim long yupela, dispela pasin tasol yupela i mas mekim long ol.” (Matyu 7:12) Krais i makim gutpela pasin sori yumi mas mekim long narapela man. Em i dai tu bilong helpim ol manmeri. Em i tokim ol disaipel: “Mi bin laikim yupela tru. Olsem tasol yupela i mas laikim tru ol brata.” (Jon 13:34; 1 Jon 3:16) Ol manmeri i stap aninit long kingdom bilong God ol bai mekim dispela kain pasin bilong sori, olsem na ol bai stap amamas tru.—Jems 2:8.
16, 17. (a) I gat wanem gutpela as na yumi laik senisim pasin na mekim ol samting God i tok yumi mas mekim? (b) Olsem wanem yumi ken save, yumi inap senisim pasin bilong yumi?
16 Baibel i tok, ol manmeri i mas senisim pasin bilong ol bambai ol i ken mekim ol samting God i kolim bilong man i laik i stap aninit long gavman bilong Em. (Efesas 4:20-24) Olsem wanem long yu? Yu wok long senisim pasin bilong yu? Maski i hatwok, tasol yu laik mekim olsem, a? Long wanem i no olsem bai yu stap amamas liklik taim tasol aninit long wanpela gavman bilong graun. Nogat. Bai yu kisim laip na i stap oltaim na i stap gutpela olgeta long gutpela ples paradais long graun aninit long wanpela gavman God yet i bosim!
17 Na long nau tu, sapos yu mekim ol samting God i tok yu mas mekim, bai yu stap amamas. Tasol ating yu mas senisim sampela pasin bilong yu pastaim. Planti planti manmeri bipo pasin bilong ol i sikrapim nogut bel bilong narapela man o ol i mangalim planti samting, tasol ol i senisim pasin bilong ol. Na sampela manmeri bipo ol i pamuk, o bagarapim marit, o mekim pasin bilong Sodom, o spak, o kilim man i dai, o stil, o kisim strongpela marasin olsem drak, o ol i smok, o kaikai buai, tasol ol i lusim ol dispela pasin. Ol i wok strong na God i helpim ol na ol i lusim. (1 Korin 6:9-11; Kolosi 3:5-9) Olsem na sapos yu hatwok long senisim sampela pasin long yu, orait yu no ken les. Yu inap senisim!
STAP GUT LONG GAVMAN BILONG GOD
18. God i laik bai yumi mekim wanem bilong kamapim bel bilong yumi, yumi givim bel long kingdom bilong em?
18 God Jehova i tok ol manmeri bilong em ol i mas givim bel long Kingdom o gavman bilong em na i stap gut long en. Ol gavman bilong graun tu i tok lain bilong ol i mas mekim olsem long ol. Tasol God i laik bai yumi mekim wanem na yumi stap gut long gavman bilong em? Yu ting em i laik bai yumi holim gan samting na mekim pait bilong helpim kingdom bilong em? Nogat. Yumi mas bihainim Jisas wantaim ol Kristen bilong pastaim na yumi mas autim tok long kingdom bilong God na stap gut long dispela tok. (Matyu 4:17; 10:5-7; 24:14) Jehova i laik bai olgeta manmeri i ken save long kingdom bilong em na olsem wanem dispela kingdom inap stretim ol hevi. Olsem wanem? Yu bin tokim ol wanblut na wantok samting long ol tok bilong Baibel yu lain pinis long en? God i laik bai yu mekim olsem.—Rom 10:10; 1 Pita 3:15.
19. (a) Taim yumi toktok wantaim ol man long kingdom bilong God, olsem wanem yumi save sampela bai birua long yumi? (b) I gat wanem ol askim yu mas tingim?
19 Krais wantaim ol Kristen bilong pastaim ol i mas strongim bel na autim tok bilong Kingdom, long wanem planti man i birua long ol. (Aposel 5:41, 42) Na i wankain tu long nau. Seten i bosim dispela graun na em i no laik bai yumi autim gutpela tok bilong Kingdom. Olsem na yu mas tingim ol dispela askim: Yu yet yu laik mekim wanem? Bai yu givim bel tru long kingdom bilong God na helpim wok bilong en? Pinis i klostu na God i laik bai yumi mekim bikpela wok long autim tok bilong Kingdom long dispela taim. Bai yu insait long dispela bikpela wok?
[Piksa long pes 128]
Ol manmeri i laik i stap aninit long gavman bilong God ol i mas kisim save long dispela gavman
[Ol Piksa long pes 131]
Ol manmeri i laik i stap aninit long gavman bilong God, ol i mas klia long ol pasin na wok God i tambuim
[Piksa long pes 133]
Ol manmeri i stap aninit long gavman bilong God, ol i mas tokim ol narapela man long dispela gavman