Tok Bilong God i Gat Laip
Kingdom Bilong God Em Wanem Samting?
TAIM Krais Jisas i stap long graun nambawan bikpela wok bilong em em bilong autim tok Bilong Kingdom bilong God. Em i tok: “Mi mas telimautim gutnius bilong Kingdom bilong God. . . . God i salim mi na mi kam bilong mekim dispela wok.” (Luk 4:43) Olsem yu lukim long piksa hia, Jisas i salim ol disaipel bilong em i go mekim dispela wok bilong autim tok bilong Kingdom. (Matyu 10:1, 7) Na em i lainim ol disaipel long beten long God, olsem: “Kingdom bilong yu i mas i kam. Mipela i mas lainim laik bilong yu long graun olsem ol i bihainim long heven.”—Matyu 6:10.
Dispela Kingdom bilong God em wanem samting, na bilong wanem em i bikpela samting?
Wanpela king em i olsem bos bilong ples. Em i wanpela king, olsem na ol i save kolim gavman bilong em olsem wanpela kingdom. Kingdom bilong God tu em i wanpela gavman. Baibel i stori long en, olsem: “Wanpela meri i karim pikinini em bilong yumi, ol i givim wanpela pikinini man long yumi; em bai holim wok gavman na ol bai kolim nem bilong em olsem . . . King bilong Gutaim. Gavman bilong em bai go bikpela na gutaim i no ken pinis.”—Aisaia 9:6, 7, Baibel Authorized Version.
Dispela “pikinini” em Pikinini bilong Bikpela King God Jehova. Em Krais Jisas. God i makim em bilong i stap king bilong Kingdom o gavman bilong Em. Sapos yumi skelim ol samting i kamap taim ol birua i laik kilim i dai, Jisas yumi ken save, Kingdom bilong em i bikpela samting taim Jisas i stap long graun.
Ol i putim Jisas long kot na sutim tok long em, olsem: “Mipela i lukim dispela man em i paulim pasin bilong lain bilong mipela. Em i tambuim mipela long givim takis long Sisa. Na em i save tok, ‘Mi yet mi Krais. Mi King.’ Pailat i harim dispela tok na em i askim Jisas: “Yu king bilong ol Juda, a?”—Luk 23:1-3.
Jisas i no bekim stret dispela askim bilong Pailat, em i abrusim liklik na em i tok: “Kingdom bilong mi em i no bilong dispela graun.” (Jon 18:36) Jisas i bekim tok olsem, long wanem kingdom bilong em i no ken kamap long graun. God i makim em bilong i stap king long heven.
Aisaia i tok, dispela gavman bilong God bai mekim gutaim i kamap na i no ken pinis. Olsem na nau yu save bilong wanem dispela gavman o Kingdom i bikpela samting, a? I no gat wanpela gavman bilong dispela graun em inap kamapim gutaim long graun bilong i stap oltaim. Kingdom bilong God tasol inap mekim. Taim Jisas i stap long graun em i mekim bikpela wok bilong tokim ol manmeri long ol gutpela tok i tru bilong Kingdom bilong God. Em nambawan bikpela tok em i autim long ol man. Nau tu dispela Kingdom em i nambawan bikpela samting ol man i mas tingim.