Ol Profet Giaman Long Nau
JEREMAIA i bin mekim wok olsem profet bilong God long Jerusalem, na long taim bilong em, ol manmeri bilong Jerusalem i lotuim ol god giaman na mekim pasin pamuk na stil na kilim man i dai. (Jeremaia 7:8-11) I gat sampela profet moa i stap long dispela taim, tasol klostu olgeta i tingim ol yet tasol na ol i mekim ol pasin nogut. Ol i mekim wanem ol pasin? Jehova i tok: “Ol pris na ol profet tu i save giamanim ol manmeri. Ol manmeri bilong mi i gat ol bikpela sua, tasol ol pris na profet i lukim ol sua olsem samting nating, na ol i no pasim gut. Ol i save tokim ol manmeri olsem, ‘Yupela i no ken wari. Yumi stap gut.’ Tasol nogat. Ol i no stap gut.”—Jeremaia 6:13, 14.
Pasin bilong giaman na stil samting i pulap long Jerusalem, tasol ol dispela profet giaman i laik mekim na bai ol manmeri i ting olgeta samting i stap gutpela, na ol i stap gut long ai bilong God; tasol nogat. Strafe bilong God bai painim ol, olsem Jeremaia i tokim ol. Taim ol soldia bilong Babilon i kam bagarapim Jerusalem long yia 607 paslain long Krais, na ol i bagarapim tempel, na kilim i dai planti manmeri bilong Jerusalem na kisim sampela i go kalabus longwe long hap bilong Babilon, ol man i save Jeremaia em i wanpela profet i save tok tru, na ol narapela profet i giaman tasol. Wan wan tasol ol i stap long Jerusalem, na ol i ranawe i go long Isip.—Jeremaia 39:6-9; 43:4-7.
Ol dispela profet giaman i bin mekim wanem? “Olsem na harim. Mi Bikpela, mi tok stret. Mi birua long ol profet i save stilim tok bilong ol wanwok bilong ol na i tok ol i bin kisim dispela tok long mi yet.” (Jeremaia 23:30) Ol profet giaman i bin stilim tok bilong God, long wanem ol i no kamapim klia ol tok bilong God—ol i kirapim ol manmeri long bihainim ol tok giaman na ol i no givim bel long toksave i kam long God. Ol dispela profet giaman i no tokim ol manmeri long ol strongpela wok bilong God, tasol ol i kamapim ol tingting bilong ol yet, na autim ol tok em ol manmeri i laik harim. Tasol tok Jeremaia i autim i kam long God, na sapos ol Israel i bin harim na bihainim tok bilong Jeremaia, ol i no inap kisim bagarap. Ol dispela profet giaman i bin ‘stilim tok bilong God,’ na ol manmeri i bihainim tok bilong ol, ol i bin bagarap. Dispela samting i wankain olsem ol samting ol bos bilong lotu i bin mekim long taim bilong Jisas, em Jisas i tok long ol olsem: “Ol i olsem ol aipas, na ol i laik soim rot long ol arapela. Tasol sapos aipas i soim rot long narapela aipas, orait tupela wantaim bai i pundaun long hul.”—Aposel 2:11; Matyu 15:14.
Long taim bilong Jeremaia i gat ol profet giaman, na long taim bilong yumi tu, i gat sampela man i tok ol i mekim wok bilong God bilong Baibel; tasol ol tu i stilim, olsem paulim, tok bilong God, long wanem, tok ol i autim i kirapim ol man long bihainim ol narapela tok, na ol i no bihainim tok bilong God long Baibel. Ol i mekim olsem wanem? Bai yumi stori long wanpela as bilip bilong Baibel, em tok bilong Kingdom, na dispela bai helpim yumi long kisim save long bekim bilong dispela askim.
Kingdom Em i Wanem Samting Tru?
Kingdom bilong God em i namba wan bikpela samting Jisas i bin lainim ol man long en, na stori bilong Kingdom i stap planti taim long hap bilong Matyu, Mak, Luk, Jon long Baibel, winim 100 taim. Taim Jisas i kirap mekim wok autim tok, em i tok: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” Na em i lainim ol disaipel bilong em long beten olsem: “Kingdom bilong yu i mas i kam.”—Luk 4:43; 11:2.
Orait, Kingdom em i wanem samting? Wanpela buk (The New Thayer’s Greek English Lexicon) i kamapim insait bilong dispela tok “kingdom” long Baibel, na i tok em i makim “namba bilong king” na “hap em king i bosim.” Olsem na dispela tok i helpim yumi long save, Kingdom bilong God em i wanpela gavman tru na i gat wanpela King i bosim. Olsem wanem? Dispela tok i stret?
Yes, dispela tok i stret, na King bilong dispela Kingdom em i Krais Jisas tasol. Taim Maria i no karim yet Jisas, ensel Gebriel i tokim em olsem: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit.” (Luk 1:32) Jisas bai mekim wok King na bosim wanpela gavman. Na tok profet bilong Aisaia tu i helpim yumi long save, Kingdom em i wanpela gavman tru; Aisaia i tok: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, . . . Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.”—Aisaia 9:6, 7.
Jisas bai stap we na mekim wok king? Ating long Jerusalem? Nogat. Daniel i driman na em i lukim Jisas i stap long heven na em i kisim wok king. (Daniel 7:13, 14) Dispela i stret wantaim tok Jisas i mekim long Kingdom. Taim Jisas i stori long Kingdom, planti taim em i kolim olsem “Kingdom bilong heven.” (Matyu 10:7; 11:11, 12) Na dispela i stret wantaim tok Jisas i mekim taim em i kot long ai bilong Pailat, em i tok: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda. Tasol kingdom bilong mi em i no bilong dispela graun.” (Jon 18:36) Olsem wanem? Pris o pasto bilong yu i bin lainim yu olsem Kingdom bilong Jisas em i wanpela gavman tru na em i mekim wok long heven? O em i lainim yu olsem Kingdom i stap long bel bilong yu? Sapos em i bin lainim yu olsem Kingdom i stap long bel bilong yu, em i bin giamanim yu na em i stilim o paulim tok bilong God.
Olsem wanem long Kingdom bilong God na ol narapela narapela kain gavman i stap long graun? Kingdom em i samting bilong ol dispela gavman? Wanpela buk i kamapim tok bilong Martin Luter, na i tok dispela man i stori long Kingdom na i tok: ‘Yumi inap givim nem olsem kingdom bilong God long ol gavman bilong graun.’ (Buk The Encyclopedia of Religion, em Mircea Eliade i bin stretim tok bilong en.) Sampela i tok, long strong bilong ol yet, ol inap mekim ol gavman bilong graun i kamap olsem Kingdom bilong God. Long yia 1983, Bikpela Bung Bilong Ol Misin i tok: “Taim yumi mekim sampela samting bilong kamapim klia laik bilong yumi long lukim gutaim i kamap, Spirit bilong God inap mekim wok long ol dispela samting yumi mekim na i no gat strong, bilong stretim ol kingdom bilong dispela graun na mekim ol i kamap olsem kingdom bilong God.”
Tasol taim Jisas i lainim ol disaipel bilong em long mekim Beten Bilong Bikpela, em i lainim ol long beten askim God long Kingdom bilong em i mas i kam, na bihain em i tok ol i mas beten askim God long ol i mas “bihainim laik bilong [God] long graun olsem ol i save bihainim long heven.” (Matyu 6:10) Olsem na maski ol man i bihainim laik bilong God, dispela samting i no inap mekim na Kingdom bilong God i kamap. Nogat. Tasol Kingdom bilong God i kirapim ol man long bihainim laik bilong God. Dispela samting i kamap olsem wanem?
Wanpela tok profet bilong Daniel, long sapta 2 na ves 44, i tok: “Taim ol dispela king [ol gavman bilong man long taim bilong pinis] i stap yet God bai i kirapim wanpela kingdom na dispela kingdom bai i stap oltaim oltaim. . . . Em bai i daunim ol na bagarapim ol arapela king.” Nau yumi ken save bilong wanem Jisas i tok Kingdom bilong em i no bilong dispela graun! Dispela Kingdom bilong Jisas bai bagarapim na pinisim ol gavman bilong graun na Kingdom yet bai bosim ol manmeri bilong graun. God yet i tingting na kamapim dispela gavman, olsem na dispela gavman bai kirapim ol manmeri long bihainim laik bilong God.
Taim yumi kisim save long man i bosim dispela graun, nau yumi inap save bilong wanem Kingdom bai mekim dispela samting. Aposel Jon i tok: “Dispela graun olgeta em i stap aninit long strong bilong Satan.” (1 Jon 5:19) Na Pol i tok Satan em i “god bilong dispela graun.” (2 Korin 4:4) Ol samting long dispela graun em Satan i bos bilong en, ol i no inap tru long mekim wok bilong Kingdom bilong God.
Olsem na nau yumi save bilong wanem Jisas i no bin insait long ol wok politik. Taim ol Juda i laik mekim em i kamap king bilong ol, em i abrusim ol na i go. (Jon 6:15) Olsem yumi stori pinis, Jisas i bin tokim Pailat: “Kingdom bilong mi em i no bilong dispela graun.” Na em i stori long ol disaipel bilong em na i tok: “Ol i no bilong dispela graun, olsem mi yet mi no bilong dispela graun.” (Jon 17:16) Olsem na taim ol pris pasto i tokim lain bilong ol, sapos ol i stretim ol samting bilong dispela graun bai ol inap hariapim Kingdom bilong God, ol dispela pris pasto i profet giaman. Tok bilong ol i mekim, na ol manmeri i no pilim strong bilong tok tru bilong Baibel.
Bilong Wanem Em i Bikpela Samting?
Ating ol dispela tok em i stori nating tasol, a? Nogat tru. Planti man i bin kisim tingting kranki long Kingdom bilong God. Wanpela buk bilong ol Katolik (Théo) i tok: ‘Lain bilong God i wokabaut i go long Kingdom bilong God. Taim Krais i stap long graun em i kirapim ol long tingim dispela samting. Misin em i pikinini bilong dispela Kingdom.’ Namel long yia 470 na 1450 ol man i bilip olsem Misin Katolik na Kingdom bilong God i wok wantaim, na dispela samting i mekim na Misin Katolik i gat bikpela strong. Na long nau tu, ol bikman bilong ol lotu i strong long stiaim wok bilong ol gavman bambai ol samting i kamap olsem ol i laikim, olsem na ol i wok gut wantaim sampela lain politik na sakim sampela.
Wanpela man i kamapim narapela tingting em planti man i bihainim long nau, em i tok: ‘Ol manmeri i mas pait bilong kamapim kingdom, na ol i mas bihainim pasin bilong Jisas na Gandhi na tupela brata nem bilong ol Berrigan, em ol i bin kirapim sampela lain bilong ol long mekim olsem.’ Ol pris pasto i insait long ol wok politik na ol i lainim ol man olsem dispela em i rot bilong kamapim Kingdom bilong God, na ol i no tingim wok tru bilong Kingdom. Sampela i bihainim dispela tingting kranki na ol i save insait long ol pait bilong daunim gavman. Tasol ol dispela kain pasin i no stret wantaim tok bilong Baibel i tok Kingdom i no bilong dispela graun. Jisas i tok ol disaipel tru bilong em ol i no bilong dispela graun, tasol taim ol pris pasto i insait long wok politik, ol i insait tru long ol samting bilong dispela graun. Ol man i lainim narapela man long ol i mas pait bilong kamapim Kingdom bilong God, ol i profet giaman. Ol i stilim o haitim tok bilong God bambai ol manmeri i no inap kisim save long en.
Sapos ol pris pasto i lainim ol manmeri long ol tok tru i stap long Baibel, ol manmeri bai save, Kingdom bilong God bai stretim ol hevi—olsem hevi bilong man i stap rabis, na sik, na narapela lain i daunim narapela lain, na ol kain hevi olsem. Tasol Kingdom bai mekim dispela samting long taim God i makim na long pasin em God i makim pinis. Bai Kingdom i no mekim wok long ol kain kain wok politik na ol nupela kain gavman, long wanem, taim Kingdom i kirap mekim wok, em bai pinisim olgeta kain wok politik. Sapos ol pris pasto i profet tru, bai ol i lainim ol manmeri long ol samting ol i mas mekim taim ol i wet long Kingdom i kamapim laik bilong God. Sapos ol i kisim save long tok bilong God, dispela samting bai helpim ol long karim ol hevi bilong ol.
Na bai ol i helpim ol manmeri long save, Baibel i bin tok profet long pasin bilong graun bai i go nogut, na dispela samting i makim olsem Kingdom bilong God i kam klostu. Tru tumas, klostu nau bai Kingdom bilong God i rausim ol wok politik i stap long graun na stretim ol samting. Em gutpela samting tru!—Matyu 24:21, 22, 36-39; 2 Pita 3:7; Kamapim Tok Hait 19:11-21.
Taim Kingdom Bilong God i Bosim Graun
Taim Kingdom bilong God i bosim graun, olsem wanem long ol manmeri? Taim dispela samting i kamap, long olgeta moningtaim, taim yu kirap bai yu gat strong long mekim wok. Nogat wanpela man i gat sik o i dai. Na ol manmeri em yu laikim tumas ol na ol i dai pinis, ol bai kirap bek. (Aisaia 35:5, 6; Jon 5:28, 29) Bai i no gat hevi moa long mani samting. Bai yu gat haus bilong yu yet na planti hap graun bilong wokim gaden na bai famili bilong yu i no ken sot long kaikai. (Aisaia 65:21-23) Yu inap wokabaut long san o long nait na yu no ken pret long bagarap bai painim yu. I no gat pait moa—no gat wanpela samting bilong mekim pretim yu. Olgeta man i tingting tasol long mekim gut long yu. Ol man nogut i no i stap moa. Narapela i sori long narapela na bihainim stretpela pasin. Yu laik i stap long kain taim olsem? Kingdom bai kamapim kain gutpela sindaun olsem.—Buk Song 37:10, 11; 85:10-13; Maika 4:3, 4.
Yu ting dispela samting em i wanpela driman nating? Nogat. Sapos yu kaunim ol hap tok bilong Baibel mipela raitim long paragraf paslain long dispela, bai yu save, God i tok promis pinis long dispela samting i mas kamap. Sapos yu no bin save long ol samting Kingdom bilong God bai mekim bilong helpim ol manmeri, orait yu ken save, wanpela man i bin stilim o paulim tok bilong God bambai yu no inap kisim save long en.
Tasol yu inap kisim save long Kingdom. Jisas i tok long taim bilong yumi, “bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Dispela nius nau yu kaunim, em tu i kamapim tok bilong Kingdom long ol man. Mipela laik kirapim yupela long tingim dispela tok, nogut ol profet giaman i paulim tingting bilong yu na giamanim yu. Mipela laik bai yu skelim gut tok bilong Baibel, bambai yu inap save Kingdom bilong God em i wanem samting tru na em bai mekim wanem ol wok. Taim yu kisim pinis save, yu mas daun long dispela Kingdom, long wanem Nambawan Wasman, em God Jehova, em i putim dispela Kingdom bilong helpim yumi. Dispela samting tasol inap helpim yumi—no gat narapela rot.
[Piksa long pes 5]
Luter i tok ol gavman bilong graun ol i olsem Kingdom bilong God
[Kredit Lain]
Courtesy of the Trustees of the British Museum
[Piksa long pes 7]
Jehova em i gutpela Wasman, na long rot bilong Kingdom, em bai kamapim ol gutpela samting em gavman bilong man i no inap kamapim