Ol i Lusim Lotu Bilong Ol Tumbuna na Bihainim Tok i Tru Bilong Baibel
YU LAIK i go wantaim wanpela wasman sekit na meri bilong em taim ol i go long ol ailan ol i kolim San Blas Ailan? Ol dispela ailan i stap long Solwara Karibian klostu long nambis bilong Panama na ol inap olsem 300 samting. Gutpela waitpela wesan i stap long nambis bilong ol dispela ailan na ol kokonas i pulap long ol dispela ailan. Wanpela lain ol i kolim Kuna Indian ol i stap long ol dispela ailan. Ol i man bilong pren gut wantaim ol narapela man na ol i save singautim ol man i go long haus bilong ol.
Ol Kuna i gat lotu bilong ol yet, em lotu bilong ol tumbuna. Tasol ol manmeri bilong kain kain misin ol i bin i go lukim ol Kuna. Ol i bin tokim ol long ol kain kain tingting na bilip bilong ol. Olsem na planti Kuna ol i save askim olsem: ‘Husat ol i Kristen tru?’ Ol Witnes Bilong Jehova i save kolim tok bilong Baibel na bekim dispela askim bilong ol na sampela Kuna ol i laikim dispela tok na ol i bilip long tok i tru bilong Baibel.
Ol i Kirap Bihainim Tok i Tru Bilong Baibel
Wanpela Kuna i kisim save long tok i tru bilong Baibel taim em i stap long skul. Nem bilong em Ramón. Wanpela pren bilong em i bin givim wanpela buk bilong Sosaiti Was Taua long em, nem bilong en long tok Inglis “Things in Which It Is Impossible for God to Lie.” Em i kaunim dispela buk na em i laikim ol tok bilong en na em i laik kisim sampela save moa. Olsem na Ramón i raitim pas i go long namba tu ofis bilong Sosaiti Was Taua long Panama na tokim ol long salim sampela buk moa long em. Wanpela mun bihain ol i kisim narapela pas long em i tok long salim sampela buk moa. Bihain ol i kisim namba tri pas bilong em, olsem na ol brata long ofis i tokim wanpela wasman sekit long i go lukim Ramón wantaim pikinini bilong brata bilong Ramón, nem bilong em Rogelio. Ol i singautim tupela i go long wanpela kibung sekit bilong ol Witnes long Panama Siti na tupela i amamas tru long ol samting ol i lukim long dispela kibung na ol tok ol i harim. Na tupela i amamas tru, long wanem ol i kisim save olsem wanpela kasen-brata bilong ol em i stap long biktaun em i wanpela Witnes bilong Jehova, nem bilong em Julio. Nau tripela wantaim i baptais pinis na ol i wok olsem painia spesel, olsem long olgeta de ol i autim tok bilong Kingdom.—Matyu 24:14.
Mipela i Go long Ol Dispela Ailan
Orait, nau yu ken i kam wantaim mipela. Mipela i laik kisim gutpela tok bilong Kingdom i go long ol dispela ailan. Mipela kalap long dingi i gat mota. Mipela lusim dingi long sua na wokabaut long lek i go long haus bung bilong ol. Mipela mas toktok wantaim hetman (zahila) bilong ol Kuna pastaim. Sapos em i no orait long mipela, mipela i no ken i go long haus bilong ol Kuna wan wan na toktok wantaim ol. Ramón i toktok wantaim hetman long tok ples Kuna na em i orait long mipela i go toktok wantaim ol manmeri bilong dispela ples.
Mipela lukim bilas bilong ol meri Kuna, em i gutpela tru. Laplap bilong het na bilong dres i gat kain kain kala. Blaus (mola) bilong ol i gat piksa bilong ol animal na pisin na pis na bataplai samting long en. Planti meri ol i save pasim bilas gol long nus na long yau, na ol i pasim bilas gol o silva long nek. Long lek na long han i gat paspas ol i bin wokim long bis.
Ol meri i save mekim ol wok long haus, tasol ol i save tru long i go long bikples long kanu na kisim wara. Ol man i save wokim gaden; ol i save kamapim yaka (yucca) na kain kain prut long gaden. Gaden bilong ol i stap long bikples. Tasol nambawan wok bilong ol em wok bilong kisim pis.
Autim Tok long Ol Kuna
Orait, nau yumi ken i go autim tok. Mi go wantaim Rogelio. Mi mekim tok Spen na Rogelio i tanim long tok Kuna. Meri bilong mi i wok wantaim Ramón o Julio. Ol Kuna i singautim mipela i go insait long haus bilong ol na givim kofi long mipela. Bihain ol i givim kap wara long mipela long klinim maus. Bihain mipela inap autim tok long ol. Mipela i go long 10-pela haus, na olgeta ol i laik givim kofi long mipela! Tasol mipela i no inap dring, olsem na mipela tokim ol: ‘Tenkyu tru long gutpela pasin yupela i mekim long mipela, tasol mipela i no inap moa.’
Ol i laik save long mipela. Ol i laik save mipela bilong wanem ples, mipela i marit o nogat, mipela i gat pikinini o nogat. Mi tokim ol mi bilong Jemani. Tokim ol pinis na nau ol i kisim ol pikinini meri bilong ol i kam, em pikinini i bikpela pinis inap long em i marit. Tasol mi tokim ol, mi marit pinis. Taim mi tokim ol mi wantaim meri bilong mi mitupela i no gat pikinini, ol i sori tru long mipela na ol i laik givim bebi long mipela bambai mipela i gat pikinini! Mi tenkyu long ol na tokim ol, mipela no inap kisim.
Mipela i amamas tru long i go lukim ol dispela manmeri. Mipela tokim ol long kisim sampela buk bilong Baibel long tok Spen i stori long Paradais bai kamap long graun. Bihain liklik, planti ol i kam bung na ol i laik kisim buk bilong ol.
Taim mipela i go bek lukim sampela man long wanpela ailan, wanpela man i kam askim mipela long helpim em long lainim tok bilong Baibel. Mipela i amamas long helpim em. Long sampela ailan, hetman i no orait long mipela i autim tok long ol manmeri. Tasol sampela ol i kam tokim mipela ol i laik kisim Baibel o sampela buk bilong Baibel na mipela inap autim tok long ol. Planti manmeri long ol dispela ailan, nau ol i laikim tok bilong Baibel.
Apinun nau na yumi mas i go long ailan Nurtupo, em ples bilong Ramón na Rogelio na Julio. Si i sakim bot isi isi na mi wantaim meri bilong mi, Nora, mitupela i tingim ol gutpela samting i bin painim mipela taim mipela i mekim wok bilong God. Mipela amamas long autim tok i tru bilong Baibel bambai “ol ailan” tu i ken belgut na amamas.—Sam 97:1.